Vraebus

◼ Wat moet kinders leer sodat hulle tot geestelike volwassenheid kan groei?

Christenouers doen baie om hulle kinders “in die dissipline en onderrigting van Jehovah” op te voed (Ef. 6:4, vtn. in NW). Ouers vind dit byvoorbeeld voordelig om elke oggend die dagteks met hulle kinders te bespreek. Gedurende gesinsaanbidding en ander geleenthede sal gesinne moontlik ’n video saam kyk en bespreek, spesifieke materiaal uit Jongmense vra-artikels bespreek, Bybelverslae opvoer of oefensessies hou. Maar as ons wil hê dat ons kinders “tot volwassenheid [moet] voortbeur”, moet hulle ook dieper Bybelwaarhede geleer word.—Heb. 6:1.

Dink aan wat ons die mense leer wat ons in ons gebied ontmoet. Op die eerste besoek of op ’n daaropvolgende besoek probeer ons gewoonlik om ’n Bybelstudie te begin deur gebruik te maak van die boek Wat leer die Bybel werklik? Nadat ons hierdie publikasie voltooi het, gebruik ons ‘Hou julle in God se liefde’. Waarom? Die Leer Bybel-boek help studente om ’n basiese kennis van die Bybel op te doen. Die ‘God se liefde’-boek leer hulle hoe om Bybelbeginsels in hulle daaglikse lewe toe te pas. As nuwelinge albei hierdie publikasies bestudeer, sal dit hulle help om in Christus “gewortel” te word en “in die geloof standvastig gemaak [te] word” (Kol. 2:6, 7). Sal ons kinders nie ook by hierdie materiaal baat vind nie? Hulle moet ook leer oor die losprys, die Koninkryk en die toestand van die dooies. En kinders moet weet waarom God lyding toelaat en hoe om die laaste dae van hierdie stelsel van dinge te identifiseer. Hulle moet daarvan oortuig wees dat Jehovah se Getuies die waarheid het. Jongmense moet ook Bybelbeginsels verstaan en weet hoe om hulle “waarnemingsvermoëns” te oefen (Heb. 5:14). Ouers moet natuurlik hulle kinders se ouderdom en begripsvermoë in ag neem. Baie kinders het egter die vermoë om dieper Bybelwaarhede te begin leer selfs terwyl hulle nog redelik jonk is.—Luk. 2:42, 46, 47.