Mɩnla Dɩyɛ Yɛ Lɛ Nyamɩnlɩ Yɩ Apɛdɩ a?

Nyamɩnlɩ ɩpɛyɩ kɛɛ yɛbʋwa paladayɩsɩ azɩlɛ yɩ zʋ wɔ azʋ̃nudwolɩyɛ nɩɩ anyɩnlɩlelɛ nu eɣile bela!

Ebiye a ekeɣizia kɛɛ, ‘Kɛ ɩkɛyɛ na eyi iazi a?’ Bayɩbʋlʋ ɩkã kɛɛ, Nyamɩnlɩ yɩ Bulombunlililɛ yɩ nɩ ɩkɛma eyi ɩkɛɣa nu, na ɩdɩ Nyamɩnlɩ yɩ pɛ kɛɛ mmenii munwatĩĩ bokozuma ɔzɔ Bulombunlililɛ yɩ nɩ nɩɩ yɩ tile nu pɔkɔ mɔɔ ɩwɔ ɩma yɛ nɩ nwʋ dɩyɛ.—Matiyu 5:5; Luuku 1:32, 33.

Nyamɩnlɩ ɩpɛyɩ kɛɛ isi yɛ bʋwɔ.

Kɛmɔ ɛzɩlɛ ba bela ɩpɛyɩ kɛɛ isi ɩ nnwuakula bʋwɔ nɩ, yɛ sʋlɔ Ɛzɩlɛ yɩ nɩ sʋ̃ ɩpɛyɩ kɛɛ yenyia anyɩnlɩlelɛ eɣile bela. (Dwɔɔnʋ 13:17) Ɩwɔ anʋhʋba yɛ kɛɛ, “enii mɔɔ ɩyɛ Nyamɩnlɩ yɩ apɛdɩ nɩ ikenyia nnwʋanlɩ mɔɔ íni awielɩyɛ.”—1 Dwɔɔnʋ 2:17.

Nyamɩnlɩ ɩpɛyɩ kɛɛ yeduwa yɩ ɔhʋanɩ zʋ.

Bayɩbʋlʋ yɩ ɩkã kɛɛ yɛ Wɔlɛvʋlɔ nɩ ɩpɛyɩ kɛɛ “ikilehile yɩ ɔhʋanɩ yɛ” na ama yɛahʋla “yɛaluwa yɩ ɔhʋanɩ zʋ.” (Isaiah 2:2, 3, NW) Ɩhyɩhyɛ “mmenii be ɩma ɩ dima” kɛɛ bɛma mmenii mɔɔ bɔwɔ azɩlɛ yɩ zʋ munwala bɔnwʋ yɩ apɛdɩ.—Egyima 15:14, NW.

Nyamɩnlɩ ɩpɛyɩ kɛɛ yɛsʋ̃mɩ yɩ wɔ ɔkʋ̃yɛlɛ nu.

Kɛ ankɩ ikobukobuko mmenii nu nɩ, Gyehova yɩ ɔzʋ̃mɩnlɛ nwanzanwanza yɩ nɩ ɩkã bɛ ɩbɔ numɔ wɔ ɔlɔlɛ kanyɩɩ nu. (Dwɔɔnʋ 13:35) Aninyiammɔ yɛɛ nnɛ bekilehile mmenyia nɩɩ mmaalɛ mɔɔ bɔwɔ dɩka bela kezimɔ bɔkɔzʋ̃mɩ Nyamɩnlɩ wɔ ɔkʋ̃yɛlɛ nu a? Yɛtʋ salɛ yɛfʋlɛ wʋ kɛɛ pɩbɛ eyi nwʋ munwalɩyɛ wɔ blohyʋɔ eyi nu.

PƖBƐ SƲ̃MAA

Ɛ nɩɩ yɛ zuma Bayɩbʋlʋ yɩ. Asʋ̃ ɔwɔ ɩtʋ kɛɛ ɛ nɩɩ Gyehova Dasɩvʋlɔmaa bosuma Bayɩbʋlʋ yɩ a? Sɛ ɔlɔ́bɔlɩ ɩtʋ a, asʋ̃ ɛkɛbɛyɩ kɛɛ bɛnɩ wʋ kɛyɛ Bayɩbʋlʋ dɩyɛzumanlɛ a? Bɛále hwɩɩ. Ɔkɔnwʋ yɩ kɛɛ ɩdɩ ɔhʋanɩ ba mɔɔ ɩkɛma ekeɣike Nyamɩnlɩ.

Bizia ɔnwʋma mɔɔ bɛále hwɩɩ. Sa ɔkʋla ɔkɔ yɛ Bulombunli Ayiyialɩyɛ Aliyia bela nu anzɛnyɩɩ ɔkʋhʋla ɛ nɩɩ Gyehova Dasɩvʋlɔ be kɛdɩndɛ na wʋaɣizia ɔnwʋma mɔɔ ɩkɔhʋla ɩkɔwʋwa wʋ ma ɛkɛdɩ Bayɩbʋlʋ yɩ tʋ wɔ wʋzawʋ wʋ ɛdɩndɛlɛ nu.

Suma yɛ nwʋ ndwokɔ wɔ Intanɛtɩ zʋ. Kyela Gyehova Dasɩvʋlɔmaa yɛ Wɛbsayɩtɩ yɩzayɩ. Sa ɔkʋla sʋ̃ ɛkɩnga Bayɩbʋlʋ yɩ wɔ Wɛbsayɩtɩ yɩ zʋ na wʋahila anzɛnyɩɩ wʋadindimi yɛ awuuku anzɛnyɩɩ nninyeni mvʋlɔ wɔ ɛdɩndɛlɛ mɔɔ ɩbʋ 700 nu.