‘Zaˬ deuˬ˗aˬ, Yeˬhawˇbaˬ Miˬyehˇ neh biꞈ˗euˬ jeˬ biˇ pyeuꞈ’

Jeˬ biˇ lehˇ ehˇ naˇ, nawˬ˗ahˇ aˬ jeˬ˗ahˇ noeˬ mawˇ laˇ nya? Pyuˇ, iˇ kahˇ maˬ ngeuˇ naˇ tiˬ gʼaˬ saˇ˗i tiˬ gʼaˬ geuꞈ ka le˗euˬ aˇ poeˬ baw˗eu myawˬ tiˬ hmˬ˗ahˇ noeˬ mawˇ laˇ˗eu maˬ ngeuˇ nya loˇ? Aˬ joˆ˗ehˇ gʼeh˗eu jeˬ biˇ maˬ kaˬ, aˬ dui aˇ poeˬ taˬ baw˗awˇ haw saˆ˗eu yaw duˬ baw meh.

Jaˇliꞈ˗ahˇ ‘Zaˬ deuˬ˗aˬ, Yeˬhawˇbaˬ Miˬyehˇ neh biꞈ˗euˬ jeˬ biˇ pyeuꞈ’ meh lehˇ ehˇ taˬ˗euˬ meh. (Ja ceuˬ 127:3, BY18) Ka li zaˬ pyeuꞈ˗eu aˬ da aˬ ma deuˬ zaˬ heu naˇ, Yeˬhawˇbaˬ neh biꞈ˗euˬ aˇ poeˬ baw dui dui˗eu laꞈ sawˬ pyeuꞈ meh lehˇ haw˗eu meh. Teu miˇ neh aˬ da aˬ ma deuˬ zaˬ deuˬ˗ahˇ kʼaˇ gʼeh nya gaˇ neh nui jah paw maˬ ehˇ, nui ma paw maˬ ehˇ, gʼawˇ mawˇ paw maˬ ehˇ, jawˇ saˇ doˆ ni ngehˬ gʼeh nehˬ mawꞈ˗eu meh.

Ehˇ kʼawꞈ nui ma nyiˇ laˇ paˬ˗ehˇ gʼeh˗eu tiˬ jeˬ naˇ, aˬ da aˬ ma tiˬ deuˬ na zaˬ heu naˇ, Miˬyehˇ neh biꞈ˗euˬ laꞈ sawˬ pyeuꞈ˗eu lehˇ maˬ haw˗a. (Iˇsaˬyaˇ 49:15; 2 Tiˆmoˇseˬ 3:1-3) Aˬ da aˬ ma dzaˇ˗i tiˬ deuˬ na jiˇ zaˬ˗ahˇ yaw muiˬ˗ehˇ ngehˬ gʼeh nehˬ mawꞈ kʼawꞈ, shaˬ zahˬ gʼawˬ mya jeˬ baˬ da neh maˬ ngehˬ gʼeh nehˬ nya ni gʼeh˗eu meh. Aˬ jeˬ jeˇ˗euˬ shaˬ zahˬ˗ahˇ ya puˬ˗eu nga? Yeˬhawˇbaˬ aˬ da aˬ ma deuˬ˗ahˇ aˬ jeˬ bi jahˇ mawꞈ˗eu nga? Aˬ da aˬ ma deuˬ zaˬ˗ahˇ yaw muiˬ˗ehˇ cu bym nya˗eu gʼaˇ duˬ aˬ jeˬ ya jahˇ˗eu nga?

Shaˬ zahˬ

Nymˇ jiˇ laꞈ kʼoeˇ˗euˬ deuˬ hawˇ˗eu aˬ cawˬ deuˬ ciˬ suꞈ laˇ˗eu. Jawˇ kʼahˬ tiˬ kʼahˬ na˗ahˇ zaˬ gʼawˬ mya ni jawˇ˗eu aˬ da aˬ ma deuˬ˗ahˇ yaw zeu baw˗eu meh. Teu miˇ neh miˬ sawˇ yo zaˬ deuˬ yawˬ ha maˬ behˬ leˇ gaˇ keuˆ ni zaˬ yuˇ ni nymˇ jiˇ laꞈ kʼoeˇ˗euˬ deuˬ hawˇ˗eu nymˇ kaˬ taꞈ˗eu deuˬ neh ciˬ suꞈ laˇ gaˇ ya daˬ˗eu meh.
Mehˬ hu paw˗euˬ gaˇ kawˆ˗ahˇ kʼahˬ lahˇ˗eu. Tiˬ kʼahˬ na˗ahˇ naˇ, mehꞈ˗eu shuꞈ˗eu jeˬ hawˇ˗eu naˇ gawˇ paˇ jaˆ gaˇ, jaˆ gʼaˬ jaˆ luˇ jiˇ maˬ kuꞈ˗eu miˇ neh zaˬ yaw kʼaˆ˗ehˇ maˬ dehꞈ iˇ˗a lehˇ noeˬ˗awˇ, zaˬ tiˬ gʼaˬ maˬ ngeuˇ naˇ tiˬ gʼaˬ bi dzeuˇ˗eu gʼaˇ duˬ gʼawˬ mya ni baw˗eu meh. Tiˬ kʼahˬ na˗ahˇ naˇ jiˇ, miˇ kʼahˬ sahˬ paˬ sahˬ ma deuˬ tsawˇ mawˬ˗ahˇ caw ba˗eu jeˬ maˬ jaˆ˗eu miˇ neh zaˬ deuˬ neh bi cu˗eu lehˇ noeˬ˗awˇ gʼawˬ mya ni baw˗eu meh.
Nymˇ jiˇ˗euˬ bawˬ toˆ. Jawˇ kʼahˬ tiˬ kʼahˬ na˗ahˇ naˇ, zaˬ baw kaˇ ni aˬ joˆ˗ehˇ ya jahˇ˗a lehˇ maˬ siˬ nya˗a. Tiˬ deuˬ na naˇ, yaw kʼaˆ˗ehˇ maˬ muiˬ˗eu zaˬ kaˬ laˆ kaˇ˗eu jaˆ gʼaˬ teu dzaˬ naˇ mawˇ do˗ahˇ lehˬ laˇ ca laˇ gaˇ guˆ˗eu meh. Jawˇ kʼahˬ tiˬ kʼahˬ na˗ahˇ naˇ, zaˬ kaˬ laˆ kaˇ˗eu jaˆ gʼaˬ teu aˇ dzehˬ˗ehˇ poeˬ˗eu miˇ neh maˬ zeuˇ tsehˆ nya˗a.a

Yeˬhawˇbaˬ aˬ da aˬ ma deuˬ˗ahˇ aˬ jeˬ bi jahˇ mawꞈ˗eu nga?

Nymˇ jiˇ tiˬ jiˇ aˇ yehˆ yaˇ kmˇ˗ahˇ tiˬ kawˆ loꞈ˗ehˇ laˬ kʼaˬ tiˬ cehˇ jawˇ luꞈ. Aˬ da gʼaˬ, aˬ buˇ zaˬ yawˬ ha˗euˬ nui ma laꞈ kʼoeˇ pyeuꞈ luꞈ˗eu jeˬ dzawˇ nehˬ luꞈ gaˇ yaw muiˬ˗ehˇ naˇ haˬ luꞈ. Aˬ ma gʼaˬ naˇ, aˬ li zaˬ nehˬ˗ehˇ baw duiˇ biˬ niˇ gʼa luꞈ. — Zaˬ aˬ yawꞈ gʼaˬ yawꞈ˗ahˇ aˇ yamˬ biꞈ

Zaˬ deuˬ loˬ˗eu jeˬ jaˆ ni ngehˬ gʼeh nehˬ. Yeˬhawˇbaˬ aˬ da aˬ ma deuˬ˗ahˇ yawˬ ha˗euˬ zaˬ˗ahˇ mˇ cu˗eu gaˇ biꞈ taˬ˗euˬ meh. Aˬ yawꞈ zaˬ deuˬ dzaˬ˗eu dawˇ˗eu, dm˗eu gʼaˬ˗eu, dehꞈ˗eu jawˇ˗eu jaˆ ni bi ngehˬ gʼeh mawꞈ˗awˇ, zaˬ˗ahˇ jiˇ bi mehˬ bi tsoˆ mawꞈ˗eu meh. Teu miˇ neh aˬ da aˬ ma deuˬ zaˬ deuˬ˗ahˇ sahˬ boꞈ dzaw nymˇ˗ahˇ sahˬ boꞈ bi dzaw iˇ˗eu tehꞈ˗ehˇ maˬ ngeuˇ˗eu aˬ da aˬ ma nehˬ˗ehˇ jawˇ ngeh jiˇ, zaˬ deuˬ huiˬ laˇ ngeh mˇ dzaˬ kawꞈ dawˇ nya˗eu zaˬ siˬ nui gahˇ hawˇ˗eu mˇ jeˬ shaˇ kawˆ deuˬ ya mehˬ nehˬ taˬ˗eu meh. Zaˬ deuˬ˗ahˇ nui gaˬ ya biꞈ nehˬ˗awˇ, yaw muiˬ˗ehˇ ya haw piˇ nehˬ˗eu meh. Yeˬhawˇbaˬ˗aˬ, aˬ yawꞈ jeˬ aˬ yawꞈ yaw tsaˬ tsaˬ˗ehˇ jaˆ˗eu Miˬyehˇ pyeuꞈ˗eu miˇ neh aˬ da aˬ ma deuˬ smˇ muiˬ muiˬ gaˇ maˬ noeˬ tmˬ˗a. Yeˬhawˇbaˬ Yeˬsuˇ˗euˬ aˬ da aˬ ma˗ahˇ tseˇ ngeh jiˇ, iˇ shaˬ shaˬ kʼawꞈ gaˇ mˇ˗eu leh jeh˗eu aˬ da aˬ ma deuˬ˗ahˇ tseˇ˗euˬ meh.—Maꞈtehˬ 13:55, 56; Luˇkaꞈ 2:24.

Jaˇliꞈ zahˇ: “Tsawˇ haˬ tiˬ gʼaˬ na, yawˬ ha˗euˬ aˬ yuiꞈ aˬ nyiˇ˗ahˇ ngehˬ maˬ gʼeh˗eu uˬ taꞈ, kʼoeˇ naˆ maˬ tseˇ, yawˬ ha˗euˬ nymˇ jiˇ˗ahˇ keuˆ ni ngehˬ maˬ gʼeh naˇ, jah˗eu jeˬ˗ahˇ byehˇ dzeh˗euˬ gaˇ duˇ˗awˇ, Ka li˗ahˇ maˬ jah˗eu tsawˇ haˬ deuˬ naˆ maˬ tseˇ doeˇ dui dui˗eu meh.”—1 Tiˆmoˇseˬ 5:8.

Yeˬhawˇbaˬ aˬ da aˬ ma deuˬ aˇ kʼoꞈ kʼawˆ laˇ ngeh, caw ba˗eu jeˬ loˬ meh lehˇ siˬ nya˗eu meh. Zaˬ deuˬ aˬ da aˬ ma˗ahˇ yaw zeu baw˗eu lehˇ mˇ mawˇ nya˗eu tiˬ jeˬ naˇ, aˬ da aˬ ma loˬ˗eu jeˬ˗ahˇ caw ba nehˬ˗eu heu meh. (Doˆ˗iˇ˗eu 20:12; 1 Tiˆmoˇseˬ 5:4) Mawˬ laˇ ngeh yawˬ ha˗ahˇ bi cu˗eu gʼaˇ duˬ lehˇ noeˬ˗awˇ cu˗eu maˬ ngeuˇ ni zaˬ˗ahˇ nui ma keuˆ˗eu laꞈ kʼoeˇ cu˗eu aˬ da aˬ ma deuˬ˗ahˇ Yeˬhawˇbaˬ nui kʼahˇ shiˇ dui dui˗eu meh.—2 Gawˇliˬtu 12:14.

Zaˬ deuˬ˗ahˇ Yeˬhawˇbaˬ˗euˬ gaˇ kawˆ mehˬ nehˬ. Ka li zaˬ pyeuꞈ˗eu aˬ da aˬ ma deuˬ zaˬ deuˬ Yeˬhawˇbaˬ˗ahˇ gaˬ laˇ ni hawˇ˗eu uˬ duˬ tahˬ laˇ ni ya dzaw nehˬ˗eu gaˇ za taˬ˗euˬ meh. Aˬ da aˬ ma deuˬ zaˬ deuˬ˗ahˇ ya mehˬ ya tsoˆ˗eu gaˇ deuˬ laꞈ kʼoeˇ neh gaˇ heu hmˬ naˇ, aˇ yeˇ kʼaˇ huiˬ˗eu gaˇ pyeuꞈ meh.—Dawˬmehˬmehˬ˗eu 6:6, 7.

Jaˇliꞈ zahˇ: “Sahˬpaˬ Miˬyehˇ neh mehˬ nehˬ laꞈ˗euˬ loꞈ˗ehˇ, [nawˬ˗euˬ zaˬ˗ahˇ] mehˬ nehˬ tsoˆ nehˬ˗awˇ mehˬ bym nehˬ˗awˬ.”—Eˇpeˇsu 6:4, YB18.

Yeˬhawˇbaˬ aˬ da aˬ ma deuˬ˗ahˇ caw ba nehˬ mawꞈ

Miˬ sawˇ yo zaˬ tiˬ gu aˬ yawꞈ nyaꞈ˗euˬ iˇ kahˇ˗ahˇ jawˇ˗awˇ, ja sawˇ luꞈ. Aˬ yawꞈ nyaꞈ˗euˬ mehˬ shi Jaˇliꞈ pah taˬ. — Zaˬ aˇ myaˆ gʼaˬ yuˇ˗eu lehˇ maˬ keuˆ laˇ mi naˆ˗ehˇ ja sawˇ

Jeˬ hu yaw muiˬ˗ehˇ lehˬ hmˬ. Zaˬ geuꞈ˗eu lehˇ shaˇ noeˬ luꞈ naˇ, yawˬ ha˗euˬ gaˇ kawˆ˗ahˇ yaw muiˬ˗ehˇ pyehˆ tseˇ. Yaw jeˬ ma jeˬ, zaˬ oeˬ gʼaˬ ngaˬ gʼaˬ˗euˬ dzaˬ dzaˬ dawˇ dawˇ, dm gʼaˬ dm lmˇ, sahˬ boꞈ bi dzaw˗eu pyuˇ loꞈ leˇ ni jaˆ miˇ˗a laˬ? Maˬ jaˆ naˇ, zaˬ aˇ myaˆ gʼaˬ tehꞈ˗ehˇ yuˇ˗eu lehˇ yawˬ ha˗euˬ nymˇ dahˬ nehˬ˗ehˇ ya ja sawˇ˗eu meh. Teu loꞈ˗ehˇ jahˇ˗awˇ neh tehꞈ˗ehˇ Yeˬhawˇbaˬ neh ehˇ taˬ˗euˬ loꞈ˗ehˇ zaˬ deuˬ˗ahˇ cu huiˬ nya˗eu meh. Kʼaˇ lehˬ hmˬ taˬ˗euˬ jeˬ yawˬ jeˬ na luꞈ noeˬ miˇ tsaˬ˗eu maˬ ngeuˇ˗a lehˇ Yeˬhawˇbaˬ siˬ nya˗eu meh. (Dawˬtsoˆ 9:11) Ehˇ kʼawꞈ ni muiˬ˗eu aˬ da aˬ ma pyeuꞈ˗eu gʼaˇ duˬ nawˬ neh leh jeh˗awˇ mˇ˗euˬ jeˬ˗ahˇ Yeˬhawˇbaˬ guiˬ lahˬ biꞈ˗eu meh.

Jaˇliꞈ zahˇ: “Noeˬ dahˇ doe˗awˇ mˇ˗eu dehꞈ dzaˬ laˇ˗awˇ, nui ma aˬ huˬ huˬ˗eu shaˬ le tehꞈ˗a.”—Dawˬdaˬ 21:5.

“Naw maꞈ laꞈ kʼoeˇ, huiˬ˗eu nymˇ nymˇ goˇ tiˬ nymˇ tsoˆ˗eu lehˇ gʼeh ngeh, pyuˇ aˇ myaˆ ni jiˇ leˇ˗eu hawˇ˗eu, tsoˆ gʼaˬ nya ni pyuˇ loꞈ leˇ maˬ loꞈ leˇ˗eu gaˇ kawˆ, jeˬ huˬ nuiˇ˗awˇ maˬ sawˇ duˬ ni tsoˆ˗eu tsawˇ haˬ aˬ suˇ gʼaˬ jawˇ ta.”—Luˇkaꞈ 14:28.

Nymˇ jiˇ laꞈ kʼoeˇ Yeˬhawˇbaˬ˗ahˇ jeˬ hu taˬ. Nawˇ nawˬ˗euˬ nymˇ jiˇ laꞈ kʼoeˇ Yeˬhawˇbaˬ˗ahˇ uˬ duˬ tahˬ˗eu jeˬ˗ahˇ aˇ yeˇ ya taˬ huiˬ dzehˬ˗eu meh. Nawˇ zaˬ jawˇ naˇ, zaˬ tiˬ gʼaˬ saˇ˗i tiˬ gʼaˬ Yeˬhawˇbaˬ˗ahˇ gaˬ laˇ ni aˇ yamˬ biꞈ˗awˇ ya mehˬ nehˬ˗eu meh. Aˇ muˇ˗euˬ mehˬ bawˬ˗ahˇ yaw muiˬ˗ehˇ naˇ haˬ˗awˇ, dzaw geuꞈ nya ni caw ba nehˬ˗awˬ. Yawˬ jaw na luꞈ nymˇ jiˇ uˬ duˬ tahˬ˗eu jeˬ jahˇ˗awˬ. Zaˬ˗ahˇ tsaꞈ gaˬ˗eu gaˇ mˇ nya laˇ ni dzaw mehˬ nehˬ˗awˬ. Zaˬ˗ahˇ mehˬ˗eu tsoˆ˗eu aˬ da aˬ ma˗ahˇ doˇ˗eu gaˇ heu, zaˬ aˬ yuiꞈ gʼaˬ˗ahˇ maˬ ehˇ, yuiꞈ nyiˇ deuˬ˗ahˇ maˬ ehˇ, maˬ ya kʼehˇ daˇ nehˬ˗a. Zaˬ˗ahˇ Yeˬhawˇbaˬ˗ahˇ gaˬ laˇ ni cu˗eu heu naˇ, aˇ yamˬ ya zmˬ˗awˇ ya leh jeh dui dui kʼawꞈ, leh jeh poeˬ kʼoꞈ˗eu yaw duˬ baw meh.

Jaˇliꞈ zahˇ: “Ngaˬ˗euˬ zaˬ deuˬ yaw tsaˬ yaw dawˇ jeˬ laꞈ kʼoeˇ dehꞈ luꞈ meh lehˇ ya gaˬ˗eu naˆ maˬ tseˇ, ngaˇ laˬ kʼaˬ cehˇ˗eu nui jeˬ maˬ paˇ jaˆ ma.”—3 Yoˇhaˬ 4.b

Yeˬhawˇbaˬ˗ahˇ gʼoe. Nawˇ zaˬ yuˇ˗eu lehˇ shaˇ noeˬ luꞈ˗eu maˬ ehˇ, zaˬ jawˇ dzeuˇ˗euˬ maˬ ehˇ, nawˬ˗euˬ jawˇ kʼahˬ˗ahˇ˗euˬ zahˇ sahˇ kʼoꞈ hawˇ˗eu dehꞈ jeˬ dehꞈ kawˆ naˆ maˬ tseˇ Yeˬhawˇbaˬ˗euˬ tsaˬ˗eu dawˇ˗eu zahˇ aˇ yeˇ huiˬ dzehˬ˗eu lehˇ jah ziꞈ˗awˬ.

Aˇ baˇ deuˬ: 1. Aˬ da aˬ ma tiˬ gu aˬ yawꞈ nyaꞈ˗euˬ aˬ li nehˬ˗ehˇ Bawˬdzaˬnymˇ laꞈ kʼoeˇ nuiˇ luꞈ. Aˬ li gʼaˬ dawˬ kʼoꞈ biꞈ˗eu lehˇ aˬ laꞈ baꞈ diˇ luꞈ. 2. Nymˇ jiˇ tiˬ jiˇ, tiˬ kawˆ loꞈ˗ehˇ tsaꞈ gaˬ˗iˇ luꞈ. Aˬ da gʼaˬ naˇ, aˇ yuiꞈ yuiꞈ saˬ gʼaˬ nehˬ˗ehˇ cah˗awˇ, aˬ ma gʼaˬ naˇ aˬ nyiˇ nyiˇ saˬ hawˇ˗eu dzaˇ˗i aˬ li tiˬ gʼaˬ nehˬ˗ehˇ cah luꞈ. — Zaˬ deuˬ˗euˬ nui jah paw ngehˬ gʼeh nehˬ˗eu gʼaˇ duˬ aˇ yamˬ ya zmˬ˗awˇ ya leh jeh

Nawˇ zaˬ myaˆ gʼaˬ tehꞈ˗ehˇ geuꞈ˗eu lehˇ noeˬ tsehˆ˗euˬ naˇ, nawˇ tsawˇ mawˬ mawˬ le ngeh Yeˬhawˇbaˬ nawˬ˗ahˇ ngehˬ gʼeh haw piˇ meh lehˇ jah ziꞈ˗awˬ. Tsawˇ mawˬ mawˬ le ngeh, zaˬ neh ya bi cu nga lehˇ aˬ cawˬ ciˬ suꞈ laˇ˗eu nui noeˬ heu˗ahˇ yahˇ˗awˬ. Nawˬ˗ahˇ maˬ ngehˬ gʼeh nehˬ laꞈ ni byehˇ dzeh nehˬ laꞈ gaˇ taˬ kʼahˬ lahˇ. Yeˬhawˇbaˬ nawˬ˗ahˇ ngehˬ gʼeh nehˬ ma lehˇ saˇ jaˇ dzaˬ taˬ˗euˬ meh. Yeˬhawˇbaˬ aˬ myah luꞈ saˇ jaˇ ziꞈ˗eu Miˬyehˇ meh.—Yawˇshuˆ 23:14.

Jaˇliꞈ zahˇ: “Nawˬ˗euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ˗ahˇ gʼoe˗awˬ. Yawˬ ha bym˗eu byehˆ˗eu jeˬ˗ahˇ taˬ gʼoe. Nawˇ kʼaˇ mˇ kʼaˇ shaˇ˗eu jeˬ laꞈ kʼoeˇ aˬ yawꞈ˗ahˇ noeˬ keuˆ˗awˬ. Nawˬ˗ahˇ yaw tsaˬ yaw dawˇ gaˇ ma mehˬ laꞈ tehꞈ˗a.”—Dawˬdaˬ 3:5, 6.

“Ngaˬ˗euˬ tiˬ ziˇ dehꞈ mawˬ laꞈ˗euˬ, tsawˇ muiˬ˗ahˇ Sahˬpaˬ Miˬyehˇ neh, byehˇ dzeh nehˬ˗euˬ maˬ ya mawˇ˗ehˇ, aˬ yawꞈ maꞈ˗euˬ zaˬ deuˬ uˆ deuˬ, hawˬ shaˇ shaˇ˗eu maˬ mawˇ haw˗aˬ.”—Ja ceuˬ 37:25.

“Miˬyehˇ˗euˬ Miˇ kʼahˬ hawˇ˗eu aˬ yawꞈ˗euˬ yaw tsaˬ yaw dawˇ jeˬ˗ahˇ jeˬ huˬ poˆ˗awˬ. Nui jeˬ dawˬ tawˆ luꞈ, aˬ yawꞈ naw maꞈ˗ahˇ biꞈ lahˬ laꞈ tehꞈ˗a.”—Maꞈtehˬ 6:33.

Zaˬ deuˬ˗aˬ, Yeˬhawˇbaˬ neh aˬ da aˬ ma˗ahˇ biꞈ˗euˬ poeˬ dui dui˗eu laꞈ sawˬ pyeuꞈ meh. Aˬ da aˬ ma deuˬ zaˬ deuˬ˗ahˇ Yeˬhawˇbaˬ nui ma tsaˬ˗eu loꞈ˗ehˇ cu ngeh Yeˬhawˇbaˬ laˬ kʼaˬ cehˇ dui dui˗eu meh. Ka li zaˬ pyeuꞈ˗eu aˬ da aˬ ma deuˬ zaˬ deuˬ˗ahˇ nui jah paw maˬ ehˇ, nui ma paw maˬ ehˇ, gʼawˇ mawˇ paw maˬ ehˇ, nui gaˬ keuˆ˗eu laꞈ kʼoeˇ yaw muiˬ˗ehˇ ngehˬ gʼeh˗eu meh. Zaˬ aˇ myaˆ gʼaˬ tehꞈ˗ehˇ geuꞈ˗eu lehˇ noeˬ tsehˆ˗eu meh. Yawˬ ha jawˇ kʼahˬ˗ahˇ˗euˬ zahˇ sahˇ kʼoꞈ hawˇ˗eu dehꞈ jeˬ dehꞈ kawˆ naˆ maˬ tseˇ Yeˬhawˇbaˬ neh aˬ da aˬ ma˗ahˇ bi mˇ˗eu jeˬ aˇ yeˇ huiˬ dzehˬ meh lehˇ haw˗eu meh. Teu loꞈ˗ehˇ mˇ luꞈ˗eu aˬ da aˬ ma deuˬ naˇ, zaˬ deuˬ˗aˬ, ‘Yeˬhawˇbaˬ Miˬyehˇ neh biꞈ˗euˬ jeˬ biˇ’ pyeuꞈ˗awˇ, aˇ poeˬ baw dui dui˗eu laꞈ sawˬ pyeuꞈ˗eu lehˇ mˇ mawˇ˗eu jeˬ pyeuꞈ meh.

Aˬ yawꞈ maꞈ nui ma maˬ cawˆ

Zaˬ ui cuiˆ tehꞈ˗ehˇ yuˇ˗euˬ aˬ da aˬ ma deuˬ, shaˬ zahˬ ya tahˬ puˬ ngaˇ loˇ? Mˇ dzaˬ kʼawꞈ dawˇ˗eu paw shaˬ˗eu miˇ kʼahˬ˗ahˇ jawˇ luꞈ˗eu aˬ da aˬ ma deuˬ teu loꞈ˗ehˇ noeˬ laˇ nya˗eu meh. Gaˇ kawˆ teu nehˬ˗ehˇ taꞈ leˇ˗awˇ miˇ kʼahˬ teu deuˬ laꞈ kʼoeˇ jawˇ˗eu nymˇ sahˇ aˬ da tiˬ gʼaˬ na aˬ joˆ˗ehˇ ehˇ˗eu nga lehˇ haw ma.

Nawˬ˗ahˇ zaˬ gʼawˬ mya gʼaˬ yuˇ ni ciˬ suꞈ laˇ haw mehˬ loˇ?

“Euˬ, ngeuˇ meh. Aˇ muˇ laꞈ kʼoeˇ˗euˬ mehˇ nmˇ tiˬ gʼaˬ na jiˇ nga nyaꞈ˗ahˇ ciˬ suꞈ laˇ˗eu meh. Miˬ sawˇ yo zaˬ tiˬ gu nga nyaꞈ˗ahˇ ‘Nawˇ aˬ jeˬ miˇ neh zaˬ tiˬ gʼaˬ tehꞈ˗ehˇ yuˇ le? Ehˇpa˗li kaˆ heu gaˇ naˇ, zaˬ tiˬ gʼaˬ tehꞈ˗ehˇ jawˇ naˇ, zaˬ maˬ jawˇ˗eu loꞈ˗ehˇ duˇ meh. Zaˬ nyiˬ gʼaˬ paˇ jawˇ˗euˬ naˇ kʼawꞈ, zaˬ tiˬ gʼaˬ tehꞈ˗ehˇ jawˇ gaˇ duˇ˗eu meh’ lehˇ ehˇ˗eu meh. Nga nyaꞈ˗euˬ zaˬ nyiˬ gʼaˬ tiˬ gʼaˬ paˇ dehꞈ le gʼaˬ ngeh jiˇ zaˬ paˇ puˬ siˬ lehˇ ciˬ suꞈ laˇ˗eu meh.”—Jeˬlaˬmaiˇ.

Nawˇ zaˬ ui cuiˆ tehꞈ˗ehˇ jawˇ˗eu miˇ neh nawˬ˗euˬ dehꞈ ziˇ shaˬ nya laˬ?

“Maˬ, maˬ shaˬ nya. Ya ehˇ naˇ, nga nyaꞈ zaˬ ui cuiˆ tehꞈ˗ehˇ yuˇ˗euˬ miˇ neh nga nyaꞈ dzeˇ zaˬ nymˇ jiˇ laꞈ kʼoeˇ˗euˬ yawˬ gʼaˬ na luꞈ˗ahˇ loˬ˗eu jeˬ jaˆ ni ngehˬ gʼeh nehˬ nya˗eu ma. Aˇ yeˇ kʼaˇ huiˬ˗eu jeˬ naˇ, ngaˇ yawˬ gʼaˬ na luꞈ nui jah ziꞈ ni caw ba nehˬ nya˗euˬ ma. Maˇ diˇ naˇ ngaˇ zaˬ gʼawˬ mya gʼaˬ jawˇ˗eu nymˇ jiˇ laꞈ kʼoeˇ huiˬ laˇ˗euˬ ma. Ngaˬ da ngaˬ ma zaˬ yawˬ gʼaˬ na luꞈ dzaˬ loꞈ dawˇ loꞈ ni sahˬ boꞈ dzaw nymˇ˗ahˇ iˇ nya ni ya leh jeh dui dui gaˇ ya mawˇ˗euˬ ma.”—Jeˬlaˬmaiˇ.

Nawˬ neh noeˬ tsehˆ˗euˬ jeˬ˗ahˇ zaˬ deuˬ aˬ joˆ˗ehˇ noeˬ˗a?

“Ngaˬ˗euˬ zaˬ nyiˬ gʼaˬ luꞈ laˬ kʼaˬ cehˇ luꞈ meh. Zaˬ gʼawˬ mya ni jawˇ˗eu aˬ da aˬ ma deuˬ naˇ, zaˬ tiˬ gʼaˬ saˇ˗i tiˬ gʼaˬ˗ahˇ yaw muiˬ˗ehˇ maˬ ngehˬ gʼeh keuˆ nehˬ nya˗a. Ehˇ kʼawꞈ nga nyaꞈ˗euˬ zaˬ deuˬ naˇ, shaˬ zahˬ teu deuˬ˗ahˇ maˬ ya tahˬ puˬ˗aˬ.”—Piˇliˇpiˆ.

“Nga nyaꞈ˗euˬ zaˬ nyiˇ ngeh neh aˬ da aˬ ma˗euˬ nui gaˬ za˗eu miˇ neh lmˇ boˬ ni gʼeh˗awˇ, laˬ kʼaˬ cehˇ˗eu meh. Nga nyaꞈ, nga nyaꞈ˗euˬ iˇ kahˇ˗ahˇ Yeˬhawˇbaˬ˗ahˇ gaˬ˗awˇ dzaw geuꞈ dui dui paˬ˗ehˇ gʼeh˗eu mehˇ nmˇ deuˬ tiˬ kʼehˬ maˬ kaˬ kuˇ laꞈ˗eu ma. Mehˇ nmˇ teu deuˬ nga nyaꞈ˗ahˇ nui jah paw aˇ pyaˇ daˬ ni gʼaˬ biꞈ˗eu meh. Nymˬ˗mˇ iˬ nah nga nyaꞈ, nga nyaꞈ˗euˬ zaˬ aˬ yawꞈ maꞈ˗ahˇ dzaw geuꞈ luꞈ gaˇ ya mawˇ˗eu ma.”—Kaˇloˬ˗suiꞈ.

Zaˬ ui cuiˆ tehꞈ˗ehˇ yuˇ˗eu lehˇ noeˬ tsehˆ˗euˬ miˇ neh gaˇ dahˇ tsoeˬ miˇ˗a loˇ?

“Teu loꞈ˗ehˇ noeˬ tsehˆ˗euˬ baˬ da neh nga nyaꞈ nymˇ jiˇ laꞈ kʼoeˇ˗euˬ yawˬ gʼaˬ na luꞈ˗ahˇ yaw muiˬ˗ehˇ ngehˬ gʼeh nehˬ nya˗euˬ ma. Yaw beh ngaˇ pyuˇ za laˇ˗eu gaˇ jaˆ˗eu ma. Ehˇ kʼawꞈ dzeuˇ yaꞈ˗euˬ smˇ kʼoꞈ˗ahˇ gaˇ˗ahˇ neh ya doˆ˗iˇ˗euˬ ma. Ehˇ kʼawꞈ nga pehˬ˗euˬ nymˇ jiˇ tsawˇ haˬ teu naˆ naˆ˗ehˇ maˬ myaˬ˗eu miˇ neh ngaˇ gaˇ˗ahˇ neh ya doˆ iˇ˗euˬ kʼawꞈ, nga pehˬ teu naˆ naˆ˗ehˇ maˬ ya shaˬ˗aˬ.”—Jeˬlaˬmaiˇ.

“Zaˬ ui cuiˆ tehꞈ˗ehˇ yuˇ˗eu lehˇ noeˬ tsehˆ˗euˬ miˇ neh zaˬ deuˬ˗euˬ nui jah paw maˬ ehˇ, gʼawˇ mawˇ paw maˬ ehˇ, loˬ˗eu jeˬ˗ahˇ yaw muiˬ˗ehˇ ngehˬ gʼeh nehˬ nya˗euˬ ma. Kʼoeˇ naˇ tsaꞈ gaˬ˗eu deuˬ loˬ˗eu jawˇ kʼahˬ˗ahˇ jiˇ iˇ˗awˇ, Miˬyehˇ˗euˬ gaˇ mˇ iˇ nya˗euˬ ma. Kʼoeˇ uˬ taꞈ, zaˬ aˬ yawꞈ gʼaˬ yawꞈ˗ahˇ jiˇ yaw muiˬ˗ehˇ haw saˆ nehˬ nya˗euˬ ma. Nymˬ˗mˇ ngaˬ˗euˬ zaˬ yawˬ gʼaˬ na luꞈ Yeˬhawˇbaˬ˗ahˇ uˬ duˬ tahˬ luꞈ˗awˇ Miˬyehˇ˗euˬ gaˇ˗ahˇ heu naˆ maˬ tseˇ mˇ huiˬ˗eu gʼaˇ duˬ aˇ pyaˇ daˬ taˬ˗euˬ meh.”—Leˇnaˬdiˬ.

Aˬ da aˬ ma nui deuˬ˗ahˇ aˬ jeˬ ehˇ mawꞈ nya?

“Ngaˇ Ja ceuˬ 34:10 laꞈ kʼoeˇ˗euˬ naˇ kʼah dzaˬ˗euˬ saˇ jaˇ dawˬ maˇ diˇ byah laˇ gaˇ yawˬ ha˗euˬ myaˆ neh ya mawˇ˗euˬ ma. Teu gaˇ ‘Sahˬpaˬ Miˬyehˇ˗ahˇ poˆ˗eu deuˬ, yaw muiˬ tiˬ jeˬ˗iˬ maˬ ju˗a’ lehˇ ehˇ taˬ˗euˬ meh. Yeˬhawˇbaˬ nga pehˬ˗euˬ nymˇ jiˇ kʼaˇ loˬ˗eu jeˬ dawˆ tawˆ luꞈ˗ahˇ ngehˬ gʼeh nehˬ laꞈ˗euˬ meh.”—Laˬpeˬ˗oˬ.

a Aˬ da aˬ ma deuˬ zaˬ aˇ myaˆ gʼaˬ yuˇ˗eu, aˬ geu ngeh yuˇ˗eu, zaˬ kaˬ aˬ joˆ˗ehˇ laˆ kaˇ˗eu, gaˇ kawˆ heu deuˬ˗ahˇ yawˬ haˇ yawˬ ha ya noeˬ tsehˆ˗eu meh. Heu naˇ yawˬ haˇ yawˬ ha noeˬ tsehˆ˗eu jeˬ pyeuꞈ˗eu miˇ neh aˬ cawˬ deuˬ ehˇ iˇ˗eu maˬ loˬ˗a. (Loˇmaˆ 14:4, 10-13) Kʼoeˇ naˇ sheuˬ dahˬ dzaˬ dzeuˇ˗euˬ Ka li zaˬ deuˬ, 1 Gawˇliˬtu 7:3-5-euˬ nui noeˬ nui duˇ˗ahˇ noeˬ keuˆ paˬ˗ehˇ gʼeh˗eu meh.

b Jaˇliꞈ heu deuˆ laꞈ kʼoeˇ zaˬ lehˇ ehˇ˗eu heu dawˬ˗ahˇ Yoˇhaˬ neh yaw tsaˬ yaw dawˇ jeˬ mehˬ nehˬ˗euˬ zaˬ lahˇ deuˬ˗ahˇ ehˇ mawꞈ kʼawꞈ, Yeˬhawˇbaˬ˗ahˇ gaˬ˗eu zaˬ deuˬ˗ahˇ aˬ da aˬ ma deuˬ jiˇ teu loꞈ˗ehˇ noeˬ˗eu meh.