Mɩnla Ti Mɔɔ Bɔfʋlɛ Yɛ Kɛɛ Gyehova Dasɩvʋlɔmaa?

Mmenii sʋ̃maa bɔdwɩnɩ kɛɛ, Gyehova Dasɩvʋlɔmaa ɩdɩ ɔzʋ̃mɩnlɛ fʋlɔ be yi dima. Naasʋ̃, kɛyɛ alʋbɔ mɔɔ ɩbʋ 2,700 mɔɔ ɩɣa ɩzɩ ɩhɔ nɩ, nɩ bɔfʋlɛ nɔhʋanlɛ Nyamɩnlɩ ɔkʋ̃ kyeinyɩɩ yɩ azʋ̃mɩvʋlɔ nɩ mɔ kɛɛ yɩ “dasɩvʋlɔmaa.” (Isaiah 43:10-12, NW) Ansaana ɔlʋbɔ 1931 ɩbɛadwu nɩ, nɩ bɔfʋlɛ yɛɛ kɛɛ Bayɩbʋlʋ Zumanlɛmaa. Mɩnla ti mɔɔ yɛvalɩ dima Gyehova Dasɩvʋlɔmaa yɩ nɩ yedianlɩ yɛ zʋ a?

Ye dima yɩ nɩ ikile Nyamɩnlɩ kʋ̃ mɔɔ yɛsʋ̃mɩ yɩ. Kɛmɔ ɔwɔkɩ salɛti ɛhɛlɛlɛ ikile nɩ, Nyamɩnlɩ yi dima, Gyehova yɩ nɩ ifinde abʋmɩ abʋmɩ sʋ̃maa zɛ wɔ Bayɩbʋlʋ yɩ nu. Wɔ Bayɩbʋlʋ azʋlɔtʋ be nu nɩ, bɛyɩ dima yɩ wɔ numɔ na bɛva abodini dɩkɛ Niibenyia anzɛnyɩɩ Nyamɩnlɩ beziye yɩ agyia nu. Naasʋ̃, nɩ nɔhʋanlɛ Nyamɩnlɩ ɩla yi dima yɩ ali ihile Mosisi kɛɛ, bɔfʋlɛ yɩ Gyehova, ɩhanlɩ kɛɛ: “Eyi ɩdɩ mɩ dima mmɩlɩ munwala a.” (Exodus 3:15, NW) Ɔzɔ ɔhʋanɩ yɩ zʋ nɩ, ɩmanlɩ ɩyɛlɩ sʋnʋnkʋ̃ wɔ awohwi nyamɩnlɩ azʋlɔtʋ nwʋ. Ɩyɛ yɛ fɛlɛkʋ̃ kɛɛ, Nyamɩnlɩ yi dima nwanzanwanza yɩ nɩ ɩla yɛ zʋ.

Ye dima yɩ nɩ ikile yɛ egyima mɔɔ yɛyɛ. Ɔzʋmɩ ɔwɔkɩ mmɩlɩ nu nɩ, mmenii sʋ̃maa zɛ mɔɔ ɛdɩnɣɛlɛnii Ebulu yɛɛ ili bɔmʋnlɩ nɩ, belili dedi mɔɔ nɩ bɔwɔ yɩ wɔ Gyehova nu yɩ nwʋ dasɩlɛ. Ɔzʋmɩ ɔzɔ mmɩlɩ nɩ, Nowa, Abilehamɩ, Sɛla, Mosisi, Devidi, nɩɩ mvʋlɔ bɛɣa bɛhɩnla ɔzɔ ‘mmenii sʋ̃maa mɔɔ bedi be dedi nwʋ dasɩlɛ nɩ’ nwʋ. (Hibulumaa 11:4, 6–12:1) Dɩkɛ mɔɔ abiye keli enii mɔɔ ɩnwʋ íni odwokɔ nwʋ dasɩlɛ wɔ kɔɔtʋ nɩ, yezi yɛ kɛnɣa kɛɛ, yɛkɛma mvʋlɔ bɔkɔnwʋ yɛ Nyamɩnlɩ ɩnwʋ nɔhʋanlɛ odwokɔ.

Dima mɔɔ yɛva yɩ nɩ ikile kɛɛ yesumazuma Gyisɛsɩ. Bayɩbʋlʋ ɩfʋlɛ Gyisɛsɩ kɛɛ “nɔhʋanlɛ dasɩvʋlɔ” (Yikile 3:14) Gyisɛsɩ yɩzayɩ ɩhanlɩ kɛɛ, ‘ɩlalɩ Nyamɩnlɩ yi dima yɩ ali’ na ɩhɔlɩ ɔzʋlɔ ‘ɩhanlɩ nɔhʋanlɛ nɩ nwʋ odwokɔ’ mɔɔ ɩfalɩ Nyamɩnlɩ nwʋ. (Dwɔɔnʋ 17:26, NW; 18:37) Meti, ɩsɛ kɛɛ Kɩlayɩsɩ yɩ mɛdalilɛmaa nɔhʋanlɛmaa yɩ nɩ, bekyina Gyehova yi dima yɩ mɛda na bɛma mvʋlɔ sʋ̃ bɔnwʋ yɩ. Eyi yɛɛ Gyehova Dasɩvʋlɔmaa bɔbɔ mmɔdɩnɩ kɛɛ bɛkɛyɛ a.

• Mɩnla ti mɔ Bayɩbʋlʋ Zumanlɛmaa yɩ nɩ bɛvalɩ dima Gyehova Dasɩvʋlɔmaa bedianlɩ bɔzʋ a?

• Ɔzʋmɩ mɩnla mmɩlɩ yɛɛ Gyehova inyiaa dasɩvʋlɔmaa wɔ azɩlɛ yɩ zʋ a?

• Aninyia yɛɛ ɩdɩ Gyehova yɩ Dasɩvʋlɔ kezile a?