Mmʋwalɩyɛ Mɔɔ Ɩwɔ Kɛnɩ Ɩma Anyɩnlɩsunliɣamaa
Ngʋndawulɛ kile kɛɛ, wɔ oyuwadɩ munwala nɩ, mmenii miliyɔnʋ 43 yɛ bɛ anyɩ zũ a, na mmenii mɔɔ bɛánwʋ dɩyɛ baaba nɩ sʋ̃ dɩ miliyɔnʋ 295. Na aɣɛlɛbɔ odwokɔ lɛ kɛɛ, subanɩ mɔɔ abiyemmɔ bɛda yɩ ali bekile anyɩnlɩsunliɣamaa, nɩɩ bɛzabɛ mɔɔ bɛánwʋ dɩyɛ baaba nɩ, iádua bʋwɔ kʋlaa.a
Naasʋ̃ Nyamɩnlɩ mɛyɩ, mɩnla adwɩnɩ yɛ ɩlɛ yɩ wɔ anyɩnlɩsunliɣamaa nwʋ a? Mɩnla po yɛ Bayɩbʋlʋ yɩ kã falɩ bɔ nwʋ a? Na Gyehova Dasɩvʋlɔmaa sʋ̃ ɛ, mɩnla yɛ bɛyɛɛ bɔbʋwa bɛ wɔ nnɛ a?
Adwɩnɩ mɔɔ Nyamɩnlɩ lɛ yɩ wɔ anyɩnlɩsunliɣamaa nwʋ
Bayɩbʋlʋ yɩ kã yɩ petee kɛɛ Gyehovab dwɩnɩ anyɩnlɩsunliɣamaa nwʋ baaba. Iluwa yɩ zɔ ti, ɩpɛ kɛɛ yɛda subanɩ baaba ali yekile bɛ na yɛbʋwa bɛ ma bɛzabɛ sʋ̃ benyia yi ehilehilelɛ zʋ mfasʋ. Kɛ mɛyɩ nkʋ̃ a, izia sʋ̃ ɩma bɔnwʋ yɩ kɛɛ nninyeni kɛyɛ bʋwɔ kɛma bɛ wɔ eɣile be.
Ɛhɛlɛlɛ Odwokɔ: “Mmuzulo hã abiyela mɔɔ ɩkɛma anyɩnlɩsunliɣanii kɔvʋ ɔhʋanɩ.”—Ditilonɔmi 27:18.
Ikile Kɛɛ: Wɔ ɔwɔkɩ nɩ, nɩ abiyemmɔ bɛála subanɩ baaba ali bekile anyɩnlɩsunliɣamaa. Meti mmɛla eyi mɔɔ Nyamɩnlɩ va manlɩ yi mmenii nɩ, nɩ ɩlɛ́ma bɛkɛyɛ anyɩnlɩsunliɣamaa ayɛkwa.
Ɛhɛlɛlɛ Odwokɔ: “Nyamɩnlɩ ɩába mmenii nu.”—Egyima 10:34.
Ikile Kɛɛ: Kezimɔ Nyamɩnlɩ dɔ mmenii mɔɔ bɔnwʋ dɩyɛ na bɔtʋ bʋlɔ bɛma yɩ nɩ, ɔzɔ la yɛ ɩdɔ anyɩnlɩsunliɣamaa na bɔtʋ bʋlɔ bɛma yɩ a.
Ɛhɛlɛlɛ Odwokɔ: Gyisɛsɩ “iwukowukoli anyɩnlɩsunliɣamaa sʋ̃maa bɛ anyɩ.”—Luuku 7:21.
Ikile Kɛɛ: Ɔzɔ la yɛ Gyisɛsɩ koluwa Nyamɩnlɩ Bulombunlililɛ yɩ zʋ kɛyɛ kɛma anyɩnlɩsunliɣamaa wɔ eɣile be a, kɛmɔ ɩyɛlɩ mmɩlɩ mɔ nɩ ɩwɔ azɩlɛ yɩ zʋ nɩ.
Ɛhɛlɛlɛ Odwokɔ: “Anyɩnlɩsunliɣamaa anyɩ kowuko.”—Ayɩzaya 35:5.
Ikile Kɛɛ: Gyehova wɔ anʋhʋba kɛɛ ɩlɛ́kyɛ yi Bulombunlililɛ nɩ kɔwɔ yɩ tʋ kɛɛ idii dɩyɛ wɔ azɩlɛ yɩ zʋ. Na mɛyɩ kɛma anyɩnlɩsunliɣamaa kezia kɔnwʋ dɩyɛ.
Mɔɔ Gyehova Dasɩvʋlɔmaa yɛ fa bʋwa anyɩnlɩsunliɣamaa
Ɔkɔ oyuwadɩ yɩ dɩka bela a, Gyehova Dasɩvʋlɔmaa mɔɔ yɛwɔ kɛnɩ nɩ duwa ahʋanɩ azʋlɔtʋ zʋ kã anyɩnɩlazʋ mɔɔ ɩwɔ Nyamɩnlɩ yi odwokɔ yi nu nɩ be kile anyɩnlɩsunliɣamaa. Kɛ yɛyɛ yɩ yese a?
Yɛma anyɩnlɩsunliɣamaa nyia Bayɩbʋlʋ nɩɩ awuuku mɔɔ bɛfa bosuma Bayɩbʋlʋ yɩ wɔ braille nu na yɛyɛ ebiye sʋ̃ mɔɔ bɔbɔ betiye. Na bɛzabɛ mɔɔ bɛánwʋ dɩyɛ baaba nɩ sʋ̃, yɛyɛ Bayɩbʋlʋ nɩɩ awuuku mɔɔ bɛfa bosuma Bayɩbʋlʋ yɩ mɔɔ bɛhɛlɛ yɩ nɣezile, vidiyo, nɩɩ ndwokɔ mɔɔ bɔbɔ betiye yɛma bɛ.
Dapɛnɩ bela sʋ̃ yɛyɛ dɩyɛzumanlɛ mɔɔ abiyela kʋla ba ebiye, mɔɔ anyɩnlɩsunliɣamaa sʋ̃ kɩnla nwʋ.
Yɛyɛ nhyɩhyɛlɩyɛ sʋ̃ mɔɔ Gyehova Dasɩvʋlɔ ɔkʋ̃ bela ɩkʋla ɩ nɩɩ anyɩnlɩsunliɣanii be suma Bayɩbʋlʋ yɩ.c
Naasʋ̃ yɛále ozukua wɔ eyi nu bela nwʋ o. Iluwakɛɛ Gyisɛsɩ se: ‘Mʋnlʋmmɔ benyia eyi mbʋanlɩ, ɔzɔ ti mʋnlʋmmɔ sʋ̃, máma bede dɩyɛ bela.’—Matiyu 10:8.
Yɛkãã paa a, Gyehova Dasɩvʋlɔmaa dɩ mmenii be mɔɔ bɔdwɩnɩ anyɩnlɩsunliɣamaa nwʋ baaba. Iluwakɛɛ abiyela, mɔɔ anyɩnlɩsunliɣamaa po kɩnla nwʋmɔ mɔɔ ɩpɛ kɛɛ ɩ nɩɩ yɛ bɔ numɔ sʋ̃mɩ Nyamɩnlɩ nɩ, yɛábʋ yɩ. Mɔwʋ dɩyɛ kila ndwokɔ be mɔɔ anyɩnlɩsunliɣamaa mɔɔ bɛaɣa yɛ Gyehova Dasɩvʋlɔmaa nɩ hã.
Talita Alnashi zʋ̃ Sweden na bɔwʋlɩ yɩ nɩ, nɩ ɩánwʋ dɩyɛ baaba. Kila kezimɔ yɩ awʋvʋlɔ va Bayɩbʋlʋ yɩ hilehile yɩ, nɩɩ mmʋwalɩyɛ mɔɔ bɔ ɔhɔnwʋmmɔ Gyehova Dasɩvʋlɔmaa yɛ́ ma bɛ.
James Ryan zʋ̃ United States, bɔwʋlɩ yɩ nɩ, nɩ ɩdɩ omumunlo na aɣinzi yi yɩ anyɩ zunli. Kila mɔɔ ɩma ɩtɩ nɣanlɩ kɛɛ yɩ anyɩ de na yɩ ahʋnlɩnɩ tɔ yi kunlu.
Cynthia Pablo zʋ̃ Philippines, ɩdɩ omumunlo na yɩ anyɩ sʋ̃ zũ. Mɛyɩ nɩ anwʋkyɩlɩ kezile yɩ mɔɔ COVID-19 adimakɛlɛ yɩ va ɣalɩ nɩ, mɩnla yɛ yɩ ɔhɔnwʋmmɔ Gyehova Dasɩvʋlɔmaa yɛlɩ wʋwalɩ yɩ a? Mɔwʋ dɩyɛ kila odwokɔ mɔɔ ise “Congregation Supports Deaf and Blind Sister During Pandemic.” (“Asafʋ Yi Nu Maa Wʋwalɩ Eliyema Baalɛ Be Mɔɔ Ɩdɩ Omumunlo, Na Yɩ Anyɩ Sʋ̃ Zũ Wɔ COVID-19 Mmɩlɩ Yi Nu.”)
Mɩnla nninyeni mɔɔ bɛfa bosuma Bayɩbʋlʋ yɩ yɛ yɛyɛ a?
Awuuku mɔɔ ɩwɔ braille nu. Yɛyɛ Bayɩbʋlʋ munli yɩ munwala anzɛnyɩɩ yɩ ɔfʋã be wɔ ndɛnɩ sʋ̃maa nu wɔ braille nu. (Sɛ ɛpɛ kɛɛ ɔnwʋ ndɛnɩ dʋdʋ mɔɔ ɩwɔ nu a, kila alɩka mɔɔ ise “New World Translation Bayɩbʋlʋ Mɔɔ Ɩwɔ Braille Nu.”) Yezia sʋ̃ yɛyɛ awuuku mɔɔ bɛfa bosuma Bayɩbʋlʋ yɩ wɔ braille nu. Bɛzabɛ mɔɔ bɛ anyɩ zũ mɔɔ bɛpɛ kɛɛ bosuma kezimɔ bɛkɩnga na bɛkɛlɛ braille nɩ, yɛyɛ blohyʋɔ be mɔɔ bɔfʋlɔ yɩ Learn to Read Braille (Sumá Kezimɔ Ɛkɛɣɩnga Braille) yɛma bɛ mɔɔ abiye mɔɔ ɩnwʋ dɩyɛ nɩ kɔhʋla kɔwʋwa bɛ ma bokozuma.
Sa ɔkʋla kã kile Gyehova Dasɩvʋlɔ be ma ɩma braille awuuku mɔɔ bɛbɩlɩntɩ nɩ be wʋ anzɛnyɩɩ ɛma bɛba bekyela wʋ.
Sa ɔkʋla sʋ̃ twɩ̃ nninyeni mɔɔ bɛfa ilɛtɩlɔnɩkɩ mahyini mɔɔ anyɩnlɩsunliɣamaa bɛfa bɛkɩnga dɩyɛ nɩ be wɔ jw.org zʋ.
Awuuku mɔɔ yɩ ɛhɛlɛlɛ mma yɩ dɩdɩ nɣezile. Yɛyɛ awuuku nɩɩ nninyeni mvʋlɔ mɔɔ yɩ ɛhɛlɛlɛ mma yɩ dɩdɩ nɣezile yɛma bɛzabɛ mɔɔ bɛánwʋ dɩyɛ baaba yɩ. Yɛyɛ yɛ jw.org wɛbsayɩtɩ yɩ bʋwɔ paa wɔ ɔhʋanɩ be zʋ mɔɔ sɛ abiye pɛ kɛɛ ɩtɛlɛ ɛhɛlɛlɛ mma yɩ nu na ɩanwʋ yɩ bʋwɔ a, sa ɩkʋla ɩyɛ zɔ mɔɔ ɛhɛlɛlɛ mma nɩ ɩlɛ́kɩhã kɔwɔ nu. Ɔzɔ la yɛ JW Library app yɩ zʋ awuuku yɩ sʋ̃, yɛyɛ yɩ wɔ ɔhʋanɩ be zʋ mɔɔ enii kʋ̃ nɩ yɩzayɩ ɩkɔhʋla ɩkɛma ɛhɛlɛlɛ mma nɩ kɛyɛ nɣezile kɛmɔ ɩpɛ yɩ.
Sa ɔkʋla kã kile Gyehova Dasɩvʋlɔ be ma ɩma wʋ yɛ awuuku mɔɔ yɩ ɛhɛlɛlɛ mma yɩ dɩdɩ nɣezile nɩ be anzɛnyɩɩ ɛma bɛba bekyela wʋ.
Sa ɔkʋla sʋ̃ twɩ̃ awuuku mɔɔ yɩ ɛhɛlɛlɛ mma yɩ dɩdɩ nɣezile nɩ be wɔ jw.org zʋ.
Awuuku mɔɔ bɛyɛ yɩ odiyo. Yɛyɛ New World Translation Bayɩbʋlʋ yɩ odiyo wɔ ndɛnɩ mɔɔ ɩbʋ 200 nu. Akʋ̃ sʋ̃, yɛ awuuku mɔɔ yɛfa yesuma Bayɩbʋlʋ yɩ nɩ, yezia yɛyɛ onumɔ sʋ̃maa nɩ la odiyo. Yɛ odiyo yɩ be wɔ kɛnɩ mɔɔ bɛkã mfonyini mɔɔ ɩwɔ buuku yi nu nɩ nwʋ odwokɔ.
Tiye anzɛnyɩɩ twɩ̃ nninyeni mɔɔ bɛyɛ yɩ odiyo nɩ be wɔ jw.org nɩɩ JW Library app yɩ zʋ.
Sa ɔkʋla sʋ̃ twɩ̃ nninyeni mɔɔ bɛyɛ yɩ odiyo mɔɔ bɔkʋla bɛfa mahyini mɔɔ ɩbɔ odiyo bɔbɔ nɩ be wɔ jw.org zʋ, ebiye dɩkɛɛ screen readers nɩɩ digital talking book players.d
Vidiyo mɔɔ besia bɛkã nninyeni mɔɔ ɩkɔlɩɩ zʋlɔ wɔ numɔ nɩ nwʋ odwokɔ. Gyehova Dasɩvʋlɔmaa yɛ vidiyo mɔɔ bɛfa bosuma Bayɩbʋlʋ yɩ. Vidiyo nɩ be wɔ kɛ mɔɔ besia bɛkã nninyeni mɔɔ ɩkɔlɩɩ zʋlɔ wɔ numɔ nɩ nwʋ odwokɔ. Bɛyɛ eyimmɔ wɔ ndɛnɩ mɔɔ ɩbʋ 100 nu. Vidiyo eyimmɔ bʋwa mmenii ma bɛtɩ Bayɩbʋlʋ yɩ tʋ na bɛfa numɔ ndwokɔ bɔbɔ bɛ ɛbɩla.
Yɛ dɩyɛzumanlɛ nɩɩ ayiyialɩyɛ mvʋlɔ mɔɔ yɛyɛ. Yɛwɔ asafʋ sʋ̃maa wɔ oyuwadɩ yɩ dɩka bela mɔɔ wɔ dapɛnɩ bela nɩ, yɛbɔ numɔ yesuma dɩyɛ na yɛsʋ̃mɩ. Yɛwɔ ayiyialɩyɛ nɣezile mɔɔ boduwa Bayɩbʋlʋ yɩ zʋ bekilehile yɛ. Yɛyɛ eyi wɔ ɔlʋbɔ bela nu. Sɛ yɛyɛɛ ayiyialɩyɛ nɣezile na yekehila vidiyo a, yɛbɔ mmɔdɩnɩ kɛɛ yɛkɛma mmenii mɔɔ bɛ anyɩ deli vidiyo mɔɔ besia bɛkã nninyeni mɔɔ ɩkɔlɩɩ zʋlɔ wɔ numɔ nɩ bɛ sa kɛhã ebiye. Akʋ̃ sʋ̃, sɛ ɩbayɩ kɛɛ abiye mɔɔ yɩ anyɩ zũ na isia sʋ̃ ɩdɩ omumunlo wɔ yɛ dɩyɛzumanlɛ nɩɩ yɛ ayiyialɩyɛ nɣezile tʋ a, yɛma abiye mɔɔ izi kezimɔ botua omumunlo ndɛnɩ nɩ sɔ yɩ sa tua omumunlo ndɛnɩ yɩ na ama ɩadɩ mɔɔ bɛkãã nɩ tʋ. Amɩyɛ mɛyɩ kezimɔ abiyela dɩ bela nɩ, yede yɩ yetiã numɔ.
Pɩbɛ dɩka mɔɔ asafʋ be yiyia numɔ yɛ bɛ dɩyɛzumanlɛ.
Kila yɛ ayiyialɩyɛ mɔɔ yɛyɛ yɩ ɔlʋbɔ bela nɩ be.
Kɔ Gyisɛsɩ yi Owulo Ɛhakɛlɛlilɛ mɔɔ ɩdɩ yɛ ayiyialɩyɛ titili, mɔɔ yɛyɛ yɩ ɔlʋbɔ bela nɩ be.
José Luis Ayala da Mexico. Bɔwʋlɩ yɩ nɩ, nɩ ɩdɩ omumunlo na mmɩlɩ mɔ ilili alʋbɔ 29 nɩ, yɩ anyɩ sʋ̃ zunli. Kila kezimɔ inyia dɩyɛzumanlɛ mɔɔ yɛyɛ nɩ zʋ mfasʋ, nɩɩ kezimɔ bɔwʋwa yɩ ma ɩɣa yɛ abiye mɔɔ ɩkʋla ikilehile Bayɩbʋlʋ nu bʋwɔ.
a Odwokɔpɔkɔ “anyɩnlɩsunliɣamaa” mɔɔ yɛ lɛ yedii egyima wɔ odwokɔ eyi nu nɩ gyĩ kɛnɩ ma bɛzabɛ mɔɔ bɛánwʋ dɩyɛ kʋlaa nɩɩ bɛzabɛ mɔɔ bɛánwʋ dɩyɛ baaba.
b Gyehova dɩ Nyamɩnlɩ yi dima ankasa. (Ndwomi 83:18) Kila odwokɔ mɔɔ ise “Aninyia Yɛ Lɛ Gyehova a?”
c Sa ɔkʋla ma bɛ nɩɩ wʋ suma Bayɩbʋlʋ yɩ mɔɔ olotuwa dɩyɛ bela.
d Screen readers nɩɩ digital talking book players dɩ mahyini be mɔɔ ɩkɩnga dɩyɛ. Na iluwakɛɛ bɛyɛ yɩ wɔ ɔhʋanɩ be zʋ mɔɔ ɩbɔ kezile nɩ ti, ɩma enii mɔɔ itiyee nɩ tɩ yɩ bʋwɔ. Bɔkʋla bɛfa kɔmpʋta bɔbɔ nnɩ be mɔɔ bɔlʋkɔdʋ bediã kɛ. Mahyini eyimmɔ bʋwa mmenii mɔɔ bɛfa bedi egyima nɩ ma bɔkʋla bɔnwʋ dɩka mɔɔ ɩɣɩnga buuku be idwu.