Azʋ̃nudwolɩyɛ Kɛɣa Oyuwadɩ Yɩ Nu Dɩka Bela

Abiyela nyianlɩ a, ankɩ azʋ̃nudwolɩyɛ wɔ oyuwadɩ yɩ nu. Ɔzʋ̃mɩ ɔwɔkɩ munwala nɩ, oyuwadɩ yɩ nu adumivʋlɔ bɛyɛ mɔɔ bɔkɔhʋla bela kɛɛ bɛkɛma azʋ̃nudwolɩyɛ kɛɣa. Itwu mmɩlɩ be a, bɔkʋla bɛma azʋ̃nudwolɩyɛ ba ɛgyɩkɩ̃ɩ̃, naasʋ̃ ɩáhyɛ nɩ basabasayɛlɛ zia ɣa dɔkʋ̃. Asʋ̃ azʋ̃nudwolɩyɛ kɔhʋla kɛɣa oyuwadɩ yɩ nu dɩka bela a? Nyɛ! Sunzu mɔɔ Gyisɛsɩ kɛyɛ nɩɩ mɔɔ ihilehileli nɩ nwʋ.

Mɔɔ Gyisɛsɩ kɛyɛ

Bayɩbʋlʋ yɩ ma yɛnwʋ mɔɔ ɩlɛ́kyɛ Gyisɛsɩ kɛyɛ kɛva kɛma azʋ̃nudwolɩyɛ kɛɣa oyuwadɩ yɩ nu dɩka bela.

• “Bɔkɔvʋlɔ [Gyisɛsɩ] kɛɛ . . . Azʋ̃nudwolɩyɛ Bulombunli. Yi bulombunlililɛ nu kɛdɛlɛ, na azʋ̃nudwolɩyɛ mɔɔ íni awielɩyɛ kɛɣa.” (Ayɩzaya 9:6, 7) Gyisɛsɩ mɔɔ ɩdɩ Nyamɩnlɩ yi Bulombunlililɛ yɩ zʋ Bulombunli nɩ kɛma azʋ̃nudwolɩyɛ mɔɔ íni awielɩyɛ kɛɣa oyuwadɩ yɩ nu dɩka bela.

• “Ikele ehyinyianii mɔɔ isũ ɩfʋlɔ yɩ nɩ, . . . nɩɩ abiyela mɔɔ íni bʋwavʋlɔ nɩ.” (Ndwomi 72:12-14) Gyisɛsɩ koluwa yi tumi yɩ zʋ kɛma pɛlɩpɛlɩlilɛ kɛɣa, na ɩkɛma kʋnɛ, basabasayɛlɛ, nɩɩ amanɩyɛnwʋnlɛ tʋ kodua.

• “Manlɩ be lɔ́twɩ̃ apʋka wɔ manlɩ be zʋ, na bolósuma kʋnɛ dɔkʋ̃.” (Ayɩzaya 2:4) Wɔ Gyisɛsɩ yi tumililɛ tʋ nɩ, abiyela kɛbɩbɛ azʋ̃nudwolɩyɛ na kɛ kʋnɛ a.

Sɛ ɛpɛ kɛɛ osuma kezimɔ Gyisɛsɩ kɛva azʋ̃nudwolɩyɛ kɛɣa ɛhyɩ̃ be, nɩɩ mfasʋ mɔɔ ekenyia wɔ zʋ a, kila vidiyo mɔɔ ise Mɩnla Yɛ Lɛ Nyamɩnlɩ Bulombunlililɛ Nɩ a?

Mɔɔ Gyisɛsɩ hilehileli

Wɔ nnɛ po nɩ, Gyisɛsɩ yɩ ehilehilelɛ nɩ ɩbʋwaa mmenii abʋmɩ abʋmɩ sʋ̃maa ma bɔkɔwʋwa wɔ azʋ̃nudwolɩyɛ nu. Wɔ Gyisɛsɩ yi file zʋ ehilehilelɛ yɩ nu nɩ, ɩvalɩ fʋlɔdulɛ mɔɔ ɩkɛma azʋ̃nudwolɩyɛ kɔwʋwa mmenii bɛ avinli ɩmanlɩ. Sunzu numɔ ɛgyɩkɩ̃ɩ̃ be nwʋ kila.

• “Anyɩnlɩlelɛ yɛ lɛ bɛzabɛ mɔɔ bɛpɩbɛ azʋ̃nudwolɩyɛ.” (Matiyu 5:9) Gyisɛsɩ hyɛlɩ yɩ mɛdalilɛmaa ɛzɩzɩbɛ kɛɛ máma bɔkʋ̃ na izialɩ sʋ̃ ɩmanlɩ bɔnwʋnlɩ kɛɛ ɩsɛ kɛ bɛpɩbɛ azʋ̃nudwolɩyɛ.

• “Kɔ na ɛ nɩɩ wu anlima nɩ belí bɔmʋnlɩ beziyeziye bɛ avinli, ansaana akʋ̃ wʋaɣa wʋawɔ wʋ afɔlɩ nɩ.” (Matiyu 5:23, 24) Gyisɛsɩ hyɛlɩ yi ediyelɛmaa nɩ ɛzɩzɩbɛ kɛɛ bɛyɛ́ ndɛ beziyeziyé akasakasa bela mɔɔ ɩkɛɣa bɛ avinli nɩ. Ihilehile kɛɛ sɛ yɛ nɩɩ Nyamɩnlɩ avinli kɛyɛ kɩnlɩma a, ɩsɛ kɛɛ yɛpɩbɛ azʋ̃nudwolɩyɛ.

• “Máma bobuwa abiyemmɔ ndɛnɩ, ama Nyamɩnlɩ sʋ̃ iáwuwalɩ bɛ ndɛnɩ.” (Matiyu 7:1) Gyisɛsɩ wɔlɩ yɛ kɔkɔ kɛɛ dɩyɛ mɔɔ amɩyɛ yɛlɛ́yɛ nɩ, máma yɛhyɛ mmenii kɛɛ bɛyɛ. Subanɩ mɔɔ ɩdɩ zɔ fa akasakasa ba. Gyisɛsɩ hilehileli kɛɛ áma yɛpɩbɛ sinidɔlɛ wɔ mmenii mvʋlɔ nwʋ, mfomi yɛhɔ́ zʋlɔ yɛva tanɩ yɛhyɛ.—Luuku 6:37.

Mmenii mɔɔ bɔwɔ oyuwadɩ yɩ nu dɩka bela nɩ lɛ Gyisɛsɩ yi ehilehilelɛ nɩ bɛyɛɛ egyima wɔ nnɩka mɔɔ akasakasa ɩkɔlɩɩ zʋlɔ po nɩ. Bɛáva bɛ ahʋnlɩnɩ bedi odwokɔ bela mɛda, na mmɩlɩ mɔ bɛ nɩɩ bɛ bɛádi yi bʋwɔ po nɩ, bɔzʋ̃ ɔlɔlɛ nu bɛfa tanɩ bɛkyɛ.

Sɛ ɛpɛ kɛɛ osuma kezimɔ Gyisɛsɩ yi ehilehilelɛ wʋwa mmenii ma benyia azʋ̃nudwolɩyɛ a, kila odwokɔ mɔɔ ise “Akokoakoko Nyinaa Akyi No Wubetumi Anya Asomdwoe.”