Bebinyia Wɔɔkyɩ Mɔɔ Ikile Mmɩlɩ Mɔ Oyuwadɩ Yɩ Kɛzɩkɛ Nɩ Bɔhɔ Anyunumi

Wɔ January 27, 2026 nɩ, sayɩnsɩmaa binyianlɩ wɔɔkyɩa mɔɔ ikile mmɩlɩ mɔ oyuwadɩ yɩ kɛzɩkɛ nɩ hɔlɩ anyunumi ma iɣikeli ohunluma dasuwonu paa. Ohunluma dasuwonu kile nninyeni mɔɔ adasamaa bɛyɛ mɔɔ ɩsɩkɛɛ oyuwadɩ yɩ nɩ.

• “Bulletin of the Atomic Scientists bɛ Science and Security Board mɔɔ bɔwɔ kɛnɩ nnɛ nɩ binyia wɔɔkyɩ mɔɔ ikile mmɩlɩ mɔ oyuwadɩ yɩ kɛzɩkɛ nɩ ma ɩha anyɩnlɩwulɛ 85 (85 seconds) ma itwu ohunluma dasuwonu. Ɩlɛ́sɩkɛlɩ lotwuli zɔ kyɩ̃.”—Bulletin of the Atomic Scientists.

• “Odwokɔ mɔɔ bɛlɛ Wɔɔkyɩ Mɔɔ Ikile Mmɩlɩ Mɔ Oyuwadɩ Yɩ Kɛzɩkɛ nɩ bɛkãã nɩ nu la kɛ paa. Nninyeni ɛyɛlɛ ɛyɛlɛ sʋ̃maa isizii, mmenii bɛáhʋla bɔsɔ bɔ ɔhawʋ munwa ma meti nninyeni ɛzɩkɛlɛ la yɛ ɩsɩkɛɛ a. Ihyinyia kɛɛ adasamaa yɛ nzɩnzanlɩyɛ, naasʋ̃ sɛ ɩkɛyɛ bʋwɔ a gyɩsɛ adasamaa kyina be mbanimbani yi zʋ ma bɛyɛ debe ndɛndɛ.”—Alexandra Bell, Bulletin of the Atomic Scientists be ebani.

Asʋ̃ ɩlɛ́kyɛ na bɛazɩkɛ enii nɩɩ azɩlɛ yɩ a? Asʋ̃ ɩsɛ kɛɛ ye kunlu tuli mɔɔ ikezi wɔ eɣile be nɩ nwʋ a? Mɩnla yɛ Bayɩbʋlʋ yɩ kã a?

Mɔɔ Ikezi Wɔ Eɣile Be

Bayɩbʋlʋ yɩ kã kɛɛ “azɩlɛ mɛyɩ ɩwɔ kɛnɩ eɣile bela” na mmenii ‘kɔwʋwa zʋlɔ daabaa.’ (Odwokɔhanlɛvʋlɔ 1:4; Ndwomi 37:29) Meti ɩ́dɩ dɩyɛ mɔɔ adasamaa kɔhʋla kɛzɩkɛ azɩlɛ yɩ anzɛnyɩɩ bɛkɛma ɩkɛyɛ dɩka mɔɔ bɔbʋwa a ɩáyɛ bʋwɔ.

Naasʋ̃, Bayɩbʋlʋ kã awielɩyɛ be nwʋ odwokɔ. Kɛ ndianwʋ nɩ, ɩkã kɛɛ ‘oyuwadɩ yɩ kodua nu.’—1 Dwɔɔnʋ 2:17.

Sɛ ɛpɛ kɛɛ ɔnwʋ oyuwadɩ yɩ awielɩyɛ ɔkʋ̃ mɔɔ Bayɩbʋlʋ yɩ ɩkãã nwʋmɔ odwokɔ yɩ a, kɩnga odwokɔ mɔɔ ise “Wiase Yi Reba Awiei Anaa? Bible Aka Sɛ Biribiara Bɛsɛe Anaa?”

• Sɛ ɛpɛ kɛɛ osuma sʋ̃maa falɩ mmɩlɩ mɔ nninyeni mɔɔ ikile kɛɛ yeɣike oyuwadɩ yɩ awielɩyɛ nɩ kezizi a, kɩnga odwokɔ mɔɔ ise “When Will the World End?”

Nyia anwʋlazʋ kɛɛ nninyeni kɛyɛ bʋwɔ

Bayɩbʋlʋ kɔhʋla kɔwʋwa yɛ ma yekenyia anwʋlazʋ kɛɛ nninyeni kɛyɛ bʋwɔ ɩávalɩ nwʋmɔ kɛɛ yeyiyiaa ndwokɔzɩzɩbɛ nɩ. Mɩnla ɔhʋanɩ zʋ a?

• Bayɩbʋlʋ yɩ ma yɛ fʋlɔdulɛ mɔɔ ɩkɔhʋla kɔwʋwa yɛ. (2 Timoti 3:16, 17) Kɛ ndianwʋ nɩ, odwokɔ mɔɔ ise “How to Control Worry” nɩ kɔwʋwa wʋ ma ɔkɔnwʋ kezimɔ Bayɩbʋlʋ kɔhʋla kɔwʋwa wʋ ma ekenyia anwʋlazʋ kɛɛ nninyeni kɛyɛ bʋwɔ, ɩávalɩ nwʋmɔ kɛɛ eyiyiaa ndwokɔzɩzɩbɛ nɩ.

• Bayɩbʋlʋ yɩ ma yenyia eɣile baaba be nwʋ anyɩnlɩlazʋ. (Wulomimaa 15:4) Mɔɔ ikezi nnɛ nɩɩ ɛhyɩ̃ be nɩ, ikilehile numɔ ma ɩda kɛnɩ fanyɩɩ, na eyi bʋwa yɛ ma yɛfa anwʋlazʋ yekyina ndwokɔ mɔɔ isizii wɔ oyuwadɩ yɩ nu nɩ munwa.

Sɛ ɛpɛ kɛɛ osuma sʋ̃maa wɔ Bayɩbʋlʋ yɩ nu a, mɛyɩ nɩ yɛlɛ anyɩnlɩlelɛ yɛtʋʋ salɛ yɛfʋlɔ wʋ kɛɛ twe yɛ Bayɩbʋlʋ dɩyɛzumanlɛ mɔɔ bɛáduwa hwɩɩ nɩ kila.