Ogwu Enenwaan̄ Okup me Otu Mudim

Eyi erọbe Ijọk Iraraka isan̄a, Jisọs mè ebi udun̄ kan̄ ekekigwu ikom ifo Galili. Jisọs otatap efuuk me agba lek ama Saika, ere udọn̄ mun̄ kè Jekọp okupbe. Ike ikitap efuuk me ere ya, ebi udun̄ kan̄ ejeje inin̄ emen ama ya isi ilep inorie.

Ogwu enenwaan̄ ge onunu inichibi mun̄ me udọn̄ mun̄ ya. Jisọs otutumu inyi ọmọ ibe: “Soso, che sọnja mudim nyi emi ǹnwọ.” Ogwu enenwaan̄ ya otutumu inyi ọmọ ibe: ‘Keke orọ okitumu usem inyi emi? Emi ire ogwu enenwaan̄ Sameria. Ebi Ju kpekigọọk ebi Sameria irọ mkpọ.’ Jisọs ofọfọọk ogwu enenwaan̄ ya ibe: ‘Ire oriọọn̄ ogwu emi nrebe, owu kè òbeek emi mudim eyi òkinyi ene ugwem.’ Ogwu enenwaan̄ ya ofọfọọk ọmọ ibe: ‘Inu otumube isibi keke? Okakaan̄ inu geege obosa ichibi mun̄.’ Jisọs otutumu inyi ogwu enenwaan̄ ya ibe: ‘Ebek ìkpoyaka irak ene geelek ònwọnwọ mun̄ eyi emi nkinyi.’ Ogwu enenwaan̄ ya otutumu ibe: “Ogwu Nte, nyi emi mun̄ ya ǹnwọ.”

Jisọs otutumu inyi ọmọ ibe: ‘Si gwen nlom kwun̄ na.’ Ogwu enenwaan̄ ya otutumu inyi Jisọs ibe: ‘Nkakaan̄ olom.’ Jisọs obebe ọmọ: ‘Owu otumu atikọ ibe ke òkakaan̄ olom. Mije, olom go ire echa okaan̄be. Ogwu okibat mgbọ keyi si ìkare nlom kwun̄. Eya orọ, ikọ otumube mgbọ yi ìre atalek atikọ.’ Ogwu enenwaan̄ ya otutumu inyi Jisọs ibe: ‘Emi mmun̄ ibe ke owu ìre ogwu nriran. Ebi n̄a echieek ibe ke eji mekọt itọbọ ebum inyi Awaji me inyọn̄ ogoon̄ keyi, ire, ebi Ju eyaka inibe ke îre Jeruselem gaalek ore ere otutuuk ene ebekitọbọ ebum inyi Awaji. Nriọọn̄ ibe ke ogwu Mesaya isinu, ke monijeen̄ eji ubọk eji ebesa itọbọ ebum inyi Awaji.’ Jisọs onenitumu inu ikawuwuuk lek itumu inyi ene geege, itumu ibe: ‘Emi nre ogwu Mesaya ya.’

Ogwu enenwaan̄ ya olilibi inin̄ emen ama, mè isi ikitumu inyi ebi Sameria ibe: ‘Ìna, ìnikpọ ogwu òkpakpa otutuuk inu geelek nrọbe me ugwem n̄a inyi emi. Ene yi ìkpolọlọ irere Ogwu Mesaya ya!’ Ema egọgọọk ọmọ isi udọn̄ mudim ya mè igban̄ ijejeen̄ kè Jisọs.

Ebi Sameria enenibe mè Jisọs ikup me ama kiban̄. Ikukup egwe iba ikijeen̄ ema mkpọ, owuwa ebi ene echechieek me lek kè Jisọs. Ema etutumu inyi ogwu enenwaan̄ Sameria ya ibe: ‘Mgbọ keyi eji esabe utọn̄ kiji gaalek inọ ikọ îtumube, eji michieek ibe ke ene yi ore ogwu unyan̄a ya òboninyan̄a otutuuk ebi linyọn̄ me atikọ.’