Kezimɔ Yekodu Mpʋnɩ Wɔ Dasɩlɛlilɛ Nu​—Anyɩnlɩsunliɣamaa Mɔɔ Yekeli Bɛ Dasɩlɛ

SIANTI MƆƆ IHYINYIA: Anyɩnlɩsunliɣamaa sʋ̃maa bɛ anyɩ iáleli nwʋmɔ kɛɛ bɛ nɩɩ ngyɛvʋlɔ bɛkɛdɩndɛ. Meti, ide mmɔdɩnɩwɔlɛ baaba na yɛali ɔzɔ mmenii nɩ dasɩlɛ. Gyehova ɩdwɩnɩ anyɩnlɩsunliɣamaa bɔ nwʋ baaba. (Lɛv 19:14) Sɛ yɛyɛ nhyɩhyɛlɩyɛ na yɛbʋwa bɛzabɛ mɔɔ bɛ anyɩ izũ nɩ ma bosuma Gyehova nwʋ dɩyɛ a, nɩ ikile kɛɛ yesumazuma Gyehova yɩ ndianwʋ nɩ.

KEZIMƆ ƐKƐYƐ YƖ:

• ‘Pɩbɛ́’ anyɩnlɩsunliɣamaa. (Mt 10:11) Ezi abiye mɔɔ yi bunsuwanii be yɩ anyɩ izũ a? Asʋ̃ anyɩnlɩsunliɣamaa sukuulu, dɩka mɔɔ bekila anyɩnlɩsunliɣamaa, anzɛnyɩɩ nnɩka mvʋlɔ wɔ wʋ azɩlɛ-sini yɩ nu mɔɔ bɛ anyɩ ikeleli yɛ awuuku nɩɩ nninyeni mvʋlɔ mɔɔ bɛyɛ bɛma anyɩnlɩsunliɣamaa nɩ nwʋ a?

• Kilé bɔ nwʋ anyɩnlɩlelɛ. Sɛ ɛfa enii mɔɔ yɩ anyɩ izũ nɩ ɔhɔnwʋ na ekile kɛɛ ɔdwɩnɩ yɩ nwʋ a, sa ɩkʋla ɩyɛ mɛlɛkɛ ɩma yɩ kɛɛ ikediye wʋ. Fá ndwokɔ mɔɔ bɛ anyɩ ikeleli nwʋmɔ nɩ bɔ nkɔmmɔwɔlɛ nɩ tʋ.

• Bʋwá bɛ wɔ sunzuma ɔfʋã nu. Kɛmɔ yɛkɔwʋwa bɛzabɛ mɔɔ bɛánwʋ dɩyɛ baaba anzɛnyɩɩ bɛ anyɩ izũ nɩ ti, yɛ ahyɩhyɛdɩ nɩ ɩyɛ awuuku be wɔ ahʋanɩ azʋlɔtʋ zʋ mɔɔ ɩkɔhʋla ɩkɔwʋwa bɛ. Biziá yɩ ma ɩhã ɔhʋanɩ mɔɔ ɩpɛ kɛɛ boduwa zʋ bosuma dɩyɛ. Ɩsɛ kɛɛ dasɩlɛlilɛ zʋ ehilalɛvʋlɔ nɩ ɩma awuuku zʋ ehilalɛvʋlɔ nɩ ɩkɛla mɔɔ anyɩnlɩsunliɣavʋlɔ be ɩpɛ nɩ be ɩma yɩ.