Bọn Ìre Ìrot Jioba Okinyi Ene

KEKE okinu owu me nkeek osinọ usem yi “ìrot”? Omokọt ikeek inu ofolek ikpoko, inu nkaan̄ mè iyaka ire, ìrot ene ge omama owu me ototun̄ ukan̄ kwun̄ ojuukbe itele inyi owu. Eyi isibi ibe ke ìrot ire inu ochuchubọk inye otu ewe.

Baibul igwen nsabọn ‘ìrot Jioba okinyi ene.’ (Itọn̄ 127:3) Me atikọ, ute mè uga ebi eyi Karais ekimun̄ nsabọn kiban̄ kubọk ire uche unye otu ewe onan̄a me ubọk Nte kiban̄ okup me emen inyọn̄. Ema ekirọ otutuuk inu ema ebekọt irọ isasa imun̄ ibe ke nsabọn kiban̄ mikaan̄ inu ema eweekbe isasa iluk ugwem, mè ikaan̄ si unye-lek, ubelejit, mè ata mgbaan̄je melek Jioba.

Ire mkpọ ufieejit ibe ke usini ebi uga mè ute me chereyi kpekimun̄ nsabọn kiban̄ kubọk ire uche onan̄a me ubọk Awaji. (Asaya 49:15; 2 Tim 3:1-3) Ebi ofifi ene michubọk iweek ikpọkpọ chieen̄ me lek bọn kiban̄, ire, mikaan̄ ogbogbo rumurumun̄ ema ekichichini. Keke ore usini rumurumun̄ echi okirọ ibe ikọkọt ikpọ chieen̄ me lek nsabọn iyọt me lek ebi irere uga mè ute? Keke ke Jioba oweek me ubọk ebi irere uga mè ute? Keke ke ebi irere uga mè ute ebekọt irọ isasa imun̄ ibe ke ema mikpukpo nsabọn kiban̄ ijaan̄?

RUMURUMUN̄

Ukeme okinan̄a me ubọk ebi ama mè ebi ototun̄ ukan̄. Me usini ere me linyọn̄ yi, ekinyi ebi uga mè ute ebi ikakaan̄ owuwa nsabọn ulibi me emen ama. Eya orọ, ebi ototun̄ ukan̄ mè iyaka ire ebi mbuuruk mikibieen̄ ebi irere olom mè nwa ibe ekaan̄ ogbogbo nsabọn, ikerere ibe ke ema kpebekọt ikpọ chieen̄ ijaan̄ me lek bọn cha.
Sasaak ofolek mgbọ okup me isi. Me usini ama ere asasa nsabọn ekikwaan̄ bak lek kpunuge ata uwu ugwun̄, uraafiọọn̄ mè orukan̄, usini olom mè nwa mikikaan̄ ogbogbo nsabọn inyi ukpọk lek inen mè inen meluk ugwem inin̄ ugane. Usini ebi olom mè nwa si ekikaan̄ ogbogbo nsabọn inyi ekọt ekaan̄ ebi ibekpọ chieen̄ me lek kiban̄ me acha ukan. Eyi ikimalek irọ me ido ere ebi mkpulu kpekitap ubọk inyi ebi ininin̄ ugane.
Ikiyọt ikpukput ininin̄ owot. Me usini ere, usini olom mè nwa kpemalek ikaan̄ owuwa ugwun̄ ema ebekọt ilep isa ikput ininin̄ owot. Ire, me ofifi agan̄, ugwun̄ cha iwa, ire, owuwa kpere atata. Eyi ikirọ inyi ebi irere olom mè nwa eketet ukpook me lek unan ugwun̄ cha obotap me lek kiban̄. Ire, usini ene kpekọt ilep ugwun̄ cha bak me lek otu ewe kiban̄.a

KEKE KE JIOBA OWEEK ME UBỌK EBI IRERE UTE MÈ UGA?

Ebi ototun̄ ukan̄ ge ikinwọọn̄ lek kiban̄. Ute ikiriọọn̄ igban̄ gwun̄ enenwaan̄ ijija kiban̄ ike ikikpa nkeek kan̄ inyi ọmọ mè mgbọ uga okifit ifit melek gwun̄ enerieen̄ kiban̄. — Kikaan̄ mgbọ nyi nsabọn kwun̄ ge ge

Kisan̄a sibi inu okukup ufiak nyi nsabọn kwun̄. Jioba inyi ebi ute mè uga ikwaan̄ inyinyi nsabọn kiban̄ inu ema eweekbe me irek anam akpalek. Iweek si ibe ebi ute mè uga esi ikwaan̄ inyi ekọt ekenyi nsabọn kiban̄ inorie, ofọnti, mè ere iluluk. Jioba iweek si ibe ebi uga mè ute ekejeen̄ bọn kiban̄ inu. Eya orọ, ebi eyi Karais irere uga mè ute kpechieek ibe nsabọn kiban̄ esi eluk me uwu ikpa ema gaalek. Kpan̄asi ikeya, ema memun̄ ibe ke nsabọn kiban migọọk ema iluk me ere yaage ike ema ekisi uwu ikpa mege memin inin̄ ene, inyi ekọt ekpọ chieen̄ me lek nsabọn kiban̄, ebem ema mè ejeen̄ ema ima. Eyi ikasibi ibe ke Jioba iweek ibe ebi uga mè ute ere ebi ibọbọọn̄ ubọọn̄. Eyi ikpọk mbum me lek ebi igobobe ibe ere nte mè nga kè Jisọs, Jioba igobo ebi ugbọọn̄, irọriọọn̄ isi ikwaan̄ ibe ekpọ chieen̄ me lek Gwun̄ kan̄.—Mat 13:55, 56; Luk 2:24.

Onineen̄ Baibul: “Ene geelek ikakpọge chieen̄ me lek ebi uwu kiban̄, ògak ge ebi ototun̄ ukan̄ kan̄ gaalek, ene ya îjit ichechieek îchieekbe me lek kè Jisọs Karais. Ene ya si îfieek igak ogwu ikachieekge me lek Awaji.”—1 Tim 5:8.

Jioba iriọọn̄ ibe ke ebi irere uga mè ute meweek ntap-ubọk ike ema ekinin̄ ugane. Me atikọ, oniin̄ ge nsabọn ebemin nte kiban̄ mè nga kiban̄ ire ineneen̄ ubọk ema ebesa ikpọ chieen̄ me lek kiban̄ me acha ukan. (Isis 20:12; 1 Tim 5:4) Ire, Jioba ikibele ejit me mgbọ ebi uga mè ute ekimalek ikeek ubọk ema ebesa ikpọ chieen̄ me lek nsabọn kiban̄ kpan̄asi ikekikeek ubọk nsabọn kiban̄ ebesa ikpọ ema chieen̄ me lek.—2 Kọr 12:14.

Kijeen̄ nsabọn kwun̄ mkpọ ofolek Jioba. Ebi irere ute mè uga mikaan̄ si ikwaan̄ itatap ubọk inyi nsabọn kiban̄ ema Jioba mè ijejeen̄ ema ubọk ebesa ikitọbọ ebum inyi ọmọ. Isa inyi Jioba, inu yi okup ufiak ichit me lek otutuuk inu ebi ute mè uga ebekọt ijeen̄ nsabọn kiban̄.—Ikan 6:6, 7.

Onineen̄ Baibul: ‘Ìkijeen̄ [nsabọn kinyi] inu, mè ìkiteme ema nteme eyi Jioba.’—Efes 6:4.

JIOBA IWEEK ITATAP UBỌK INYI OWU

Olom mè nwa ge ikigbaan̄ ikpa ukpatu me uwu kiban̄. Baibul echilibe omaan̄ me ikasi okup me isi kiban̄. — Igbaan̄ ikpa me ata mgbọ otu ifuk nsabọn enyi ebekaan̄

Keek jaan̄ otu ifuk nsabọn obokaan̄. Ire enyi ekitọt ikakaan̄ nsabọn, iriọọn̄ ubọk ikeek mkpọ ofolek irek kinyi ijaan̄. Kubọk inu njeen̄, ire enyi mikaan̄ ikpoko enyi ebesa ilep inorie mè ofọnti inyi owuwa nsabọn ni? Ire enyi mekọt ikpe ikpoko uwu ikpa kiban̄ ni? Ire enyi kpekaan̄, igbaan̄ ikpa kubọk olom mè nwa mè itumu ifieek otu ifuk nsabọn enyi ebekaan̄. Jioba igobo itet ibe ke ikare otutuuk mgbọ ke inu obokibọkọ irek ike eji etọtbe. (Etip 9:11) Ire, ọmọ mogbana efuuk enyi ekitap irere mbet lek uga mè ute iweekbe ibe enyi ere.

Onineen̄ Baibul: “Otitọt ebi ìkisiki lek irọ ikwaan̄ okisibi oruru, ire, eyi ebi gbamgbam ìkisa ugbọọn̄ inu.”—Urọk 21:5.

“Ire ene geelek me etete kinyi ibonama ubene ubene uwu inyọn̄, sabum ene ya obobene inama uwu ya, ìbodadasi isiki ikweek ifuk otu ifuk ikpoko uwu ya oboben, mè ikpọ-nu mè ìre ọmọ îkaan̄ ikpoko iso isasa inama uwu ya isan̄a, mè ìre ọmọ ìkakaan̄.”—Luk 14:28.

Kè ntọbọ-ebum Jioba ire adasi inu me ototun̄ ukan̄ kwun̄. Mun̄ jaan̄ ibe ke itọtọbọ ebum inyi Jioba ore inu okukup ufiak ichit me ototun̄ ukan̄ kwun̄. Ire okaan̄ nsabọn, tumu fieek ijejeen̄ ema ge ge ibe ema Jioba. Tap ubọk nyi ema ibe ekeriọọn̄ ubọk egban̄ utọn̄ mè ekween̄ mkpọ me nkween̄mkpọ ntitiin̄. Mun̄ jaan̄ ibe ke enyi mikirọ nkween̄mkpọ ototun̄ ukan̄ nde geelek. Kijeen̄ nsabọn kwun̄ ubọk ebesa ikilook ata etip. Kabieen̄ ikwaan̄ kwun̄ kubọk ute mè iyaka ire uga isa inyi nsabọn kwun̄ ebi imimin mè iyaka ire usini ebi uwu kwun̄. Ikpukpukpo nsabọn ibe ema Jioba ikimọnọ mgbọ mè efuuk. Ire, omokibele ejit ike okimun̄ nsabọn kwun̄ ekitọbọ ebum inyi Jioba inan̄a me unwọọn̄.

Onineen̄ Baibul: “Inu òkibele emi ejit ichit ìre ikekinọ ibe ke nsabọn n̄a me emen ichechieek mêkiluk ugwem me emen atikọ eyi Awaji.”—3 Jọn 4.b

Toon̄ ejit me lek Jioba. Ire okitọt ibebene ikaan̄ bọn mè iyaka ire owuuk lek ikakaan̄, chieek jaan̄ ibe ke onineen̄ Jioba ikup ufiak igak orọmijọn̄, mè iyaka ire ubọk iluk ugwem me ama kwun̄.

Ogugo: 1. Ute mè uga ge ikekweek irek melek gwun̄ kiban̄ enerieen̄ ike nkween̄mkpọ ntitiin̄ ge okije inyi isi. Gwun̄ ya ibene ubọk kan̄ ibonyi ufọọk-otu. 2. Ebi ototun̄ ukan̄ ge igbagbaan̄ isibi uko. Ute ikigọọk gwun̄ enenwaan̄ ijija kiban̄ ikije mè mgbọ uga okigọọk gwun̄ enerieen̄ kiban̄ igbaan̄ ije. — Ijejeen̄ nsabọn ubọk ebesa ikitọbọ ebum inyi Jioba mè ikirọ mkpọ obokibele ọmọ ejit ikimọnọ mgbọ mè efuuk

Ire otumu ifieek ibe ke okpokaan̄ nsabọn iwa, toon̄ ejit me lek Jioba ibe ke ọmọ mokpọ owu chieen̄ me lek me acha ukan. Me ekakpọge chieen̄ me lek mkpọ ebi ene ekikeek mè ikitumu, kakaan̄ nsabọn bak me lek okiweek ikakaan̄ ebi ibekpọ owu chieen̄ me lek me acha ukan. Kakaan̄ sasaak ofolek mgbọ obokan mije, Jioba ichieek use ibe ke ọmọ mokpọ owu chieen̄ me lek, ikirọrọ use kan̄ iso si.—Jos 23:14.

Onineen̄ Baibul: ‘Sa otutuuk ejit kwun̄ toon̄ me lek Jioba; kasa ngobo-ntet eyi akpalek kwun̄ ìbieen̄ me lek. Riọọn̄ Jioba me oniin̄ kwun̄ geelek, ke ọmọ môrọ mè oniin̄ kwun̄ ije itat.’—Urọk 3:5, 6.

‘Mwuuk lek ire nsabọn; mgbọ keyi, nra ikan; ire, ǹkamun̄-nu Jioba ojitbe ogwu ata irọrọ itele, mè ìre itele ibe bọn ene ya ekebeek inorie.’—Itọn̄ 37:25.

“Eya orọ, ìdasi ìweek mkpulu eyi Awaji, mè irọrọ inu Awaji okiweek, ke Awaji mônyi enyi otutuuk inu chi geelek si igbaalek.”—Mat 6:33.

Nsabọn ire inyinyi okup me unye otu ewe eyi Jioba onyibe ebi irere uga mè ute. Kpolọlọ ibe ke Jioba ikibele ejit enenen isimun̄ ike uga mè ute ekiriọọn̄ ubọk ikpọ chieen̄ ijaan̄ me lek nsabọn kiban̄ ike ọmọ oweekbe! Ebi irere ute mè uga ekisa me ima ikikpọ chieen̄ me lek nsabọn kiban̄ me irek anam akpalek mè irek emen ekwukwu. Mkpọ Jioba oweek ibe ema erọ ikup ufiak igak ubọk ebi ene ekirọ mkpọ me ere ema elukbe. Eya orọ, ema mesa me ugbalachieen̄ itumu ifieek otu ifuk nsabọn ema ebekaan̄. Sa me irọrọ ikeya, ema memun̄ ijaan̄ ibe ke ema misan̄a isibi mkpọ nsabọn kiban̄ ge ge eweekbe, ema memun̄ ibe ke nsabọn kiban̄ ge ge mikikaan̄ ubelejit mè ire si ebi imama Jioba mè ikitọbọ ebum inyi ọmọ.

Ema Kpekaan̄ Ubọnọ-Lek Geege

Ire ebi irere uga mè ute mikibọkọ ukwook bak me lek ema etumube ifieek ibe ke ema kpekaan̄ bọn iwa ni? Owuwa uga mè ute ebi iluk me ere ugwem oyọtbe me linyọn̄ yi ekikeek mkpọ ofolek idodo yi. Taba iman̄ me lek mkpọ usini ebi ibot ototun̄ ukan̄ etumu ofolek ibot usem yi.

Ire ebi ene mibieen̄ owu ibe okaan̄ ototun̄ ukan̄ omimin ni?

“Iin̄, ikerere usini ene me emen ntitiin̄. Olom mè nwa ge etumu inyi eji ibe, ‘Keke orọ enyi ekaan̄be gwun̄ enerieen̄ ge gaalek? Me Africa, ire okaan̄ gwun̄ enerieen̄ ge, ikup kubọk okakaan̄ gwun̄ geege. Ire bọn ebirieen̄ iba ke okaan̄, ikup kubọk ge gaalek ke okaan̄.’ Ike mgbọ ojebe, eji ekakaan̄ gwun̄ enenwaan̄, orere, òso gwun̄ iba kiji. Ikerere me mgbọ ya si, owuwa ene ekikeek ibe ke eji mekaan̄ igbaalek.” Jeremias

Ire ugwem iyọt owu me lek bak lek okakaan̄ge owuwa nsabọn ni?

“In̄-in̄. Bak lek emi mè nwa n̄a egobobe ikakaan̄ ototun̄ ukan̄ ikaminge, eji mikimun̄ ibe ke eji ge ge mikaan̄ inu eji eweekbe isasa iluk ugwem mè ikaan̄ ichechieek onyenye me lek Jioba. Ekpukpo emi isibi me ototun̄ ukan̄ omimin, mmun̄ si ubọk isabe iyọt me lek nte n̄a mè nga n̄a ikọkọt isan̄a isibi mkpọ okukup ufiak isasa iluk ugwem mè iraria eji isi uwu ikpa.”—Jeremias

Ike owa ke ntumu-mfieek kinyi okup me lek nsabọn kinyi?

“Nsabọn kiji mikibele ejit bak lek ema kpekibọkọ mbet lek ukwook echi usini nsabọn ekibọkọ bak lek ema ewabe me uwu kiban̄, eyi orọrọ ibe nte kiban̄ mè nga kiban̄ ekakikọt ikpọ chieen̄ ijaan̄ me lek kiban̄.”—Filipe

“Nsabọn kiji mikibele ejit bak lek ema mikaan̄ mbem mè ima ogbegbe me ubọk kiji. Eji mikigwen bọn ute irieen̄ mè ibaan̄ imama Jioba mè ikijeen̄ ata akpat ukot inu me uwu kiji, ema metatap eji efuuk me owot irọrọ ikwaan̄ igbaalek inyi Jioba. Me chereyi, eji mikimun̄ ubọk nsabọn kiji ekigọọk akpat ukot kiban̄.”—Carlos

Ire okaan̄ oruru me lek ikakaan̄ sọntiik ototun̄ ukan̄ ni?

“Eji mikọt ikpọ chieen̄ ijaan̄ me lek ototun̄ ukan̄ kiji bak lek ntumu-mfieek kiji. Me mkpọ obet lek acha ita oraraka, nchep ikwaan̄ okinyi emi ata ikpoko. Ire, bak lek eji kpewa me ototun̄ ukan̄ kiji, eji kpeweek owuwa ikpoko isasa ikpọ chieen̄ me lek ufiak kiji. Eyi irọ ibe ifet ikọkọt ikaan̄ mkpọ eji eweekbe ikerere me mgbọ nkaan̄be ofifi ikwaan̄ eyi kpekikpe ikpoko iwa.”—Jeremias

“Bak lek eji kpekaan̄ ototun̄ ukan̄ omimin, eji mikọt ikpọ chieen̄ me lek ufiak anam akpalek mè irek emen ekwukwu nsabọn kiji. Eji mikọt ikọp uran̄ isi esese ere isi itap ubọk me ere ufiak ominbe. Eji mikọt ikpọ chieen̄ me lek ufiak nsabọn kiji ge ge si. Otutuuk kiban̄ ekitọbọ ebum inyi Jioba mè ikiweek esese oniin̄ ema ebesa irọ mkpọ igbaalek inyi ọmọ.”—Lenadi

Kpasi mkpọ ke oboma itutumu inyi ebi irere ute mè uga?

“Mmun̄ atikọ okup me ikpa Okwa Itọn̄ 34:10, eyi obe: ‘Ebi ìkinu me lek Jioba, kpunu ata inu geege òbonan ema.’ Jioba ikisasan̄a isibi inu geelek emi mè ebi ototun̄ ukan̄ n̄a eweekbe.”—Rafael

a Baibul ijeen̄ ibe ke ire olom mè nwa ebetumu ifieek otu ifuk nsabọn ema ebekaan̄ mè mgbọ ema ebebene ikaan̄ nsabọn. Ema si ebetumu ifieek mè ire mesa ugwun̄ ikput ininin̄ owot mè mbet lek ugwun̄ ema ebesa irọ ikeya. (Rom 14:4, 10-13) Isọkọ me lek si, olom mè nwa esiberọ mbet lek ntumu-mfieek keyi, ema ekeek inu okup me ikpa Ebi Kọrint Eyi Adasi 7:3-5.

b Nsabọn ekpabe mkpọ ofolek me agba ere Baibul yi ire usini ebi udun̄ kè Karais ebi Jọn ojeen̄be atikọ. Kubọk Jọn, ebi irere uga mè ute mikibele ejit ike ekimun̄ nsabọn kiban̄ ekitọbọ ebum inyi Jioba.