Kɛ Ɩyɛlɩ Mɔɔ Bezialɩ Bɔnwʋnlɩ Bayɩbʋlʋ Yɩ Nu Nɔhʋanlɛ Yɩ a?

Bayɩbʋlʋ ɩhanlɩ idianlɩ ɛkɛnɩ kɛɛ, wɔ Kɩlayɩsɩ yɩ wulo mɛda nɩ, awohwi ehilehilelɛmaa bokodwodwu wɔ Kilisinyiamaa mɔɔ beli bɔmʋnlɩ nɩ bonu, na bɛazɩkɛ Bayɩbʋlʋ nu nɔhʋanlɛ odwokɔ. (Egyima 20:29, 30) Mmɩlɩ ɩkɔɔ ɔzʋlɔ nɩ, ɔzɔ sʋ̃ la yɛɛ izili a. Bɛvalɩ bɛ awʋzʋmɩ ɔzʋ̃mɩnlɛ bɔvʋlalɩ Gyisɛsɩ yɩ hilehilelɛ baaba yɩ nu, na ɩmanlɩ awohwi Kilisinyianɩ ɔzʋ̃mɩnlɛ idwodwuli. (2 Timoti 4:3, 4) Kɛ ɩkɛyɛ na yɛahʋla yɛale yɛadiã numɔ kɛɛ, yɛwɔ ntɩyasɩ baaba wɔ mɔɔ Bayɩbʋlʋ yɩzayɩ ikilehile nɩ nu nnɛ a?

Mmɩlɩ idwuli kɛɛ Gyehova ɩkɛla nɔhʋanlɛ yɩ ali. Ɩhanlɩ kɛɛ, wɔ ‘awielɩyɛ mmɩlɩ nu nɩ, nɔhʋanlɛ nnimidi ikowulu ɔzʋlɔ.’ (Daniel 12:4, NW) Wɔ 1870 nu nɩ, okuwu ɛgyɩkɩ̃ɩ̃ be mɔɔ nɩ bɛdɩ nɔhʋanlɛ-bɩbɛlɛmaa bɔnwʋnlɩ kɛɛ asɔlɩ azʋlɔtʋ be ehilehilelɛ nɩ ígyĩ Bayɩbʋlʋ yɩ zʋ. Meti, bɔwɔlɩ yɩ tʋ kɛɛ bɛpɩbɛ ntɩyasɩ mɔ ɩwɔ mɔɔ Bayɩbʋlʋ yɩzayɩ ikilehile yɩ nu, na Gyehova iwukoli bɛ adwɩnɩ nu ma bɛdɩlɩ ɛhɛlɛlɛ odwokɔ yɩ tʋ.

Mmenyia nɔhʋanlɛmaa beleli mmɩlɩ bozumanlɩ Bayɩbʋlʋ yɩ. Ɔhʋanɩ mɔɔ Bayɩbʋlʋ Zumanlɛmaa mɔɔ nnɛ bɔfʋlɛ bɛ kɛɛ Gyehova Dasɩvʋlɔmaa boluwalɩ zʋ bozumanlɩ Bayɩbʋlʋ nɩ la yɛɛ yɛzayɛ sʋ̃ yeduwa zʋ nnɛ a. Bozunzunli Bayɩbʋlʋ yɩ nu ndwokɔ abɔkɔ nwʋ nkʋ̃kʋ̃ nkʋ̃kʋ̃. Mmɩlɩ mɔɔ beyiyia Bayɩbʋlʋ odwokɔ be mɔɔ ɩyɛ ɛzɩzɩbɛ kɛɛ bɛkɛdɩ ɩtʋ nɩ, bɛpɩbɛ nkyɩkyɛmi fʋlɔ mɔɔ ikilehile ɔzɔ odwokɔ yɩ nu. Na sɛ bɛba bɔnwʋ yɩ kɛɛ ɩnɩ Ɛhɛlɛlɛ Odwokɔ nɣalɩyɛ nɩ yiyia a, bɛkɛlɛ betiã ɛkɛnɩ. Meti Bayɩbʋlʋ mɔɔ bɛmanlɩ ihilehileli yɩzayɩ ɩnwʋ nu nɩ, ɩmanlɩ bezialɩ bɔnwʋnlɩ nɔhʋanlɛ mɔɔ ɩfalɩ Nyamɩnlɩ yi dima nɩɩ yɩ Bulombunlililɛ nwʋ, yɩ tile nu pɔkɔ mɔɔ ɩwɔ ɩma adasamaa nɩɩ azɩlɛ yɩ, bʋwabɩlɛ mɔɔ awuvʋlɔ bɔwɔ nu, nɩɩ awudunwolɩyɛ nwʋ anyɩnlɩlazʋ nɩ. Ɛbɩbɛlɛ mɔɔ bɛbɩbɛlɩ nɩ, ɩmanlɩ benyianlɩ fawʋnwʋdi wɔ dedi azʋlɔtʋ mɔɔ nɩ ɩdɩ awohwi nɩɩ bɛ nyɛlɩyɛ azʋlɔtʋ nwʋ.—Dwɔɔnʋ 8:31, 32.

Wɔ ɔlʋbɔ 1879 nu nɩ, Bayɩbʋlʋ Zumanlɛmaa bɔnwʋnlɩ kɛɛ, mmɩlɩ idwu kɛɛ bɛma bɔnwʋ nɔhʋanlɛ yɩ wɔ dɩka bela. Meti wɔ ɔzɔ ɔlʋbɔ nu nɩ, bɔwɔlɩ ɩtʋ kɛɛ bɛyɛ The Watchtower Announcing Jehovah’s Kingdom magezini, mɔɔ nnɛ sʋ̃ yegua ɔzʋlɔ yɛyɛ nɩ. Nnɛ, yɛ nɩɩ mmenii kyɛ Bayɩbʋlʋ yɩ nu nɔhʋanlɛ wɔ azɩlɛ 239 zʋ nɩɩ ɛdɩndɛlɛ kɛyɛ 700 nu. Nɔhʋanlɛ nnimidi ilébulu ɔzʋlɔ zɛ kyɩ̃ kɛɛ nnɛ!

• Wɔ Kɩlayɩsɩ iwulo mɛda nɩ, mɩnla odwokɔ yɛɛ ɩɣalɩ Bayɩbʋlʋ yɩ nu nɔhʋanlɛ zʋ a?

• Mɩnla dɩyɛ yɛɛ ɩwʋwalɩ yɛ ma yezialɩ yɛnwʋnlɩ nɔhʋanlɛ mɔɔ ɩwɔ Nyamɩnlɩ Odwokɔ yɩ nu a?