Jisọs Ikilook Etip Ofolek Ama Ubọọn̄ Awaji

Sọnja mgbọ iraraka me lek ntap-me-mun̄ kan̄, Jisọs obebene ikilook ibe: ‘Mkpulu eyi Awaji îkup mgbet.’ Ebi udun̄ kan̄ ekekigọọk ọmọ ikijijen̄e ikana Galili mè Judia. Mgbọ Jisọs okabe inu ama kan̄ me Najeret, ijeje isi uwu mbuban okup me ere ya, mè ichili ikpa Asaya mè isa me ubene ida ibene ikifuk ibe: ‘Jioba inyi emi ekwukwu mbuban kan̄ inyi nkọt nlook ata etip.’ Keke ke eya osibi? Isibi ibe ke okpan okpan inu orọrọ Jioba onyibe Jisọs ekwukwu mbuban ire inyi ikọt ilook ata etip Ama Ubọọn̄ ikerere ibe ke ebi ene ekiweek imumun̄ Jisọs okirọ ikwaan̄ ukechieen̄. Inenitumu inyi ebi ikigban̄ ọmọ ibe: ‘Chereyi, nriran yi irọ iso.’

Jisọs oneninan̄a isi agba okwaan̄ Galili, ere ichichinibe ene ini me lek ebi udun̄ kan̄, ebi irere ebi mbọm irin̄. Igwegwen ema ibe: ‘Ìna ìnigọọk emi ke mârọ inyi enyi ekana ebi ìkibọm mbọm itet-ene.’ Ema ire Pita, Anduru, Jemis, mè Jọn. Mgbọ yaage, ema etetele mbọm irin̄ kiban̄ mè igọọk Jisọs. Ema mije ikana otutuuk emen Galili ikilook etip ofolek Ama Ubọọn̄ Jioba. Ema milook ebi ene etip yi me lek oniin̄, me ere ewe, mè uwu ntitiin̄. Owuwa ebi ene ekekigọọk ema isi ere geelek ema ejebe inin̄. Etip ofolek Jisọs okekitaan̄ ikana otutuuk ere, ikerere me ido Siria.

Ike mgbọ ojebe, Jisọs onyinyi usini ebi udun̄ kan̄ unye isasa igwa orukan̄ mè unye isasa ilap ijo ekwukwu isibi me emen ene. Usini me lek kiban̄ egọgọọk ọmọ isi ikilook ata etip inan̄a me ama ile ire ama ile mè gwun̄ ama ire gwun̄ ama. Usini ebibaan̄ ebi igbegbe utoon̄-ejit, kubọk Meri ogwu Magidala, Juwana, Susana mè owuwa ofifi ebibaan̄, ekikpọ chieen̄ me lek Jisọs mè ebi udun̄ kan̄.

Eyi Jisọs okpukpobe ebi udun̄ kan̄ isan̄a, iraria ema isibi ibe esi elook ata etip. Ike ema ekije ikana Galili, owuwa ebi ofifi ife ekakana ebi udun̄ kan̄ mè ikaan̄ ntap-me-mun̄. Owuwa ebi ene miweek irere ebi udun̄ kè Jisọs, eya orọ Jisọs osabe ema itọt me lek uko okakan eberọkọ mè itumu ibe: ‘Ibeek Jioba ibe iria owuwa ebi ikwaan̄ itap me uko kan̄.’ Ike mgbọ ojebe, igogobo akọp ebi udun̄ kan̄ jaaba mè iria ema iba iba ibe esi elook ata etip ekana otutuuk Judia. Ema ejejeen̄ otutuuk ebi ife geelek mkpọ ofolek Ama Ubọọn̄ Awaji. Mgbọ ebi udun̄ kan̄ ekabe, ema esasa me uyok uyok ejit ikikpa inu obọbọkọ irek inyi Jisọs. Kpunu inu geege Yọk obokọt irọ isasa igban ikwaan̄ ilolook ata etip.

Jisọs imun̄ ijaan̄ ibe ke ebi udun̄ kan̄ mekup inye ikirọ ikwaan̄ okukup ufiak yi isi ifo emen inyọn̄. Itumu inyi ema ibe: ‘Ilook ata etip ikana otutuuk linyọn̄. Ijeen̄ ebi ene Usem Awaji, mè itap ema me mun̄.’