Verbeter jou vaardighede in die bediening—Lei nuwelinge op

Waarom dit belangrik is: Nuwe dissipels van Jesus moet leer om “alles” te onderhou wat hy ons beveel het, en dit sluit in dat ons die waarheid aan ander leer (Matt. 28:19, 20). Baie nuwelinge het reeds gekwalifiseer om by die Teokratiese Bedieningskool aan te sluit en het moontlik al informeel vir familielede of vriende getuig. Maar wanneer hulle waardering toeneem vir die dinge wat hulle leer en hulle besef dat Jehovah wil hê dat alle mense die goeie nuus moet hoor, sal hulle dalk graag aan die veldbediening wil deelneem (Rom. 10:13, 14). Nadat nuwelinge as ongedoopte verkondigers goedgekeur is, sal goeie opleiding hulle help om meer selfvertroue te hê tydens hierdie noodsaaklike stadium in hulle geestelike vordering.—Luk. 6:40.

Hoe om dit te doen:

Help die nuwe verkondiger om die publikasies te kry wat hy nodig sal hê om te preek en te onderrig. Wys hom wat jy in jou velddienssak gepak het, en verduidelik wat die doel is van elke publikasie.
Kies saam ’n voorgestelde aanbieding uit Ons Koninkryksbediening, en oefen dit. Spoor die nuweling aan om die aanbieding in sy eie woorde te stel. Gebruik agtergronde op bladsy 82 van die Bedieningskool-boek om voor te berei vir situasies wat algemeen is in julle gebied. Beklemtoon die belangrikheid van beskeie kleredrag en persoonsversorging.—2 Kor. 6:3, 4.
Lei die nuwe verkondiger geleidelik op. Wys hom ’n gebiedskaart, en leer hom hoe hy ’n huis-tot-huis-verslag kan hou. Wys hom hoe om aantekeninge te maak wanneer iemand belangstel. Leer hom hoe om jw.org sowel as die boekie Good News for People of All Nations in die bediening te gebruik. Help hom om die belangstelling wat hy vind, verder te ontwikkel.—1 Kor. 3:6.
Wees geduldig, en prys hom (Spr. 25:11). Stel ’n goeie voorbeeld. Jou ywer en die persoonlike belangstelling wat jy toon, sal jare lank ’n positiewe uitwerking op hom hê.

Wenk vir die maand:

Werk saam met jou student in die huis-tot-huis-bediening, en neem hom saam wanneer jy ’n herbesoek gaan doen of ’n Bybelstudie gaan hou. As jy nie ’n student het nie, kan jy ’n verkondiger met minder ondervinding nooi om saam met jou te werk.