Mmʋwalɩyɛ Ma Mmaalɛ Mɔɔ Bɛyɛ Bɛ Atɩɩtɩɩ

Ɔzɔ yɛ odwokɔ mɔɔ ɩwɔ jw.org zʋ mɔɔ yi odwokɔtile se “Mmaalɛ Bɛ Banɩwɔlɛ—Mɔɔ Bayɩbʋlʋ Yɩ Kã Wɔ Nwʋ” nɩ bɔ yɩ tʋ a. Lɩnkɩ be wɔ ɔzɔ odwokɔ nɩ yɩ awielɩyɛ mɔɔ ɩma ɔkʋla ɔtwɩ̃ yɩ PDF, mɔɔ sa ɔkʋla pɩlɩntɩ na wʋawuwu numɔ ma ɩayɛ kɛlɛta ɛɣalɛ mɔɔ ɩwɔ owukolɛ anla. Eliyema baalɛ be mɔɔ ɩda United States mɔɔ bɔfʋlɔ yɩ Stacy hanlɩ kɛɛ, “Mɩbɩlɩntɩlɩ ebiye, na mɩ nɩɩ eliyema baalɛ be va hɔ manlɩ bɛzabɛ mɔɔ bɛda azʋkɔlɩyɛ mɔɔ bekila mmaalɛ mɔɔ bɛyɛ bɛ atɩɩtɩɩ wɔ yɛ asafʋ yɩ azɩlɛ-sini yi nu nɩ.”

Egyimayɛlɛmaa mɔɔ bɔwɔ kɛnɩ nɩ, bo nu ɔkʋ̃ ɣizialɩ bɛ kɛɛ ɩkɔhʋla kenyia sʋ̃maa kɛhɩnla nwʋmɔ na ɩava ɩama bɛzabɛ mɔɔ bɛda kɛnɩ nɩ a. Meti, bezia bɛvalɩ ahɛlɛta mmalɛ yɩ 40 bɛhɩnlanlɩ jw.org kaadɩ 30 nwʋ bɔhɔ bɛmanlɩ bɛ. Mmɩlɩ be mɔ bezia bɔhɔlɩ kɛnɩ nɩ, ebani mɔɔ ikila kɛnɩ nɩ hanlɩ kɛɛ Dasɩvʋlɔmaa yɩ behilé mmenii mɔɔ bɛda kɛnɩ nɩ kezimɔ bokozuma Bayɩbʋlʋ yɩ.

Stacy nɩɩ mmeliyema mmaalɛ anwɩ̃ be hɔlɩ azʋkɔlɩyɛ fʋlɔ be, na ɛkɛnɩ sʋ̃ beleli ahɛlɛta mmalɛ yɩ anlu na bezeli bɛ kɛɛ bɛvá sʋ̃maa bɔhɔ bɛhɩnla nwʋmɔ bɛ. Egyimayɛlɛmaa yɩ ɔkʋ̃ hanlɩ kɛɛ “Kɛlɛta eyi kɔwʋwa mmaalɛ mɔɔ bɔwɔ ɛkɩhyɩ nɩ paa.” Ɩva ɩzɔlɩ zʋlɔ kɛɛ, “Eyi yɛ yehyinyia a.” Aɣinzi yi mɔɔ bezia bɔhɔlɩ kɛnɩ nɩ, bɛzabɛ mɔɔ bɛdɩda kɛnɩ nɩ, bo nu sʋ̃maa hunwanlɩ bo munwa kɛɛ bɛpɛ kɛɛ bɔnwʋ kezimɔ bɛyɛ Bayɩbʋlʋ dɩyɛzumanlɛ, na bo nu anwɩ̃ po hanlɩ kɛɛ bɛpɛ kɛɛ bɛba dapɛnɩ yɩ awielɩyɛ dɩyɛzumanlɛ mɔɔ ili kɛnɩ yɩ be wɔ Kɩndɔm Hɔɔlʋ.

Stacy kã kɛɛ: “Kezimɔ mmenii valɩ anyɩnlɩlelɛ leli odwokɔ eyi nɩ yɛlɩ yɛ nnwʋánlɩ. Sɛ ɛpɩlɩntɩ kɛlɛta yɩ na obubu a, ɩdɩ ɔhʋanɩ kɩnlɩma mɔɔ ɔkɔhʋla koluwa zʋlɔ ɛ nɩɩ mmaalɛ eyimmɔ kɛhyɛ Bulombunlililɛ nwʋ odwokɔba yɩ. Kezimɔ bɛyɛlɩ bɛ dɩyɛ wɔ nwʋmɔ nɩ manlɩ yɛ anyɩ leli, na yɛlɛ anyɩnlɩlelɛ yekilaa ɔhʋanɩ kɛɛ Gyehova keyila yɛ mmɔdɩnɩwɔlɛ zʋ mmɩlɩ mɔ yɛkɔɔ zʋ kɛhã odwokɔba yɩ kehile mmaalɛ eyimmɔ nɩ.”