Ìriọọn̄ Ubọk Ìgban̄ Utọn̄

1-2. (a) Ike owa ke Jioba okikpọ chieen̄ me lek ufiak emen ekwukwu ebi eyi kan̄ me chereyi? (Okwa Itọn̄ 23:​1, 2, 5) (b) Keke ke eji ebekween̄ ofolek nkween̄mkpọ ntitiin̄ me ibot usem keyi?

ME CHEREYI, Jioba ikisan̄a owuwa inorie emen ekwukwu isibi inyi eji. Eji mekọt ichieek me lek inu yi Debit otumube: ‘Jioba, owu okikpukpo emi kubọk ekikpukpo arọọn̄; inu geege ìkabonan emi.’​—Fuk Okwa Itọn̄ 23:​1, 2, 5.

² Oniin̄ ge Jioba okijeen̄ eji mkpọ ire me nkween̄mkpọ ntitiin̄. Me nkween̄mkpọ chi, eji mikinọ mkpọ echi eji ewuukbe lek ikween̄. Ikup ufiak ibe eji ekpọk ekekween̄ inu chi ikerere ibe ke eji miwuuk lek “iriọọn̄ ema iraka, mè ikeke inye me emen atikọ” eji ekaan̄be. (2 Pita 1:12) Ire, esikikpa mkpọ owuukbe lek inọ owuwa mgbọ me nkween̄mkpọ ntitiin̄, ire ikekiyọt owu me lek igbagban̄ utọn̄ ni? Me ibot usem yi, eji mekpa mkpọ obokọt itap ubọk inyi eji ekọt ekegban̄ utọn̄ ejaan̄ me nkween̄mkpọ ntitiin̄. Eji mekween̄ mkpọ orọrọ ikupbe ufiak ibe eji ekeriọọn̄ ubọk egban̄ utọn̄ me nkween̄mkpọ ntitiin̄. Eji mekween̄ si ubọk ebi ikinyi usem me nkween̄mkpọ ntitiin̄ ebesa itap ubọk irọ inyi ebi ene ekegban̄ utọn̄ me lek mkpọ ema ekitumu. Ire, kè eji edasi eweek ufọọk-otu enyi idodo yi: ‘Ire ekene okichubọk ijeen̄ eji mkpọ me nkween̄mkpọ ntitiin̄?’

KAWUUK IBE KE IRE JIOBA OKIJEEN̄ EJI MKPỌ ME NKWEEN̄MKPỌ NTITIIN̄

3. Ike owa ke Jioba okitumu ikọ inyi eji, ike owa si ke ebi usun̄ kan̄ ekisa Baibul irọ mkpọ me mgbọ ema ekijeen̄ mkpọ?

³ Jioba ikisa Usem kan̄ Baibul itumu ikọ inyi eji. (2 Tim 3:​16, 17) Jisọs igobo eyi itet ijaan. Isa Usem Awaji irọ mkpọ ijaan̄ ire lek ebi ikigban̄ ọmọ edobe ibe: “Ìre ene yi ìjeje iriọọn̄ inu ikeyi me ere ìkasisi ìkween̄ inu geege?” (Jọn 7:15) Ebi isisiki lek mè iweek ikwekween̄ mkpọ ofolek Jioba mibele ejit me mgbọ Jisọs okikpa Usem Awaji iwele inyi ema. Ebi eyi Karais me adasi ukot kubọk Pọọlu mè Apọlọs migọọk akpat ukot Jisọs si me ikekisa usem Awaji itap ubọk inyi ebi ene egobo etet mkpọ Jioba oweekbe me ubọk kiban̄. (Ikwaan̄ 17:​2, 3; 18:​24, 28) Eji miriọọn̄ ibe ke mkpọ echi okup me jw.org, kubọk esese esese ibot usem, jw broadcasting, fidio mè ofifi ofifi inu si iyaka imaan̄ me lek Baibul. Adasi mgbọ owuwa ene esibe nkween̄mkpọ ntitiin̄, mkpọ ema etababe iman̄ me lek mè ima ire ubọk eji ekisa Baibul irọ mkpọ. Ebi ikakaan̄ mkpọ nrọ me nkween̄mkpọ mikisa Baibul ijeen̄ mkpọ. Ema kpekikpọkpọk ifuk Baibul gaalek, mikitap ubọk inyi otutuuk ene ekọt egobo etet mè eriọọn̄ ubọk ebetap mkpọ ekween̄be me ikwaan̄.​—Luk 24:32.

4. Keke ke usem “inọnọ” mè “igbagban̄” osibi?

⁴ Usem “inọnọ” mè “igbagban̄” ike esabe irọ mkpọ me Baibul mokọt isibi isisiki ibot inyi ene. Eji esikifuk Baibul me nkween̄mkpọ ntitiin̄, ikikup kubọk Jioba okitumu ikọ inyi eji. Eji esigobo itet mkpọ Jioba okiweek ibe eji erọ mè mkpọ orọrọ ikiweek ibe eji erọ ikeya, morọ ibe ifet inyi eji ikọkọt ikisiki ibot inyi ọmọ. Eji mekọt ichieek ijaan̄ ibe ke Jioba ikibele ejit me mgbọ eji ekiriọọn̄ ubọk igban̄ utọn̄ me nkween̄mkpọ ntitiin̄ mè ikisa mkpọ eji ekween̄be irọ mkpọ me ugwem.​—Urọk 27:11.

KEKE ORỌ IKUPBE UFIAK IBE EJI EKEGBAN̄ UTỌN̄ EJAAN̄ ME NKWEEN̄MKPỌ NTITIIN̄?

5. Keke ke eji ekirọ bak me lek ima eji ekaan̄be me lek Jioba? (Jọn 4:​23, 24; 1 Jọn 5:3)

⁵ Eji ekigban̄ mkpọ ekitumu me nkween̄mkpọ bak me lek eji emabe Jioba. (Matiyu 22:37) Ike eji ekikween̄ mkpọ ofolek Jioba, ikeya ke ima eji ekaan̄be me lek kan̄ obokimin igbaalek. Ima ya okirọ ibe eji ekegban̄ utọn̄ me lek kan̄, ekesiki ibot enyi ọmọ, mè eketọbọ ebum enyi ọmọ me oniin̄ eyi ikpabe me Usem kan̄.​—Fuk Jọn 4:​23, 24; 1 Jọn 5:3.

6. Me nkween̄mkpọ ntitiin̄, keke ke eji ekikween̄ ofolek itatap ubọk inyi ebi ofifi ife?

⁶ Eji ekigban̄ utọn̄ me nkween̄mkpọ ntitiin̄ bak me lek eji mima ebi ene. (Matiyu 22:39) Me nkween̄mkpọ ntitiin̄, Jioba ikijeen̄ eji ubọk eji ebesa ikitap ubọk inyi ebi eyi Karais ogbo kiji mè ebi kperọriọọn̄ omọ. Kubọk inu njeen̄, broshọ Ma Ebi Ene​—Rọ Ema Ebi Udun̄ Kè Karais ijeen̄ eji ubọk eji ebekijeen̄ ata eru me mgbọ eji ekigọọk ebi ene ikpa usem. Ire ikiyọt owu me lek ibebene ukpatu melek ene ni? Ire ikeya, riọọn̄ ubọk gban̄ utọn̄ me mgbọ ebi bọn ute ekirom orirom mè ikijeen̄ ubọk ebekọt irọ eyi ijaan̄ me nkween̄mkpọ etete nde.

7. Keke orọ ikupbe ufiak ibe eji ekesiki ibot enyi Jioba?

⁷ Eji ekigban̄ utọn̄ me nkween̄mkpọ ntitiin̄ bak me lek eji mima ugwem. Ike Jioba otumube inyi ebi usun̄ kan̄ me ukot ikaan̄, ire eji iweek ikekibele ejit me ugwem mè iluk ire mgbọ geelek, eji kpelọlọ isisiki ibot inyi ọmọ. (Ikan 32:​44-47) Eji esikigban̄ utọn̄ me nkween̄mkpọ ntitiin̄, eji mekaan̄ ntap-efuuk-me-owot obotap ubọk inyi eji ekọt ekeme ufialek geelek ike eji ekikup ikpọ aya inyọn̄ okinu. (Rom 8:25) Ikekigban̄ utọn̄ me lek inu Jioba okitumu mgbọ keyi ikup ufiak bak me lek eji ekiluk me mgburudun̄ mgbọ oweweek ibe eji ekup me ugwọk chieen̄.​—Matiyu 24:​42-44; Ichi 1:3.

UBỌK EJI EBESA IKITAP UBỌK INYI EBI OFIFI IFE EKỌT EKEGBAN̄ UTỌN̄ ME NKWEEN̄MKPỌ NTITIIN̄

8. Keke orọ igbebe ibe ebi bọn ute ebi ikinyi usem ekup enye ekerọ ibe ubọk ijeen̄-inu kiban̄ ikinwọn igbaalek?

⁸ Igbe ibe ebi bọn ute irieen̄ ebi ikijeen̄ mkpọ me inyọn̄ obubot, ogakge ebi ikinyi usem isi ogbo oyet, ekup enye ekerọ ibe ubọk ijeen̄-inu kiban̄ ikinwọn. Usem eneen̄be mè inyi ijaan̄ mokọt itaba ebi ene inu me lek atikọ mè itap ubọk irọ mè ebi eyi Karais ogbo kiji ekup enye me atikọ. Ebi ikaan̄ mkpọ irọrọ me nkween̄mkpọ ekawuuk ibe ke mkpọ nrọ kiban̄ mokọt ikaan̄ ata mgbaan̄ me lek ebi ofifi ife me oniin̄ eyi ema ekakeekge. Eya orọ, ire okaan̄ mkpọ irọrọ me nkween̄mkpọ ntitiin̄, keek-nu ubọk nteme enyibe me ibot usem yi obosa itap ubọk inyi owu ore ata ogwu ijejeen̄. Ikerere ibe ke nteme chi imalek ikaan̄ mgbaan̄ me lek ebi ikinyi usem isi ogbo oyet, ebi geelek ikakaan̄ mkpọ irọrọ me nkween̄mkpọ ntitiin̄ mekọt ikaan̄ oruru inan̄a me lek si.​—2 Tim 4:2; Taitus 1:9.

9. Keke ke obokọt irọ inyi usem kwun̄ ifet igogobo itet?

⁹ Neen̄ esese esese inu obotumu jaan̄. Ike okinyi usem, monwọn ibe ebi ikigban̄ owu egobo etet inu okitumu mè ubọk nkeek ge osabe ikaan̄ mgbaan̄ me lek ofifi nkeek. Ebi ene mekọt ibene ikisan̄a ejit me lek inu okitumu mè ire okaneen̄ usem kwun̄ ijaan̄ mè iyaka ire, ire inu okitumu iyọt igogobo itet. Eya orọ, keke obokọt itap ubọk inyi owu? (1) Osibene ikinyi usem kwun̄, tap ubọk nyi ebi ikigban̄ owu ibe eriọọn̄ okpan okpan mkpọ okiweek itutumu me usem ya. (2) Bene kitumu okpan okpan mkpọ cha ge ge. Osikpa ge isan̄a, rọ inyi isibi utoon̄ ibe ke okpa mkpọ ofolek isan̄a sabum obene okokpa eyi ogọgọọk. (3) Osikikana usem kwun̄ igwook, yaka kpọk tumu okpan okpan inu cha me mgbidim.

10. Keke orọ ikupbe ufiak ibe oma inu obojeen̄?

¹⁰ Ma inu okiweek itutumu mkpọ ofolek. Ire oma mkpọ, omosa me uyok uyok ejit itumu mkpọ ya, ebi ikigban̄ owu si meriọọn̄ ibe ke oma mkpọ okijeen̄ ya. (Urọk 2:​4, 5; Ikwaan̄ 4:20) Inyi okọt oma usem obonyi, gwu nkeek kom me lek nkeek esan̄abe isibi me emen usem ya mè ere Baibul obosa irọ mkpọ. Gwun ute enerieen̄ ge oninin̄ ugane onan̄a me United States ikikeek usem ge inọbe me mgbọ ikupbe ijija. Itumu ibe: “Nkeek ubọk ogwu onyinyi usem ya osabe iteme eji ibe ekegwu nkeek ekom me lek ere Baibul geelek eji efukbe. Ikpa iwele ubọk eji ebekirọ ikeya mè itumu usem me oniin̄ okijeen̄ ibe ke ọmọ ichieek ijaan̄ me lek mkpọ ikitumu. Usem ya ikup ufiak inyi emi enenen mije, ijeen̄ emi ubọk mbakifuk Baibul mè ubọk mbakirọ inyi mgbaan̄je n̄a melek Jioba ikinye.”

11. Ike okinyi usem kwun̄, keke orọ inwọnbe ibe otumu esese esese oniin̄ ebekọt itap mkpọ ekikween̄ me ikwaan̄? (1 Timọti 4:​13-16)

¹¹ Keek mkpọ ofolek ufiak ebi ikigban̄ owu mè gon aban me lek nkeek obokọt itap ubọk inyi ema. Kpan̄asi obokitumu usem ogọgọbọ owuwa mkpọ, sa ere Baibul obokọt itap efuuk me owot ebi ikigban̄ owu rọ mkpọ mè tumu inu obotap ubọk inyi ema emun̄ esese esese oniin̄ ema ebekọt isa inu ema ekikween̄ irọ mkpọ me ugwem kiban̄. Kubọk inu njeen̄, ogwu otuchieen̄ Pọọlu inyi Timọti nteme obotap ubọk inyi ọmọ ikọt itet ichechieek kan̄ inye me mgbọ ikupbe me Efesọs. (Fuk Timọti Eyi Adasi 4:​13-16.) Keek mkpọ ofolek ufiak ebi ikigban̄ owu mè tap ubọk nyi ema eriọọn̄ esese esese oniin̄ ebekọt isa mkpọ ema ekween̄be me usem kwun̄ irọ mkpọ me ugwem kiban̄.

12. Keke orọ ikupbe ufiak ibe otumu usem onan̄a me ejit kwun̄ ike okinyi usem kwun̄?

¹² Ike okineen̄ usem obonyi, kitumu sibi owuwa mgbọ inyi omokọt inyi inan̄a me ejit kwun̄. Osikinyi usem kwun̄ kubọk okikpa usem melek ene kpan̄asi ikekige usem geelek obotumu mè ikifuk usem cha isibi, mofet inyi ebi ikigban̄ owu ibe eriọọn̄ ubọk eche ulọk kiban̄ enyi owu mè egobo etet inu okitumu. Broshọ Tap Lek me Ikekifuk mè Ikijeen̄ Mkpọ itumu ibe: “Sa ubọk okisa itumu usem tumu, ike mokọtbe ijeen̄ nkeek kwun̄ me lek ibot usem ya melek ebi ikigban̄ owu utọn̄ me lek.” Ike okitumu usem inan̄a me ejit kwun̄, ikeya ke ebi ikigban̄ owu ebekinwọọn̄ inu okitumu, ikaan̄ ulọk me lek inu okijeen̄ mè iweek itatap inu cha ema ekikween̄ me ikwaan̄.

13. Keke orọ ikupbe ufiak ibe ebi ikijeen̄ mkpọ me ntitiin̄ edo ntap-ubọk ebi irọriọọn̄ ubọk ekijeen̄ mkpọ? (Kpọ si ogugo.)

¹³ Be mè gwun̄ ute ge ogwu onyinyi usem me owuwa acha itap ubọk inyi owu. Ike owa ke obokọt irọ eyi? Sabum usen obonyi usem kwun̄, omokọt ijeen̄ gwun̄ ute ya mkpọ oneen̄be itutumu. Tumu nyi ọmọ ibe igban̄ ike okinyi usem ya me isi kan̄ mè itumu inyi owu ere oborọ ijaan̄ igbaalek ufuna okọt onyi usem ya me oniin̄ onwọnwọn. Ire inyi owu nteme ofolek ubọk obosa inyi usem ya, bọkọ tap mè sa rọ mkpọ. (Urọk 1:5) Usini mgbọ, okporiọọn̄ ibe ke inu okitumu ikariọọn̄ ubọk isibi utoon̄. Ire, gwun̄ ute ya mokọt itumu inyi owu mkpọ oborọ inyi inu obotumu ifet igogobo itet mè ire si inu ebetap me ikwaan̄. Eji ekitap efuuk irere ebi ikinyi usem mè ikijeen̄ mkpọ ijaan̄ inyi eji ekọt eketap ubọk enyi ebi ofifi ife ekaan̄ oruru enan̄a me lek inu unye otu ewe okup me Usem Awaji.

UBỌK OBOKỌT IKIGBAN̄ UTỌN̄ IJAAN̄

14. Keke orọ igbebe ibe eji ekaan̄ mbet lek eru ogwu ogege ikpa Okwa Itọn̄ 119 okaan̄be? (Okwa Itọn̄ 119:​24, 111, 167)

¹⁴ Eji mekigban̄ utọn̄ ijaan̄ ire eji ekimọnọ nyaka-nkeek kè Jioba kubọk inu okukup ufiak enenen. Eji miweek nyaka-nkeek Jioba okinyi eji inyi eji ekọt ekeme ufialek eji ekichichini me inyọn̄ keyi eyi ‘ufialek òmimin enenen okupbe.’ (2 Tim 3:1) Ire ikikup me lek kiji usini mgbọ kubọk eji ekpọkpọk ikinọ ikọ yaage, eji esa mè egwu nkeek ekom me lek eru ogwu ogege ikpa Okwa Itọn̄ 119 okaan̄be.​—Fuk Okwa Itọn̄ 119:​24, 111, 167.

15. Keke obokọt itap ubọk inyi eji ekemun̄ mkpọ eji ekikween̄ me ntitiin̄ kubọk inyinyi onan̄a me ubọk Jioba?

¹⁵ Igbe ibe eji ekup enye ekemun̄ ijejeen̄ eji ekibọkọ me nkween̄mkpọ ntitiin̄ kubọk inyinyi onan̄a me ubọk Jioba. Eji mekọt ikween̄ mkpọ inan̄a me lek inu orọrọ ebi Ijeren me emen èwè me mgbọ Jioba onyibe ema mana. (Isis 16:​15, 31) Kpunu cheche ibe ke ebi Ijeren midasi inwọọn̄ mana ya mije, ire Jioba onyi ema, itop irerie, isun̄ ema me ugwem si. Ire, ike mgbọ okije, irerie inorie ya usen geelek obebene ikita usini ene efuuk me owot. (Ifuk 21:5) Keke ke eji ekween̄ me lek eyi? Eji ekakimun̄ inorie emen ekwukwu kubọk chieen̄ inorie yaage ekpọkpọk ikisan̄a isibi. Kpan̄asi ikeya, eji ekemun̄ kubọk inu okukup me unye otu ewe eyi Jioba okisan̄a isibi inyi eji. Eji ekawuuk ibe ke usun̄ orọriọọn̄ inu mè igbe utoon̄-ejit ikirọriọọn̄ ubọk igobo mkpọ ekijeen̄ eji me nkween̄mkpọ ntitiin̄. Eji ekawuuk si ibe ke mkpọ eji ekikween̄ mokọt itap ubọk inyi eji ekọt ekerọ ata ntumu-mfieek mè eluk ere mgbọ geelek si.​—Urọk 3:​13, 16-18; Jọn 17:3.

16. Keke okitap ubọk inyi usini ebi usun̄ Jioba ikukup ifiin̄ me ntitiin̄ ibe ekup enye ekegban̄ utọn̄ me nkween̄mkpọ ntitiin̄? (Kpọ si okop obe “Inu Obotap Ubọk Inyi Owu Okogban̄ Utọn̄ Ojaan̄.”)

¹⁶ Eji mekọt ire ebi ikigban̄ utọn̄ ijaan̄ me nkween̄mkpọ ire eji igọọk nteme chi. Taba iman̄ me lek mkpọ otatap ubọk inyi usini ebi ikitọbọ ebum inyi Jioba me ujọn̄ọ mgbọ ibe ekup enye ekegban̄ utọn̄ ejaan̄ me nkween̄mkpọ. Ashley, ogwu okitọbọ ebum inyi Jioba me mkpọ oraraka akọp acha ita itumu ibe: “Ikwekween̄ mkpọ ebetumu mkpọ ofolek me nkweenmkpọ ikirọ ibe ikekigban̄ mkpọ ekitumu ifet inyi emi. Ire nkaneen̄ lek, ikiyọt emi me lek inyinyi ufọọk-otu, makọt ibene ikikeek ofifi mkpọ si kpan̄asi mbato nkeek n̄a me lek inu ekijeen̄.” József, ogwu okitọbọ ebum inyi Jioba me akọp acha go mè iba itumu ibe “Nkinwọọn̄ ikekigban̄ usem mwuukbe lek inọ owuwa mgbọ me nkween̄mkpọ ntitiin̄. Nkikween̄ ayaya mkpọ ofolek ibot usem nriọọn̄be ijaan̄ mije, ekikpa mkpọ ofolek me esese esese oniin̄. Ire ogwu okinyi usem ya ikamalek iriọọn̄ ubọk ekinyi usem ijaan̄, nkito chieen̄ me lek etip ikisan̄a isibi me emen Usem Awaji kpan̄asi ubọk ikisa inyi usem ya.”

17. Keke ke obokọt irọ inyi okogban̄ utọn̄ ojaan̄ me nkween̄mkpọ ntitiin̄? (Kpọ si ogugo.)

¹⁷ Kpọ-nu usini inu obokọt irọ igbaalek echi obotap ubọk inyi owu okogban̄ utọn̄ ojaan̄. (1) Kamalek irie inorie iwa sabum osi nkween̄mkpọ ntitiin̄ inyi okasi ilaak ilaak. (2) Re uwu nkween̄mkpọ kinyi me ata mgbọ mè kweek irek sabum nkween̄mkpọ onobene. (3) Mun̄ jaan̄ ibe ke fun kwun̄ ikpobosisaak owu ike nkween̄mkpọ okije inyi isi. (4) Kikeek mkpọ ofolek inu ogwu obonyi usem obotumu (5) Kikpọ ogwu okinyi usem ike ikitumu ikọ. (6) Ge usini mkpọ tap me ikpa mè iyaka ire gwook ogugo ofefet obosa ikeek inu okukup ufiak. (7) Sa inyi okeek mkpọ ofolek okpan okpan ere Baibul ekifuk mè kimun̄ mgbaan̄ ekaan̄be me lek ge ge. (8) Do lek kwun̄, ‘Ike owa ke mbakọt isa inu yi ekijeen̄ itap ubọk inyi ene ge me ntitiin̄ mè iyaka ire me uko?’ (9) Me chinichini Sekut mè iyaka ire chinichini ilile, kpọ ibot usem usen ya, usem echi ebenyi, mè okpan okpan ere Baibul ebefuk me usem echi ebenyi. (10) Nen̄e ejit kwun̄ sun̄ sa me ikukup dii mè irọriọọn̄ ubọk ikigban̄ utọn̄ me lek okwa ekifit esibebene orirọ ya.

KWEEK NYE KIGBAN̄ UTỌN̄ ME LEK JIOBA

18. Keke orọ igbebe ibe eji ekup enye ekegban̄ utọn̄ me nkween̄mkpọ ntitiin̄?

¹⁸ Igbe ibe eji ekup enye ekegban̄ utọn̄ me nkween̄mkpọ ntitiin̄ mije, eji esikirọ ikeya, eji ekitele ibe Jioba ikisa eji “ije me oniin̄ eyi ata irọrọ.” (Itọn̄ 23:3; 31:3) Igbe si ibe Jioba ikiban eji inyi eji ekup enye ekerọ inu otatat. Eya orọ, ‘riọọn̄ ubọk kigban̄ utọn̄’ mè kitap inu okikween̄ me nkween̄mkpọ ntitiin̄ me ikwaan̄. (Luk 8:18) Ebi ikigban̄ utọn̄ me lek Jioba mekaan̄ ubelejit mgbọ keyi mè iluk ugwem ire mgbọ geelek me mgbọ okup me isi.​—Itọn̄ 119:​2, 14.