‘Ons het eerlike mense nodig’

EERLIKHEID is iets skaars in vandag se wêreld. Tog is dit ’n basiese vereiste vir Christene. Paulus het geskryf: ‘Ons wil ons in alles eerlik gedra’ (Hebreërs 13:18). Dit is wat Wilma, een van Jehovah se Getuies in Faenza, Italië, wou doen.

Die koerant Il Resto del Carlino vertel hoe sy, toe sy ’n notebeurs met ’n groot som geld daarin buite ’n supermark in haar stad opgetel het, dit “sonder aarseling” aan die polisie oorhandig het sodat dit aan die eienaar terugbesorg kon word.

Toe die burgemeester hiervan te hore kom, het hy onmiddellik ’n kort dankiesêbriefie aan Wilma gestuur. “Namens die Stad”, het hy geskryf, “wil ek u hartlik bedank vir u goeie gebaar. Ons edele stad Faenza het goeie en eerlike mense nodig.”

Hetsy goeie dade bekend word of nie, ons moet altyd daarna streef om eerlik te wees. Soos die Heilige Skrif ons vermaan, “probeer ons reg doen, nie net voor God nie, maar ook voor die mense”.—2 Korintiërs 8:21, The Jerusalem Bible.