Jehovah se standaarde help ons
“Mag Hy u gee na u hart en al u voornemens vervul!”—PSALM 20:5.
1. Watter soort standaarde is algemeen? (Deuteronomium 25:15)
IN 1266 het koning Hendrik III van Engeland bepaal dat ’n pennie net soveel moet weeg soos 32 koringkorrels. Hy het aldus ’n standaard vasgestel. Tallose dinge rondom ons werk eweneens volgens standaarde. Ons stel ons radio of televisie op ’n vaste punt (baan) in vir ’n uitsending op ’n standaardgolflengte. Ander standaarde dui op vermoë; ’n skolier se leesvermoë kan deur ’n standaard toets gemeet word.
2. Watter ander soort standaarde is seldsaam, en waarom?
2 Standaarde in die sin van morele waardes en gedrag is egter belangriker. Daarsonder is eersgenoemde standaarde sinloos. ’n Raad op hoër onderwys het byvoorbeeld gevind dat feitlik 50 persent van 25 000 skoliere gesê het dat hulle portuurs slaagpunte gekry het, nie deur te studeer nie, maar deur oneerlik te wees. Wat van die standaarde van mense in openbare ampte? Kan vandag se jongmense morele standaarde by die meeste leiers leer? Geskiedskryfster Barbara Tuchman het gesê: “Mense doen vandag afstand van morele leierskap in die sin dat daar ’n algemene onwilligheid is om standaarde vas te stel.”
3. Waarom moet ons verwag dat Jehovah morele standaarde het?
3 Maar wat van Jehovah God? Hy het standaarde, net soos ’n mensevader standaarde en vereistes het betreffende gedrag by die huis en in handelinge met ander. Jehovah, die universele Regter, Wetgewer en Koning, voorsien in die Bybel wette, reëls of duidelike beginsels wat toon wat sy morele standaarde is en wat hy van mense verwag—riglyne oor hoe ons moet wandel.—Psalm 25:4, 5; 86:10, 11; Jesaja 33:22, NW.
4. Waarom behoort ons belang te stel in redes waarom ons God se standaarde moet aanneem?
4 Wie van ons sal ontken dat Jehovah se standaarde waardevol is? Tog kan hulle ons irriteer wanneer hulle bots met ’n persoonlike begeerte. Ons kan sy standaarde kleineer of daarteen beswaar maak omdat ons meen dat ons situasie ’n uitsondering is of ’n wysiging van die reëls vereis. Kom ons hersien dus enkele redes waarom ons God se morele standaarde moet aanneem en hoe ons daarby baat kan vind.
God se standaarde vergeleke met die mens s’n
5, 6. Wat kan ons uit Jehovah se werke gedurende die eerste ses skeppingsdae leer?
5 Na ses skeppingsdae het God gesê dat sy werk “baie goed” was (Genesis 1:31). Alles is in logiese volgorde geskape, en niks was gebrekkig nie. Die plante en diere het hulle plek gehad en volgens hulle soort voortgebring sonder enige nodigheid om tot nuwe soorte te evolueer (Genesis 1:25). Vra jouself af: Wie of wat moes Jehovah gedurende hierdie skeppingswerk vir voorskrifte raadpleeg? Hyself het klaarblyklik die kennis en wysheid besit om al hierdie dinge te doen. Nie net om dit te doen nie, maar om dit volmaak te doen, op ’n wyse wat fisiese standaarde daargestel het (Jesaja 40:12-14). As gevolg van God se standaarde kan ons die mag der menigte soorte plante, visse, voëls en landdiere klassifiseer en herken.
6 Jehovah het eenkeer enkele vrae gestel wat ons kan help om sy kennis, vermoëns en standaarde met die mens s’n te vergelyk. God het vir Job gevra: “Waar was jy toe Ek die aarde gegrond het? Gee te kenne as jy insig het.” Wetenskaplikes kan slegs die ouderdom van die heelal beraam. Dit is duidelik dat mense nie teenwoordig was om te weet wanneer of hoe God die aarde geskape het nie. “Het jy”, het God gevra, “solank as jy lewe, die môre ontbied, die dageraad sy plek aangewys?” Fisici bestudeer die aarde se rotasie, probeer om die versmeltingsproses waardeur ons son leweonderhoudende energie produseer na te doen en sukkel om die aard van iets doodgewoons soos lig met ingewikkelde formules te verklaar. Hoe vergelyk hulle prestasies met God s’n? Jehovah het voorts gesê: ‘Ken jy die wette van die hemel? Kan jy jou stem na die wolke verhef, sodat ’n oorvloed van water jou oordek? Kan jy die bliksems uitstuur?’ Job het eindelik erken: “Kyk, ek is te gering. Wat kan ek U antwoord?” “Ek weet dat U alles kan doen en geen plan vir U onuitvoerbaar is nie.” Voel jy persoonlik ook so?—Job 38:4, 12, 33-35; 39:37; 42:2.
7, 8. Hoe lewer jy as ’n mens bewys van God se werke?
7 Die kroon van God se aardse skepping was die mens. Die beste moderne kamera is ’n minderwaardige nabootsing van ’n hoër standaard, jou oog. Jou spysverteringstelsel en metabolisme oortref enigiets wat chemiese ingenieurs en bioloë nog ooit gemaak het. Hoewel ons verskeidenheid onder ons sien, getuig ons wonderlike liggame van lewensbelangrike standaarde. Gestel ’n chirurg moes jou appendiks uithaal. Sou jy jou bekommer dat hy dalk jou mangels of brein in jou onderlyf sal vind? Nee. standaardisering (in God se skepping) maak dit vir die chirurg moontlik om anatomie te bestudeer sodat hy die nodige operasies kan doen.
8 In jou skedel, nie in jou onderlyf nie, het jy ’n rekenaar wat die mees gevorderde elektroniese rekenaar ver oortref in veelsydigheid en vermoë. Jou brein stel jou in staat om jou te verwonder en te verbaas oor God se skepping, onder meer die duisendmiljoene sonne in die miljoene melkweë in die hemele. God het wette vasgestel vir die ordelike, presiese beweging van die hemelliggame sodat ons hulle kan gebruik as standaarde om tyd te meet, vir dag en nag, vir seisoene en jare.—Genesis 1:14; Psalm 8:4, 5.
9. Tot watter gevolgtrekking kan ons kom as ons God se werke en standaarde met die mens s’n vergelyk?
9 Vergelyk God se werke met wat die mens gedoen het. Ondanks die feit dat regerings allerhande regulerende standaarde vasgestel het, het mense die water en lug besoedel, talle soorte wild uitgewis, volke op die gebied van die politiek, godsdiens en ras verdeel, en die mensdom rede gegee tot kommer oor die vraag of oorlog, besoedeling of verhongering menselewe geheel en al van die aarde af sal uitwis. Dit is duidelik dat God nie oordryf het toe hy van die mens gesê het nie: “Soos die hemel hoër is as die aarde, so is my weë hoër as julle weë en my gedagtes as julle gedagtes” (Jesaja 55:9). Is dit dan nie gepas dat ons in Jehovah se voorskrifte of standaarde moet belangstel in plaas daarvan om staat te maak op menslike beskouings oor die standaarde waaraan voldoen moet word nie?—Spreuke 16:25; Jesaja 30:21.
10. Wat leer die stoflike skepping ons omtrent die raadsaamheid daarvan om ons tot God te wend vir morele standaarde?
10 Die stoflike skepping bevestig dat al God ‘se werk volkome is’. Deuteronomium 32:4 gaan egter voort om Jehovah se morele hoedanighede te meld. Behoort ons ons nie, met die oog op sy werke en standaarde in die fisiese ryk—van die sterre tot atoomdeeltjies, van mikroörganismes tot ons menseliggame—met vertroue tot hom te wend vir sy morele standaarde nie? Die feit is dat hy voortreflike morele standaarde voorsien het waarvolgens ons ons verhoudinge met hom en met ons medemens kan rig.—Miga 6:6-8.
11. Op watter gebiede kan God se standaarde jou tot voordeel strek?
11 Jehovah beperk nie sy raad tot ’n klein aspek van ons lewe, soos sekere leerstellige opvattings of seremoniële ritusse nie. Sy morele standaarde dek alle aspekte van die lewe, onder meer gesinsaangeleenthede, saketransaksies, ons beskouing van en gedrag teenoor lede van die ander geslag, ons gesindheid teenoor mede-Christene en deelname aan aanbidding (Jesaja 48:17; Jakobus 1:25). In Jesaja 55:11 het Jehovah gesê dat ‘die woord wat uit sy mond uitgaan voorspoedig sal wees’. Wanneer ons hard probeer om sy standaarde toe te pas, sal ons gewis ook meer sukses behaal, meer nut stig en meer geluk vind.
Hulp van God se veilige en gewisse riglyne
12, 13. Hoe het ’n onlangse gesondheidsverwikkeling betrekking op God se standaarde in verband met geslagsedelikheid?
12 Ons kan op talle regstreekse, fisiese maniere deur God se standaarde gehelp word. The New York Times Magazine (6 Februarie 1983) het byvoorbeeld ’n berig bevat oor ’n nuwe siekte wat ‘mediese speurders die eeu se hewigste epidemie noem’. Dit is Verworwe Immuniteitsgebreksindroom (letternaam: VIGS). Hierdie siekte veroorsaak dat ’n persoon se immuniteitstelsel ineenstort sodat hy vatbaar is vir seldsame vorme van kanker (Kaposi-sarkoom), longontsteking en ander ongewone kwale. Hoe gevaarlik is VIGS? Die tweejarige sterftesyfer is glo meer as 65 persent.
13 Wetenskaplikes meen dat VIGS versprei word deur liggaamsafskeidings (veral saad) en bloed. Tot dusver het hoofsaaklik homoseksuele dit opgedoen weens hulle promiskueuse onsedelikheid, hoewel dit na heteroseksuele maats versprei het. Een homoseksueel het erken: “Dit is soos in oorlogstyd. Ons weet nie wanneer die bom gaan val nie. Agttien van my vriende het die afgelope 18 maande aan VIGS gesterf. Nog 12 is nou ernstig siek.” Die artikel het gesê: “Terwyl hulle wegkwyn, begin baie VIGS-pasiënte nadink oor hulle lewens, en soms meen hulle dat hulle gestraf word vir hulle onverskillige, hedonistiese weë.” God se morele standaarde, soos dié wat in 1 Korinthiërs 6:9, 10 gemeld word, help ons ongetwyfeld. Hulle beskerm ons!
14. Op watter ander maniere onderstreep die VIGS-probleem God se standaarde? (Deuteronomium 12:23-25)
14 Dit is nie al nie. VIGS kom ook voor onder baie persone uit die Karibiese Eilande. Dr. Sheldon Landesman het verduidelik: ‘Ons weet dat ons pasiënte dikwels betrokke is by voedoe en spiritualisme.’ VIGS word skynbaar tydens hulle ritusse oorgedra. Die siekte word ook verbind met bloedoortappings en bloedprodukte. “Onder bloeiers het VIGS die tweede grootste doodsoorsaak geword—naas onbeheerbare bloeding—en heel onlangs het ’n aantal chirurgiese pasiënte wat bloedoortappings gekry het VIGS opgedoen, iets wat by sommige waarnemers vrees gewek het oor die nasie se bloedvoorraad.” Die ontkiemingstyd wissel skynbaar van ses maande tot twee jaar. Teen die tyd dat party besef dat hulle VIGS het, kon hulle dus “onwetend honderde ander individue besmet het—deur seksuele kontak, deur bloedskenkings of deur ’n tot nog toe onbekende roete”. God se standaarde in verband met geslagsedelikheid, die vermyding van spiritisme en ‘onthouding van bloed’ help ons om van hierdie en ander kwale vry te bly.—Deuteronomium 18:10-12; Spreuke 5:18-23; Handelinge 15:29; 21:25.
15. Hoe is Jehovah se standaard in verband met sterk drank nuttig?
15 As nog ’n bewys dat Jehovah se standaarde ons help, kan ons onthou dat hy dronkenskap veroordeel. Hy keur dit selfs af dat ’n persoon ‘hom oorgee aan te veel wyn’ (1 Timotheüs 3:3, 8, NW; Romeine 13:13). Baie wat God se standaard ignoreer, ly aan kwale wat deur onmatige drinkery veroorsaak of vererger word. Sommige Christene het Paulus se raad om slegs “’n bietjie wyn” te gebruik, geïgnoreer en in die gewoonte verval om straf te drink om hulle te ‘help ontspan’ (1 Timotheüs 5:23). Die chroniese ongesteldheid alkoholisme (met fisiese, emosionele en morele aspekte) kan geleidelik ontwikkel. Die gevolglike probleme is talryk: die persoon kan onder meer respek verloor, daar is gesinspanning (indien nie gesinsverbrokkeling nie), hy verkwis sy inkomste en kan sy werk verloor. Is God se standaarde in verband met die gebruik van sterk drank nie ’n beskerming op hierdie gebied nie?
16. Van watter ekonomiese hulp is God se standaarde vir Jehovah se Getuies?
16 God se standaarde was ook op ekonomiese gebied prakties. Hy spoor Christene aan om eerlik te wees en hard te werk. (Efesiërs 4:28; Kolossense 3:23; vergelyk Lukas 16:10-12.) Verslae van oor die hele aarde toon dat baie van Jehovah se Getuies hulle werk behou het wanneer ander afbetaal is, of dat hulle selfs bevorder is omdat hulle eerlik en vlytig is. Weet jy van sulke gevalle? As ’n persoon werk het, het hy natuurlik minder probleme in moeilike tye. Dit hou ook finansiële voordele in as ’n persoon onskriftuurlike gewoontes en verslaafdheid vermy. Meer informasie hieroor word gevind in die hoofstuk “Watter hulp met geldelike probleme?” in die boek Geluk—Hoe om dit te vind.a Jy kan ongetwyfeld aan ander voorbeelde van die ekonomiese uitvoerbaarheid van God se standaarde dink.
17. Watter leiding gee God oor uitsetting, en waarom is dit verstandig?
17 Jehovah se standaarde ten opsigte van die Christengemeente is ook verstandig en nuttig. God beveel byvoorbeeld dat ’n Christen wat sonde bedryf en onberouvol is uit die gemeente gesit moet word. Ander moet nie omgaan “met iemand wat, al staan hy as ’n broeder bekend, ’n hoereerder is of ’n gierigaard of ’n afgodedienaar of ’n kwaadspreker of ’n dronkaard of ’n rower nie; met so iemand moet [hulle] selfs nie saam eet nie.” Hoewel dit volgens sommige persone se standaarde liefdeloos lyk, weet God van beter. Dit beskerm die rein gemeente liefderyk, want ,’n bietjie suurdeeg maak die hele deeg suur’ (1 Korinthiërs 5:11, 6). ’n Kommentaar deur dr. A. L. McGinnis, skrywer van The Friendship Factor, lig die wysheid toe van wat God sê, naamlik dat ons nie saam met uitgesette persone moet eet nie:
“Een van die beste maniere om ’n vriendskap te verinnig, is om saam te eet. Daar is byna iets gewyds aan die breek van brood saam met ’n ander persoon. Het jy byvoorbeeld al ooit opgemerk hoe moeilik dit is om saam met ’n vyand te eet en vyande te bly?”
18. Hoe is God se standaard nuttig ten opsigte van afvalliges?
18 Getrouheid aan God se standaard help ook om te voorkom dat valse leerstellings en beskouings versprei. In die eerste eeu het Himeneüs en Filetus afvallig geword en probeer om die geloof van sommige om te keer. God se standaard was: ‘Vermy onheilige, onsinnige praatjies’ (2 Timotheüs 2:16-19). Christene wat by daardie standaard gebly het, sou nie daarin belanggestel het om na afvalliges te luister of enige kwaadwillige geskrifte te verkry wat dié “ter wille van vuil wins” versprei nie. Waarom sulke persone se goddeloosheid finansier deur hulle lektuur te koop? (Titus 1:11). Laat ons, as lojale Christene, God se standaarde naleef, ons verstande voed met wat waar en regverdig is en die kanaal waardeur ons aanvanklik Bybelwaarheid geleer het met waardering en lojaliteit aanhang.—Vergelyk 1 Timotheüs 4:16.
19. Op watter ander gebied kan Jehovah se standaarde ons help?
19 God se standaarde help Jehovah se Getuies op talle ander maniere. In die huwelik staan dit liefde, eerbied en eenheid voor op ’n tyd wanneer morele laksheid en oproepe om bevryding tot hoë egskeidingsyfers lei. Jehovah se standaarde help Christenkinders om ouerlike leiding aan te neem en nie soos baie van hulle skoolmaats gou in opstand te kom nie. In plaas daarvan om ’n afkeer van ouerlike gesag te hê en die huis vroeg te verlaat, vind jongmense wat God se standaarde waardeer graag baat by die Bybelse raad en hulp wat Christenouers kan gee.—Kolossense 3:18-21.
Neem Jehovah se standaarde gehoorsaam aan
20-22. Wat moet jy in gedagte hou in verband met God se standaarde?
20 Ons kan talle ander maniere bespreek waarop God se standaarde ons kan help. Jy het moontlik spesifieke maniere in gedagte waarop hulle jou persoonlik gehelp het. Uitstekend! Dit is goeie en bemoedigende dinge om by jou gesprekke met ander Christene in te sluit.
21 Ons moet egter almal in gedagte hou dat dit baie maklik is om van God se standaarde af weggelei te word. Maar onthou wat Jehovah vir die Israeliete by die berg Sinai gesê het: “As julle dan nou terdeë na my stem luister en my verbond hou, sal julle my eiendom uit al die volke wees.” Hulle het geesdriftig geantwoord: “Alles wat die HERE gespreek het, sal ons doen.” Maar hoe anders het hulle tog in die daaropvolgende jare opgetree!—Exodus 19:5, 8; Numeri 14:1-4, 10.
22 Laat ons dus Jehovah se standaarde aanneem en getrou naleef! Want dit is waarlik die weg van wysheid en geluk om getrou by die onvergelyklike standaarde te bly wat Jehovah voorsien het om ons te help om ons lewens te rig.—Psalm 19:8-12.
[Voetnoot]
a Uitgegee deur die Wagtoring- Bybel- en Traktaatgenootskap.
Onthou jy?
◻ Watter getuienis lewe die stoflike skepping oor Jehovah as ’n bron van standaarde?
◻ Waarom moet ons ons na Jehovah wend vir morele standaarde?
◻ Watter voorbeelde kan jy versterk om toe te lig hoe Jehovah se standaarde jou kan help?
◻ Hoe voel jy oor God se standaarde?
[Prent op bladsy 11]
Die skepping, van die infinitesimale tot die astronomiese, getuig van Jehovah se vermoë om standaarde te voorsien
[Venster op bladsy 13]
VIGS—Die epidemie van die tagtigerjare
“Feitlik driekwart van die mense wat die kwaal aanvanklik opgedoen het, is dood. Sommige navorsers meen dat niemand dit oorleef nie.” Die kwaal is Verworwe Immuniteitsgebreksindroom, of VIGS.—Science 83, Maart.
Een dokter het gesê: “Dit is soos ’n masjien. Wanneer dit begin, weet jy dat jy dit nie kan afskakel nie. Jy kan sien hoe die immuniteitstelsel agteruitgaan. Jy sal net een infeksie genees, en ’n ander een steek sy kop uit. Die pasiënt sal longontsteking kry, dan herpes, dan fungus in die brein, dan ’n virus wat die dikderm aanval.” Een van sy pasiënte was ’n semi-professionele bokser en tennisspeler wat ook gewigte opgetel het. Hierdie man “het ’n vaste nooi gehad en het slegs een homoseksuele ervaring gehad ses maande voordat hy siek geword het”. Wat het met hom gebeur? “Ses weke nadat die siekte gediagnoseer is, het die man op die ouderdom van 30 aan ’n geperforeerde derm gesterf.”
Wat word gedoen om al die feite omtrent VIGS te wete te kom? Die SSB (Sentrums vir Siektebeheer) is in Atlanta, Georgia, geleë. Op 13 Februarie 1983 het ’n gesaghebbende koerant in Atlanta berig: “Die SSB het nog nooit meer werkers—nou al sowat 100—vir so ’n lang tydperk aan ’n openbare gesondheidsprobleem toegewys nie. Die groep se werk is een van die mees onafgebroke, intense mediese speurpogings in die geskiedenis . . . Met die gedagte dat hulle na ’n virus soek—en nie eers dít is seker nie—probeer die SSB-wetenskaplikes om die kiem in diere of proefbuise te laat groei.” Maar aangesien VIGS ’n ontkiemingstyd van ses maande tot twee jaar het, kan toetse wat nou gedoen word, dalk niks voor 1985 oplewer nie. Op die oomblik meen die SSB se viroloë en mikrobioloë dat “hulle niks nader aan die ontdekking van die agens [wat VIGS veroorsaak], is as wat hulle was toe hulle meer as ’n jaar gelede met hulle soektog begin het nie.”
In Januarie het die SSB ’n konferensie gehou om VIGS te bespreek. Volgens die Journal of the American Medical Association het dr. D. Armstrong van die Memorial Sloan-Kettering Cancer Center die konferensie meegedeel: “Daar bestaan by my absoluut geen twyfel dat VIGS deur seks en bloedprodukte oorgedra word nie” Science 83 het die algemene mening uitgedruk: “Wetenskaplikes meen dat dit deur ‘intieme kontak’ oorgedra word—gemeenskaplike dwelmnaalde, byvoorbeeld, of geslagsomgang. En dit dui op iets wat deur die bloedstroom gedra word. En dit maak baie gesondheidsamptenare bekommerd oor die miljoene mense wat bloed gee en ontvang.”
Op die oomblik is daar geen toetse om vas te stel wie VIGS het nie, en daarom kan bloedbanke bepaal watter skenkers aan die kwaal ly nie. Daar is aan die hand gedoen dat skenkings nie aanvaar word van groepe met ’n hoë risiko nie, in die besonder van homoseksuele. Maar homoseksuele het gereageer deur te sê dat daar teen hulle gediskrimineer word en dat hulle regte geskend word. (Wie is bekommerd oor die regte, van die persone wat sulke bloed ontvang?) Daarbenewens het ’n verteenwoordiger van die National Gay Task Force die SSB-vergadering meegedeel: “Talle homoseksuele identifiseer hulself nie en sal nie op die vraestel reageer nie.” Soortgelyke proteste is in Suid-Afrika aangeteken toe daar na die dood van twee vlugkelners van die Suid-Afrikaanse Lugdiens voorgestel is dat skenkers gekeur word.
Die jongste getuienis is dat vroue wat geslagsomgang gehad het met mans wat VIGS het die kwaal kan opdoen. Kinders is nog ’n nuwe groep slagoffers. Sommige babas het klaarblyklik slagoffers geword nadat hulle bloedoortappings en -bestanddele ontvang het om na geboorte ’n RH-probleem te behandel. Ander babas het dit moontlik in die baarmoeder opgedoen of dit as gevolg van intieme kontak met, ’n ouer of ander VIGS-slagoffer gekry.
Aangesien die getal aangemelde gevalle elke ses maande verdubbel, sal ons beslis nog baie meer oor hierdie verskriklike epidemie van die tagtigerjare hoor.—Galasiërs 6:7, 8.