“Bɛkɛdɩ Kɛɛ Kʋnɛ Zi”

John Simpson mɔɔ ɩyɛ egyima wɔ BBC ɔzʋ̃mɩ kɛyɛ ɔlʋbɔ 1960 nɩ kã kɛɛ: “Mɩva mɩ anyɩ mʋnwʋ kʋnɛ mɔɔ ɩbʋ 40, na minyia nwʋmɔ hʋanɩ mʋwɔ nwʋmɔ amanɩyɛ sʋ̃. Mʋnwʋnlɩ mmɩlɩ mɔ Cold War yɩ nu yɛlɩ sɩ na aɣilemvile nu la yɩ tʋ dualɩ nɩ. Naasʋ̃ mʋlɔ́nwʋnlɩ ɔlʋbɔ mɔɔ numɔ yɛ atɩɩtɩɩ dɩkɛɛ 2025 ɔlʋbɔ yɩ kyɩ̃. Kɛ kʋnɛ nɣezile nɣezile mɔɔ ɩkɔlɩɩ zʋlɔ nɩ nkʋ̃ʋ̃ ti a, mfomi mɔɔ ɩzʋ̃ kʋnɛ yɩ numɔ ɔkʋ̃ nu ɩkɛɣa nɩ kɔhʋla kɛhã mmenii sʋ̃maa wɔ oyuwadɩ yɩ nu kɛdɛla kʋnɛ bela.” Na eyi si mɔɔ Bayɩbʋlʋ yɩ kã nɩ zʋ owudo.

Kʋnɛ mɔɔ ɩkɔlɩɩ zʋ wɔ oyuwadɩ yɩ nu nɩ ididee mmenii paa. Mmenii sʋ̃maa bizia bɔ nwʋ kɛɛ, asʋ̃ nninyeni kɛyɛ bʋwɔ a? Mɩnla yɛ Gyisɛsɩ hilehileli a?

Mɔɔ Gyisɛsɩ hilehileli

Gyisɛsɩ hanlɩ mɔɔ isizii wɔ nnɛ nɩ nwʋ odwokɔ dianlɩ kɛ. Ɩwɔlɩ yɩ adʋwavʋlɔ yɩ kɔkɔ kɛɛ: “Bɛkɛdɩ kɛɛ kʋnɛ izi na iɣike bɛ yɛɛ bɛkɛdɩ kɛɛ ebiye sʋ̃ izi manlɩ be nu aɣinzi aɣinzi.”—Matiyu 24:6.

Ɩwɔ numɔ kɛɛ kʋnɛ nɩɩ basabasayɛlɛ mɔɔ ɩkɔlɩɩ zʋ nɩ yɛ atɩɩtɩɩ paa dɩyɛ, naasʋ̃ yɛlɛ sianti baaba be ti mɔɔ yɛkɔhʋla kehila ɔhʋanɩ kɛɛ nninyeni kɛyɛ bʋwɔ. Mɩnla ti a? Iluwakɛɛ Gyisɛsɩ hanlɩ kɛɛ kʋnɛ nɣezile, nɩɩ subanɩ azʋlɔtʋ, nɩɩ ndwokɔ mɔɔ ikezizi, nɩɩ bʋwabɩlɛ azʋlɔtʋ mɔɔ ɩdɩdɩ zɔ yɛ ɩbɔ nu ɩyɛ “sɛnkyɩlɛdɩ” mɔɔ ɩkɛma yɛkɔnwʋ kɛɛ “oyuwadɩ eyi ɩbaa awielɩyɛ” a. (Matiyu 24:3; Luuku 21:7) Eyi kile kɛɛ mmɩlɩ be bɛaɣa mɔɔ Gyisɛsɩ kɛma kʋnɛ kodua nu. Mɩnla ɔhʋanɩ zʋ a?

Mɔɔ Gyisɛsɩ kɛyɛ

Ɩlɛ́kyɛ bela, Gyisɛsɩ mɔɔ ɩdɩ Nyamɩnlɩ Bulombunlililɛ yɩ zʋ Bulombunli nɩ “kɛma kʋnɛ keyiaki wɔ azɩlɛ yɩ munwala zʋ.”—Ndwomi 46:9.

Sɛ ɛpɛ kɛɛ osuma sʋ̃maa falɩ kezimɔ yekenyia azʋ̃nudwolɩyɛ wɔ eɣile be, nɩɩ mfasʋ mɔɔ ekenyia wɔ zʋlɔ nɩ nwʋ a, kɩnga odwokɔ mɔɔ ise “Nea Ɛbɛma Akokoakoko Agyae.”