Inu Ntap-Me-Mun̄ Ochubọk Isibi

1. Ike owa ke eji esa iriọọn̄ ibe ke ntap-me-mun̄ ikup ufiak enenen?

EJI mikikaan̄ unwọọn̄ mgbọ geelek ebi ene ekaan̄be ntap-me-mun̄! Ire oriọọn̄ ibe ke ire mbet lek unwọọn̄ yaage ke ebi eyi Karais ekaan̄ me adasi chinichini ekaan̄be me adasi ukot ni? Me ntitiin̄ ya, ebi ene mikaan̄ ntap-me-mun̄, minyi si usem okikpa mkpọ ntap-me-mun̄ ochubọk isibi. (Ikwaan̄ 2:​38, 40, 41) Ike mgbọ ojebe, ogwu ikwaan̄ Pọọlu ogege ibe ke okpan okpan ijejeen̄ eyi Karais igọbọ ntap-me-mun̄. (Iburu 6:​1, 2) Ubọk geelek ibe ke ijejeen̄ ntap-me-mun̄ ire ge me lek okpan okpan ijejeen̄ Baibul eji ekween̄be mkpọ ofolek, keke orọ ikupbe ufiak ibe eji egobo etet ejaan̄ mkpọ isibibe ni?

2. Keke orọ igbebe ibe eji ekaan̄ ata ngobo-ntet ofolek ntap-me-mun̄?

² Ike ewuuk onyenye esabe itọbọ ọdọ uwu okirọ ibe uwu ikeke inye, ikeya ke ata ngobo-ntet ofolek ntap-me-mun̄ okirọ ibe eji ekaan̄ ichechieek onyenye. Igbe ibe eji ekaan̄ ngobo-ntet yi mè ire eji ekitọt ikakaan̄ ntap-me-mun̄ sa mikaan̄ ntap-me-mun̄ me acha acha oraraka. Eya orọ, me ibot usem yi, eji mekaan̄ ufọọk-otu inyi idodo chi: Keke ke ntap-me-mun̄ ochubọk isibi? Ike owa ke ebi eyi Karais ekisa ikaan̄ ntap-me-mun̄? Ike owa ke eji ekisa ikaan̄ ntap-me-mun̄ me erieen̄ eyi Ute, mè erieen̄ eyi Gwun̄, mè erieen̄ eyi ekwukwu mbuban?

INU NTAP-ME-MUN̄ KWUN̄ OSIBI

3. Keke ke ntap-me-mun̄ kwun̄ okijeen̄ ebi ene?

³ Keke ke ntap-me-mun̄ kwun̄ okijeen̄ ebi ene? Ikijeen̄ ibe ke owu obọkọ atikọ ofolek Jioba mè Jisọs itap. Ikijeen̄ ibe ke ogwu ikom me emen ijo kwun̄, mè inwene ugwem kwun̄ inyi okọt otọbọ ebum onyi Jioba. Ikijeen̄ ibe ke ochieek ibe ke ire inan̄a me lek Jisọs ke Awaji obonyan̄a owu. Ikijeen̄ si ibe ke obeek uriaak inan̄a me ijọn̄ ijọn̄ ejit kwun̄ inyi Jioba ibe ke omorọ nkeek kan̄ mè igọọk ntitiin̄ kan̄ ikigbaan̄ ije. Osichieek Awaji use yi mè isa lek kwun̄ inyi ọmọ mè ikaan̄ ntap-me-mun̄, mgbọ ya ke obobene ikije me oniin̄ obosa owu isi lek ugwem ikakaan̄ge itata.

4. Keke ke ininin̄ me emen mun̄ mè isisibi okijeen̄? (Kpọ si ogugo.)

⁴ Osibokaan̄ ntap-me-mun̄, omonin̄ me emen mun̄ mè inan̄a isibi,a eyi ikup kubọk efufuun̄ owu mè iyaka inijomo owu. (Sa tọt me lek Ebi Kọlọsi 2:12.) Keke orọ eyi orebe ata inu njeen̄? Bak me lek ntap-me-mun̄ ikijeen̄ mbet lek unwene echi orọbe me ugwem kwun̄. Me mgbọ onin̄be irak mun̄, okijeen̄ ibe ke okayaka iluk ugwem ubọk owuukbe lek ikiluk. Me mgbọ onan̄abe isibi, okijeen̄ ibe ke obene ikiluk ayaya ugwem eyi okakat ikana me lek irọrọ nkeek Awaji.

5. Ike owa ke ikwaan̄ oborọ isasa imin isoon̄ ikakaan̄ ntap-me-mun̄ osa ikup kubọk ikwaan̄ Nuwa orọbe isasa inama ikpele uji ya? (Pita Eyi Adasi 3:​18-21)

⁵ Fuk Pita Eyi Adasi 3:​18-21. Eji mekọt isa ikwaan̄ orọbe isasa inwene ugwem kwun̄ inyi okọt omin osoon̄ ikakaan̄ ntap-me-mun̄ itọt me lek ikwaan̄ Nuwa orọbe mgbọ ikinama uji ile. Ire ikafiin̄ obenebe ikikween̄ mkpọ ofolek Jioba, mokọt ikup owu me lek kubọk ikwaan̄ oborọ isasa imin isoon̄ ikakaan̄ ntap-me-mun̄ moyọt enenen. Mokọt ikup kubọk imalek iyọt ike iyọtbe me lek Nuwa inanama ikpele uji ya. Ire, ire ichubọk ikup ufiak ibe orọ otutuuk unwene chi ni? Iin̄, keke orọ eji etumube ikeya? Keek-nu mkpọ ofolek Nuwa. Awaji me lek kan̄ ogwook ubọk ikpele uji ya obokup, mè inyi Nuwa ntọ-ubọk ibogọọk. Nuwa ibogọgọọk ntọ-ubọk cha inyi ọmọ ikọt iluk itibi mun̄ ile ya. Bak lek ichechieek me lek Jioba mè ntap-ubọk kan̄, Nuwa isiki ibot mè inama uji ile ya. Kubọk Nuwa, omokọt irọ otutuuk inu Awaji onyibe ida ibe mè orọ.​​—Ibeb 6:22.

6. Me oniin̄ okukup ke ntap-me-mun̄ okinyan̄a eji?

⁶ Me agba eyi 21, Pita ige ibe ke ntap-me-mun̄ ikinyan̄a ene. Ire, eyi ikasibi ibe ke ikakaan̄ ntap-me-mun̄ ore gaalek mkpọ ene oborọ inyi ikọt ikaan̄ ntele-nnyi. Mkpa kè Jisọs gaalek orọ inyi eji ekọt ekekaan̄ ntele-nnyi me ubọk Jioba. (Jọn Eyi Adasi 1:7) Ntap-me-mun̄ ire inu okukup ufiak enenen si bak lek Jioba onyi eji ida ibe ekekaan̄ ntap-me-mun̄. Eji esikaan̄ ntap-me-mun̄, eji ekibeek Jioba ibe inyi eji utọn̄ọ nkeek. Jioba mobele ejit itetele ijo kiji inyi eji mije ngwugwa kè Jisọs. Ire me oniin̄ keyi ke ntap-me-mun̄ okinyan̄a eji, orere, ntap-me-mun̄ orọ inyi eji ekaan̄ ikpọchieen̄ iluluk ugwem ire mgbọ geelek.

IKE EBI EYI KARAIS EKISA IKAAN̄ NTAP-ME-MUN̄

7. Ike owa ogbe ibe erọ ntap-me-mun̄ ebi eyi Karais?

⁷ Baibul ijeen̄ ibe ke ene isikikaan̄ ntap-me-mun̄, igbe ibe ejiin̄ ene ya me emen mun̄ mè esan̄a ene ya esibi, ire, ikatumu owuwa mkpọ ofolek ubọk ntap-me-mun̄ ebi eyi Karais obokup. Ikerere ikeya, Baibul itap ubọk inyi eji eriọọn̄ mkpọ otatat ibe eji erọ me mgbọ ekikaan̄ ntap-me-mun̄. Kubọk inu njeen̄, ikaan̄ usini onineen̄ Baibul obotap ubọk inyi ebi ibekaan̄ ntap-me-mun̄ eriọọn̄ mbet lek ofọnti ema ebekọt itap mè ubọk ebi ikikpọ ema eberọ eru. (1 Kọr 14:40; 1 Tim 2:9) Me chereyi, ikimalek ire ebi ugane ntitiin̄ ekijiin̄ ene itap me emen mun̄, ire, eyi ikarọ ibe ema ere ebi isisibi esese. (1 Kọr 1:​14, 15) Isọkọ me lek si, otu ifuk ebi ikukup me mgbọ ekikaan̄ ntap-me-mun̄ ikachubọk ikup ufiak, mè ire ewawa sa kpewa.​​—Ikwaan̄ 8:36.

8. Idodo echi owa ke ekido ebi ibekaan̄ ntap-me-mun̄, keke orọ ekido idodo cha? (Ikwaan̄ 2:​38-42) (Kpọ si ogugo.)

⁸ Baibul ibe: “Otu kwun̄ ke obosa itumu ichechieek kwun̄ isibi, mè ikaan̄ unyan̄a.” (Rom 10:​9, 10) Ikare gaalek me mgbọ eji ekilook ebi ene ata etip ke eji ekitumu ichechieek kiji isibi. Eji ekirọ eyi si me mgbọ eji ekaan̄be ntap-me-mun̄. Ire bak me lek eyi ke ekido ebi ibekaan̄ ntap-me-mun̄ idodo iba. Eyi Adasi ire, “Ire ogwu ikom inan̄a me lek ijo kwun̄, isa ugwem kwun̄ inyi irọrọ nkeek kè Jioba mè ichieek ibe ke ire inan̄a me lek Jisọs Karais ke ibonyan̄a owu ni?” Idodo yi ikijeen̄ mbet lek ikwaan̄ ogwu obokaan̄ ntap-me-mun̄ orọbe isasa imin isoon̄ ikakaan̄ ntap-me-mun̄. Pita itumu mbet lek inu yaage mgbọ ikitumu inyi ebi ene ibe egwu ekom mè ekaan̄ ntap-me-mun̄ me usen Pentikọs. Idodo eyi òso iba ire, “Ire ogobo itet ibe ke ntap-me-mun̄ kwun̄ ikijeen̄ ibe ke owu ire ge me lek Ebi Ata-Ikọ Jioba ikigọọk ntitiin̄ kè Jioba igbaan̄ ije ni?” Idodo yi ikijeen̄ inu ogwu obokaan̄ ntap-me-mun̄ oborọ isikaan̄ ntap-me-mun̄ isan̄a. Ene yi mokirọ use ichieekbe sa me ikekigọọk otutuuk ntọ-ubọk Jioba okisa ntitiin̄ kan̄ inyi, mè ikitọbọ ebum inyi Jioba melek bọn ute irieen̄ mè ibaan̄ ikup me ntitiin̄ ike ebi eyi Karais ikakaan̄ ntap-me-mun̄ me usen Pentikọs erọbe. (Fuk Ikwaan̄ 2:​38-42.) Ebi isasa me otutuuk ejit kiban̄ ifọọk iin̄ inyi idodo iba chi mimin isoon̄ ikakaan̄ ntap-me-mun̄.

9. Keke ke otutuuk ene eberọ isasa ikaan̄ ata mgbaan̄je melek Awaji?

⁹ Usini mgbọ, sabum obenebe ikikween̄ Baibul, owu oluk ugwem onwọnwọn, okarọ si ijo inu omimin geege. Mokọt ire nte kwun̄ mè nga kwun̄, ebi irere ebi Ata-Ikọ Jioba etap ubọk inyi owu oma Jioba. Ire ikeya, ire ikup ufiak si ibe ogwu okom me lek ijo inu kwun̄ mè okaan̄ ntap-me-mun̄ ni? Iin̄. Keke orọ eji etumu ikeya? Otutuuk kiji ire ebi ijo, ijo inu oda eji ibọkọ me lek Awaji. (Itọn̄ 51:5) Ire, ike eji ekikween̄ mkpọ igbaalek ofolek Jioba, eji enenitumu ifieek ikekirọ inu Jioba oweekbe kpan̄asi irọrọ inu eji eweekbe. Eyi obieen̄ eji ibe egwu ekom, enwene ugwem kiji mè ebene ekerọ mkpọ obokibele nte kiji me emen inyọn̄ ejit. Me mgbọ eji erọbe otutuuk inu chi, eji ekakaan̄ ntap-me-mun̄.​​—Ikwaan̄ 3:19.

10. Ire owuuk lek ikaan̄ ntap-me-mun̄ me ofifi uwu uriaak, keke ke oborọ?

¹⁰ Ikerere ibe ke owuuk lek ikaan̄ ntap-me-mun̄ me ofifi uwu uriaak, omokaan̄ si ntap-me-mun̄ kubọk ogwu Ata-Ikọ Jioba. Bak lek keke? Bak lek me mgbọ ya, okariọọn̄ ubọk igobo atikọ ofolek Jioba mè Jisọs itet. Ikerere ibe ke osa lek kwun̄ inyi Awaji me uriaak mè ichieek ọmọ use irọrọ nkeek kan̄ me mgbọ ya, okariọọn̄ ubọk igobo itet ijaan̄ mkpọ irọrọ nkeek Awaji ochubọk isibi. Mgbọ ogwu otuchieen̄ Pọọlu ochichinibe usini ebirieen̄ me Efesọs ebi iwuwuuk lek ikaan̄ ntap-me-mun̄, ineen̄ ibe ema ekpọk ekaan̄ ntap-me-mun̄ mije, ema kpegobo itet atikọ ofolek Karais.b (Ikwaan̄ 19:​1-5) Ubọk yaage si me chereyi, Jioba ikibọkọ itap ntap-me-mun̄ ogwu ogogobo nkeek kan̄ itet ijaan̄.

“ME ERIEEN̄ EYI UTE, GWUN̄, MÈ EKWUKWU MBUBAN”

11. Keke ke ikakaan̄ ntap-me-mun̄ me erieen̄ Ute, Gwun̄ mè ekwukwu mbuban osibi? (Matiyu 28:​18-20)

¹¹ Jisọs inyi ida ibe ebi ene ekaan̄ ntap-me-mun̄ “me erieen̄ eyi Ute, mè erieen̄ eyi Gwun̄, mè erieen̄ eyi ekwukwu mbuban.” (Fuk Matiyu 28:​18-20.) Keke ke Jisọs okitumu? Me Baibul, esikikpa mkpọ ofolek “erieen̄” ene, ekimalek itumu mkpọ ofolek ogwu ene orebe. Mokọt isibi si irek ene ya, mè iyaka ire unye ntọ-ikọ ikaan̄be. Eya orọ, ikakaan̄ ntap-me-mun̄ me erieen̄ eyi Ute, mè erieen̄ eyi Gwun̄ isibi ibe ke eji miriọọn̄ ibe ke Jioba mè Jisọs mikaan̄ unen mè unye itutumu inyi eji mkpọ eji ebekirọ. Ikakaan̄ ntap-me-mun̄ me erieen̄ eyi ekwukwu mbuban isibi igọgọọk ntọ-ubọk Jioba okisa ekwukwu mbuban kan̄ inyi. (Sa tọt me lek Matiyu 10:41.) Kè eji ekween̄ egbaalek ubọk eji ebekọt irọ eyi.

12. Ike owa ke eji ekisa ikaan̄ ntap-me-mun̄ me erieen̄ eyi Ute? (Ichichili 4:11) (Kpọ si ogugo .)

¹² Me erieen̄ eyi Ute. Eyi isibi ibe ke eji michieek inye ibe ke Jioba ore Nte kiji mè ogwu onyinyi eji ugwem. Ọmọ ore Awaji obebene ichit, Ogwu Ororom otutuuk inu. (Fuk Ichichili 4:11.) Eji miriọọn̄ ibe ke ọmọ okinọ uriaak kiji, eji mikigwen erieen̄ kan̄ si me mgbọ eji ekibeek uriaak inyi ọmọ mè mgbọ eji ekikpa mkpọ ofolek kan̄ inyi ebi ofifi ife. (Itọn̄ 65:2) Ire, ikaan̄ si ofifi mkpọ ogbegbe ibe eji eriọọn̄. Ebi igbagban̄ Pita me usen Pentikọs miwuuk lek iriọọn̄ mkpọ ofolek Jioba, ire, igbe ibe ema eriọọn̄ ibe ke Jioba ore ogwu obonyi ema ugwem ikakaan̄ge itata inan̄a me lek Jisọs.​​—Rom 5:8.

13. Ike owa ke eji ekisa ikaan̄ ntap-me-mun̄ me erieen̄ eyi Gwun̄? (Kpọ si ogugo .)

¹³ Me erieen̄ eyi Gwun̄. Eyi isibi ibe ke eji migobo itet ibe ke Jisọs ore ọkpọkpọ Gwun̄ Awaji. Eji michieek si ibe ke Jisọs ore oniin̄, ire inan̄a me lek kan̄ gaalek ke eji ebekọt ikaan̄ ata mgbaan̄je melek Jioba. (Jọn 14:6) Jisọs ore ogwu unyan̄a kiji, ogwu okwukwu me ibot kiji inyi eji mekọt ikaan̄ ugwem ikakaan̄ge itata. Eya orọ, eji ekiweek igọgọọk akpat ukot kan̄ egwe geelek me ugwem kiji, ikare gaalek me usen eji ekaan̄be ntap-me-mun̄. (Jọn Eyi Adasi 2:6) Eya orọ, kubọk Jisọs, eji ekachieek ibe inu geege ikput eji ibe eji ekalook ata etip. (Luk 4:43) Eji mikup si me mbem-lek imeme tukutuku bak lek eji ekigọọk Jisọs. Eji mekigbe utoon̄-ejit si ike eji ekitọbọ ebum inyi Jioba. (2 Tim 3:12) Eji mikaan̄ ulibi me lek Jisọs kubọk ogwu ibot ntitiin̄, eya orọ, eji ekisa me unwọọn̄ ikigọọk ntọ-ubọk eji ekibọkọ me ubọk ebi Jisọs ogobobe ibe ekenyi eji ntọ-ubọk mè ekekpọ chieen̄ me lek kiji.​​—Efes 4:​8, 11, 12; 5:23.

14. (a) Ike owa ke eji ekisa ikaan̄ ntap-me-mun̄ me erieen̄ eyi ekwukwu mbuban? (Kpọ si ogugo .) (b) Kpasi ofifi ntap-me-mun̄ ke ebi ekenbe aran̄ ekikaan̄ si? (Kpọ okop “Ofifi Ntap-Me-Mun̄ Ebi Ekenbe Aran̄ Ekikaan̄.”)

¹⁴ Me erieen̄ eyi ekwukwu mbuban. Eji mibọkọ itap atikọ ofolek ekwukwu mbuban. Ikare ene mè iyaka ire okpọkọ me lek awaji ita me emen ge, kpan̄asi ikeya, ire unye Awaji okisa irọ mkpọ. Eji miriọọn̄ ibe ke Jioba isa ekwukwu mbuban itap ubọk inyi ebi nriran kan̄ ibe eriọọn̄ mkpọ ema ebetumu. Isa ekwukwu mbuban itap ubọk inyi ebi igege Baibul inyi ekọt ege mkpọ iweekbe ibe ema ege. (2 Pita 1:​20, 21) Eji mejit si irọrọ ijo inu omimin, bak lek eyi mokọt irọ ibe eji mè iyaka ire ntitiin̄ ekayaka ikaan̄ ekwukwu mbuban Awaji.​​—Efes 4:30.

15. Kubọk ogwu okakaan̄ ntap-me-mun̄, keke ore ntumu-mfieek kwun̄?

¹⁵ Ire okaan̄ ntap-me-mun̄, kweek nye kikeek lek kwun̄ inu orọrọ ntap-me-mun̄ okupbe ufiak mè kup nye kirọ use ochieekbe Jioba me mgbọ osabe lek kwun̄ inyi ọmọ mè ikaan̄ ntap-me-mun̄.c Ire, ire okakaan̄ ntap-me-mun̄ ye? Ire ikaan̄ mkpọ okitet owu ikaan̄ ni? Ibot usem ogọgọọk mokpa ubọk obokọt ikup inye ikirọ mkpọ obotap ubọk inyi owu okọt omin osoon̄ ikakaan̄ ntap-me-mun̄.