Asʋ̃ Gyehova Dasɩvʋlɔmaa Bɛdɩ Nɔhʋanlɛ Kilisinyiamaa?

Kɛ Gyehova Dasɩvʋlɔmaa nɩ, yede yedi kɛɛ yɛdɩ nɔhʋanlɛ Kilisinyiamaa. Mɩnla ti a? Sunzú mɔɔ ye dedi igyĩ zʋlɔ, dima mɔɔ ɩma yɛyɛ sʋnʋnkʋ̃, nɩɩ ɔlɔlɛ mɔɔ yɛwɔ yɛma yɛ nwʋ yɛ nwʋ nɩ nwʋ kila.

1. Mɩnla yɛ Gyehova Dasɩvʋlɔmaa be dedi igyĩ zʋlɔ a?

Gyisɛsɩ ɩhanlɩ kɛɛ: ‘Nyamɩnlɩ odwokɔ ɩdɩ nɔhʋanlɛ.’ (Dwɔɔnʋ 17:​17) Dɩkɛɛ Gyisɛsɩ nɩ, Gyehova Dasɩvʋlɔmaa bɛfa be dedi bekyina Nyamɩnlɩ Odwokɔ yɩ zʋ mmɩlɩ munwatĩĩ. Sunzú yɛ abakɔsɛmɩ nwʋ kila. Wɔ 1870 yi nu nɩ, okuwu be mɔɔ nɩ bɛdɩ Bayɩbʋlʋ zumanlɛmaa wɔlɩ yɩ tʋ kɛɛ bɛpɩbɛlɩ Bayɩbʋlʋ yi nu bʋwɔ. Bɛɣa bɔnwʋnlɩ kɛɛ mɔɔ Bayɩbʋlʋ ɩkã nɩ, kɛ mɛyɩ yɛ asɔlɩ azʋlɔtʋ nɩ bekilehile a. Naasʋ̃ bezili pɔkɔ kɛɛ bɛkɛva mɔɔ Bayɩbʋlʋ ikilehile nɩ bɛkɛyɛ egyima. Akʋ̃ bɔwɔlɩ yɩ tʋ kɛɛ bɛkãã ɔzɔ Bayɩbʋlʋ nu nɔhʋanlɛ odwokɔ yɩ bekehile mmenii.a

2. Mɩnla ti mɔɔ yɛfʋlɔ yɛ nwʋ Gyehova Dasɩvʋlɔmaa?

Gyehova ɩfʋlɔ yɩ asʋ̃mɩvʋlɔ kɛɛ yɩ dasɩvʋlɔmaa iluwakɛɛ bɛkã yɩ nwʋ nɔhʋanlɛ odwokɔ. (Hibulumaa 11:4–​12:1) Kɛ ndianwʋ nɩ, wɔ ɔwɔkɩ mmɩlɩ nu nɩ, Nyamɩnlɩ ɩhanlɩ ihileli yɩ mmenii kɛɛ: “Mʋlʋnmmɔ yɛ lɛ mɩ dasɩvʋlɔmaa.” (Kɩnga Ayɩzaya 43:​10.) Bɔfʋlɔ Gyisɛsɩ kɛɛ “Nɔhʋanlɛ Dasɩvʋlɔ.” (Yikile 1:5) Meti wɔ 1931 yi nu nɩ, yɛvalɩ dima Gyehova Dasɩvʋlɔmaa yedianlɩ yɛ zʋ. Ɩyɛ yɛ fɛ paa kɛɛ ɔzɔ dima nɩ ɩla yɛ zʋ.

3. Mɩnla ɔhʋanɩ zʋ yɛ Gyehova Dasɩvʋlɔmaa bosumazuma Gyisɛsɩ yɩ ɔlɔlɛ nɩ a?

Nɩ Gyisɛsɩ ɩdɔ yɩ adʋwavʋlɔ nɩ mmɔ nkʋ̃ʋ̃ ma nɩ ɩnwʋ bɛ kɛɛ bɛdɩ yɩ abusunwa. (Kɩnga Maakɩ 3:​35.) Ɔzɔ la sʋ̃ yɛ Gyehova Dasɩvʋlɔmaa bɛdɩ oyuwadɩ munwala abusunwa mɔɔ ɔkʋ̃yɛlɛ wɔ bɛ avinli a. Eyi ti mɔɔ yɛfʋlɔ yɛ nwʋ mmeliyema yɩ a. (Fɩlɩmɔnʋ 1, 2) Akʋ̃ sʋ̃ yɛfa ahyɛdɩ eyi yɛyɛ egyima: “Bɔlʋlɔ́ bɔ ɔhɔnwʋmmɔ dedimaa.” (1 Pita 2:​17) Gyehova Dasɩvʋlɔmaa boduwa ɔhʋanɩ sʋ̃maa zʋ bɛda ɔlɔlɛ eyi ali, dɩkɛɛ mmʋwalɩyɛ mɔɔ yɛfa yɛma yɛ ɔhɔnwʋmmɔ dedimaa mɔɔ bɔwɔ oyuwadɩ munwala mmɩlɩ mɔ behyinyia mmʋwalɩyɛ nɩ.

SUMÁ SƲ̃MAA

4. Yɛfa ye dedi yekyina Bayɩbʋlʋ yɩ zʋ

Gyehova ɩhanlɩ idianlɩ ɛkɛnɩ kɛɛ Bayɩbʋlʋ nu nɔhʋanlɛ yɩ ɩkɛla ali. Kɩnga Danɩyɛlɩ 12:​4, na akʋ̃ bozunzú odwokɔɣizialɛ eyi nwʋ:

• Mɩnla yɛ “ikowuli ɔzʋlɔ” wɔ Nyamɩnlɩ yi mmenii bɛ avinli mmɩlɩ mɔ bɔkɔ ɔzʋlɔ bɛpɩbɛlɩ Bayɩbʋlʋ yi nu a?

Kila ɔhʋanɩ mɔɔ Bayɩbʋlʋ zumanlɛmaa okuwu be, mɔɔ Charles Russell ɩkɩnla nwʋmɔ nɩ, boluwalɩ ɔzʋlɔ bozumanlɩ Nyamɩnlɩ Odwokɔ yɩ. Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Bɔnwʋnlɩ Bayɩbʋlʋ Nu Nɔhʋanlɛ Yɩ Dɔkʋ̃ (7:45)

• Wɔ vidiyo yi nu nɩ, mɩnla ɔhʋanɩ yɛ Charles Russell nɩɩ yɩ ɔhɔnwʋmmɔ Bayɩbʋlʋ zumanlɛmaa nɩ boluwalɩ zʋlɔ bozumanlɩ Bayɩbʋlʋ yɩ a?

Ezi a?

Ɩyɛ a, nninyeni mɔɔ yede yedi nɩ yɛsɩnza numɔ. Mɩnla ti a? Kɛmɔ oyuwa ifinde ngyɩkɩ̃ɩ̃ ngyɩkɩ̃ɩ̃ kɔbʋmɩ kɛɛ oyumi ɩkɛdɩdɩ na yɛanwʋ azɩ bʋwɔ nɩ, ɔzɔ la yɛ Nyamɩnlɩ ɩma ntɩyasɩ mɔɔ ɩwɔ yɩ Odwokɔ yi nu nɩ ɩda ali ngyɩkɩ̃ɩ̃ ngyɩkɩ̃ɩ̃ a. (Kɩnga Ɛɣɛlɛwulɛ 4:18.) Meti ɩwɔ numɔ kɛɛ Bayɩbʋlʋ yɩ ɩázɩnza dɩyɛ, naasʋ̃ yɛyɛ nzɩnzanlɩyɛ wɔ nninyeni mɔɔ yede yedi nɩ nu mmɩlɩ mɔ ntɩyasɩ mɔɔ yɛwɔ wɔ Bayɩbʋlʋ yi nu ɩyɛɛ kezi nɩ.

5. Ye dima nɩ ikile egyima mɔɔ yɛyɛ

VIDIYO: Dima Mɔɔ Ɩma Bɔnwʋ Yɛ (2:40)

• Mɩnla ti mɔɔ dima Gyehova Dasɩvʋlɔmaa nɩ ɩfata a?

Mɩnla ti mɔɔ Gyehova ɩyɩ mmenii kɛɛ yɩ dasɩvʋlɔmaa a? Ama bɛahã nɔhʋanlɛ ndwokɔ mɔɔ ɩfalɩ Gyehova mɔɔ ɩdɩ nɔhʋanlɛ Nyamɩnlɩ yɩ nwʋ, iluwakɛɛ mmenii hã awohwi ndwokɔ sʋ̃maa bɛvalɩ yɩ nwʋ. Ma yezunzu ɔzɔ awohwi ndwokɔ yi nu anwɩ̃ nwʋ.

Ɔzʋ̃mɩnlɛ azʋlɔtʋ be kilehile be mmenii kɛɛ Nyamɩnlɩ ɩpɛ kɛɛ bɛfa mmoduwaba bedi egyima wɔ bɔ ɔzʋ̃mɩnlɛ nu. Naasʋ̃, kɩnga Lɛvitikɔsʋ 26:​1, na akʋ̃ bozunzú ndwokɔɣizialɛ eyimmɔ nwʋ:

• Mɩnla nɔhʋanlɛ yɛ ɛhɛlɛlɛ odwokɔ eyi ɩma yɛnwʋ yɩ a? Kɛ Gyehova ɩtɩ nɣanlɩ ise wɔ mmoduwaba mɔɔ bɛfa bedi egyima wɔ ɔzʋ̃mɩnlɛ nu nɩ nwʋ a?

Nyamɩnlɩzʋ̃mɩnlɛ nu mbanimbani be kilehile kɛɛ Gyisɛsɩ yɛ lɛ Nyamɩnlɩ. Naasʋ̃, kɩnga Dwɔɔnʋ 20:​17, na akʋ̃ bozunzú ndwokɔɣizialɛ eyimmɔ nwʋ:

• Mɩnla nɔhʋanlɛ yɛ ɛhɛlɛlɛ odwokɔ eyi ɩma yɛnwʋ yɩ a? Asʋ̃ Gyisɛsɩ yɩzayɩ ɔkʋ̃ yɩ sʋ̃ yɛ lɛ Nyamɩnlɩ a?

• Sikalɛyɩ mɔɔ ɔnwʋ yɩ kɛɛ Gyehova ɩzʋ̃ma yɩ Dasɩvʋlɔmaa kɛɛ bɛhã mɛyɩ nɩɩ ɩ Ɣa yɩ nwʋ nɔhʋanlɛ odwokɔ nɩ, kɛ ɩma ɛtɩ nɣanlɩ ese a?

6. Yɛdʋdɔ yɛ nwʋ yɛ nwʋ

Bayɩbʋlʋ yɩ ɩfa Kilisinyiamaa itindiã eniiwudo yɩ ɔfʋã azʋlɔtʋ nwʋ. Kɩnga 1 Kɔlɛntɩmaa 12:​25, 26, na akʋ̃ bozunzú ndwokɔɣizialɛ eyimmɔ nwʋ:

• Mɩnla yɛ ɩsɛ kɛɛ nɔhʋanlɛ Kilisinyiamaa bɛyɛ mmɩlɩ mɔ Kilisinyiamaa mvʋlɔ bɔnwʋʋ amanɩyɛ a?

• Mɩnla yɛ ɛyɛ yɩ ndwɩ wɔ ɔlɔlɛ mɔɔ Gyehova Dasɩvʋlɔmaa bɔwɔ bɛma bɔ nwʋ nɩ nwʋ a?

Sɛ Gyehova Dasɩvʋlɔmaa mɔɔ bɔwɔ oyuwadɩ yɩ ɔfʋã dɩka be bɔnwʋʋ amanɩyɛ a, bɔ ɔhɔnwʋmmɔ Dasɩvʋlɔmaa mɔɔ bɔwɔ oyuwadɩ munwala bɛyɛ dɩyɛ be bɔbʋwa bɛ. Sɛ ɛpɛ kɛɛ ɔnwʋ nwʋmɔ ndianwʋ ɔkʋ̃ a, yɩ́ VIDIYO nɩ. Akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Ahumi Kezile Matthew Iduli Wɔ Haiti (5:29)

• Mɩnla ɔhʋanɩ zʋ yɛ mmʋwalɩyɛ mɔɔ Gyehova Dasɩvʋlɔmaa bɛfa bɛma wɔ asianɩ mmɩlɩ nu nɩ ikile kɛɛ bɔwɔ ɔlɔlɛ a?

YƖ DƆKƆWƆLƐ

Gyehova Dasɩvʋlɔmaa bɛdɩ nɔhʋanlɛ Kilisinyiamaa. Yɛdɩ abusunwa ɔkʋ̃ wɔ oyuwadɩ munwala mɔɔ ye dedi igyĩ Bayɩbʋlʋ yɩ zʋ, na yɛma mmenii nwʋ nɔhʋanlɛ mɔɔ ɩfalɩ Gyehova nwʋ.

Kɛ Okowuwa Ekeze a?

• Mɩnla ti mɔɔ yɛvalɩ dima Gyehova Dasɩvʋlɔmaa yedianlɩ yɛ zʋ a?

• Mɩnla ɔhʋanɩ zʋ yɛ yɛda ɔlɔlɛ ali yekile yɛ nwʋ yɛ nwʋ a?

• Asʋ̃ ekila a, Gyehova Dasɩvʋlɔmaa bɛdɩ nɔhʋanlɛ Kilisinyiamaa a?

PƖBƐ́ SƲ̃MAA

Sumá sʋ̃maa falɩ yɛ abakɔsɛmɩ nwʋ.

Gyehova Dasɩvʋlɔmaa​—Dedi Mɔɔ Bɛda Yɩ Ali, Ɔfʋã 1: Bɔzʋ̃ Anwunzumi Yi Nu Bɛyɩ Bɔ Nwʋ (1:​00:53)

Kila ndianwʋ ɔkʋ̃ mɔɔ ɩfalɩ kezimɔ Gyehova Dasɩvʋlɔmaa bɛba awohwi ehilehilelɛ nwʋ ndamɛ.

Nyamɩnlɩ Yi Mmenii Bɛhyɛ Yi Dima Animinyiamɩ (7:​08)

Kila ndwokɔɣizialɛ mɔɔ ebiye a ɛlɛ yɩ wɔ Gyehova Dasɩvʋlɔmaa bɔ nwʋ nɩ nwʋ munwalɩyɛ.

“Ndwokɔ Mɔɔ Bɛta Bebizia Bɛfalɩ Gyehova Dasɩvʋlɔmaa Bɔ Nwʋ” (ɔfʋã mɔɔ ɩwɔ jw.org zʋ)

Nɩ Stephen ɩdɩ abiye mɔɔ ɩ nɩɩ awɔfʋlɔ bɛ anyɩ iáyiyia kʋlaa, na nɩ ɩyɛ bɛ bɛsabɛsa. Kila dɩyɛ mɔɔ ɩnwʋnlɩ wɔ Gyehova Dasɩvʋlɔmaa bɔ nwʋ mɔɔ ɩmanlɩ ɩzɩnzanlɩ.

“Nɩ Mɩ Ɛbɩlawɔlɛ Ɩsɩkɛɛ Kʋlaa” (Ɔwɩɛnɩlɛ Aɣanɩ, July 1, 2015)