Verbeter jou vaardighede in die bediening—Hoe om ’n ondersteunende velddiensmaat te wees

Waarom dit belangrik is: Jesus het die waarde daarvan besef om saam met ’n metgesel te preek. Toe hy 70 van sy dissipels voor hom uitgestuur het om te gaan preek, het hy hulle dus twee-twee uitgestuur (Luk. 10:1). ’n Metgesel kan die nodige ondersteuning gee as sy velddiensmaat hom in ’n moeilike situasie bevind of onseker is hoe hy ’n huisbewoner moet antwoord (Pred. 4:9, 10). Sy velddiensmaat kan by sy ondervinding baat vind, en hy kan sy velddiensmaat elke nou en dan ’n wenk gee wat hom kan help om ’n doeltreffender verkondiger te wees (Spr. 27:17). Hy kan sy velddiensmaat ook aanmoedig deur opbouende gesprekke tussen deure te voer.—Fil. 4:8.

Hoe om dit te doen:

Skenk aandag wanneer jou metgesel met ’n huisbewoner praat (Jak. 1:19). Volg saam in jou Bybel wanneer ’n teks gelees word. Dit sal dit vir jou makliker maak om hulp te verleen wanneer dit nodig is.
Gebruik goeie oordeel om te bepaal of jy iets moet sê en wanneer jy dit moet doen (Spr. 25:11). As jy saam met ’n ander verkondiger na ’n Bybelstudie gaan, sal dit waarskynlik waardeer word as jy nou en dan kommentaar lewer. Maar wanneer julle die huis-tot-huis-werk doen, sal jou velddiensmaat dit moontlik verkies as jy hom laat praat wanneer dit sy beurt is. As hy natuurlik ’n nuwe verkondiger is of nie seker is hoe om op ’n vraag of beswaar te reageer nie, sal hy waarskynlik jou hulp waardeer. Maar hetsy jy ’n verkondiger in die huis-tot-huis-werk of na ’n herbesoek of ’n Bybelstudie vergesel, jy moet hom nie in die rede val, die gesprek oorneem of ’n ander onderwerp begin bespreek nie.
Laat ander by jou ondervinding baat vind. As jy jou velddiensmaat van tyd tot tyd ’n wenk kan gee wat hom kan help om doeltreffender te wees, moet jy nie huiwer nie (Spr. 3:27). Wanneer dit gepas is, kan jy begin deur te sê: “Hoe dink jy het dit afgeloop?” of “Mag ek jou ’n wenk gee?” of “Dit is wat ek probeer doen.” Hou in gedagte dat ander dit wel waardeer om nou en dan ’n wenk te kry, maar dat dit hulle sal ontmoedig as jy elke fout wat hulle maak, onder hulle aandag bring.

Wenk vir die maand:

Nadat jy saam met jou velddiensmaat in die bediening gewerk het, kan jy vir hom sê wat hy gesê of gedoen het wat hom ’n ondersteunende velddiensmaat gemaak het.