Gyehova Dasɩvʋlɔmaa, Bɛdɩ Mɩnla Mmenii a?

Gyehova Dasɩvʋlɔmaa bonu anã yɛɛ ezi bɛ a? Ebiye a, yenu be dɩ wʋ ɔhwɔnwʋmmɔ, ɛ nɩɩ ebiye yɛ egyima anzɛnyɩɩ ɛ nɩɩ ebiye wɔ sukuulu nu. Ebiye a, ɛ nɩɩ yenu be sʋ̃ wɔ Bayɩbʋlʋ nu nkɔmɔ kyɩ̃. Yɛdɩ mɩnla mmenii pɔkyɩ̃ɩ̃ a, na mɩnla ti mɔ yɛbɔ yɛ dedi nwʋ ɛlawulo a?

Yɛdɩ kɛɛ abiyela. Yɛzʋ̃ nnɩka nnɩka nɩɩ bʋwabɩlɛ azʋlɔtʋ nu. Nɩ ye nu be wɔ asɔlɩ azʋlɔtʋ nu, na nɩ ebiyemmɔ sʋ̃ bɛále Nyamɩnlɩ bedi. Ye munwatĩĩ yeleli mmɩlɩ yɛbɩbɛlɩ Bayɩbʋlʋ ehilehilelɛ yɩ nu bʋwɔ ansaana yɛbɛayɛ Dasɩvʋlɔmaa. (Egyima 17:11) Yeleli mɔɔ yezumanlɩ yɩ nɩ yedianlɩ numɔ, na akʋ̃ amɩyɛzayɛ yezili pɔkɔ kɛɛ, yɛkɔzʋ̃mɩ Gyehova Nyamɩnlɩ.

Yenyia Bayɩbʋlʋ yɩ mɔ yesuma yɩ zʋ mfasʋ. Dɩkɛ enii bela nɩ, yɛwɔ yɛ ndwokɔ ɛzɩzɩbɛ nɩɩ yɛ mɛlɛkɛyɛlɛ azʋlɔtʋ mɔ ɩsɛ kɛɛ yedi ɔnwʋmɔ egyima. Naasʋ̃, Bayɩbʋlʋ egyinalɛzʋ-ndwokɔ mɔ yɛbɔ mmɔdɩnɩ kɛɛ yɛkɛva yekeli egyima nɩ ɩma yɛ azɩwʋwalɛ idu mpʋnɩ. (Gyemisi 1:25) Eyi ɩkɩnla ɔnwʋmɔ ti mɔɔ yɛnɩ mvʋlɔ kyɛ nninyeni baaba mɔ yezuma wɔ Bayɩbʋlʋ yɩ nu yɩ a.

Yɛfa Nyamɩnlɩ yɩ odwokɔ yɛbɔ yɛ ɛbɩla. Ɔzɔ ndwokɔ eyi mɔɔ ɩwɔ Bayɩbʋlʋ yɩ nu nɩ ikilehile yɛ ma yɛ ɛbɩlawɔlɛ ɩkɔlɩ ɔzʋlɔ na ɩma yebu mvʋlɔ, na mɔ ɩkɩnla ɔzɔ subanɩ nɩ ɩnwʋ yɛ lɛ nɔhʋanlɛlilɛ nɩɩ baabayɛlɛ. Ɔzɔ egyinalɛzʋ-ndwokɔ eyi ɩbʋwa ma yenyia mmenii mɔ bɛtɩ pɔkɔ na mfasʋ wɔ bɔ zʋ wɔ manlɩ yɩ nu, na bɛhyɛ ɔkʋ̃yɛlɛ wɔ abusunwa nu nɩɩ ɛbɩla baaba ɔnwʋmɔ ɛzɩzɩbɛ. Iluwakɛɛ yezi petee kɛɛ “Nyamɩnlɩ ɩába mmenii nu” nɩ ti, yɛdɩ mmeliyema dedimaa mɔɔ yɛwɔ oyuwadɩ nu dɩka bela mɔɔ abiye yɩ nnwʋnlamɩ anyɩ zʋ nɩɩ manlɩwulɛ ndwokɔ ɩáyɛ ɛyɩlɛ ipukopuko ye nu. Ɩwɔ numɔ kɛɛ yɛdɩ kɛɛ abiyela dɩyɛ, naasʋ̃ yɛbɔ numɔ yɛyɛ mmenii sʋnʋnkʋ̃.—Egyima 4:13; 10:34, 35.

• Mɩnla ɔhʋanɩ zʋ yɛɛ Gyehova Dasɩvʋlɔmaa bɛdɩ kɛɛ abiyela?

• Mɩnla mfasʋ yɛ Bayɩbʋlʋ yɩ mɔɔ Dasɩvʋlɔmaa bosuma yɩ nɩ ɩma benyia?