Berei nuwelinge voor om teenstand die hoof te bied
1 Wanneer mense die Bybel begin studeer en “met godvrugtige toegewydheid . . . wil lewe”, word hulle spesiale teikens van Satan (2 Tim. 3:12). Soms bied werksmaats, skoolmaats of bure teenstand. Dit kan veral moeilik wees wanneer welmenende familielede nuwelinge teëstaan.—Matt. 10:21; Mark. 3:21.
2 Teenstand voorspel: Nuwelinge moet weet dat hulle vervolging te wagte kan wees en dat dit ’n aanduiding is dat hulle besig is om ware dissipels van Christus te word (Joh. 15:20). Soms staan ander hulle teë omdat hulle wanopvattings omtrent Jehovah se Getuies het. Hou in gedagte dat dit groot vreugde meebring as ’n mens oneer ly omdat jy ’n volgeling van Jesus en aan God gehoorsaam is (Hand. 5:27-29, 40, 41). Verseker nuwelinge van Jehovah se liefdevolle ondersteuning (Ps. 27:10; Mark. 10:29, 30). Deur hulle onkreukbaarheid te handhaaf, skaar hulle hulle aan Jehovah se kant van die geskil oor universele soewereiniteit.—Spr. 27:11.
3 Rol van juiste kennis: Prent by jou Bybelstudente in hoe belangrik dit is dat hulle aanhou om juiste kennis in te neem ongeag die beproewinge wat hulle moontlik deurmaak. Satan gebruik teenstand om te probeer verhinder dat wat hulle leer, in hulle figuurlike hart wortelskiet (Spr. 4:23; Luk. 8:13). Hulle moet aanhou om juiste kennis van God se Woord in te neem sodat hulle goed gewortel kan wees in die geloof.—Ps. 1:2, 3; Kol. 2:6, 7.
4 Volharding is nodig: In enige beproewende situasie is volharding noodsaaklik en kan dit goeie resultate voortbring (Luk. 21:16-19). Wanneer nuwelinge teenstand verduur, vind hulle en ander daarby baat. Hulle sien dat Jehovah die vermoë het om dié wat getrou volhard, ryklik te seën.—Jak. 1:12.
5 Die apostel Paulus het hom verbly in die geestelike vordering van sy broers in Tessalonika. Hy het God gedank vir sy broers, onder wie hy baie gehelp het om in die waarheid te kom (2 Tess. 1:3-5). Ons kan ook dieselfde vreugde en bevrediging ervaar as ons ons Bybelstudente voorberei om teenstand die hoof te bied en te volhard.