Gui˗eu deuˬ naˇ haˬ˗eu jeˬ

Miˇ kʼahˬ deuˬ “miˇ kʼahˬ saˇ˗awˇ guˆ kʼaˇ maˬ za˗a” lehˇ aˬ geu ngeh yamˬ˗ahˇ tsaꞈ gaˬ˗eu nga?

Maˬ myahˇ laˇ˗euˬ Loꞈ˗eu nymˇgoˇa laꞈ kʼoeˇ˗euˬ “Gui˗eu deuˬ naˇ haˬ˗eu jeˬ” lehˇ ehˇ˗eu gaˇ kawˆ laꞈ kʼoeˇ, Yeˬhawˇbaˬ miˇ kʼahˬ deuˬ˗euˬ dah zaˇ pyeuꞈ˗eu ‘uˬ coeˇ tseˇ coeˇ’˗ahˇ “Miˬyehˇ˗euˬ nui noeˬ” dawˆ ahˇ nehˬ˗awˇ, miˇ kʼahˬ deuˬ˗euˬ baoˬ teu, Miˇ kʼahˬ deuˬ˗ahˇ haw teˬ˗eu aˇ maꞈ˗ahˇ ehˇ mawꞈ˗eu “neˇ tseuˆ ni gʼeh˗eu jeˬ zaˬ yaw haiˬ”˗ahˇ a nehˬ˗eu meh lehˇ ehˇ ehˇ˗eu gaˇ kawˆ ya siˬ˗euˬ ma. Jeˬ zaˬ heu mawˇ˗ahˇ ‘jeˬ zaˬ yaw haiˬ mawˇ˗euˬ tahˬ pahˬ aˬ ma mawˇ kawˇ’ lehˇ jiˇ kuˇ˗eu meh. (Pah mehˬ˗eu 13:14, 15; 17:3, 16, 17) Teu gaˇ neh naˇ, ‘uˬ coeˇ tseˇ coeˇ’ hawˇ˗eu baoˬ za˗euˬ jeˬ zaˬ yaw haiˬ heu mawˇ, miˇ tsaˬ kʼoeˇ taˆ˗euˬ zahˇ kʼawꞈ dawˬ tawˆ luꞈ˗ahˇ laˆ cawˆ jiˇ˗eu meh. Toˆ˗ehˇ naˇ, miˇ kʼahˬ deuˬ “miˇ kʼahˬ saˇ˗awˇ guˆ kʼaˇ maˬ za˗a”b lehˇ aˬ geu ngeh yamˬ˗ahˇ tsaꞈ gaˬ˗eu nga? Zahˇ kʼawꞈ deuˬ bi laˆ cawˆ dzeuˇ˗awˇ neh nga laˬ? Maˬ ngeuˇ naˇ, maˬ bi laˆ cawˆ mi naˆ˗ehˇ nga laˬ?—1 Teˇsaˬloˇni 5:3.

Yaw awˬ˗ehˇ ya ehˇ naˇ, miˇ kʼahˬ deuˬ “miˇ kʼahˬ saˇ˗awˇ guˆ kʼaˇ maˬ za˗a” lehˇ aˬ geu ngeh yamˬ˗ahˇ tsaꞈ gaˬ˗a lehˇ aˬ dui maˬ siˬ duˬ nya˗a. Aˬ dui aˬ geu ngeh yamˬ˗ahˇ pyeuꞈ laˇ˗eu lehˇ yaw muiˬ˗ehˇ siˬ duˬ law nmˇ, yaw beuˇ beuˇ lehˇ dawˬ dawˬ˗ehˇ jawˇ˗eu maˬ paˇ loˬ meh. Teu miˇ neh Yeˬsuˇ aˬ yawꞈ˗euˬ zaˬ lahˇ deuˬ˗ahˇ “yaw beuˇ beuˇ˗ehˇ jawˇ˗awˬ” lehˇ gʼawˬ mya poˆ saˇ tiˇ biꞈ yaꞈ˗euˬ meh. (Maꞈtehˬ 24:42; 25:13; 26:41) Nymˬ˗mˇ aˬ dui muiˬ˗eu shawˇ˗eu yaw sahˇ sheuˬ gʼeh˗eu laꞈ kʼoeˇ Pawˇluˆ neh Teˇsaˬloˇni meuˬ˗ahˇ˗euˬ Ka li zaˬ deuˬ˗ahˇ boꞈ nehˬ˗euˬ maˬ keuˆ laˇ mi ehˇ taˬ˗euˬ dawˬ˗ahˇ yaw muiˬ˗ehˇ poˆ tseˇ haw kaˇ˗euˇ.

Pawˇluˆ ‘Miˇ kʼahˬ saˇ˗awˇ guˆ kʼaˇ maˬ za˗a lehˇ aˬ cawˬ ja luꞈ ngeh, luˬ˗iˇ seˇ˗iˇ˗eu jeˬ aˬ yawꞈ maꞈ kʼoeˇ taˆ ja pyuˬ ni keuˆ le tehꞈ˗a’ lehˇ boꞈ taˬ˗euˬ meh. (1 Teˇsaˬloˇni 5:2, 3) Aˬ dui˗euˬ aˇ maꞈ aˇ muˇ˗euˬ sahˬ boꞈ laꞈ kʼoeˇ Pawˇluˆ dawˬ heu˗ahˇ tiˬ kʼehˬ maˬ kaˬ heu loꞈ˗ehˇ dzawˇ nehˬ taˬ˗euˬ meh. Huiˬ dui dui˗eu shaˬ zahˬ aˇ yamˬ dahˬ beh laˇ dzaˬ˗ahˇ Huiˬ dui dui˗eu Baˬbuˇloˬ pyeuꞈ˗eu zahˇ kʼawꞈ˗ahˇ laˆ cawˆ meh lehˇ ehˇ taˬ˗euˬ meh. Kʼoeˇ naˇ huiˬ dui dui˗eu shaˬ zahˬ aˇ yamˬ teu maˬ beh laˇ mi naˆ˗ehˇ “miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ meh lehˇ jiˇ ehˇ taˬ˗euˬ meh. Heu loꞈ˗ehˇ tsaꞈ gaˬ˗eu jeˬ heu naˇ, huiˬ dui dui˗eu shaˬ zahˬ dahˬ beh laˇ shaw˗iˬ meh lehˇ bi siˬ˗eu jeˬ pyeuꞈ meh.

Ehˇ kʼawꞈ yaw muiˬ˗ehˇ poˆ tseˇ pyehˆ tseˇ gʼaˬ ngeh, dzaˇ˗i tiˬ jeˬ lehˇ jiˇ pyeuꞈ leˇ nya paˬ˗ehˇ gʼeh gaˇ ya mawˇ˗euˬ ma. Teu naˇ, zahˇ kʼawꞈ deuˬ bi laˆ cawˆ jiˇ˗euˬ kʼoeˇ sawˇ miˇ tsa hawˇ˗eu “miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ laˇ˗eu kʼawꞈ pyeuꞈ nya meh. Aˬ dui teu loꞈ˗ehˇ aˬ jeˬ miˇ neh ehˇ nya˗eu nga? Laꞈ oˆ paw jaˆ˗eu naˇ haˬ˗eu jeˬ heu deuˬ˗ahˇ ja sawˇ haw kaˇ˗euˇ.

Miˇ kʼahˬ deuˬ guiˇ deuˆ gaˇ zahˇ kʼawꞈ deuˬ aˬ joˆ˗ehˇ keuˬ leˇ gm leˇ luꞈ˗eu nga? Jaˇliꞈ laꞈ kʼoeˇ “miˇ tsaˬ heu˗euˬ kʼoeˇ taˆ, kʼaˇ bi sehꞈ yoeˇ˗euˬ shiˬ, nawˬ˗euˬ laꞈ kʼoeˇ [tsawˇ myahˇ doˆ˗eu meh maˬ laˇ, huiˬ dui dui˗eu Baˬbuˇloˬ] ya mawˇ˗euˬ meh” lehˇ ehˇ taˬ˗euˬ meh. (Pah mehˬ˗eu 17:1, 5; 18:24) Miˇ tsaˬ kʼoeˇ taˆ gaˇ hu ba neh pyeuꞈ laꞈ˗euˬ jeˬ˗ahˇ haw kʼoꞈ gʼeh ngeh, zahˇ kʼawꞈ deuˬ pyeuꞈ˗eu tsawˇ myahˇ doˆ˗eu meh maˬ laˇ heu naˇ, miˇ kʼahˬ deuˬ tiˬ kʼahˬ tiˇ kʼahˬ guiˇ deuˆ ni, yaw haiˬ yaw doeˇ jeˬ mˇ ni laˆ noeˬ nehˬ luꞈ gaˇ ya mawˇ˗eu meh. Teu miˇ neh zahˇ kʼawꞈ pyeuꞈ˗eu Baˬbuˇloˬ˗ahˇ laˆ cawˆ gʼaˬ˗euˬ kʼoeˇ sawˇ miˇ tsa hawˇ˗eu miˇ kʼahˬ deuˬ “miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ laˇ˗eu kʼawꞈ pyeuꞈ nya meh. Toˆ˗ehˇ kʼawꞈ ni aˬ dui gaˇ kawˆ heu˗ahˇ maˬ ehˇ tsehˆ nya˗a.

“Miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ gʼaˬ ngeh, aˬ jeˬ pyeuꞈ laˇ˗eu nga? Pawˇluˆ ‘luˬ˗iˇ seˇ˗iˇ˗eu jeˬ aˬ yawꞈ maꞈ kʼoeˇ taˆ ja pyuˬ ni keuˆ le tehꞈ˗a’ lehˇ ehˇ taˬ˗euˬ meh. (1 Teˇsaˬloˇni 5:3) Miˇ kʼahˬ deuˬ zahˇ kʼawꞈ deuˬ maˬ bi laˆ cawˆ mi naˆ˗ehˇ “miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ naˇ, teu loꞈ˗ehˇ tsaꞈ gaˬ gʼaˬ˗euˬ nehˬ˗ehˇ aˬ yawꞈ maꞈ˗ahˇ ja pyuˬ ni maˬ laˆ cawˆ nya˗eu lehˇ mawˇ laˇ˗eu meh. Aˬ yawꞈ maꞈ˗ahˇ laˆ cawˆ˗eu gʼaˇ duˬ aˇ yamˬ tiˬ kʼehˬ ya bi kaˇ iˇ˗eu meh. Ehˇ kʼawꞈ Pawˇluˆ miˇ kʼahˬ deuˬ “ja pyuˬ ni” bi laˆ cawˆ meh lehˇ ehˇ taˬ˗euˬ meh. Teu miˇ neh zahˇ kʼawꞈ deuˬ˗ahˇ laˆ cawˆ jiˇ gʼaˬ˗euˬ kʼoeˇ sawˇ miˇ tsa hawˇ˗eu “miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ laˇ gaˇ duˇ˗eu meh.

Yeˬhawˇbaˬ˗euˬ tsawˇ haˬ deuˬ maˬ keuˆ laˇ miˇ ehˇ taˬ˗euˬ dawˬ heu˗ahˇ aˬ joˆ˗ehˇ noeˬ˗eu nga? Pawˇluˆ “aˬ yuiꞈ aˬ nyiˇ deuˬ˗oˇ, naw maꞈ˗aˬ, yaw zahˇ laꞈ kʼoeˇ jawˇ luꞈ˗eu maˬ ngeuˇ˗eu miˇ neh, aˇ nah kʼoeˇ nah naw maꞈ kʼoeˇ taˆ smˇ kʼoeˬ tahˇ joe oe˗eu loꞈ˗ehˇ ja pyuˬ ni maˬ ga keuˆ le˗aˇ” lehˇ ehˇ˗eu meh. (1 Teˇsaˬloˇni 5:4) Zahˇ kʼawꞈ deuˬ˗ahˇ laˆ cawˆ gʼaˬ˗euˬ kʼoeˇ sawˇ miˇ tsa hawˇ˗eu “miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ laˇ naˇ, Yeˬhawˇbaˬ˗euˬ tsawˇ haˬ deuˬ miˇ kʼahˬ deuˬ bi laˆ cawˆ˗eu gʼeh ngaˇ lehˇ siˬ nya˗eu meh. Ehˇ kʼawꞈ miˇ kʼahˬ deuˬ naˇ, aˬ yawꞈ maꞈ˗ahˇ laˆ cawˆ˗eu jeˬ heu maˬ noeˬ˗euˬ gaˇ ja pyuˬ ni keuˆ le nyaˬ lehˇ noeˬ˗eu meh.

Toˆ˗ehˇ naˇ, aˬ dui aˬ jeˬ noeˬ tmˬ nya˗eu nga? Gʼawˬ myahˇ maˬ gʼeh˗ehˇ ‘uˬ coeˇ tseˇ coeˇ’ hawˇ˗eu baoˬ za˗euˬ jeˬ zaˬ yaw haiˬ zahˇ kʼawꞈ dawˬ tawˆ luꞈ˗ahˇ laˆ cawˆ jiˇ˗eu meh. Teu naˇ huiˬ dui dui˗eu shaˬ zahˬ aˇ dahˬ beh˗eu jeˬ pyeuꞈ laˇ˗eu meh. Miˇ kʼahˬ deuˬ tiˬ yamˬ maˬ ngeuˇ naˇ tiˬ yamˬ˗ahˇ “miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ˗eu meh. Aˬ geu ngeh tsaꞈ gaˬ laˇ˗eu nga? Aˬ dui pyeuꞈ nya paˬ˗ehˇ gʼeh˗eu nyiˬ kawˆ˗ahˇ ja sawˇ laꞈ˗euˬ ma. Pyeuꞈ nya paˬ˗ehˇ gʼeh˗eu dahˬ beh˗eu jeˬ naˇ, zahˇ k’awꞈ deuˬ˗ahˇ maˬ laˆ cawˆ mi naˆ-ehˇ “miˇ k’ahˬ saˇ-awˇ guˆ k’aˇ maˬ za-a“ lehˇ tsaꞈ gaˬ-eu meh. Pyeuꞈ nya paˬ˗ehˇ gʼeh˗eu nyiˬ kawˆ aˬ yawꞈ kawˆ naˇ, zahˇ kʼawꞈ deuˬ˗ahˇ laˆ cawˆ jiˇ gʼaˬ˗awˇ kʼoeˇ sawˇ miˇ tsa “miˇ kʼahˬ saˇ˗awˇ guˆ kʼaˇ maˬ za˗a” lehˇ tsaꞈ gaˬ laˇ˗eu meh. Maˇ diˇ aˬ joˆ˗ehˇ pyeuꞈ laˇ˗eu gaˇ kawˆ naˇ, ya haw˗a siˬ. Aˬ myah myah naˇ, aˬ dui Jaˇliꞈ laꞈ kʼoeˇ˗euˬ maˬ keuˆ laˇ miˇ ehˇ taˬ˗euˬ dawˬ deuˬ˗ahˇ byah laˇ luꞈ ngeh, hawˇ˗eu byah laˇ dzeuˇ˗euˬ kʼoeˇ sawˇ miˇ tsa hawˇ˗eu yaw muiˬ˗ehˇ gʼoˆ shaw nya laˇ˗eu meh.—Yoˇhaˬ 12:16 nehˬ˗ehˇ sheu cehˆ.

Ehˇ kʼawꞈ aˬ dui˗euˬ gʼaˇ duˬ aˇ yeˇ huiˬ˗eu jeˬ naˇ, “miˇ kʼahˬ saˇ˗awˇ guˆ kʼaˇ maˬ za˗a” lehˇ aˬ geu ngeh yamˬ˗ahˇ tsaꞈ gaˬ˗eu lehˇ ya siˬ nya˗eu heu maˬ ngeuˇ˗a. Miˬyehˇ˗ahˇ aˬ myah luꞈ saˇ jaˇ ziꞈ ziꞈ˗ehˇ jawˇ˗eu heu meh. Teu miˇ neh maˬ keuˆ laˇ miˇ ehˇ taˬ˗euˬ dawˬ maˇ diˇ pyeuꞈ laˇ ngeh dah laˇ taˬ˗euˬ gʼaˇ duˬ, aˬ dui “yaw beuˇ beuˇ˗ehˇ jawˇ kaˇ˗euˇ.”—1 Teˇsaˬloˇni 5:6, YB18.