Jisọs Irọ Owuwa Inu Ukechieen̄

Jisọs inu inyọn̄ ijọn̄ yi inilook ata etip Ama Ubọọn̄. Me isasa ijeen̄ inu Jisọs oborọ kubọk ogwu ubọọn̄, Jioba inyi ọmọ ekwukwu mbuban kan̄ inyi ikọt irọ inu ukechieen̄. Kpunu orukan̄ geege eyi Jisọs ikakọtbe igwa. Me ere geelek isibe, ebi ikifiak orukan̄ ekinu me lek kan̄ inyi itap ubọk inyi ema, ọmọ si igwa otutuuk kiban̄. Ebi nnaan̄ mimọọn̄ inu, ebi inan minọ ikọ, ebi akọọk mije ije, inyan̄a si ebi ijo ekwukwu okisisaak. Ikerere ibe ke ire otu utọn̄ ofọnti kan̄ ke echak ubọk me lek, mekaan̄ igwagwa. Ebi ene ekigọgọọk Jisọs isi ere geelek isibe. Ikerere mgbọ ikiweek ikukup ọmọ gaalek, Jisọs ikarieen̄ ene geege.

Me mgbọ ge ebi ene esabe ogwu ngọm ge inu me uwu Jisọs okupbe, kpekọt inin̄ uwu ya bak lek, ebi ene ejojot me emen. Eya orọ, ema esisi inene inyọn̄ otoon̄-uwu ya, mè ichili nruruk me otoon̄-uwu ya itat me ere Jisọs okweekbe, mè iben ogwu ngọm ya itap itibi, mè igele ọmọ isiki iniyik me ijọn̄ me isi kè Jisọs. Jisọs onenitumu inyi ogwu enerieen̄ ya ibe: ‘Nan̄a keke, mè je ije.’ Ogwu enerieen̄ ya onanan̄a ikeke mgbọ yaage mè ibene ikije ije. Inu ya okeke chieen̄ ebi ikup me ere ya.

Ofifi mgbọ, ike Jisọs ojebe inin̄ gwun̄ ama ge, akọp ebirieen̄ ebi inyakpa okifiak ekekeke me ujọn̄ọ ere mè ikitaan̄ ukpo ibe: ‘Jisọs, soso tap ubọk nyi eji!’ Me mgbọ ya, kpekichieek ibe ebi inyakpa eje eriaak lek ebi ofifi ife. Jisọs otutumu inyi ebirieen̄ cha ibe eje esi uwu mbuban, ike ikan Jioba obe mè ebi inyakpa ekerọ esikaan̄ igwagwa. Me oniin̄ ije kiban̄, lek kiban̄ onyenye. Me mgbọ ene ge me lek ebi inyakpa cha omun̄be ibe ke lek kan̄ inye, igwugwu ikom initọn̄ Jisọs mè ikitọn̄ Awaji si. Me lek akọp ene cha, ọmọ gaalek onitọn̄ Jisọs.

Ogwu enenwaan̄ ge ofafiak orukan̄ iso akọp mè acha iba ichubọk iweek ikakaan̄ ngwa. Ineninu me udun̄ kè Jisọs me etete ogbogbo ebi ene mè ichak ubọk me lek otu utọn̄ ofọnti kè Jisọs. Mgbọ yaage, ikakaan̄ ngwa. Mgbọ inu ya orọbe, Jisọs ododo ibe: “Ìre ekene ochak emi ubọk me lek?” Ukpook otetet ogwu enenwaan̄ ya, ire, inan̄a isibi mè itumu atikọ inyi Jisọs. Jisọs okakat ọmọ ejit sa me itutumu ibe: ‘Gwun̄ enenwaan̄, fo me esuuk.’

Ogwu ibot uwu ntitiin̄ ge ekigwen Jairọs obebeek Jisọs ibe: ‘Na me uwu n̄a! Sọntiik gwun̄ n̄a enenwaan̄ monikwu.’ Ire, sabum Jisọs okọtbe ire uwu kè Jairọs, ogwu enenwaan̄ ya okwukwu. Mgbọ Jisọs orebe, imumun̄ ibe ke owuwa ebi ene minu inigọọk ebi ototun̄ ukan̄ ya ikito ito. Jisọs otutumu inyi ema ibe: ‘Ikayaka ìto ito! Gwun̄ enenwaan̄ ya ìkilalaak.’ Jisọs onenitet gwun̄ enenwaan̄ ya me ubọk, mè itumu inyi ibe: “Gwun̄ n̄a, nan̄a keke!” Inanan̄a ikeke mgbọ yaage mè ikweek irek, Jisọs onenitumu inyi nga mè nte gwun̄ ya ibe enyi ọmọ inọrie inyi irie. Keek-nu ubọk inu ya osa ikup me lek nga mè nte gwun̄ ya!