“Bɛmá Ɔkʋ̃yɛlɛ Nɩ Mɔɔ Sunzuma Nɩ Ɩva Ɩma Mʋnlʋmmɔ Nɩ Ɩwʋwa Ɛkɛnɩ Eɣile Bela”
SƲ̃MAVƲLƆ Pɔɔlʋ hyɛlɩ Kilisinyiamaa mɔɔ nɩ bɔwɔ Ɛfɩsɛsɩ nɩ ɛzɩzɩbɛ kɛɛ ‘bɛvá ɔlɔlɛ bɔzʋzɔ bɔ nwʋ nkʋ̃kʋ̃, bɔwɔ́ mmɔdɩnɩ kɛɛ bɔkɔwʋwa azʋ̃nudwolɩyɛ nu, na bɛmá ɔkʋ̃yɛlɛ nɩ mɔɔ sunzuma nɩ ɩva ɩma bɛ nɩ ɩwʋwa ɛkɛnɩ eɣile bela.’—Ɛfɩ. 4:2, 3.
“Sunzuma” yɩ yɛ ɩma “ɔkʋ̃yɛlɛ” bʋwa yɛ avinli a. Eyi kile kɛɛ ɔkʋ̃yɛlɛ mɔɔ ɩwɔ yɛ avinli nɩ zʋ̃ Gyehova yi sunzuma yɩ. Kɛmɔ Pɔɔlʋ hanlɩ nɩ, ɩsɛ kɛɛ yɛbɔ mmɔdɩnɩ kɛɛ yɛkɛma ɔkʋ̃yɛlɛ mɔɔ ɩwɔ yɛ avinli nɩ kɔhɔ zʋ kɔwʋwa kɛ. Ɩdɩ aninyia yi egyima a? Mɔɔ ɩdɩ yɛ lɛ kɛɛ, ɩsɛ kɛɛ Kilisinyianii bela yɛ mɔɔ ɩkɔhʋla ‘ɩmá ɔkʋ̃yɛlɛ nɩ mɔɔ sunzuma nɩ ɩva ɩma nɩ bʋwa ɛkɛnɩ eɣile bela.’
Kɛ ndianwʋ nɩ, fa yɩ kɛɛ abiye hyɛ kaalʋ fʋlɔ wʋ. Ekila a, aninyia yɛ ɩsɛ kɛɛ isiyeziye kaalʋ yɩ a? Eyi mɛyɩ, munwalɩyɛ yɩ dɩ senyii. Sɛ wʋákila kaalʋ yɩ bʋwɔ na ɩsɩkɛ a, ɔlɔ́kʋla kɛva nwʋmɔ ɔzʋnɩ kediã enii mɔɔ ɩva ɩhyɛlɩ wʋ nɩ zʋ.
Ɔzɔ la sʋ̃ yɛ ɩwɔ numɔ kɛɛ ɔkʋ̃yɛlɛ mɔɔ ɩwɔ yɛ avinli nɩ dɩ Nyamɩnlɩ yɩ akyɛdɩ dɩyɛ, naasʋ̃ ɩdɩ ye nu ɔkʋ̃ bela yɩ asɛdɩ kɛɛ ɩkɔwʋwa ma ɩkɔhɔ zʋ kɔwʋwa kɛnɩ. Sɛ yɛ nɩɩ eliyema be avinli ɩáyɛ baaba a, ɩsɛ kɛɛ yebizia yɛ nwʋ kɛɛ, ‘Asʋ̃ mɩyɛɛ mɔɔ mʋkɔhʋla keziyeziye yɛ avinli na ama ɔkʋ̃yɛlɛ ɩawʋwa asafʋ yɩ nu a?’
‘BƆ́ MMƆDƖNƖ’ MA ƆKƲ̃YƐLƐ ƖHƆ ZƲLƆ ƖWƲWA KƐ
Kɛmɔ Pɔɔlʋ hanlɩ nɩ, ɩyɛ a ihyinyia kɛɛ yɛyɛ egyima ɛzɩzɩbɛ na ama ɔkʋ̃yɛlɛ mɔɔ sunzuma nɩ fa ma nɩ ɩawʋwa kɛnɩ, titili mmɩlɩ mɔ eliyema be yɛ debe idiyia yɛ nɩ. Asʋ̃ ɔkʋ̃yɛlɛ mɔɔ yɛkɛma ɩkɔwʋwa yɛ avinli nɩ, mmɩlɩ munwala yɛ ɩpɩbɛ kɛɛ yɛ nɩɩ enii mɔɔ ɩyɛ debe idiyia yɛ nɩ kɛhã nwʋmɔ odwokɔ a? Kɛ ɔzɔ ankasa. Bizia wʋ nwʋ kɛɛ, ‘Sɛ mɩyɛ zɔ a, asʋ̃ ɩkɛma bʋwabɩlɛ yɩ kɛyɛ baaba anzɛnyɩɩ ɩkɛzɩkɛ?’ Itwu mmɩlɩ be a, ɩkɛyɛ baaba kɛɛ yɛkɛva kɛhyɛ enii kʋ̃ nɩ na yɛama yɛ ɛɣɛɛlɛ iavi.—Ɛɣɛ. 19:11; Mk. 11:25.
Bizia wʋ nwʋ kɛɛ, ‘Sɛ mɩ nɩɩ yɩ kã nwʋmɔ odwokɔ a, asʋ̃ ɩkɛma bʋwabɩlɛ yɩ kɛyɛ baaba anzɛnyɩɩ ɩkɛzɩkɛ?’
Kɛmɔ sʋ̃mavʋlɔ Pɔɔlʋ hɛlɛlɩ nɩ, bɛmá yɛhɔ zʋ ‘yɛva ɔlɔlɛ yɛzʋzɔ yɛ nwʋ nkʋ̃kʋ̃.’ (Ɛfɩ. 4:2) Buuku be kã kɛɛ yɛkɔhʋla kehile odwokɔ eyi tʋ kɛɛ “belé bɛ kezimɔ bɛdɩ nɩ la.” Eyi kile kɛɛ yede yetiã numɔ kɛɛ tanɩ wɔ ye mmeliyema nwʋ dɩkɛɛ yɛzayɛ la. Amba, yɛbɔɔ mmɔdɩnɩ kɛɛ yekowula “subanɩ fʋlɔ” yɩ. (Ɛfɩ. 4:23, 24) Naasʋ̃, yɛlɔ́kʋla kɛyɛ yɩ pɛpɛɛpɛ. (Wul. 3:23) Sɛ yede yetiã numɔ zɔ a, ɩma ɩyɛ mɛlɛkɛ kɛɛ yɛkɔzʋzɔ yɛ nwʋ nkʋ̃kʋ̃, yɛkɛva tanɩ kɛhyɛ na ‘ɩamá ɔkʋ̃yɛlɛ nɩ mɔɔ sunzuma nɩ ɩva ɩma nɩ ɩawʋwa ɛkɛnɩ eɣile bela.’
Sɛ yɛfa tanɩ yɛkyɛ na yɛma yɛ ɛɣɛɛlɛ fi nninyeni mɔɔ mvʋlɔ yɛ tiyia yɛ nɩ a, ɩkɛma ɔkʋ̃yɛlɛ nɩɩ azʋ̃nudwolɩyɛ kɔwʋwa yɛ avinli. Giliki odwokɔpɔkɔ mɔɔ bekile yɩ tʋ ‘ɔkʋ̃yɛlɛ nɩɩ azʋ̃nudwolɩyɛ’ wɔ Ɛfɩsɛsɩmaa 4:3 nɩ, besia bekile yɩ tʋ kɛɛ “ndini” wɔ Kolosiyiamaa 2:19, NWT. Ndini dɩ debe mɔɔ ɩwɔ ye eniiwudo yi nu mɔɔ ɩkã mmowulo anwɩ̃ ɩbɔ numɔ. Ɔzɔ la sʋ̃ yɛ azʋ̃nudwolɩyɛ nɩɩ ɔlɔlɛ mɔɔ yɛwɔ yɛma ye mmeliyema nɩ bʋwa yɛ ma yɛkɔ zʋ yɛ nɩɩ bɔ bʋwa ɩávalɩ nwʋmɔ kɛɛ ɩyɛ a bɛyɛ nninyeni be mɔɔ yɛ anyɩ iáleli nwʋmɔ nɩ.
Sɛ eliyema be yɛ debe tiyia wʋ anzɛnyɩɩ ɩma ɛfa ɛya a, kɛ ankɩ ɛkɛva wʋ adwɩnɩ keziye nninyeni mɔɔ ɩyɛ idiyia wʋ zʋ nɩ, bɔ mmɔdɩnɩ kɛɛ ɛkɛla ntɩyasɩ ali. (Kol. 3:12) Iluwakɛɛ ye munwala yɛáli munli nɩ ti, ebiye a wʋzawʋ sʋ̃ ɔvʋ̃mɩ abiye wɔ ɔhʋanɩ be zʋ kyɩ̃. Sɛ yɛma eyi bʋwa yɛ adwɩnɩ nu a, ɩkɔwʋwa yɛ ma yɛkɛyɛ mɔɔ yɛkɔhʋla na ‘ɩamá ɔkʋ̃yɛlɛ nɩ mɔɔ sunzuma nɩ ɩva ɩma nɩ ɩawʋwa ɛkɛnɩ eɣile bela.’