Jisọs Igwu Ikom Ifo Emen Inyọn̄

Jisọs ichichini ebi udun̄ kan̄ me Galili. Inyi ema ikan ge okukup ufiak enenen. Itumu inyi ema ibe: ‘Ije isi irọ inyi otutuuk ebi ido geelek ekana ebi udun̄ n̄a. Ijeen̄ ema inu njeen̄be enyi mè itap ema me mun̄.’ Inenichieek ema use ibe: ‘Makup melek kinyi mgbọ geelek.’

Mgbọ Jisọs ojomobe me mkpa, ikup me linyọn̄ iso akọp usen ini. Me okike mgbọ ya, ikakana isibi me isi efit efit ebi udun̄ kan̄ me Galili mè Jeruselem. Ijeen̄ ema owuwa inu nkween̄ okukup ufiak mè irọ owuwa inu ukechieen̄. Jisọs onenichichini ota mgbọ melek ebi otuchieen̄ kan̄ me inyọn̄ ogoon̄ Olifu. Itutumu inyi ema ibe: ‘Ikanan̄a me Jeruselem isibi. Ikup ikikpọ mgbọ Nte n̄a moriabe inu ichieekbe me use.’

Ebi otuchieen̄ kan̄ kpegobo itet mkpọ ikitumu. Ema edodo ọmọ ibe: ‘Ire omokana ogwu ubọọn̄ ebi Ijeren mgbọ keyi ni?’ Jisọs ofọfọọk ema ibe: ‘Ikarere mgbọ Jioba osun̄be ibe nkana ogwu ubọọn̄. Sọnja mgbọ, enyi mebọkọ unye ekwukwu mbuban mè ire ebi ata-ikọ n̄a. Ije isi ilook ata etip me Jeruselem, Judia, Sameria, mè ntutun̄ ere geelek me linyọn̄ keyi.’

Jisọs onenibene ikifo emen inyọn̄, ike ikije, oduku inyọn̄ okakana ọmọ ichit. Ebi udun̄ kan̄ ekpọkpọ igwuun̄ chieen̄ ikikpọ isinyọn̄, ire, Jisọs ifo.

Ebi udun̄ Jisọs enanan̄a me inyọn̄ ogoon̄ Olifu mè isi Jeruselem. Ema ekekititiin̄ mgbọ geelek me agwut ge okup me uwu inyọn̄ ge mè ikibeek uriaak. Ema ekup me ere ya ikikup ikpọ Jisọs ibe inyi ema ntọ-ubọk.