Basabasayɛlɛ Lɔ́kʋla Kɔwʋwa Ma Akasakasa Tʋ Kodua

Mmenii kɔ zʋlɔ de di kɛɛ sɛ kʋnɛ anzɛnyɩɩ akasakasa be ba a, sa bɔkʋla boduwa basabasayɛlɛ zʋ bɛma yɩ tʋ tua. Naasʋ̃ ɔzɔ adwɩnɩ yɩ nɩɩ kezimɔ Gyisɛsɩ hilehileli na ɩyɛlɩ yɩ dɩyɛ nɩ iáyiyia. Dwɩnɩndwɩnɩ ndwokɔ be mɔɔ ɩhanlɩ nɩɩ nninyeni be mɔɔ ɩyɛlɩ nɩ nwʋ kila.

Mɔɔ Gyisɛsɩ hanlɩ

Wɔ Gyisɛsɩ yi file zʋ ehilehilelɛ yɩ nu nɩ, ihilehileli kɛɛ sɛ yɛ nɩɩ mvʋlɔ adwɩnɩ iáyiyia po a, yɛlɔ́kʋla yɛkɛva ɛyavalɛ, nɩɩ basabasayɛlɛ yekeziyeziye. Sunzu mɔɔ ɩhanlɩ yɩ be nwʋ kila.

• “Dɩyɛ bela mɔɔ bɛpɛ kɛɛ abiyemmɔ bɛyɛ bɛma mʋnlʋmmɔ nɩ, bɛyɛ́ zɔ la bɛma bɛ.” (Matiyu 7:12; Luuku 6:31) Fʋlɔdulɛ eyi hyɛ yɛ ɛzɩzɩbɛ kɛɛ yɛ nɩɩ mmenii mvʋlɔ lí yi kezimɔ yɛpɛ kɛɛ bɛ nɩɩ yɛ di nɩ la.a Abiyela ɩábɛ akasakasa, meti wʋánwʋ yɩ kɛɛ sɛ yɛ nɩɩ mmenii mvʋlɔ ɩáyɛ adwɩnɩ po a, ɩsɛ kɛɛ yɛ nɩɩ bɛ di wɔ annidi nɩɩ odwolɛ nu a?

• “Sɛ abiye bɔ bɛ azʋ̃ nyini yi nu a, bɛlánɩ bɛnɩ yɩ sʋ̃ bɛma yɩ.” (Matiyu 5:38, 39; Luuku 6:29) Nɩ Gyisɛsɩ lɛ́kã kɛɛ yeyiáki yiaki yɛ nwʋ ma mmenii bũ yɛ. Mfomi nɩ ɩtɩnɣɛɛ adwɩnɩ mɔɔ ɩáyɛ baaba mɔɔ nyamɩnlɩzʋ̃mɩnlɛ mbanimbani yi kilehile kɛɛ ɩdɩ baaba kɛɛ ɛkɛva tanɩ koduwa tanɩ kakɛ nɩ. Nɩ ɩkãã kehile yɩ adʋwavʋlɔ yɩ kɛɛ íni kɛɛ bɛfa tanɩ botuwa tanɩ kakɛ, mfomi sɛ abiye yɛ debe tiyia bɛ po a, ɩsɛ kɛɛ bɛda odwolɛ ali.b

• “Bɔlɔ́ bɛ adamvʋlɔ.” (Matiyu 5:43, 44; Luuku 6:27) Gyisɛsɩ hilehileli kɛɛ ɩsɛ kɛɛ yɛyɛ bɛzabɛ mɔɔ bɛ nɩɩ yɛ iáli yi bʋwɔ po nɩ baaba. Mɛyɩ sʋ̃ iáhile kɛɛ yɛsʋzɔ tanɩ zʋ.c Mfomi sɛ yɛyɛ baaba yɛma bɛzabɛ mɔɔ bɛ nɩɩ yɛ iáli yi bʋwɔ nɩ a, ɩkɛma bɛ ɛya nɩ kodwe na ebiye po a bɔkɔwɔ yɩ tʋ kɛɛ bɛ nɩɩ yɛ dii yi bʋwɔ.

Mɔɔ Gyisɛsɩ yɛlɩ nɩɩ mɔɔ ɩkɛyɛ

Gyisɛsɩ valɩ yɩ nyɛlɩyɛ nɩɩ yi ehilehile hileli kɛɛ basabasayɛlɛ ɩ́dɩ ɔhʋanɩ mɔɔ boduwa zʋlɔ besiyeziye akasakasa. Nunuma mɔ bɛhyɩlɩ yɩ nɩ, nɩ yɩ adʋwavʋlɔ yɩ bo nu ɔkʋ̃ pɛ kɛɛ ɩbɔ Gyisɛsɩ nwʋ banɩ naasʋ̃ ɩhanlɩ ihileli yi kɛɛ: “Fa wʋ apʋka nɩ wula yɩ bɔha nɩ nu, iluwakɛɛ bɛzabɛ mɔɔ bɔtwɩ̃ apʋka nɩ bowu apʋka munwa.” (Matiyu 26:52) Gyisɛsɩ valɩ yɩ adamvʋlɔ nɩ bɛ tanɩ ɩhyɛlɩ bɛ na ɩwɔlɩ mpayɩ ɩmanlɩ bɛ po. Eyi kile kɛɛ nɩ ɩdɔ bɛ baaba!—Luuku 23:33, 34; 1 Pita 2:23.

Bayɩbʋlʋ yɩ bɔ anʋhʋba kɛɛ Gyisɛsɩ mɔɔ bɔfʋlɔ yɩ Azʋ̃nudwolɩyɛ Bulombunli nɩ kɛyɩ basabasayɛlɛ wɔ kɛ. (Ayɩzaya 9:6, 7) Sɛ ɛpɛ kɛɛ osuma sʋ̃maa falɩ eɣile be kɩnlɩma eyi nwʋ a, kɩnga odwokɔtile mɔɔ ise “Nea Ɛbɛma Akokoakoko Agyae.”