Idodo Usini Ene Edobe

Kpa mgbọ ke ebi ene ebekitumu ibe “Eji mîkaan̄ esuuk! Eji mîkaan̄ utelelek!”?

Ike eji ekween̄be me “Idodo Usini Ene Edobe” eyi egebe me emen Uwu Mbema me mgbọ ikafiin̄ge, sọnja mgbọ, Jioba motap “inu okup me nkeek kan̄” me emen ejit ‘anam okakaan̄ akọp iko,’ orere, otutuuk ebi mkpulu ikup me linyọn̄ yi. Morọ ibe ema ekana unye kiban̄ mè irek ubọọn̄ kiban̄ enyi “anam ukpook ge òkup araran̄” eyi okeke ichit chieen̄ United Nations. Baibul igwen si anam yi “inu ya ebotbe inyi adasi anam ukpook ya.” (Ichi 13:​14, 15; 17:​3, 16, 17) Anam okakaan̄ “akọp iko” ya mè anam ukpook ya, orere, otutuuk ebi mkpulu, menenisan̄a otutuuk uwu uriaak ataak geelek isan̄a. Ire kpa mgbọ ke otutuuk ebi mkpulu ebekitumu ibe ke ema ‘mîkaan̄ esuuk mè utelelek,’b ire sabum mè iyaka ire mgbọ ebefiat ataak uwu uriaak isan̄a ni?​—1 Tes 5:3.

Me atikọ, eji kpechubọk iriọọn̄ mgbọ ebi mkpulu ebekitumu ibe ke ema ‘mîkaan̄ esuuk mè utelelek.’ Ire eji eriọọn̄ otutuuk inu ofolek ubọk ebesa itumu usem yi, ikpoboyaka ikup ufiak ibe eji ekup me mbem-lek. Ire, Jisọs itumu owuwa mgbọ ibe ke ikup ufiak ibe ebi udun̄ kan̄ ekup me mbem-lek. (Mat 24:42; 25:13; 26:41) Kè eji ekpa-nu mkpọ ogwu otuchieen̄ Pọọlu otumube ofolek inu yi me mgbọ igebe ikpa ijet ebi eyi Karais me Teselonaika.

Pọọlu ige ibe: “Mgbọ ebi ene mêkitumu ibe, ‘Eji mîkaan̄ esuuk! Eji mîkaan̄ utelelek!’ mgbọ ya ke mfiat mè mkpa obonu inyi ema me uwuuk-lek.” (1 Tes 5:​2, 3) Sabum mgbọ keyi, ikpa kiji ikimalek ikpa usem kè Pọọlu ikeyi: Ebi mkpulu ebetumu ibe ke ema ‘mîkaan̄ esuuk mè utelelek’ sabum ikpele ujaralek mobenebe, eyi ibobene me lek mfiat Babilọn Ama Ile, orere, otutuuk ataak uwu uriaak. Eji mitumu si ibe ke esitumu ibe ke ‘mîkaan̄ esuuk mè utelelek,’ isibi ibe ke ikpele ujaralek monibene.

Ire, eyi eji eyaka ikpọk iwọlo ere yi ikpọ, mokọt ire ibe ke ikaan̄ ofifi oniin̄ ebekọt isa igobo usem yi itet. Mokọt ire ibe ke ebetumu ibe ke ‘mîkaan̄ esuuk mè utelelek’ esifiat ataak uwu uriaak isan̄a. Keke orọ eji etumube ikeya? Kpọ-nu usini idodo chi.

Kpasi mgbaan̄ ke ataak uwu uriaak okaan̄ me lek akọn̄ echi ekitim me linyọn̄ yi? Baibul ikpa ibe: “Îre me emen kan̄ [“ikpele ogwu òje oyet ya,” Babilọn Ama Ile] ke emun̄ eje . . . otutuuk ebi ekpan̄be me linyọn̄ keyi.” (Ichi 17:​1, 5; 18:24) Me owuwa acha oraraka mege inire mgbọ keyi, ataak uwu uriaak ikibebieen̄ akọn̄ inye mè ikirọ ibe eketim etim mgbọ geelek, eyi orọrọ ibe efie efie ebi ene ekwaan̄. Eya orọ, ataak uwu uriaak okirọ ibe akọn̄ mè inu afa ikibọkọ irek, kpan̄asi esuuk mè utelelek. Bak me lek eyi, ene mokọt ido ibe: Ire ebi mkpulu mekọt itumu ibe ke esuuk mè utelelek omaan̄ esifiat Babilọn Ama Ile isan̄a ni? Mokọt ire, ire, eji kperiọọn̄.

Keke obobọkọ irek ebi mkpulu esitumu ibe ke ‘mîkaan̄ esuuk mè utelelek’? Pọọlu itumu ibe: “Mgbọ ya ke mfiat mè mkpa obonu inyi ema me uwuuk-lek.” (1 Tes 5:3) Ebi mkpulu esitumu ibe ke ‘mîkaan̄ esuuk mè utelelek’ esifiat ataak uwu uriaak isan̄a, mgbọ ya ke mfiat oborọn̄ ikeme otutuuk ebi ido geelek me uwuuk-lek.

Ike owa ke ebi eyi Jioba eberọ eru me lek nriran chi ebenbe? Pọọlu itumu ibe: “Enyi bọn Nte n̄a, Usen ya ìkponu enyi me uwuuk-lek kubọk ogwu inọ okinu, mije, enyi kpekup me emen udun.” (1 Tes 5:4) Keek-nu: Esifiat ataak uwu uriaak isan̄a mè itumu ibe ke ‘esuuk mè utelelek’ omaan̄, ebi eyi Jioba meriọọn̄ ibe ke sọnja mgbọ, mfiat monu inyi otutuuk ido. Ire, isa inyi ebi linyọn̄, mfiat ya ibonu me uwuuk-lek kubọk ogwu inọ okinu.

Ikaan̄ inu ge eji echubọk iriọọn̄. Sọnja mgbọ me isi, menyi anam okakaan̄ akọp iko mè anam ukpook okup araran̄ unye isasa ifiat ataak uwu uriaak. Mgbọ ya ke ikpele ujaralek obobene. Eji miriọọn̄ si ibe ke ikaan̄ mgbọ ebi ido ebetumu ibe ke ema ‘mîkaan̄ esuuk mè utelelek.’ Kpa mgbọ ke eyi obobọkọ irek? Eji mikpa oniin̄ iba inu yi obokọt ibọkọ irek. Ge ire: Mokọt ire ibe ke ebetumu inu yi sabum ebefiat ataak uwu uriaak. Òso iba ire: Mokọt ire ibe ke ebetumu inu yi esifiat ataak uwu uriaak isan̄a. Eji mekup ikikpọ ubọk inu chi obobọkọ irek. Owuwa nriran Baibul ire echi ekigobo itet ijaan̄ me mgbọ ema ekebibọkọ irek mè iyaka ire, esibọkọ irek isan̄a.​—Sa tọt me lek Jọn 12:16.

Ire, me mgbọ keyi, inu okukup ufiak ichit inyi eji ikare mgbọ ebi ido ebetumu ibe ke ‘esuuk mè utelelek’ omaan̄, kpan̄asi ikeya, ire eji ikukup inye ikigbe utoon̄-ejit inyi Awaji. Eji ekup me ugwọk chieen̄, mè ekup si me mbem-lek mgbọ geelek inyi eji mekọt ikineen̄ lek iban mgbọ ya me ekakpọge chieen̄ me lek mgbọ nriran yi oborọ iso.​—1 Tes 5:6.