Mmɔdɩnɩ Mɔɔ Mmenii Bɔbɔɔ Kɛɛ Bɛkɛma Azʋ̃nudwolɩyɛ Kɛɣa Oyuwadɩ Nɩ Kɛyɛ Bʋwɔ a?

Basabasayɛlɛ nɩɩ kʋnɛ ɩábalɩ oyuwadɩ yɩ nu. Iluwa eyi ti, Amanlɩ Amanlɩ Nkabomi nɩɩ ahyɩhyɛdɩ azʋlɔtʋ va nninyeni gua ɔhʋanɩ nu mɔɔ ɩkɛma azʋ̃nudwolɩyɛ kɛɣa, na bɛma bɛ agyianugyinanlɛmaa kɔ nnɩka mɔɔ basabasayɛlɛ kɔlɩ zʋlɔ nɩ. Bɔ bʋtayɩ lɛ kɛɛ, bɛkɛma azʋ̃nudwolɩyɛ kɛɣa nnɩka mɔɔ ɩdɩdɩ zɔ nɩ. UN Sɛkɛtile Ebani António Guterres hanlɩ kɛɛ, “Amanlɩ Amanlɩ Nkabomi bɛ agyianugyinanlɛmaa mɔɔ bɛ nɩɩ bɔ hɔ nnɩka azʋlɔtʋ nɩ yɛ bokoluwa bɔ zʋ bɛkɛma azʋ̃nudwolɩyɛ kɛɣa oyuwadɩ a.”

Mmɔdɩnɩ mɔɔ ahyɩhyɛdɩ eyimmɔ bɔbɔɔ kɛɛ bɛkɛma azʋ̃nudwolɩyɛ kɛɣa nɩ, bɔhʋla bodwu ɔzɔ bʋtayɩ yɩ be nwʋ wɔ alʋbɔ mɔɔ ɩɣa ɩzɩ̃ ɩhɔ nɩ nu. Kɛ ndianwʋ nɩ, ɩyɛ a bɔbɔ manlɩmaa nwʋ banɩ, bɔbʋwa bɛzabɛ mɔɔ kʋnɛ nɩɩ basabasayɛlɛ ma bodu wɔ bɛ manlɩ nu nɩ ma besia bɛba, bɛfa alɩyɛ nɩɩ nninyeni azʋlɔtʋ be bɔkɔ bɛma mmenii, na bɔbʋwa manlɩmaa be ma besia beziyeziye be nninyeni be mɔɔ ɩzɩkɛzɩkɛ nɩ. Naasʋ̃ mmenii mɔɔ bɔbɔɔ mmɔdɩnɩ kɛɛ azʋ̃nudwolɩyɛ kɛɣa nɩ beyiyia ɔhawʋ nɣezile mɔɔ ɩáma bɔkʋla botwu bɔ bʋtayɩ munwala nwʋ. Mɩnla yɛ ɩkɔhʋla kɛma azʋ̃nudwolɩyɛ ankasa kɛɣa oyuwadɩ a? Mɩnla yɛ Bayɩbʋlʋ yɩ kã wɔ nwʋ a?

Ɔhawʋ mɔɔ beyiyia, nɩɩ mɔɔ Bayɩbʋlʋ yɩ kã

Mmenyia anwɩ̃ be lanlɩ bɛ mɛda ma bɔ nwʋ na bɛɣɛla bɛ sa beyiyia nu.

Ɔhawʋ yɩ: bɛ adwɩnɩ iáyiyia. Ɩ́la azɩ kɛɛ azogyiamaa nɩɩ okuwu azʋlɔtʋ mɔɔ ɩsʋnɩ dɩka mɔɔ abiyela zʋ̃ nɩ kɔwɔ numɔ kɛyɛ egyima. Itwu mmɩlɩ be a, ɩyɛ sɩ ɩma bɛ kɛɛ bɔkɔwɔ nu bɛkɛyɛ egyima iluwakɛɛ bɛ adwɩnɩ iáyiyia na ɩyɛ sʋ̃ a, ɩsʋnɩ kezimɔ abiyela pɛ kɛɛ ɩyɛ yi egyima.

Mɔɔ Bayɩbʋlʋ yɩ kã: ‘Sʋlɔ Nyamɩnlɩ nɩ kebigyia bulombunlililɛ be sʋlɔ. Ikowuwu bulombunlililɛ [enii yɩ aɣanɩ] azʋlɔtʋ yɩ munwala ma ɩkɛzã, na mɛyɩ dɩyɛ ikegyina daabaa.’—Danɩyɛlɩ 2:44.

Ɩlɛ́kyɛ bela, Nyamɩnlɩ bayɩ kʋnɛ wɔ kɛ na ɩama azʋ̃nudwolɩyɛ ɩaɣa oyuwadɩ munwala. (Ndwomi 46:8, 9) Ɩkɛva yɩ aɣanɩ ɔkʋ̃ kyeinyii mɔɔ mɛyɩ yɛ lɛ Nyamɩnlɩ yi Bulombunlililɛ nɩ ikeziye oyuwadɩ dɩyɛ yɩ agyia nu. Sʋlɔ aɣanɩ ɔkʋ̃ kyeinyii eyi mɔɔ ɩdɩ baaba ɩtɛla biyela nɩ keli tumi wɔ azɩlɛ mɔɔ basabasayɛlɛ bela íni zʋlɔ nɩ zʋ, na yeléhyinyia okuwu azʋlɔtʋ mɔɔ bɛpɩbɛ azʋ̃nudwolɩyɛ dɔkʋ̃.

Ɔhawʋ yɩ: béni nninyeni sʋ̃maa, na bɛ anwʋzɩzɩbɛ sʋ̃ wɔ azɩ. Okuwu azʋlɔtʋ mɔɔ bɛpɛɛ azʋ̃nudwolɩyɛ nɩ, kɛ mmɩlɩ munwatĩĩ yɛ benyia mmenii, ozukua nɩɩ nninyeni sʋ̃maa mɔɔ ɩkɛma bekenyia anwʋzɩzɩbɛ bɛkɛyɛ be egyima yɩ a. Akʋ̃ sʋ̃, iluwa bɛ anwʋzɩzɩbɛ mɔɔ ɩwɔ azɩ nɩ ti, bɛáhʋla bɛyɛ egyima wɔ nnɩka mɔɔ ɛkɛnɩ yɛ ɛyɛlɛ nɩ.

Mɔɔ Bayɩbʋlʋ yɩ kã: ‘Ye Niibenyia Gyisɛsɩ Kɩlayɩsɩ Nyamɩnlɩ nɩ, ɩvalɩ [Gyisɛsɩ] ɩwʋwalɩ yɩ sa nyini zʋ wɔ sʋlɔ. Ɩvalɩ yɩ ɩwʋwalɩ dɩka mɔɔ ɩwɔ sʋlɔ kʋlaa ɩtɛla aɣanɩ, tumililɛ nɩɩ tumi.’—Ɛfɩsɛsɩmaa 1:17, 20, 21, New World Translation.

Dɩyɛ munwala zʋ tumivʋlɔ Nyamɩnlɩ Gyehovaa nɩ, ɩva dɩyɛ bela mɔɔ Gyisɛsɩ mɔɔ ɩdɩ Nyamɩnlɩ yi Bulombunlililɛ zʋ Bulombunli nɩ hyinyia na ama ɩahʋla iali tumi nɩ ɩma yɩ. (Danɩyɛlɩ 7:13, 14b) Nyamɩnlɩ ɩma Gyisɛsɩ nyia tumi kezile, nnimidi, nɣɛlɛbɛ, nɩɩ dɩyɛnunwʋnlɛ mɔɔ ɩtɛla enii aɣanɩ, anzɛnyɩɩ okuwu bela yɩ dɩyɛ. (Ayɩzaya 11:2) Akʋ̃ sʋ̃, Gyisɛsɩ lɛ awɔvʋlɔ sʋ̃maa mɔɔ bɔwɔ tumi mɔɔ ɩkɔhʋla kɛva bɛ keli egyima. (Yikile 19:14) Dɩyɛ bela íni kɛnɩ mɔɔ ɩyɛ sɩ ɩma yɩ.

Gyisɛsɩ kɛva anwʋzɩzɩbɛ nɩɩ dɩyɛ bela mɔɔ Nyamɩnlɩ va ma yɩ nɩ keli egyima na ɩava ɩayɩ kʋnɛ wɔ kɛ. Na kɛ yɩzayɩ nkʋ̃ o, mfomi ɩkɛma abiyela mɔɔ ɩwɔ Nyamɩnlɩ yi Bulombunlililɛ yɩ tʋ nɩ kenyia azʋ̃nudwolɩyɛ nɩɩ banɩwɔlɛ, na yɩ nwʋ kɔdɔ yɩ baaba.—Ayɩzaya 32:17, 18.

Ndɛnɩwuwalɛmaa bɛ hama mɔɔ bɛfa bɔpʋmɩ kɛnɩ.

Ɔhawʋ yɩ: ɩyɛ a, mmɛla si bɔ ɔhʋanɩ. Itwu mmɩlɩ be a, bɛzabɛ mɔɔ bɛyɛ egyima bɛma okuwu mɔɔ bɛpɛɛ azʋ̃nudwolɩyɛ nɩ, mmɛla yɩ nu ɩála kɛnɩ ma bɛ, na ɩyɛ sʋ̃ a, isi bɔ ɔhʋanɩ wɔ nninyeni azʋlɔtʋ be ɩyɛlɛ nwʋ. Iluwa eyi ti, ɩáma bɔkʋla bɔbɔ mmenii nwʋ banɩ bʋwɔ anzɛnyɩɩ botwu bɔ bʋtayɩ munwala nwʋ.

Mɔɔ Bayɩbʋlʋ yɩ kã: “Nyamɩnlɩ ɩva sʋlɔ nɩɩ azɩlɛ yɩ zʋ tumi munwatĩĩ iwula [Gyisɛsɩ] sa.”—Matiyu 28:18.

Nyamɩnlɩ ma Gyisɛsɩ ɔhʋanɩhilelɛ mɔɔ numɔ la kɛnɩ mɔɔ ɩkɛma ikenyia tumi kezile ɩkɛva azʋ̃nudwolɩyɛ kɛɣa mɔɔ dɩyɛ bela lési yi ɔhʋanɩ. (Dwɔɔnʋ 5:22) Gyisɛsɩ lésizi abiyela kyɩ̃. (Ayɩzaya 11:3-5) Meti ntɩyasɩ wɔ numɔ kɛɛ Bayɩbʋlʋ fʋlɔ Gyisɛsɩ kɛɛ “Azʋ̃nudwolɩyɛ Bulombunli” mɔɔ yi bulombunlililɛ gyĩ “pɛlɩpɛlɩlilɛ nɩɩ ɛdɩnɣɛlɛ” zʋ.—Ayɩzaya 9:6, 7.

Nyamɩnlɩ yi Bulombunlililɛ yɩ kɛva azʋ̃nudwolɩyɛ baaba yɩzayɩ kɛɣa

Ɩwɔ numɔ, enii yɩ ahyɩhyɛdɩ azʋlɔtʋ mɔɔ bɛpɛɛ azʋ̃nudwolɩyɛ nɩ kɔhʋla kɛma kʋnɛ keyiaki wɔ mmɩlɩ ɛgyɩkɩ̃ɩ̃ be nu wɔ dɩka pɔkyɩɩ be dɩyɛ, naasʋ̃ bɔlɔ́kʋla kɛyɩ ɛdanɩlɛ mɔɔ ɩwɔ mmenii avinli mɔɔ ɩfa basabasayɛlɛ ɩba nɩ wɔ mmenii ahʋnlɩnɩ nu kyɩ̃.

“Odwokɔ yɩ yɛ lɛ kɛɛ, azʋ̃nudwolɩyɛ yɩzayɩ ebiye íni kɛnɩ po na bɛahã kɛɛ bɔbɔɔ nwʋmɔ banɩ.”—Dennis Jett, former U.S. ambassador.

Naasʋ̃ Nyamɩnlɩ yi Bulombunlililɛ mɛyɩ, ɩkɔhʋla kɛva azʋ̃nudwolɩyɛ ɩkɛɣa, iluwakɛɛ ɩbʋwa mmenii ma bɛyɩ ɛdanɩlɛ wɔ bɛ ahʋnlɩnɩ nu. Kakɛ kɛɛ, mmɩlɩ mɔ nɩ Gyisɛsɩ wɔ azɩlɛ yɩ zʋ nɩ, ɩvalɩ yi munwa ndwokɔ nɩɩ yɩ nyɛlɩyɛ ihilehileli mmenii ma bɔnwʋnlɩ kezimɔ bɛkɛbɩbɛ azʋ̃nudwolɩyɛ na bɛalɔ mmenii:

“Nyilalɛ ɩhã bɛzabɛ mɔɔ bekila ma azʋ̃nudwolɩyɛ ɩba nɩ.”—Matiyu 5:9.

“Dɔ wʋ ɔhɔnwʋ kɛɛ wʋzawʋ wʋ nwʋ.”—Maakɩ 12:29-31.

“Fa wʋ apʋka wula yɩ bɔha nɩ nu, iluwakɛɛ bɛzabɛ mɔɔ bɔtwɩ̃ apʋka nɩ bowu apʋka munwa.”—Matiyu 26:52.

“Mmɩlɩ mɔ bɔwʋdʋlɩ [Gyisɛsɩ] nɩ, ɩáwʋdʋ biye bɛ. Mmɩlɩ ɩnwʋʋ amanɩyɛ nɩ, iánwunlanwunla bɛ.”—1 Pita 2:23, New World Translation.

Gyisɛsɩ zia hanlɩ kɛɛ, bɛzabɛ mɔɔ bɔkɔhɔ Nyamɩnlɩ yi Bulombunlililɛ yɩ nu nɩ, bɔkɔlɔ mmenii mvʋlɔ. Bayɩbʋlʋ yɩ ma numɔ da kɛnɩ petee kɛɛ, bɛzabɛ mɔɔ bɛtanɩ bɔ ɔhɔnwʋ enii nɩ, bɔlɔ́kɔ Nyamɩnlɩ yi Bulombunlililɛ yɩ nu:

“Sɛ bɔdʋdɔ bɔ nwʋ nkʋ̃kʋ̃ a, yɛ abiyela ɩkɔnwʋ kɛɛ mʋnlʋmmɔ bɛdɩ mɩ adʋwavʋlɔ a.”—Dwɔɔnʋ 13:34, 35.

“Abiyela mɔɔ ikyi yi anlima nɩ ɩdɩ wudivʋlɔ.”—1 Dwɔɔnʋ 3:15.

“Enii mɔɔ ɩdɔ Nyamɩnlɩ nɩ, ɩlɔ́ yi anlima sʋ̃.”—1 Dwɔɔnʋ 4:20, 21.

Gyehova Nyamɩnlɩ mɔɔ yɩzayɩ yɛ ɩwɔlɩ enii nɩ, mɛyɩ yɛ izi ɔhʋanɩba ɔkʋ̃ pɛ mɔɔ ikoluwa zʋ kɛva azʋ̃nudwolɩyɛ kɛɣa oyuwadɩ a. Mɔɔ mmenii nɩɩ ahyɩhyɛdɩ azʋlɔtʋ bɛáhʋla bɛyɛ ma azʋ̃nudwolɩyɛ ba nɩ, Nyamɩnlɩ yi Bulombunlililɛ kɔhʋla kɛyɛ ma ɩkɔwʋlʋ zʋ.

a Gyehova dɩ Nyamɩnlɩ yi dima ankasa. (Ndwomi 83:18) Kila odwokɔ mɔɔ ise “Aninyia Yɛ lɛ Gyehova a?”

b Wɔ Danɩyɛlɩ 7:13, 14 nɩ, odwokɔ “enii ɣalɛ” nɩ gyĩ kɛnɩ ma Gyisɛsɩ Kɩlayɩsɩ.—Matiyu 25:31; 26:63, 64.

Kakɩ yɩ po, Nyamɩnlɩ yi Bulombunlililɛ má azʋ̃nudwolɩyɛ nɩɩ ɔkʋ̃yɛlɛ bʋwa mmenii avinli

Eɣile be, Nyamɩnlɩ yi Bulombunlililɛ keli azɩlɛ yɩ munwatĩĩ zʋ, na ɩkɛhã mmenii munwala kɔwɔ numɔ, iluwakɛɛ bekediye Nyamɩnlɩ yi odwokɔ mɔɔ ɩfalɩ azʋ̃nudwolɩyɛ nwʋ nɩ. (Ayɩzaya 2:4; 11:9) Naasʋ̃ kakɩ yɩ, Nyamɩnlɩ yi Bulombunlililɛ idii tumi wɔ sʋlɔ, na nnɛ po, ikilehilee mmenii abʋmɩ abʋmɩ sʋ̃maa ma bɔkɔnwʋ kezimɔ bɛkɛma azʋ̃nudwolɩyɛ nɩɩ ɔkʋ̃yɛlɛ kɔwʋwa bɛ nɩɩ mmenii mvʋlɔ avinli wɔ azɩlɛ yɩ zʋ.

Kila vidiyo mɔɔ ise Enti Bere Bi Bɛba a Nokware Dɔ Bedi Ɔtan So? na ɔkɔnwʋ kezimɔ mmenyia anwɩ̃ be duli mmenii nu nyiyimi tʋ wɔ bɛ ahʋnlɩnɩ nu ɩávalɩ nwʋmɔ ɛdanɩlɛ mɔɔ ɩla Dwuumaa nɩɩ Alabɩmaa bɛ avinli ɔzʋmɩ mmɩlɩ tɩndɩnlɩ nɩ.

Kila vidiyo mɔɔ ise Adamvʋlɔ Be Mɔɔ Bɛɣa Bɛyɛ Ɔhɔnwʋmmɔ na ɔkɔnwʋ kezimɔ Bayɩbʋlʋ ehilehilelɛ wʋwalɩ basabasayɛlɛ okuwu be zʋ ebani, nɩɩ polisinii be mɔɔ yi odwokɔ yɛ sɩ ma boduli ɛdanɩlɛ mɔɔ nɩ ɩwɔ bɛ avinli nɩ tʋ ma bɛɣa yɛlɩ ɔhɔnwʋmmɔ baaba paa nɩ.