Kɛ Ɩkɛyɛ Na Wʋahile Kɛɛ Wʋ Anyɩ Sɔ Elelɛdɩyɛ Nɩ a?

1-2. Gyisɛsɩ valɩ yɩ nnwʋanlɩ dianlɩ kɛnɩ manlɩ yɛ, mɩnla yɛ ɩsɛ kɛɛ eyi kã yɛ ma yɛyɛ a, na mɩnla ti a? (2 Kɔlɛntɩmaa 5:​14, 15) (Kila mfonyini yi sʋ̃.)

FA YƖ kɛɛ aliyia be wu gua wʋ zʋ, na abiye va yɩ nnwʋanlɩ diã asianɩ nu ɩɣa ɩyɩ wʋ ivinde. Kɛ ɛkɛdɩ nɣanlɩ ekezia a? Asʋ̃ ɛlɛ́fa anyɩnlɩlelɛ kɛla yɩ asɩ kɛɛ ile wʋ nnwʋanlɩ a? Pɩlazunɛ bela íni nwʋmɔ kɛɛ ɔzʋ̃ wʋ ahʋnlɩnɩ nu ɛkɛla yɩ asɩ paa, na wʋahile kɛɛ wʋ anyɩ sɔ mmɔdɩnɩ mɔɔ ɩwɔlɩ ɩva ileli wʋ nnwʋanlɩ nɩ, na wʋ ɛɣɛɛlɛ iléfi mɔɔ ɩyɛlɩ ɩmanlɩ wʋ nɩ kyɩ̃.

² Kɛmɔ dɩyɛzumalɛ mɔɔ ili eyi yɩ anyunu nu nɩ hilehileli numɔ nɩ, yehyinyia abiye na iale yɛ wɔ tanɩ nɩɩ owulo tʋ. Gyisɛsɩ yɩ elelɛdɩyɛ afɔlɩ nɩ yɛ ɩkɔhʋla ikele yɛ na ama (1) bɛava yɛ tanɩ mɔɔ yɛyɛ nɩ bɛahyɛ yɛ, (2) yɛanyia anyɩnlɩlazʋ kɛɛ eɣile be yekeli munli, nɩɩ (3) yɛ nɩɩ Gyehova yɛanyia abusunwawɔlɛ mɔɔ numɔ yɛ sɩ. Iluwa elelɛdɩyɛ yɩ ti, yɛwɔ anyɩnlɩlazʋ paa kɛɛ eɣile be yɛkɔwʋwa azɩ daabaa wɔ oyuwadɩ fʋlɔ yɩ nu. Nɔhʋanlɛ, Gyisɛsɩ hileli kɛɛ ɩdɔ yɛ mmɩlɩ mɔ ɩvalɩ yɩ nnwʋanlɩ idianlɩ ɛkɛnɩ ɩmanlɩ yɛ nɩ. Na ansaana ɩkɛɣa azɩlɛ yɩ zʋ po nɩ, nɩ ɩdɔ yɛ. (Ɛɣɛ. 8:​30, 31) Sʋ̃mavʋlɔ Pɔɔlʋ hɛlɛlɩ kɛɛ “Kɩlayɩsɩ yɩ ɔlɔlɛ nɩ yɛ isiye yɛ a.” (Kɩnga 2 Kɔlɛntɩmaa 5:​14, 15.) Eyi kile kɛɛ ɩsɛ kɛɛ yɛda yɩ ali kɛɛ yɛ anyɩ sɔ ɔlɔlɛ mɔɔ Gyisɛsɩ lalɩ yɩ ali hileli yɛ nɩ, na yɛ ɛɣɛɛlɛ iléfi mɔɔ ɩyɛlɩ ɩmanlɩ yɛ nɩ kyɩ̃.

3. Kezimɔ ekile anyɩnlɩzɔlɛ ma elelɛdɩyɛ nɩ kɔhʋla kɛyɛ sʋnʋnkʋ̃ wɔ mmenii mvʋlɔ bɛ dɩyɛ nwʋ. Mɩnla ti a?

³ Kɛ ɩkɛyɛ na wʋahile anyɩnlɩzɔlɛ wʋama elelɛdɩyɛ nɩ a? Wu munwalɩyɛ kɔhʋla kɛyɛ sʋnʋnkʋ̃ wɔ mmenii mvʋlɔ dɩyɛ nwʋ. Mɩnla ti a? Fa yɩ kɛɛ mmenii asã be botuu ɔhʋanɩ bɔkɔhɔ dɩka ɔkʋ̃, naasʋ̃ ɩsʋnɩ dɩka mɔɔ bo nu bela ɩzʋ̃ ɩbaa. Pɩlazunɛ bela íni nwʋmɔ kɛɛ ɩsʋnɩ ɔhʋanɩ mɔɔ bo nu bela koluwa zʋ. Ɔzɔ la sʋ̃ yɛ “ɔhʋanɩ” mɔɔ okoluwa zʋlɔ ekehile anyɩnlɩzɔlɛ ɛkɛma elelɛdɩyɛ nɩ kɔhʋla kɛyɛ sʋnʋnkʋ̃ wɔ mmenii mvʋlɔ bɛ dɩyɛ nwʋ a, na eyi gyĩ kezimɔ ɛ nɩɩ Gyehova avinli abusunwawɔlɛ dɩ nɩ zʋ. Dɩyɛzumalɛ eyi kɔwʋwa mmenii eyimmɔ ma bekehile anyɩnlɩzɔlɛ bɛkɛma elelɛdɩyɛ nɩ: (1) Bayɩbʋlʋ dɩyɛzumanlɛmaa, (2) Kilisinyiamaa mɔɔ bonluma, nɩɩ (3) bɛzabɛ mɔɔ bɔzʋ̃ asafʋ yɩ nu bɛyɩ bɔ nwʋ nɩ.

BAYƖBƲLƲ DƖYƐZUMANLƐMAA

4. Kɛ Gyehova nwʋ Bayɩbʋlʋ dɩyɛzumanlɛmaa se a?

⁴ Sɛ ɛdɩ Bayɩbʋlʋ dɩyɛzumanlɛvʋlɔ a kakɛ kɛɛ, Gyehova nwʋ dɩyɛ mɔɔ osumaa na ɛlɛ bɔ wʋ ɛbɩla nɩ, kile kɛɛ, Gyehova pɛ kɛɛ ɛba ɛyɛ yɩ ɔhɔnwʋ na sikalɛyɩ po, ɩbʋwaa wʋ ma ɛkɛyɛ ɔzɔ. (Dwɔ. 6:44; Egy. 13:48) “Gyehova yɛ ɩpɩbɛ ahʋnlɩnɩ nu a.” Eyi kile kɛɛ, ɩnwʋ mmɔdɩnɩ mɔɔ ɔbɔɔ kɛɛ okozuma yɩ nwʋ dɩyɛ nɩ, na yɩ anyɩ de mmɩlɩ mɔ ɩnwʋ kɛɛ ɛyɛɛ nzɩnzanlɩyɛ wɔ wʋ ɛbɩlawɔlɛ nu ma ɩkɔzɔ yɩ anyɩ nɩ. (Ɛɣɛ. 17:3; 27:11) Elelɛdɩyɛ nɩ ma enyia ɔnwʋmɔ ɔhʋanɩ ɛ nɩɩ Gyehova nyia abusunwawɔlɛ mɔɔ numɔ yɛ sɩ. (Wul. 5:​10, 11) Áma etindiã ɔnwʋmɔ ɔhʋanɩ eyi azɩ kʋlaa.

5. Mɩnla ɔhʋanɩ zʋ yɛ Bayɩbʋlʋ dɩyɛzumanlɛmaa kɔhʋla kɛva fʋlɔdulɛ mɔɔ ɩwɔ Fɩlɩpɩmaa 3:16 nɩ kɛyɛ egyima a?

⁵ Sɛ ɛdɩ Bayɩbʋlʋ dɩyɛzumanlɛvʋlɔ a, kɛ ɩkɛyɛ na wʋahile kɛɛ wʋ anyɩ sɔ elelɛdɩyɛ nɩ a? Ɔhʋanɩ ɔkʋ̃ yɛ lɛ kɛɛ, ɛkɛva fʋlɔdulɛ mɔɔ sʋ̃mavʋlɔ Pɔɔlʋ va manlɩ Fɩlɩpɩmaa nɩ kɛyɛ egyima. Ɩhanlɩ kɛɛ: “Dɩka bela mɔɔ yenyia anyunumihɔlɛ yɛhɔ yedwu nɩ, bɛmá yɛhɔ zʋ yɛwɔ yɛ ɛbɩla wɔ ɔzɔ ɔhʋanɩ yɩ zʋ la.” (Fɩl. 3:​16, NWT) Bayɩbʋlʋ tʋhilelɛ fʋlɔ kã wɔ ɔhʋanɩ fʋlɔ zʋ kɛɛ: “Ɩsɛ kɛɛ yɛkɔ zʋ yeduwa ɔhʋanɩ mɔɔ yeluwa zʋlɔ kakɩ yɩ nɩ zʋ.” Meti máma dɩyɛ bela anzɛnyɩɩ abiyela sɩnza wʋ adwɩnɩ wɔ nnwʋanlɩ ɔhʋanɩ mɔɔ oluwa ɔzʋlɔ nɩ zʋ.—Mt. 7:14; Lk. 9:62.

6. Mɩnla yɛ Bayɩbʋlʋ dɩyɛzumanlɛmaa kɔhʋla kɛyɛ mmɩlɩ mɔ ɩyɛ sɩ ɩma bɛ kɛɛ bɛkɛyɛ nzɩnzanlɩyɛ nɩ a? (Ditilonɔmi 30:​11-14) (Kila mfonyini yi sʋ̃.)

⁶ Ebiye a ɩyɛ sɩ ɩma wʋ kɛɛ ekele dɩyɛ be mɔɔ osumaa yɩ wɔ Bayɩbʋlʋ yɩ nu kakɩ nɩ ekediã nu. Sɛ ɔzɔ a, mɩnla yɛ ɔkɔhʋla kɛyɛ wɔ nwʋ a? Yɛ ɛbɩbɛlɛnu falɩ mɔɔ osumaa nɩ nwʋ, na bɔ Gyehova mpayɩ ma ɩwʋwa wʋ ma ɛdɩ mɔɔ osumaa nɩ yɩ tʋ bʋwɔ. (Ndw. 86:11) Na sɛ ɩlanwʋ la ɩyɛ sɩ ɩma wʋ kɛɛ ɛkɛdɩ yɩ tʋ sʋ̃ ɛ? Áma ɔdwɩnɩndwɩnɩ nwʋmɔ sʋ̃maa ma wʋ padi ikolɔ, kɔ ɔzʋlɔ suma Bayɩbʋlʋ yɩ na ngyɩkɩ̃ɩ̃ ngyɩkɩ̃ɩ̃ la ɛkɛdɩ yɩ tʋ. Na sɛ ɩyɛ sɩ ɩma wʋ kɛɛ ekeyiaki subanɩ tanɩ be mɔɔ Gyehova kyi sʋ̃ ɛ? Kakɛ kɛɛ Gyehova ɩlɛ́pɩbɛ mɔɔ ɩbʋlʋ wʋ anwʋzɩzɩbɛ zʋ kyɩ̃. Nyia anwʋlazʋ kɛɛ sa ɔkʋla yɛ dɩyɛ bela mɔɔ ɩsɔ yɩ anyɩ. (Kɩnga Ditilonɔmi 30:​11-14.) Gyehova bɔ anʋhʋba kɛɛ ɩkɔwʋwa wʋ. (Ayɩ. 41:​10, 13; 1 Kɔl. 10:13) Meti máma wʋ padi kolɔ. Kɛ ankɩ ɔkɔdwɩnɩndwɩnɩ nninyeni mɔɔ ɩyɛ sɩ ɩma wʋ nɩ nwʋ sʋ̃maa nɩ, fa wʋ adwɩnɩ siye nninyeniba mɔɔ Gyehova ɩyɛ ɩma wʋ nɩ zʋ, titili yɩ Ɣa mɔɔ ɩmanlɩ ɩɣa wuli ɩmanlɩ wʋ nɩ. Mmɩlɩ mɔ ɔlɔlɛ mɔɔ ɔwɔ ma Gyehova ɩyɛɛ kezi nɩ, ɛkɛɣa kɔnwʋ yɩ kɛɛ “yɩ ahyɛdɩ ɩ́dɩ adɩsʋwa.”—1 Dwɔ. 5:3.a

7. Nnwuakula mɔɔ bɛtɩdɩɩ bɛ wɔ nɔhʋanlɛ yɩ nu nɩ, mɩnla yɛ ɩsɛ kɛɛ bɛma ɩbʋwa adwɩnɩ nu a?

⁷ Na mʋnlʋmmɔ nnwuakula mɔɔ bɛtɩdɩɩ bɛ wɔ nɔhʋanlɛ yɩ nu sʋ̃ ɛ? Mʋnlʋmmɔ sʋ̃ bɛdɩ Bayɩbʋlʋ dɩyɛzumanlɛmaa. Amba, bɛdɩ Bayɩbʋlʋ dɩyɛzumanlɛmaa mɔɔ bɔ nwʋ hyinyia paa bɛma bɛ awʋvʋlɔ. Bayɩbʋlʋ yɩ kã kɛɛ: “Bɔhwɩ̃ beɣike Nyamɩnlɩ na yɩzayɩ sʋ̃ ɩkɔhwɩ̃ ikeɣike bɛ.” (Gye. 4:8; 1 Mm. 28:9) Sɛ otu agyiakɛ mɔɔ ikile kɛɛ ɛpɛ kɛɛ ɛba yɛ Gyehova yɩ ɔhɔnwʋ a, yɩzayɩ sʋ̃ ikeɣike wʋ. Ɩ́dɩ kɛɛ bɛdɩdɩlɩ wʋ wɔ abusunwa mɔɔ bɛdɩ dasɩvʋlɔmaa nu ti yɛ Gyehova anyɩ wɔ wʋ zʋ yɩ a, mfomi ɩpɛ kɛɛ ɩ nɩɩ wʋzawʋ nyia ɔhɔnwʋvalɛ mɔɔ numɔ yɛ sɩ. Mɩnla yɛ Gyehova ɩyɛ na ama ɛ nɩɩ ianyia ɔhɔnwʋvalɛ mɔɔ numɔ yɛ sɩ a? Ɩva yɩ Ɣa ɔkʋ̃ kyeinyii nɩ ɩma wʋ. Ɩdɩ akyɛdɩ mɔɔ ɩtʋ bʋlɔ, mábu wʋ anyɩ kua zʋlɔ kyɩ̃. (Wul. 5:​1, 2) Meti ansaana mɔɔ ɔkɔhɔ ɔlʋbɔ eyi Ɛhakɛlɛlilɛ yɩ be nɩ, mɩnla ti mɔɔ wʋale mmɩlɩ sunzu mɔɔ Gyehova nɩɩ yɩ Ɣa Gyisɛsɩ bɛyɛ bɛma wʋ nɩ nwʋ bʋwɔ a? Ɔkɔhʋla sʋ̃ okozunzu kezimɔ ɛkɛma wʋ ɛbɩlawɔlɛ nɩɩ abɔkɔ mɔɔ ekezizi nɩ kehile kɛɛ wʋ anyɩ sɔ mɔɔ Gyehova nɩɩ yɩ Ɣa Gyisɛsɩ bɛyɛ bɛma wʋ nɩ.b

KILISINYIAMAA MƆƆ BONLUMA

8. Mɩnla ɔhʋanɩ zʋ yɛ bɛzabɛ mɔɔ bonluma nɩ bɛla yɩ ali kɛɛ bɛ anyɩ sɔ elelɛdɩyɛ nɩ a?

⁸ Sɛ onluma a, mɛyɩ nɩ ɛla yɩ ali wɔ ahʋanɩ sʋ̃maa zʋ kɛɛ wʋ anyɩ sɔ mɔɔ Gyehova nɩɩ Gyisɛsɩ bɛyɛ bɛma wʋ nɩ. Kɛ ndianwʋ nɩ, ɛyɛ nzɩnzanlɩyɛ sʋ̃maa wɔ wʋ ɛbɩlawɔlɛ nu na ɛɣa ɛyɛ Gyehova yɩ ɔhɔnwʋ paa. Ediyeli Gyisɛsɩ yɩ ahyɛdɩ na ɛkãã odwokɔba mɔɔ ɩfalɩ Gyehova nɩɩ Gyisɛsɩ nwʋ nɩ be ekile mmenii mvʋlɔ. Eyila wʋ nwʋ zʋ ma Gyehova na onluma. Iluwa Gyehova mɔɔ ɔsʋ̃mɩɩ yɩ nɩ ti, ebiye a eyiyia ndwokɔzɩzɩbɛ be. (2 Tim. 3:12) Naasʋ̃ ɛva nɔhʋanlɛlilɛ egyina numɔ pindinyii ɛva hile kɛɛ ɔdɔ Gyehova na wʋ anyɩ sɔ elelɛdɩyɛ mɔɔ iluwa yɩ Ɣa nɩ zʋ ɩva ɩma wʋ nɩ.—Hib. 12:​2, 3. 

9. Mɩnla yɛ ɩsɛ kɛɛ bɛzabɛ mɔɔ bonluma dada nɩ kila bʋwɔ wɔ nwʋmɔ a?

⁹ Sɛ yenluma daada a, mɩnla yɛ ɩsɛ kɛɛ yekila bʋwɔ paa wɔ nwʋmɔ a? Sɛ yɛákila yɩ bʋwɔ a, mmɩlɩ ɩkɔlɩɩ zʋlɔ nɩ yɛkɔnwʋ yɩ kɛɛ anyɩnlɩzɔlɛ mɔɔ yɛwɔ yɛma elelɛdɩyɛ nɩ ɩkãã azɩ. Mɩnla ɔhʋanɩ zʋ yɛ eyi kɔhʋla kezi a? Sunzu ɔwɔkɩ Kilisinyiamaa mɔɔ nɩ bɔwɔ Ɛfɩsɛsɩ nɩ nwʋ kila. Gyisɛsɩ mɔɔ nɩ bodunwo yɩ nɩ hamvʋlɩ bɛ wɔ be pindinyiigyinanlɛ nwʋ. Naasʋ̃ ɩhã ihileli bɛ kɛɛ: “Mɩlɛ eyi mitiyia wʋ, kɛɛ sikalɛpɛyɩ wʋálɔ mɩ kɛmɔ bɔmʋnlɩ nɩ, nɩ ɔdɔ mɩ nɩ.” (Yik. 2:​3, 4) Gyisɛsɩ yi odwokɔ yɩ ma yɛnwʋ yɩ kɛɛ, Kilisinyianii be kɔhʋla kɛva ahʋnlɩnɩ mɔɔ iáli munli ɩkɔzʋ̃mɩ Gyehova, na eyi kɛma ngyɩkɩ̃ɩ̃ ngyɩkɩ̃ɩ̃ la yɩ ɔzʋ̃mɩnlɛ kɔhʋla kɛhã azɩ. Sa ɩkʋla ɩbayɩ kɛɛ abiye mɔɔ ɩdɩ zɔ nɩ bɔ mpayɩ, ɩkɔ dɩyɛzumanlɛ nɩɩ dasɩlɛlilɛ, naasʋ̃ ekehila nɩ, nɩ ɩsɛ kɛɛ ɩyɛ la ti yɛ ɩyɛɛ a, na kɛ ɔlɔlɛ mɔɔ ɩwɔ ɩma Gyehova a. Sɛ ɔnwʋ yɩ kɛɛ ɔlɔlɛ mɔɔ ahyɛasɩ yɩ, nɩ ɔwɔ ɛma Gyehova nɩ ɩkãã azɩ a, mɩnla yɛ ɔkɔhʋla kɛyɛ a?

10. Kɛ ɩkɛyɛ na wʋava odwokɔ mɔɔ Pɔɔlʋ hã hileli Timoti nɩ wʋayɛ egyima a? (1 Timoti 4:​13, 15)

¹⁰ Sʋ̃mavʋlɔ Pɔɔlʋ duli Timoti fʋlɔ kɛɛ ɩda ɩdwɩnɩndwɩnɩɩ ɔzʋ̃mɩnlɛ mɔɔ ɩfa ɩma Gyehova nɩ nwʋ na ɩva yɩ ahʋnlɩnɩ munwala iwula nu. (Kɩnga 1 Timoti 4:​13, 15.) Yɛzayɛ sʋ̃, yɛkɔhʋla kɔdwɩnɩndwɩnɩ ahʋanɩ azʋlɔtʋ mɔɔ yɛkɔhʋla yekoluwa zʋ kɛva ɛhyɩmɛ kɔzʋ̃mɩ Gyehova nɩ nwʋ. (Wul. 12:11) Kɛ ndianwʋ nɩ, sa ɔkʋla ede mmɩlɩ esiyeziye wʋ nwʋ bʋwɔ ɛma dɩyɛzumanlɛ. Eyi kɔwʋwa wʋ ma ɔkɔhʋla kɛva wʋ nwʋ kowula dɩyɛzumanlɛ yɩ nu bʋwɔ. Anzɛnyɩɩ sɛ ɛyɛɛ wʋzawʋ dɩyɛzumanlɛ a, sa ɔkʋla kɔ bʋwa dɩka mɔɔ dɩyɛ bela lɔ́twɩnhwɩ̃ wʋ adwɩnɩ na ama wʋahʋla wʋadwɩnɩndwɩnɩ mɔɔ osumaa nɩ nwʋ bʋwɔ. Eyi kɛma ekenyia wʋ dɩyɛzumanlɛ yɩ zʋ mfasʋ kezile. Kɛmɔ sɩnɩ kehyinyia ɛyɛnɩ sʋ̃maa na ama ɩahɔ zʋlɔ ɩazɔ nɩ, ɔzɔ la sʋ̃ yɛ ɩsɛ kɛɛ yɛkɔ zʋlɔ yɛyɛ nninyeni eyimmɔ na ama anyɩnlɩzɔlɛ mɔɔ yɛwɔ yɛma elelɛdɩyɛ nɩ ɩayɛ kezi a. Akʋ̃ sʋ̃, sɛ ɩka alapɛnɩ ɛgyɩkɩ̃ɩ̃ be ma ɛhakɛlɛlilɛ yɩ twu zʋlɔ a, sa ɔkʋla ɔdwɩnɩndwɩnɩ nyilalɛ mɔɔ yenyia kɛɛ Gyehova Dasɩvʋlɔmaa nɩ nwʋ. Pɩlazunɛ bela íni nwʋmɔ kɛɛ, ɔzɔ mɔɔ ɛkɛyɛ nɩ kɛma anyɩnlɩzɔlɛ mɔɔ ɔwɔ ma elelɛdɩyɛ nɩ kɛyɛ kezi. Kakɛ kɛɛ elelɛdɩyɛ yɩ, yɛ ɩma ɛ nɩɩ Gyehova nyia ɔhɔnwʋvalɛ mɔɔ numɔ yɛ sɩ a. 

11-12. Sɛ ɩyɛ na ɛtɩ nɣanlɩ kɛɛ ɛhyɩmɛ mɔɔ ɛlɛ sʋ̃mɩɩ Gyehova nɩ hã azɩ a, asʋ̃ nɩ mɛyɩ ikile kɛɛ ɩyɩ yɩ sunzuma yɩ wɔ wʋ zʋ a? Kilehile numɔ. (Kila mfonyini yi sʋ̃.)

¹¹ Sɛ aɣile asã yɩ ɛtɩ nɣanlɩ kɛɛ ɛhyɩmɛ mɔɔ ɛfa ɔsʋ̃mɩ Gyehova nɩ ɩkãã azɩ a, áma wu padi kolɔ na máma eyi ma ɛtɩ nɣanlɩ kɛɛ Gyehova ɩyɩ yɩ sunzuma nwanzanwanza yɩ wɔ wʋ zʋ. Kakɛ odwokɔ mɔɔ sʋ̃mavʋlɔ Pɔɔlʋ hã valɩlɩ dasɩlɛlilɛ egyima yɩ nwʋ wɔ yɩ kɛlɛta mɔɔ ɩhɛlɛlɩ ɩhɔ ɩmanlɩ Kɔlɛntɩmaa nɩ, ɩhɛlɛlɩ kɛɛ: “Sɛ mʋzʋ̃ mɩ ahʋnlɩnɩ nu mɩáyɛ po a, ɩdɩ egyima mɔɔ bɛva bowula mɩ sa.” (1 Kɔl. 9:​17, NWT) Mɩnla yɛ nɩ ɩpɛɛ ikehile a?

¹² Nɩ ɩyɛ a Pɔɔlʋ sʋ̃ ɩádɩ nɣanlɩ kɛɛ ɩhɔ́ dasɩlɛlilɛ. Naasʋ̃ ɩávalɩ nwʋmɔ kezimɔ nɩ ɩtɩ nɣanlɩ nɩ, nɩ izi yɩ kɛnɣa kɛɛ ɩkɛhã odwokɔba yɩ ikehile mmenii. Wʋzawʋ sʋ̃ sa ɔkʋla osumazuma Pɔɔlʋ. Fa siye wʋ anyɩ zʋ kɛɛ ɛkɛyɛ mɔɔ ɩtɩnɣɛ, mmɩlɩ po mɔ íni wʋ nu kɛɛ ɛkɛyɛ nɩ. Meti bɔ mpayɩ pɩbɛ “ɛpɛ nɩɩ anwʋzɩzɩbɛ mɔɔ ɛkɛva kɛyɛ yɩ apɛdɩ.” (Fɩl. 2:​13, NWT) Kɔ zʋlɔ yɛ nninyeni mɔɔ ɩma ɛ nɩɩ Gyehova avinli abusunwawɔlɛ yɛ sɩ nɩ. Akʋ̃ nyia anwʋlazʋ kɛɛ mmɩlɩ ɩkɔlɩ zʋlɔ nɩ ɔlɔlɛ mɔɔ ɔwɔ ma Gyehova nɩ kɛyɛ kezi na ekezia ɛkɛva ɛhyɩmɛ kɔzʋ̃mɩ yɩ dɔkʋ̃.

13. Kɛ ɩkɛyɛ na yɛanwʋ yɩ kɛɛ yɛlanwʋ la yɛlɛ dedi nɩ nu a?

¹³ Ɩdɩ baaba kɛɛ mmɩlɩ ɩkɔlɩɩ zʋlɔ nɩ, yɛkɛbɩbɛlɩ ye nu dɩkɛɛ mɔɔ Pɔɔlʋ hanlɩ nwʋmɔ odwokɔ wɔ 2 Kɔlɛntɩmaa 13:5 nɩ. Ɛkɛnɩ kã kɛɛ: “Bɔhɔ́ zʋ bodwe behila kɛɛ bɔwɔ dedi yi nu a; bɔhɔ́ zʋ bɛbɩbɛlɩ bɔ nwʋ nu.” Ɩwɔ numɔ la a, sa yɛkʋla yebizia yɛ nwʋ kɛɛ: ‘Sɛ mikila kezimɔ mʋbɔ mɩ ɛbɩla a, ikile kɛɛ mɩdɩ abiye mɔɔ Gyehova yɩ ɔzʋ̃mɩnlɛ nwʋ hyinyia mɩ a?’ (Mt. 6:33) ‘Asʋ̃ nninyeni mɔɔ mɩfa mi dide mɩ anyɩ nɩ da yɩ ali kɛɛ mikyi tanɩ a?’ (Ndw. 97:10) ‘Asʋ̃ mʋbɔ mmɔdɩnɩ kɛɛ mɩkɛma mɔɔ mɩkɛhã nɩɩ mɔɔ mɩkɛyɛ nɩ kɛma azʋ̃nudwolɩyɛ nɩɩ ɔkʋ̃yɛlɛ kɔwʋwa asafʋ yɩ nu a?’ (Ɛfɩ. 4:​2, 3) Ɛhakɛlɛlilɛ mmɩlɩ yɩ dɩ mmɩlɩba mɔɔ yɛkɔhʋla kɛva kɔdwɩnɩndwɩnɩ elelɛdɩyɛ nɩ nwʋ. Sɛ yɛdwɩnɩndwɩnɩ mɔɔ Gyehova nɩɩ Gyisɛsɩ bɛyɛ bɛma yɛ nɩ nwʋ a, yekehile anyɩnlɩzɔlɛ kezile yɛkɛma Gyehova na yɛahile sʋ̃ kɛɛ yɛda azɩ yɛma Kɩlayɩsɩ, na kɛ yɛzayɛ yɛnwʋ a.

BƐZABƐ MƆƆ BƆZƲ̃ ASAFƲ YƖ NU BƐYƖ BƆ NWƲ

14. Mɩnla yɛ ɩkɔhʋla kɛma Kilisinyianii be kɔzʋ̃ asafʋ yɩ nu kɛyɩ yɩ nwʋ a?

¹⁴ Ye mmeliyema Kilisinyiamaa be mɔɔ bɛva nɔhʋanlɛlilɛ bɔzʋ̃mɩ Gyehova alʋbɔ sʋ̃maa bɔzʋ̃ asafʋ yɩ nu bɛyɩ bɔ nwʋ. Mɩnla ti a? Iluwakɛɛ “ɛbɩlawɔlɛ eyi nwʋ adwɩnɩndwɩnɩ” hyɛ bo nu mbiyemmɔ zʋ. (Lk. 21:34) Mbiyemmɔ sʋ̃ ma be mmeliyema be bɛ nyɛlɩyɛ nɩɩ bo munwa ndwokɔ lile bɛ ma bɔzʋ̃ asafʋ yɩ nu bɛyɩ bɔ nwʋ. (Gye. 3:2) Mbiyemmɔ sʋ̃ mɛyɩ, bɛyɛlɩ tanɩ mɔɔ numɔ yɛ ɔnlʋmɔ naasʋ̃ bɛápɩbɛ mmʋwalɩyɛ. Ɩávalɩ nwʋmɔ kezimɔ wʋ bʋwabɩlɛ dɩ bela nɩ, sɛ ɔzʋ̃ asafʋ yɩ ɛyɩ wʋ nwʋ a, mɩnla yɛ ɔkɔhʋla kɛyɛ a? Mɩnla yɛ elelɛdɩyɛ yɩ nɩɩ ɔlɔlɛ mɔɔ Gyehova nɩɩ Gyisɛsɩ bɛla yɩ ali behile wʋ nɩ kɛhã wʋ ma ɛkɛyɛ a?

15. Mɩnla ɔhʋanɩ zʋ yɛ Gyehova hile kɛɛ ɩdwɩnɩ bɛzabɛ mɔɔ bɔzʋ̃ asafʋ yɩ nu bɛyɩ bɔ nwʋ nɩ nwʋ a? (Izikɩyɛlɩ 34:​11, 12, 16)

¹⁵ Mɔwʋ dwɩnɩndwɩnɩ kezimɔ Gyehova tɩ nɣanlɩ wɔ bɛzabɛ mɔɔ bɔzʋ̃ asafʋ yɩ nu bɛyɩ bɔ nwʋ nɩ nwʋ. Ɩlɛ́falɩ bɔ nwʋ ɛya na yɩ ɛɣɛɛlɛ iléfili bɛ sʋ̃. Mfomi ɩpɩbɛ mmuwuanɩ mɔɔ beminli nɩ. Nɔhʋanlɛ odwokɔ yɛ lɛ kɛɛ, ikila bɛ na ɩbʋwa bɛ ma besia bɛba yɩ pɛ. (Kɩnga Izikɩyɛlɩ 34:​11, 12, 16.) Ɔzɔ la yɛ Gyehova ɩyɛɛ kɛma wʋzawʋ sʋ̃ a. Mmɩlɩ po mɔ enyia mɔɔ ɛlɛ osumaa Ɔwɩɛnɩlɛ Aɣanɩ eyi nɩ da yɩ ali kɛɛ ɛlanwʋ la ɛpɛ kɛɛ ɛyɛ mɔɔ ɩsɔ yɩ anyɩ. Kɛmɔ Gyehova nwʋnlɩ nninyeniba wɔ wʋ ahʋnlɩnɩ nu mɔɔ meti ɩhwɩnlɩ wʋ ɩɣalɩ nɔhʋanlɛ yɩ nu nɩ, ɔzɔ la sʋ̃ yɛ ɩlanwʋ la ɩnwʋ nninyeniba wɔ wʋ ahʋnlɩnɩ nu a.

16. Mɩnla yɛ ɩkɔhʋla kɔwʋwa bɛzabɛ mɔɔ bɔzʋ̃ asafʋ yɩ nu bɛyɩ bɔ nwʋ nɩ ma bekezia kɛɣa Gyehova pɛ dɔkʋ̃ a? (Kila mfonyini yi sʋ̃.)

¹⁶ San Bra Yehowa Nkyɛn blohyʋɔ yɩ lɛ ɛɣɛɛlɛyɩkyɩlɛ ndwokɔ be. Ɩkã kɛɛ: “Nyia anwʋlazʋ kɛɛ Gyehova kɔwʋwa wʋ ma ekezia kɛyɛ yɩ ɔhɔnwʋ dɔkʋ̃. Ɩkɔwʋwa wʋ ma ekeli wʋ adwɩnɩndwɩnɩ nɩɩ ɛyɛkɛ bela mɔɔ abiye yɩ nyɛlɩyɛ ti edii nɩ zʋ. Na ɩkɛva wʋ tanɩ kɛhyɛ wʋ ma wʋ ahʋnlɩnɩ ɩadɔ wu kunlu na wʋanyia tiwʋwaba baaba. Eyi kɔwʋwa wʋ ma ekezia kegyina wʋ agyia zʋ dɔkʋ̃ na ɛ nɩɩ wʋ mmeliyema bɛawɔ numɔ bɛazʋ̃mɩ Gyehova.” Kakɛ sʋ̃ kɛɛ, asafʋ nu mbanimbani yi wɔ ɛpɛ kɛɛ bɔkɔwʋwa wʋ. Bɛdɩ kɛɛ “ɛɣɩntanlɛdɩka wɔ anwʋma mmɩlɩ nu, nɩɩ eziyelɛdɩka wɔ ahũmidulɛ mmɩlɩ nu.” (Ayɩ. 32:2) Yezi kɛɛ wʋ anyɩ sɔ elelɛdɩyɛ nɩ na ɛpɛ kɛɛ ɛyɛ dɩyɛ bela fa kile kɛɛ wʋ anyɩ sɔ yɩ. Meti bizia wʋ nwʋ kɛɛ, ‘Mɩnla yɛ mʋkɔhʋla kɛyɛ na mɩava miaziyeziye mɩ nɩɩ Gyehova avinli a?’ (Ayɩ. 1:18; 1 Pit. 2:25) Kɛ ndianwʋ nɩ, sa ɔkʋla kɔ dɩyɛzumanlɛ wɔ Kɩndɔm Hɔɔlʋ a? Asʋ̃ sa ɔkʋla kɔ pɩbɛ mmʋwalɩyɛ wɔ asafʋ nu mbanimbani yi bo nu ɔkʋ̃ kɛnɩ kɛɛ ɛpɛ kɛɛ esiã ba sʋ̃mɩ Gyehova dɔkʋ̃ a? Sa ɩyɛ nhyɩhyɛlɩyɛ ma abiye nɩɩ wʋ ba suma Bayɩbʋlʋ yɩ wɔ mmɩlɩ dʋdʋ be nu. Nyia anwʋlazʋ kɛɛ Gyehova keyila mmɔdɩnɩ bela mɔɔ ɔbɔɔ kɛɛ ekezia kɛɣa yɩ pɛ na wʋahile anyɩnlɩzɔlɛ wʋama elelɛdɩyɛ nɩ zʋ.

MƖNLA YƐ ƐKƐYƐ A?

17-18. Mɩnla yɛ yɛkɔhʋla kɛyɛ ansaana yɛahɔ ɔlʋbɔ eyi ɛhakɛlɛlilɛ nɩ a?

¹⁷ Gyisɛsɩ hanlɩ kɛɛ bɛvalɩ elelɛdɩyɛ yɩ bɛmanlɩ yɛ na “ama abiyela mɔɔ ikele yi ikeli nɩ iáwuli mfomi ianyia nnwʋanlɩ mɔɔ íni awielɩyɛ.” (Dwɔ. 3:​16, NWT) Iluwa Gyisɛsɩ yi elelɛdɩyɛ yɩ zʋ nɩ, Gyehova kɔhʋla kele yɛ wɔ tanɩ nɩɩ owulo tʋ. Mɛyɩ ti, íni kɛɛ ye nu bela tindiã elelɛdɩyɛ nɩ azɩ kʋlaa. (Wul. 3:​23, 24; 2 Kɔl. 6:1) Ansaana mɔɔ yɛkɔhɔ ɛhakɛlɛlilɛ yɩ nɩ, sa yɛkʋla yɛdwɩnɩndwɩnɩ ɔlɔlɛ mɔɔ Gyehova nɩɩ Gyisɛsɩ bɛla yɩ ali behile yɛ nɩ nwʋ, na eyi kɛhã yɛ ma yekehile bɔ ɔlɔlɛ yɩ nwʋ anyɩnlɩzɔlɛ kezile.

¹⁸ Mɩnla yɛ ɛkɛyɛ kɛva kehile kɛɛ wʋ anyɩ sɔ elelɛdɩyɛ nɩ a? Ebiye a, wu munwalɩyɛ yɩ kɛyɛ sʋnʋnkʋ̃ wɔ enii fʋlɔ yɩ dɩyɛ nwʋ. Naasʋ̃ ɛ nɩɩ wu mmeliyema abʋmɩ abʋmɩ sʋ̃maa bɔbɔɔ mmɔdɩnɩ kɛɛ bɔlɔ́bʋwa azɩ bɛkɛma bɔ nwʋ ebiyekʋ̃, na mfomi bɔkɔwʋwa azɩ bɛkɛma enii mɔɔ iwuli ɩmanlɩ bɛ nɩ. Nyia anwʋlazʋ kɛɛ Gyehova keyila ɔzɔ mmɔdɩnɩwɔlɛ yɩ zʋ.—2 Kɔl. 5:15.