Hy het by mense in die tronk geleer

In 2011 het ’n man van Eritrea as ’n vlugteling Noorweë toe gekom. Toe Jehovah se Getuies hom ontmoet het, het hy vir hulle gesê dat hy kontak met die Getuies in sy geboorteland gehad het. Hy het vir hulle vertel dat toe hy in die weermag was, het hy gesien dat Getuies wat vir hulle geloof in die tronk is, nie gedwing kon word om by die weermag aan te sluit nie al is hulle sleg behandel.

Iets het toe in sy lewe gebeur en hy is skielik tronk toe gestuur. Hy was in die tronk saam met drie Getuies – Paulos Eyasu, Negede Teklemariam en Isaac Mogos – wat al van 1994 in die tronk is vir hulle geloof.

Terwyl hy in die tronk was, het hy self gesien dat Jehovah se Getuies volgens die Bybelstandaarde lewe wat hulle aan ander leer. Hy het opgelet dat hulle eerlik is en selfs hulle kos deel met ander mense in die tronk. Hy het gesien dat die Getuies die Bybel elke dag saam gestudeer het en ander genooi het om dit ook saam met hulle te doen. Hulle kon uit die tronk vrygelaat word as hulle ’n dokument geteken het waarin hulle sê dat hulle Jehovah nie meer sou dien nie, maar hulle het geweier.

Hierdie opregte man is diep geraak deur hierdie ondervinding. Nadat hy na Noorweë getrek het, wou hy uitvind waarom Jehovah se Getuies sulke sterk geloof het. Toe die Getuies hom besoek het, het hy onmiddellik die Bybel saam met hulle begin studeer en hulle vergaderinge ook begin bywoon.

Hy is in September 2018 as een van Jehovah se Getuies gedoop. Hy gebruik nou elke geleentheid om mense van Eritrea en Soedan te kontak sodat hy hulle kan aanmoedig om die Bybel te studeer en om sterk geloof op te bou.