Ogwu Akọn̄ Ge mè Gwun̄ Enenwaan̄ Ge

Ikaan̄ gwun̄ enenwaan̄ Ijeren ge oluk me ido Siria mè iyaka ire Aram. Ere ya ijọn̄ọ ere me lek ama kan̄, mije, gwun̄ ya ire ogwu Ijeren. Ire ebi akọn̄ Siria etet gwun̄ enenwaan̄ Ijeren ya isan̄a me ubọk ebi ototun̄ ukan̄ kan̄ isa ifo Siria. Gwun̄ ya okakana ogwu usun̄ nwa kè Nieman ogwu ibot ebi akọn̄ Siria. Gwun̄ enenwaan̄ ya itọtọbọ ebum inyi Jioba ikerere ibe ke ebi ikup ikana ọmọ kpekiriaak Jioba.

Nieman ikifiak ijo orukan̄ ge ekigwen inyakpa eyi orọrọ ibe ikikaan̄ unaan̄ mgbọ geelek. Gwun̄ enenwaan̄ Ijeren ya ichubọk iweek itatap ubọk inyi Nieman. Ọmọ orọ, itutumu inyi nwa kè Nieman ibe: ‘Ikaan̄ ogwu enerieen̄ ge me Ijeren ekigwen Ilaisia. Ogwu enerieen̄ ya ire ogwu nriran Jioba. Nriọọn̄ ibe ke mokọt igwa orukan̄ nlom kwun̄.’

Nwa kè Nieman otutumu mkpọ gwun̄ enenwaan̄ ya otumube inyi ogwu olom. Nieman ibem lek irọrọ inu geelek ibokọt ufuna orukan̄ kan̄ ita, ọmọ orọ, isisi uwu kè Ilaisia me Ijeren. Nieman ikaan̄ me nkeek ibe ke Ilaisia mobọkọ ogọt itap kubọk ogwu omimin ene. Ire, kpan̄asi Ilaisia obosibi inigọọk ogot ikpa ikọ isi mè isi, iria ogwu usun̄ kan̄ ibe isi itọp Nieman amọn mè ilook ogọt etip ibe: ‘Si gwọk lek kwun̄ me emen okwaan̄ Jodan mgbọ jaaba, ke lek kwun̄ monye.’

Eyi inaan̄ Nieman enenen. Nieman okekitumu ibe: ‘Nkikeek ibe ke ibokpọkpọ inan̄a isibi inikeke me isi n̄a, mè igwen erieen̄ Awaji kan̄, mè iwuwum ubọk kan̄ me ere inyakpa cha okupbe, otutuuk motata. Kpan̄asi ikeya, ibe emi nsi Ijeren nsi ngwọk lek me mun̄ okwaan̄ ge me Ijeren. Ire mun̄ okwaan̄ okup me Siria ikanwọn igak otutuuk mun̄ geelek okup me Ijeren? Ire kpamakọt isi irọn̄ me emen kiban̄ igwọk lek, mè lek n̄a otana?’ Isasa me unaan̄-ejit igwu ikom ikije ifo.

Ebi usun̄ Nieman mitap ubọk inen̄e nkeek Nieman isun̄ ijaan̄. Ema edo ọmọ ibe: ‘Ire okporọ inu geelek ebe owu orọ inyi lek kwun̄ inye ni? Inu ogwu nriran yi obe mè owu orọ ire sọntiik inu, soso rọ ma.’ Nieman ogbagban̄ ikọ kiban̄ mè isi igwọk lek mgbọ jaaba me okwaan̄ Jodan. Mgbọ Nieman ogwọkbe lek mgbọ jaaba me okwaan̄ ya isan̄a, lek kan̄ onyenye. Nieman ibele ejit mije lek kan̄ onyebe mè igwu ikom isi itọn̄ Ilaisia. Nieman itumu inyi Ilaisia ibe: ‘Nnichieek mgbọ keyi ibe ke Jioba ire ata Awaji.’ Me nkeek kwun̄, ike owa ke igwagwa kè Nieman okup me lek gwun̄ enenwaan̄ Ijeren ya?