Inu Oborọ Osikaan̄ Ntap-Me-Mun̄ mè Ibene Ikichichini Ufialek

1-2. Keke ke eji ebekọt irọ isasa ibem lek inyi ufialek eji ebekọt ichichini eji esikaan̄ ntap-me-mun̄ isan̄a? Nyi inu njeen̄.

EJI miriọọn̄ ibe ke eji mekaan̄ ufialek me inyọn̄ kè Setan. Jisọs itumu inyi ebi udun̄ kan̄ ibe: “Me atikọ, ojelek inu kechi kpolọlọ inunu.” (Mat 18:7) Eji mekọt ichichini ufialek echi obokọt irọ ibe ichechieek kiji iwọ. Eji ekaan̄ ntaba-ubọk-me-utọn̄ yi me ejit mè ebem lek enyi ufialek geelek eji mekọtbe ichichini, kubọk mbet lek ufialek eji mekọtbe ikaan̄ melek ebi bọn Nte kiji.

² Keek-nu inu njeen̄ yi. Owuwa mgbọ me ntitiin̄, ekitap eji efuuk me owot ibe ebem lek enyi mfufiat. Ike owa ke eji ebesa ibem lek ni? Eji medasi iweek iriọọn̄ mbet lek mfufiat obokọt ibọkọ irek me ere eji elukbe. Ikup ufiak ibe eji eriọọn̄ eyi, ogak ge, ire ikafiin̄ mgbọ eji ebenebe ikiluk me ere ya. Eji esiweek iriọọn̄ mbet lek mfiat okibọkọ irek, eji menenitọt mkpọ eji ebekọt irọ isasa ikup me mbem lek. (Urọk 21:5) Ubọk yaage si, inwọn ibe eji eriọọn̄ mbet lek ufialek eji ebekọt ichichini eji esikaan̄ ntap-me-mun̄. Eyi motap ubọk inyi eji ekọt eme ufialek cha mè ekaan̄ si ata mgbaan̄je melek Jioba. (Itọn̄ 17: 5) Kè eji ekpa-nu ufialek ita echi ebi ikakaan̄ ntap-me-mun̄ ebekọt ichichini mè ubọk ebekọt isa ibem lek inyi ufialek cha ge ge.a

MGBỌ GWUN̄ UTE GE ORỌBE OWU ILỌ

3. Kpasi ufialek ke eji ebekọt ichichini me emen ntitiin̄?

³ Ire okeek ubọk ikupbe owu me lek adasi mgbọ onube ntitiin̄ ebi eyi Jioba mè imun̄ ubọk ema ekisa ijeen̄ ima me eden̄ kiban̄ ni? Ire okachieek inye ibe ke omun̄ atikọ ni? (Jọn 13:35; Kọl 3:12) Ubọk ikupbe me lek Blancab ire eya. Ire, ike mgbọ ojebe eyi ikaan̄be ntap-me-mun̄ isan̄a, inu ge orọrọ eyi ikakeek ibe ke mokọt ibọkọ irek. Itumu ibe: “Gwun̄ ute enenwaan̄ ge ikasa me ata ejit irọ mkpọ melek n̄a. Nnọ si ikebitumu mkpọ ikanwọnge ofolek ebi ofifi ene me ntitiin̄. Nkakeek ibe ke mbet lek inu okup ikeyi mokọt ibọkọ irek mije, nkween̄ ibe ke Ebi Ata-Ikọ Jioba ire ebi ikisa isusun̄ esuuk mè ebi ikakaan̄ ima.” Ire atikọ ibe ke ebi eyi Jioba mikisa igọgọọk akpat ukot kan̄. Ire, bak lek eji kpeso, eji mekọt ikitumu mè iyaka ire ikirọ mkpọ olọlọ usini mgbọ. (Efes 4:​23, 24; 1 Jọn 1:8) Eya orọ, gwun̄ ute ge mokọt itumu usem mè iyaka ire irọ mkpọ obonaan̄ eji. (Jemis 3:8) Ire mkpọ nsan ibe ke usini ene mitele ikekitọbọ ebum inyi Jioba bak lek mkpọ gwun̄ ute ge otumube mè iyaka ire irọ.

4. Keke ke obokọt irọ me mgbọ keyi obotap ubọk inyi owu mè ire gwun̄ ute ge irọ inu onanaan̄ owu? (Ebi Efesọs 4:32)

⁴ Keke obotap ubọk inyi owu oriọọn̄ mkpọ oborọ ire gwun̄ ute ge irọ ibe onaan̄ ejit? Keek mkpọ ofolek nteme okup me ikpa Ebi Efesọs 4:​32, (Fuk.) mè kweek nye kigọọk nteme okup me ere ya. Ire okup inye ikijeen̄ njijin mè ata ejit, okpobomalek ikikaan̄ ibot ikọ melek ebi ofifi ene. Omokọt itumu ifieek bene me mgbọ keyi ikekitele inyi ebi irọrọ owu ilọ. Keke obokọt itap ubọk inyi owu okọt orọ ikeya? Keek mkpọ ofolek otu ifuk mgbọ okibeek Jioba ibe itele nrọ-nlọ kwun̄ inyi owu mè ubọk Jioba okisa itele inyi owu me ikike. Ọmọ si ikibele ejit itetele inyi owu. (Mat 6:12) Osikikeek ubọk Jioba okisa ichili ejit itele inyi owu owuwa mgbọ, ikekitele inyi ebi ofifi ife si mofet inyi owu.

5. Kpasi onineen̄ Baibul obokọt itap ubọk inyi eji me mgbọ erọbe mkpọ onanaan̄ eji? (Urọk 19:11) (Kpọ si ogugo.)

⁵ Fuk Urọk 19:11. Baibul itumu ibe ke ire ene ikaan̄ iriọọn̄-inu,c ìkakichieek ibe ene inaan̄ ejit gbei. Nteme Baibul yi itap ubọk inyi Rima, ogwu okakaan̄ ntap-me-mun̄ me mgbọ ikafiin̄ge. Itumu ibe: “Bọn ute irieen̄ mè ibaan̄ esirọ mkpọ onanaan̄ emi, nkidasi ikeek mkpọ okup me ikpa Urọk 19:11. Nkikpọ irek kiban̄ mè ere ema enan̄abe. Nkikeek si mkpọ orọrọ ema ebak lek irọ mkpọ ikeya. Nkekigọọk ema isibi isi ilook ata etip. Irọrọ ikeya okitap ubọk irọ mè nkọt nriọọn̄ ema njaan̄.” Inwọn ibe oriọọn̄ bọn ute kwun̄ ojaan̄ mgbọ keyi. Ike okigobo ema itet ijaan̄, ikeya ke ibokifet owu me lek itetele inyi ema ire erọ mkpọ onanaan̄ owu ejit.

6. Keke obotap ubọk inyi eji enwọọn̄ ata mgbaan̄je melek bọn ute irieen̄ mè ibaan̄?

⁶ Keke ke obokọt irọ inyi okonwọọn̄ ata mgbaan̄je melek ebi ikup me emen ntitiin̄? Ike okiriọọn̄ bọn ute irieen̄ mè ibaan̄, sa inyi okomun̄ ata eru echi ema ekaan̄be. (Sa tọt me lek Urọk 10:12; Rom 12:10; Filip 2:​2, 3) Taba iman̄ me lek ubọk irọrọ ikeya osa itap ubọk inyi gwun̄ ute ge ekigwen Mark, ogwu okakaan̄ ntap-me-mun̄ ayaya. Ike ibenebe ikigọọk ebi bọn ute ikup me ntitiin̄ kan̄ ikigbaan̄ mkpọ irọ, ikeya ke ibene ikimun̄ ere ema ewọbe. Keke otap ubọk inyi ọmọ ibe ikawọ me ichechieek kan̄? Itumu ibe: “Nnimun̄ ibe ke lọlọ chi ikaso inu geege ire esa itọt me lek ijo inu okibọkọ irek me eden̄ ebi inyọn̄ yi me chereyi. Eya orọ, ntutumu ifieek ikekikpọ chieen̄ ilọ me lek asabọn asabọn nrọ-nlọ echi ebi bọn ute ekirọ. Mbebene ikito chieen̄ me lek ata eru kiban̄ mè ikikeek mkpọ ofolek kiban̄.” Ire okirọ inu yaage mè ikito chieen̄ me lek ata eru echi ebi bọn ute ekaan̄be, motap ubọk inyi owu otaba lek oriaak me lek kiban̄.

OSIBENE IKIKAAN̄ ULỌK ME LEK INU ECHI OTELEBE

7. Keke obokọt irọ ibe eji ebene ekekaan̄ ulọk me lek inu echi eji ejuukbe itele ni?

⁷ Kpunu cheche ibe ke mgbọ obenebe ikitọbọ ebum inyi Jioba melek ebi eyi kan̄, ibele owu ejit irọriọọn̄ ibe ke okayaka ire okpọkọ ge me lek inyọn̄ kè Setan. Ire, mokọt iyọt owu me lek ichechieek ibe ke ogwu okitọbọ ebum inyi Jioba mokọt igwu ikom ifo lek inu ijuukbe itele me inyọn̄ kè Setan. Ire, eyi mokọt ibọkọ irek me mgbọ okije itibi ufialek, omokọt ibene ikikeek mkpọ ofolek ebi unene kwun̄, ikwaan̄ owuukbe lek ikirọ, mè iyaka ire usini mkpọ ikanwọnge echi owuukbe lek ikirọ. (Sa tọt me lek Otu Ifuk 11:​4-6.) Kubọk inu njeen̄, usini bọn ute mitele ikwaan̄ okinyi ema owuwa ikpoko eyi okibọkọ owuwa mgbọ kiban̄. Usini bọn ute michep ebi unene kiban̄ bak lek ebi unene cha etetele ema me mgbọ ema ebenebe ikikween̄ Baibul. Usini bọn ute si mitim igak ijo eru echi orerie ema lek, ubọk geelek ibe ke ema emama eru cha me mgbọ oraraka. More mkpọ nsan ire ogwu eyi Karais itele ibe inu echi ikebirọ me mgbọ oraraka irọ ibe ọmọ itele Jioba! Keke ke obokọt irọ me mgbọ keyi inyi okagwu ikom ifo lek inu echi ojuukbe itele me ekakpọge chieen̄ me lek inu geelek obọbọkọ irek?

8. Keke ke eji ebekween̄ me lek akpat ukot Ebereyam mè Sera?

⁸ Baibul ikpa mkpọ ofolek owuwa ebi igbegbe utoon̄-ejit ijujuuk owuwa mkpọ itele inyi ema ekọt etọbọ ebum enyi Jioba, ire, ema kpekup inye ikikeek inu cha ema ejuukbe itele. Kubọk inu njeen̄, Ebereyam mè Sera misiki ibot inyi Jioba mè inan̄a isibi me ama Uru ojajaan̄ enenen mè ibene ikiluk me emen uwu ọfọ. (Iburu 11:​8, 9) Me atikọ, usini mgbọ, ema mira ikeek mkpọ ofolek ugwem ema enwọọn̄be me Uru. Ema kè egwu ekom efo ama ya more ibe ke ema mikup inye ikikeek mkpọ ofolek ama ya mè iyaka ire ubọk ugwem osabe inwọn ema me lek me ama ya. Kpan̄asi ikeya, ema ekukup inye ikikeek mkpọ ofolek use Jioba ochieekbe inyinyi ema me mgbọ okup me isi.​​—Iburu 11:​15, 16.

9. Ike owa ke ogwu otuchieen̄ Pọọlu osa imun̄ inu echi ijuukbe itele? (Ebi Filipai 3:​7, 8, 13)

⁹ Ogwu otuchieen̄ Pọọlu si irọ unwene me ugwem kan̄ inyi ikọt itọbọ ebum inyi Jioba me oniin̄ otatat. Kubọk inu njeen̄, sabum ikanabe ogwu eyi Karais, ikween̄ ikan ebi Ju me ubọk Gamalien ogwu ijejeen̄ osisibi isi. (Ikwaan̄ 22:3) Pọọlu kè okana ogwu omimin, orere, ogwu ibot uwu uriaak ebi Ju. (Gal 1:​13, 14) Ire, me mgbọ ikween̄be atikọ ofolek Jisọs, ijujuuk otutuuk irek umin cha itele. Ire, ire ugwem kan̄ kubọk ogwu eyi Karais ifet ni? In̄-in̄, ikafet. Misut ọmọ osusut mè itap ọmọ me mkpọn, ebi Ju echacha ọmọ si. (2 Kọr 11:​23-26) More ibe ke Pọọlu ikifiat owuwa mgbọ kan̄ ikikeek ubọk ugwem kan̄ osabe ifet ire sabum ikanabe ogwu eyi Karais, kè okọt okana ogwook ibe ke ọmọ irọ ntumu-mfieek olọlọ mgbọ ibenebe ikigọọk Jisọs. Ire, ikakeek ikeya. Kpan̄asi ikeya, ikukup inye ikikeek nga umin ile irebe irere ogwu udun̄ kè Karais mè ikikup ikpọ mgbọ ibokaan̄ mkpukpe okup uyeke uyeke me mgbọ okup me isi. Pọọlu ichieek inye ibe ke irere ogwu udun̄ kè Jisọs inwọn igak inu geelek ijuukbe itele.​​—Fuk Ebi Filipai 3:​7, 8, 13.

10. Keke ogbe ibe eji ekekeek mkpọ ofolek? (Mak 10:​29, 30) (Kpọ si ogugo.)

¹⁰ Keke ke eyi okijeen̄ eji? Ire obene ikikeek mkpọ ofolek inu ojuukbe itele inyi okana ogwu eyi Karais, kawuuk si inu orọrọ ojuukbe inu cha itele. (Etip 7:10) Kikeek si otutuuk ata mkpọ echi okaan̄be me mgbọ keyi echi onwọnwọn igak echi ojuukbe itele. Kubọk inu njeen̄, owu okaan̄ ata mgbaan̄je melek Jioba. (Urọk 3:32) Owu okaan̄ owuwa bọn ute irieen̄ mè ibaan̄ me ntitiin̄ kwun̄ mè ebi ikup me otutuuk linyọn̄ yi ebi imama owu enenen. (Fuk Mak 10:​29, 30.) Okaan̄ si ata mkpọ echi obonwọọn̄ eyi Jioba ochieekbe owu use ibe ke morọ me mgbọ okup me isi! (Asaya 65:​21-23) Ire okimalek ikeek ugbana echi okikaan̄ bak me lek okitọbọ ebum inyi Jioba, okpokikeek mkpọ ofolek inu echi ojuukbe itele.

11. Keke ke eji ekween̄ me lek ukpatu Rosemary?

¹¹ Gwun̄ ute enenwaan̄ ge ekigwen Rosemary ikaan̄ ntap-me-mun̄ me mgbọ ikupbe mkpọ obet lek akọp acha go. Taba iman̄ me lek mkpọ otatap ubọk inyi ọmọ ibe ikakikeek mkpọ ofolek inu echi ijuukbe itele. Itumu ibe: “Me adasi mgbọ nkanabe ge me lek ebi Ata-Ikọ Jioba, nkifieek ejit acha geelek me mgbọ ekebirọ orirọ usen iman kè Karais, bak lek nkinwọọn̄ igọgọọk ebi ototun̄ ukan̄ n̄a ikup me usen ya. Nkinwọọn̄ si icheche mkpọ inyi ebi mmabe. Nkinwọọn̄ si imumun̄ ike nsabọn n̄a mè bọn bọn n̄a ekichili inyinyi nnyibe ema.” Keke otap ubọk inyi Rosemary? Itumu ibe: Nkween̄ ikekinwọọn̄ igọgọọk ebi ototun̄ ukan̄ n̄a ikup me ofifi mgbọ me acha. Me acha geelek, me ofifi usen, nkigwen ebi ototun̄ ukan̄ n̄a inu me uwu n̄a mè ikinwọọn̄ lek melek kiban̄. Nkinyi ema inyinyi mè ikitumu inyi ema mkpọ orọrọ mmabe ema ge ge.” Rosemary si ikaan̄ ofifi ufialek. Itumu ibe: “Me mgbọ nkanabe ogwu Ata-Ikọ Jioba, ebi unene n̄a ebi kpekitọbọ ebum inyi Jioba kpeyaka iweek irere ebi unene n̄a. Eyi irọ ibe nkemfieek ejit usini mgbọ bak lek nkayaka ikirọ mkpọ melek kiban̄. Mweek ayaya unene.”d Keke otap ubọk inyi ọmọ? Ikineen̄ melek esese esese bọn ute ibaan̄ ibe egọọk ọmọ esibi uko. Itumu ibe: Me ikwaan̄ uko, mbebene ikiriọọn̄ bọn ute ibaan̄ chi ijaan̄, mè irọ ata unene melek kiban̄ si. Mgbọ keyi, nkaan̄ ayaya ebi unene ebi mmabe mè imọnọ ibene. Keke ke obokọt ikween̄ me lek Rosemary? Ikerere ibe ke okayaka ikirọ usini mkpọ echi okinyi owu unwọọn̄ sabum okween̄be atikọ, kawuuk ibe ke omokọt ikaan̄ ofifi inu oborọ ibe ochubọk okaan̄ ubelejit mgbọ keyi echi onwọnwọn igak inu echi ojuukbe itele. (Filip 4:​8, 9) Kawuuk si ibe ke Jioba ikinyi eji inu igak mkpọ echi eji ejuukbe itele bak lek kan̄.

ENE ISITELE ITỌTỌBỌ EBUM INYI JIOBA

12. Kpasi mkpọ obokọt irọ me emen ntitiin̄ eyi oboyọt eji me lek imeme?

¹² Me mgbọ okanabe ogwu Ata-Ikọ Jioba, ora ibele ejit enenen ibe ke owu ire ge me lek urum ebi ikijeen̄ ebi ene atikọ mè ikisa irọrọ mkpọ otatat, ke okayaka ire okpọkọ ge me lek inyọn̄ osasak yi si. (Asaya 65:14) Ire, usini mgbọ, omokọt inọ ibe ke ene ge me emen ntitiin̄ irọ ijo inu omimin. Ire ene ya ikagwu ikom, mekọt isan̄a ene ya isan̄a me emen ntitiin̄. (1 Kọr 5:13) Taba iman̄ me lek inu orọrọ gwun̄ ute enenwaan̄ ge ekigwen Samar. Itumu ibe: “Me ikafiin̄ge nkaan̄be ntap-me-mun̄ isan̄a, ogwu ugane ntitiin̄ ge orọrọ ijo inu omimin, esasan̄a ọmọ me ntitiin̄. Inu yi irọ ibe ichechieek n̄a iwọ sọntiik, nkakeek ibe ke ogwu ugane ntitiin̄ mokọt irọ ijo inu ikeme Jioba mè ebi bọn ute.” Me atikọ, ikup ufiak ibe eji ekaan̄ utoon̄-ejit ibe ke ebi bọn Nte kiji mima Jioba mè iweek ikukup inye ikigbe utoon̄-ejit inyi ọmọ. (1 Kọr 13:​4, 7) Ire, ire mkpọ nsan ibe ke acha geelek mikisan̄a usini ene me ntitiin̄. Eyi mokọt ikiyọt eji me lek, ogak ge ire ogwu unene kiji, ogwu uwu kiji, mè iyaka ire gwun̄ ute ge okijeen̄ ata akpat ukot ogobo itetele Jioba.

13. Keke ke obokọt irọ mgbọ keyi obotap ubọk irọ mè ichechieek kwun̄ ikawọ mè ire ogwu okukup iriaak owu me lek itele Jioba?

¹³ Keke ke obokọt irọ mgbọ keyi obotap ubọk irọ mè ichechieek kwun̄ ikawọ mè ire ogwu okukup iriaak owu me lek itele Jioba? Kweek nye kirọ ibe mgbaan̄je kwun̄ melek Jioba inye. (Jemis 4:8) Kawuuk ibe ke ikare bak lek ofifi ene ke okiriaak Jioba. Kubọk inu njeen̄, ikerere ibe ke eji ekimalek ikween̄ Baibul mè ikibeek uriaak kubọk ototun̄ ukan̄ mè ntitiin̄, ikup ufiak ibe eji ge ge ekebeek uriaak enyi Jioba mè ekefuk Baibul mgbọ geelek.​​—Itọn̄ 1:2; 62:8.

14. Keke ke eji ekween̄ me lek akpat ukot ogwu otuchieen̄ Pita? (Jọn 6:​66-68)

¹⁴ Eji mekọt ikween̄ mkpọ me lek ubọk ogwu otuchieen̄ Pita orọbe eru me mgbọ owuwa ebi udun̄ kè Jisọs etele igọgọọk Jisọs bak lek inu itumube. Mokọt ire ibe ke Pita si ikagobo itet inu Jisọs otumube, ire, ikup inye ikigbe utoon̄-ejit. (Fuk Jọn 6:​66-68.) Kpan̄asi itoto chieen̄ me lek mkpọ ebi ofifi ife ekirọ, Pita ikeek mkpọ ofolek atikọ Jisọs okijeen̄ ọmọ. Bak lek eyi, Pita ikachieek ibe ichechieek kan̄ iwọ. Ubọk yaage si me chereyi, ikerere ibe ke usini ene kpeyaka ikitọbọ ebum inyi Jioba, kawuuk ibe ke ntitiin̄ yi ojeen̄ eji atikọ ofolek Jioba. Kweek nye kimọnọ bene inu okween̄be mè kweek nye kigbe utoon̄-ejit nyi Jioba! Samar, ogwu ewuukbe lek ikpa mkpọ ofolek itumu ibe: “Nkikeek lek n̄a ibe ke ire ene ge orọ ijo inu, ikare otutuuk ene me ntitiin̄. Isọkọ me lek si, kpekijeen̄ eji ijo inu me ntitiin̄.”

15. Keke ke okween̄ inan̄a me lek ukpatu kè Emily?

¹⁵ Keek-nu mkpọ orọrọ Emily. Nde ge gaalek iraraka me lek ikaan̄be ntap-me-mun̄, ogwu uga ojijit ema itele, esasan̄a ogwu uga si me ntitiin̄. Emily itumu ibe: “Nkakekeek ibe ke inu yi mobọkọ irek. Me lek otutuuk ufialek nchichinibe, eyi keyi oyọt emi me lek ichit. Nchubọk iweek ikpọkpọk imun̄ nga n̄a.” Keke otap ubọk inyi Emily? Itumu ibe: “Nkakup emi gaalek. Nte n̄a ima emi enenen mè ikiriọọn̄ ubọk ikpọ emi chieen̄ me lek. Ebi ntitiin̄ kiji si mikirọ mkpọ me lek n̄a kubọk emi ire ge me lek ebi ototun̄ ukan̄ kiban̄. Otutuuk ene ekichichichini ufialek, eya orọ, ikup ufiak ibe eji ekejeen̄ ima me lek bọn Nte kiji ge ge mè ekerọ ema ebi unene kiji mè eketap ema efuuk me owot.” (1 Pita 5:9) Kakup mege osikaan̄ ufialek sabum otaba lek oriaak me lek ebi bọn ute irieen̄ mè ibaan̄. Sa inyi otaba lek oriaak me lek kiban̄ mgbọ keyi. Osirọ ikeya, ema metap ubọk inyi owu osikaan̄ ufialek, okpobokup si owu gaalek.

16. Keke ke eji kpewuuk? (Kpọ si ogugo.)

¹⁶ Kawuuk ibe ke Jioba ikisut ebi usun̄ kan̄ osusut bak lek imabe ema. (Iburu 12:6) Iweek ibe otutuuk ebi esan̄abe me ntitiin̄ egwu ekom me lek ijo kiban̄ mè eyaka enu me ntitiin̄. (2 Pita 3:9) Eya orọ, ire esan̄a ogwu omabe me ntitiin̄, riọọn̄ ibe ke ebi ugane ntitiin̄ merọ otutuuk inu ema ebekọt irọ isasa itap ubọk inyi ene ya ibe igwu ikom inu lek Jioba.​​—2 Tim 2:​24, 25.

17. Keke ke eji eriọọn̄ ijaan̄ lek?

¹⁷ Eji mikpa usini me lek ufialek echi obokọt ichichini osikaan̄ ntap-me-mun̄ isan̄a. Me atikọ, omokọt ikup inye ikigbe utoon̄-ejit inyi Jioba ikerere me mgbọ okichichini ufialek. Owuwa mkpọ omaan̄ echi obokọt irọ isasa ibem lek inyi mbet lek ufialek cha. Kawuuk si ibe ke Jioba ikup me mbem-lek itatap ubọk inyi owu. Ọmọ okitap ubọk inyi owu me mgbọ keyi, iweek si itatap ubọk inyi owu ire mgbọ geelek! (1 Pita 5:10) Mokup inye ikinyi owu unye mè ime oweekbe isasa ije itibi ufialek geelek obochichini. Ire otele ibe Jioba ikitap ubọk inyi owu, kpunu ufialek geege obokọt itaba owu isan̄a me lek kan̄!​​—Itọn̄ 119:165; Rom 8:​38, 39.