Uji Akọn̄ Jioba Okilomo Kubọk Ukan̄

Ben-Adadi ogwu ubọọn̄ Siria mè iyaka ire Aram, ikpọkpọk ikiweek ititim akọn̄ me lek ebi Ijeren. Ire, mgbọ geelek Ben-Adadi isitọt ubọk ọmọ mè ebi akọn̄ kan̄ ebesi itim akọn̄ me lek ebi Ijeren, ogwu nriran Ilaisia ira itumu inyi ogwu ubọọn̄ Ijeren ere ema ebeje inu. Mije keya, Ben-Adadi ikakọt itet ogwu ubọọn̄ Ijeren. Ben-Adadi onenitumu ifieek itetet Ilaisia. Mgbọ inọbe ibe ke Ilaisia ikup me ama Dotan, ineniria ebi akọn̄ kan̄ ibe esi etet Ilaisia.

Ebi akọn̄ Siria cha enunu me Dotan me eririeen̄. Me ofit iwele kan̄, ogwu usun̄ kè Ilaisia osisibi oyet mè imun̄ ibe ke owuwa ebi akọn̄ mikup ikana ama Dotan. Ukpook otetet ogwu usun̄ kè Ilaisia, itataan̄ ukpo ibe: ‘Keke ke eji eberọ ni?’ Ilaisia otutumu inyi ọmọ ibe: ‘Kafieek owot, ebi ikup melek kiji miwa igak ebi ikup melek kiban̄.’ Jioba onenichili chieen̄ gwun̄ uwu kè Ilaisia, imumun̄ ogbogbo inyinya melek uji akọn̄ okilomo kubọk ukan̄ ojotbe otutuuk inyọn̄ orioon̄ ya ogbagban ikana Ilaisia okokop.

Mgbọ ebi akọn̄ cha ebenitet Ilaisia, ibebeek Jioba ibe: ‘Soso tap ebi ife chi nnaan̄.’ Mgbọ yaage, ebi akọn̄ cha kpeyaka iriọọn̄ ere ema ekupbe ikerere ibe ke ema mekimọọn̄ inu. Ilaisia otutumu inyi ebi akọn̄ cha ibe: ‘Ikare ama keyi ke enyi menin̄. Ina, ke masa enyi isi ijeen̄ ogwu enyi ekiweek.’ Ema egọgọọk Ilaisia ije isi Sameria, ere ogwu ubọọn̄ Ijeren okiluk.

Sabum ema eninọ lek mè iriọọn̄ ere ema ekupbe, kpunu inu geege ebeyaka irọ. Ogwu ubọọn̄ Ijeren ododo Ilaisia ibe: ‘Ire mkpan̄ ife chi?’ Ire Ilaisia isa irek ya irọ ebi akọn̄ cha useen̄ ijo inu ema ekiweek irọrọ ọmọ ni? In̄-in̄. Kpan̄asi ikeya, Ilaisia itumu ibe: ‘Kakpan̄ ema. Nyi ema inorie, mè tele ibe egwu ekom efo.’ Ogwu ubọọn̄ Ijeren onenito ikpele ijọk inyi ema mè iria ema ifo.