Jeen̄ Iriọọn̄-Inu Inyi Inu Ije Ijaan̄ Me Lek Kwun̄

1-2. Keke ore iriọọn̄-inu, ike owa ke ibokọt itap ubọk inyi eji?

IRE iwuuk lek ikup owu me lek kubọk kpejeen̄ owu ulibi ni? Ire miwuuk lek isibi oyerebet ifeen̄ owu mè iyaka ire irọ owu ilọ ni? Ire owuuk lek ichichini irek orọrọ ibe otet ukpook ni? Ikakifet irọrọ mè iyaka ire itumu mkpọ onwọnwọn me mbet lek irek okup ikechi. Baibul inyi eji ata nteme ofolek inu eji eberọ me irek chi mè ofifi ofifi irek si.

² Eji ekijeen̄ iriọọn̄-inu me mgbọ eji ekidasi iweek iriọọn̄ mkpọ orọrọ inu ge obọkọbe irek mè iyaka ire, mkpọ orọrọ ene orọbe mkpọ sabum eji enerọ ntumu-mfieek. Iriọọn̄-inu motap ubọk inyi eji ekerọ mkpọ otatat. Kubọk inu njeen̄, motap ubọk inyi eji eriọọn̄ mgbọ eji ebetumu ikọ mè mgbọ eji eberiaan̄ ere. (Urọk 10:19; Itọn̄ 4:4) Mokọt itap ubọk inyi eji ekọt ekup dii me mgbọ eji ekinaan̄ ejit mè ekekpọ chieen̄ elọ me lek nrọ-nlọ. Mokọt itap ubọk inyi eji ekebọkọ nteme mè nnen̄e-nsun̄ etap. (Urọk 19:20) Ire eji ikaan̄ iriọọn̄-inu, eji mekitumu usem mè ikirọ inu obokibele Jioba ejit. Eji melek ebi eji ekigọọk irọ mkpọ mekaan̄ oruru si. Me mgbọ eji ekup me irek oyọyọt eyi obokọt irọ ibe eji enaan̄ ejit, eji kpebenaan̄ ejit ire lek eji merọbe mkpọ ikatatge. Eji enekpọ-nu mfufuk ita me Baibul okijeen̄ ubọk iriọọn̄-inu obokọt itap ubọk inyi eji ekesiki lek, ekekup dii mè ekeyaka lek emaan̄ me lek Jioba.

KAAN̄ USIKILEK KPAN̄ASI UGUMU

3. Ire ekene ore Nieman?

³ Inyi eji ekọt ekerọ ejaan̄ me atikọ, ikup ufiak ibe eji ejit ugumulek. (1 Pita 5:5) Iriọọn̄-inu mokọt itap ubọk inyi eji ekerọ ikeya. Kpa ubọk ni? Kpọ-nu akpat ukot kè Nieman. Iluk me Siria, ido okup me agan̄ inyọn̄ me ido Ijeren. Nieman ire ogwu osisibi isi, mè ire ogwu ibot akọn̄ ebi Siria. Ire, ikaan̄ ijo orukan̄ ge okifiak ọmọ, orere, orukan̄ inyakpa.​—2 Ubọọn̄ 5:1.

4. Ike owa ke Nieman osa ijeen̄ iriọọn̄-inu?

⁴ Gwun̄ enenwaan̄ Ijeren ge orere ogwu usun̄ nwa kè Nieman itumu inyi ọmọ ibe ke ikaan̄ ogwu nriran ge me Ijeren ogwu obokọt igwa orukan̄ ogwu olom. (2 Ubọọn̄ 5:​2, 3) Nieman kè okọt okeek ibe ‘Ire gwun̄ usun̄ enenwaan̄ yi mokọt ikaan ata mkpọ ge ibokọt itumu inyi emi ni?’ Ire, Nieman isa iriọọn̄-inu irọ mkpọ. Kpan̄asi isasa me ugumulek ijit otutuuk ikọ gwun̄ usun̄ enenwaan̄ ya otumube, isa me nsikilek imọnọ usem ya isun̄ isi uyọt. Ibọkọ unye me ubọk ogwu ubọọn̄ Siria inyi ọmọ ikọt isi Ijeren isi iweek ngwa inyi orukan̄ kan̄.​—2 Ubọọn̄ 5:​4, 5.

5. Keke orọ Nieman me mgbọ irebe ama Ijeren?

⁵ Nieman isi lek Jeyoram ogwu ubọọn̄ ebi Ijeren inyi ọmọ ikaan̄ ngwa inyi orukan̄ inyakpa kan̄. Ire, Jeyoram ikikeek ibe ke ogwu ubọọn̄ ebi Siria ikiweek ikọ me lek kan̄. Mgbọ Ilaisia ogwu nriran onọbe ibe ke Nieman inu, itutumu inyi ogwu ubọọn̄ Jeyoram ibe iria Nieman inu lek kan̄. (2 Ubọọn̄ 5:​6-9) Ire, mkpọ ikabọkọ irek ubọk Nieman okeekbe. Ilaisia ikasibi me uwu kan̄ inibọkọ ọmọ itap, mè iyaka ire itumu ikọ inyi ọmọ. Kpan̄asi ikeya, iria ogwu ikwaan̄ kan̄ ibe isi itumu inyi Nieman mkpọ iborọ.​—2 Ubọọn̄ 5:10.

6. (a) Keke orọ Nieman ikaweek igọgọọk ntọ-ubọk Ilaisia onyibe ọmọ? (b) Ike owa ke ebi usun̄ Nieman esa ijeen̄ iriọọn̄-inu, keke ke eya osan̄a isibi? (Ebi Ubọọn̄ Eyi Òso Iba 5:​13, 14)

⁶ Me adasi mgbọ, Nieman ikagọọk ntọ-ubọk Ilaisia onyibe ọmọ. “Isasa me unaan̄-ejit igwu ikom ikije ifo.” (2 Ubọọn̄ 5:​11, 12) Bak me lek keke ni? Mokọt ire ibe ke Nieman ikikeek ibe ke Ilaisia ikanyi ọmọ mbet lek ulibi ogbegbe ọmọ kubọk ogwu ibot akọn̄ ebi Siria. Mokọt ikikeek si ibe ke ntọ-ubọk Ilaisia onyibe ọmọ ikajeen̄ ulibi inyi ido Siria. Eya ọrọ, Nieman ojijit irọrọ inu oborọ ibe ọmọ ikaan̄ ngwa mè igwu ikom ikifo uwu kan̄. Ire, ebi usun̄ Nieman migobo itet ibe ke Ilaisia ichubọk iweek itatap ubọk inyi ọmọ, eya orọ, ema ebebeek ọmọ ibe inwene ejit kan̄. Nieman osasa me iriọọn̄-inu ijit ugumulek kan̄ mè isiki lek igọọk ntọ-ubọk Ilaisia, ikakaan̄ ngwa!​—Fuk Ebi Ubọọn̄ Eyi Òso Iba 5:​13, 14.

7. Keke ke eji ebekọt ikween̄ me lek akpat ukot Nieman? (Urọk 22:4) (Kpọ si ogugo chi.)

⁷ Keke ke eji ebekọt ikween̄ me lek mfufuk yi? Ubọk eji ekimun̄ mè iyaka ire ikigobo mkpọ itet ikakitat isan̄a, eya orọ, sabum eji merọ mkpọ, ikup ufiak ibe eji eriọọn̄ ubọk ekeek mkpọ ofolek inu eji eberọ ya. Eji kpekichieek si ibe ubọk eji ekimun̄ mkpọ ikaan̄ mgbaan̄ me lek ntumu-mfieek kiji. Iriọọn̄-inu si ikibieen̄ eji ibe eji ekesiki lek. Ogwu osisiki lek iriọọn̄ ibe ke ọmọ ikariọọn̄ otutuuk mkpọ isan̄a. Ire ikaan̄ inu eyi eji ekagobobe itet, eji mekọt iweek ntap-ubọk ebi bọn ute irieen̄ mè ibaan̄. Ire, eyi ogagak, eji mekọt iweek ntap-ubọk Jioba. Ikerere ibe ke Nieman ikarọriọọn̄ Jioba ijaan̄, ijeen̄ iriọọn̄-inu mè isiki lek igban̄ mkpọ gwun̄ usun̄ ogwu nwa otumube, igban̄ si eyi ebi usun̄ kan̄ mè Ilaisia etumube. Nieman itetele ugumu kan̄. Bak lek eyi, irọ ata ntumu-mfieek mè ikaan̄ igwagwa si. Sabum eji merọ inu ge mè iyaka ire itumu ikọ, igbe ibe eji ekeek mkpọ osilek. Kubọk inu njeen̄, mekọt inyi eji nteme me emen Baibul eyi eji ekachieekge me lek mè iyaka ire, ntọ-ubọk ge me ntitiin̄ eyi eji ekagobobe itet. Me mbet irek okup ikeya, igbe ibe eji eriọọn̄ ubọk ekeek ejaan̄ ubọk eji eberọ eru, mè ire eji mesiki lek sa eji kpesiki.​—Fuk Urọk 22:4.

KUP DII KPAN̄ASI OBONAAN̄ EJIT

8. Me mbet irek okukup ke ikiyọt eji me lek ikukup dii?

⁸ Eji esichichini irek oyọyọt, iriọọn̄-inu motap ubọk inyi eji ekọt ekup dii kpan̄asi eji ebenaan̄ ejit. Me atikọ, ikakimalek ifet ikukup dii, ogak ge, me mgbọ ene orọbe eji nnaan̄ me lek. (Efes 4:26) Kpọ-nu ubọk Debit mè Abigen ejeen̄be iriọọn̄-inu me irek okukup uyọt uyọt.

9. Ike owa ke Naban orọ eru melek Debit?

⁹ Kpọ-nu irek yi: Debit mè ebi melek kan̄ elet me emen èwê Paran. (1 Sam 25:1) Eyi ema ekupbe me ere ya, ema mikpọ chieen̄ me lek arọọn̄ ogwu enerieen̄ obọbọọn̄ ubọọn̄ ge ekigwen Naban mè ebi ikikpukpo arọọn̄ cha. (1 Sam 25:​15, 16) Mgbọ mgbọ ekisọp inwọọn̄ me lek arọọn̄ okembe, Debit oraria usini ebirieen̄ isi lek Naban. Itumu inyi ema ibe etọp Naban amọn mè ebeek ọmọ inorie. (1 Sam 25:​6-8) Ire, Naban ikatọn̄ Debit mè ebi melek kan̄ me lek mkpọ ema erọbe inyi ọmọ. Kpan̄asi ikeya, itutumu ijo ikọ mè itiik Debit mè ebi melek kan̄.​—1 Sam 25:​10, 11.

10. Ike owa ke Debit mè Abigen esa ijeen̄ iriọọn̄-inu? (Samuel Eyi Adasi 25:​32, 33) (Kpọ si ogugo.)

¹⁰ Ire okup me mbet lek irek kè Debit, ibokukup owu me lek? Kpunu che che ibe ke Debit monaan̄ ejit. Inaan̄ ejit ire lek iweekbe ikpakpan̄ Naban! (1 Sam 25:​13, 21, 22) Ire, Abigen nwa kè Naban isa iriọọn̄-inu ikput Debit mè ebi melek kan̄ ibe ekakpan̄ ogwu olom. Keke orọ Abigen orọbe ikeya? Igobo itet ibe ke Debit ikare ijo ene ikerere ibe ke inanaan̄ ejit. Eya orọ iweekbe irọrọ inu ibokọt isasa itap ubọk inyi Debit ikọt ikup dii mè irọ ata ntumu-mfieek. Iche owuwa ata mkpọ inyi Debit mè inyi ọmọ ata nteme si. (1 Sam 25:​18, 23-31) Debit ijeen̄ ibe ke ọmọ ikaan̄ iriọọn̄-inu mè igban̄ utọn̄ me lek ikọ kè Abigen mije, inimun̄ ibe ke ikọ kè Abigen ije igọọk me lek nkeek Jioba. Me nkana-ngwook, unaan̄-ejit Debit ogegele. Ikayaka irọ ijo inu eyi iwuukbe ikaan̄ me ejit irọrọ.​—Fuk Samien Eyi Adasi 25:​32, 33.

11. Ike owa ke iriọọn̄-inu obotap ubọk inyi eji me mgbọ eji ekinaan̄ ejit? (Urọk 19:11)

¹¹ Keke ke eji ebekọt ikween̄ me lek mfufuk yi? Iriọọn̄-inu motap ubọk inyi eji ekesa me esuuk erọ inu, ikerere me mgbọ erọbe eji mkpọ ogbegbe ibe eji enaan̄ ejit. Ire eji ekeek inu oborọ ire eji esa me unaan̄-ejit itumu usem mè iyaka ire irọ mkpọ, motap ubọk inyi eji ekọt ekup dii mè erọ ata ntumu-mfieek. (Fuk Urọk 19:11.) Me mgbọ Abigen okeekbe Debit ubọk inu iborọ obosa ikup me lek Jioba, Debit ikayaka irọ inu ikaan̄be me ejit. Ire ikaan̄ mkpọ mè iyaka ire ogwu orọrọ ibe onaan̄ ejit, jit irọrọ mkpọ igọọk me lek unaan̄-ejit kwun̄. (Jemis 1:19) Si lek Jioba me uriaak mè nyi lek kwun̄ mgbọ isasa ikeek mkpọ ofolek inu ya, eyi mokọt itap ubọk inyi owu okup dii.

12. Ike owa ke ebi ofifi ife ebekọt itap ubọk inyi eji ekaan̄ iriọọn̄-inu mè ekup dii?

¹² Jioba isa Abigen itap ubọk irọ inyi Debit ikọt ikup dii mè igobo itet ubọk ọmọ okimun̄ mkpọ, ikeya si ke ibokọt isa ebi bọn ute irieen̄ mè ibaan̄ me chereyi itap ubọk irọ inyi eji ekọt emun̄ mkpọ ubọk ọmọ okimun̄. Eya orọ, me mgbọ okinaan̄ ejit, sa mè tumu ikọ melek gwun̄ ute ge ogwu omimin inin̄ ene, ogwu obokọt itap ubọk inyi owu okomun̄ mkpọ ubọk Jioba okimun̄. (Urọk 12:15; 20:18) Ire okaan̄ irek ikọkọt itap ubọk inyi ogwu unene kwun̄ me mbet irek okup ikeyi, ire omokọt igọọk akpat ukot Abigen ni? Ire omokọt itap ubọk inyi ogwu unene kwun̄ ikọt iriọọn̄ nkeek Jioba ni? Jioba motap ubọk inyi owu okọt okoneen̄ usem kwun̄ me oniin̄ eyi obokitap ubọk inyi ebi ofifi ife.

TOON̄ EJIT ME LEK JIOBA OSIKIKAAN̄ UKPOOK

13. Ike owa ke ikakaan̄ iriọọn̄-inu obokọt itap ubọk inyi eji me mgbọ eji ekitet ukpook ni?

¹³ Usini mgbọ, eji mikichichini irek okitet eji ukpook. Ire, ire eji ikeek ubọk unye Jioba osa ibene isaba unye ene geelek mè mkpọ geelek, eyi mokọt itap ubọk irọ inyi eji etoon̄ ejit me lek kan̄ ikerere me mgbọ eji ekitet ukpook. (Itọn̄ 27:1) Jioba mokọt itap ubọk inyi eji me irek geelek, ikerere me irek okup kubọk kpunu ikpọchieen̄ geege. Eyi ichubọk ire mkpọ orọrọ ogwu nriran Jona. Ima Jioba enenen, ire, ukpook itet ọmọ me mgbọ Jioba oriabe ọmọ ikwaan̄ ge okukup uyọt uyọt.

14. Keke orọ Jona okaan̄be ukpook irọrọ ikwaan̄ Jioba oriabe ọmọ?

¹⁴ Jioba ibe mè Jona irọ ikwaan̄ ge okukup uyọt uyọt. Ibe mè Jona isi itumu inyi ebi ama Ninife ibe ke ọmọ mofiat ema. (Jona 1:​1, 2) Ibokukup owu me lek mebe ke ire owu ke Jioba oria ikwaan̄ yi? Ire ukot ukot ke Jona oboje inan̄a me Ijeren ire ama Ninife me mkpọ oboso onyan̄ ge. Jona ibolook etip yi inyi ebi ama Ninife, ebi eriọọn̄be kubọk ebi afa. Egwen Ninife “ama eje ene onin̄be chieen̄.” (Nawum 3:​1, 7) Kpan̄asi irọrọ ikwaan̄ Jioba oriabe ọmọ, Jona olilibi.​—Jona 1:3.

15. Keke orọ ibe utoon̄-ejit Jona okaan̄be me lek Jioba inye igbaalek? (Jona 2:​6-9)

¹⁵ Jona inin̄ uji ile ge okisi ama ojọjọn̄ọ ere me lek Ninife. Etọtọp ọmọ itap me emen okwaan̄ ile, Jioba onyanyan̄a ọmọ. Eyi ikeek ọmọ mbet lek ikpele unye Jioba okaan̄be. (Jona 1:​15, 17) Jona inimun̄ ibe ke ikagbe ibe ọmọ ikitet ukpook isisi ama Ninife bak me lek, Jioba mobem ọmọ. (Fuk Jona 2:​6-9.) Mgbọ Jioba okpọkbe inyi ọmọ ofifi irek isisi ikwaan̄ ya, Jona ikayaka ijit. Isi ilook ebi Ninife etip ya, ebi ife cha egbagban̄ utọn̄ me lek ikọ kan̄, inwene mè ikaan̄ unyan̄a.​—Jona 3:5.

16. Keke obokọt itap ubọk inyi eji me mgbọ eji ekitet ukpook? (Urọk 29:25) (Kpọ si ogugo chi.)

¹⁶ Keke ke eji ebekọt ikween̄ me lek mfufuk yi? Eji kpeweek ibe ukpook mkpọ ebilene ebekọt irọ eji irọ inyi eji ekpaka ibot enyi Jioba. (Fuk Urọk 29:25.) Jona igwu nkeek ikom me lek otutuuk mkpọ obọbọkọ irek mè inimun̄ ibe kpan̄asi ikekisisiaak lek kan̄ ofolek mkpọ obokọt irọ ọmọ, igbe ibe ọmọ ikeek ibe ke Jioba motap ubọk inyi ọmọ. Eji si kpebeyaka itet ukpook ire eji igwu nkeek ikom me lek ubọk Jioba osabe itap ubọk inyi eji mè iban eji me mgbọ oraraka. Eji mekọt igwu nkeek ikom si me lek ubọk Jioba osabe itap ubọk inyi ebi bọn nte kiji me irek oyọyọt enenen bak me lek ema eyakabe lek imaan̄ me lek kan̄.a (Iburu 13:6) Kè eji ekup enye ekejeen̄ iriọọn̄-inu sa me itotoon̄ ejit inye me lek Jioba mè itatap ubọk inyi ebi ofifi ife inyi ekọt ekerọ ikeya si.

KWEEN̄ IKEKIKEEK MKPỌ UBỌK JIOBA OKIKEEK

17. Keke obokọt itap ubọk inyi eji ekọt ekekween̄ ikekeek mkpọ kubọk Jioba?

¹⁷ Ike eji ekpabe, iriọọn̄-inu mokọt itap ubọk inyi eji ekọt erọ mkpọ otatat me irek oyọyọt. Ike owa ke eji ebekọt isa ikaan̄ iriọọn-inu igbaalek? Jioba, Awaji ogwu okakaan̄ iriọọn̄-inu ichit ikinyi ebi ikitọbọ ebum inyi ọmọ iriọọn-inu itibi me usem kan̄ mè ekwukwu mbuban kan̄. (Neyem 9:20; Itọn̄ 32:8) Ikinyi eji nteme echi obotap ubọk inyi eji ekọt ekerọ ata ntumu-mfieek. (Itọn̄ 119:​97-101) Eji ekikaan̄ iriọọn̄-inu ike eji ekisa me ugbalachieen̄ ikikween̄ inu Baibul okitumu mè ikibeek Jioba ibe inyi eji ekwukwu mbuban kan̄. Eyi motap ubọk inyi eji ekemun̄ mkpọ ike Jioba okimun̄ mè eketumu usem mè ekerọ mkpọ me oniin̄ ojeje ikike me lek nkeek Jioba.​—Urọk 21:11.

18. Keke ke otumu ifieek irọrọ?

¹⁸ Kè eji ekup enye ekekween̄ mè ekemọnọ ebene iriọọn̄-inu okinan̄a me ubọk Jioba. (Itọn̄ 14:2) Ire eji ikirọ ikeya, eji kpebetele “oniin̄ ebi ìriọọn̄ lek.” (Urọk 21:16) Kpan̄asi ikeya, eji metumu ifieek ibe ke eji mekijeen̄ iriọọn̄-inu me mgbọ geelek mè irek geelek. Eyi morọ ibe inu ikije ijaan̄ eji me lek.