FONJI 10
Inyalo Ŋeyo Nedi Din Mar’adieri?
1. Din mar’adieri nitie acel kende?
“Gwokere win kwoŋ jotuci wac Were ma twodo.”—MATAYO 7:15.
Yesu ofonjo ji din acel kende mar’adieri. Din mar’adieri cale gi royo ma tero jo i kwo makirum. Yesu owaco ni: “Ji manok ama jonwaŋo” royo no. (Matayo 7:14) Din kende ma Were yeyo, a meno ma fonjo Wac pere manitie i Baibul. Joma jonitie i din mar’adieri jotiyere maber aka joyeyo gimoro acel.—Soma Yohana 4:23, 24; 14:6; Joefeso 4:4, 5.
Neni vidiyo Were Yeyo Din Je?
2. Yesu owaco aŋo kwoŋ Jokristo ma twodo?
‘Jowaco ni joŋeyo Were, to tim pajo nyutho ni jodak go.’ —TITO 1:16.
Yesu owaco ni jofonji ma twodo di jobino to jofonjo gikipiny ma twodo. Jocale gi Jokristo mar’adieri. Aka joma joluwo jo jolwoŋere ni Jokristo. To inyalo ŋeyo nedi ni jokobedo Jokristo mar’adieri? Inyalo ŋeyo jo rupiri din mar’adieri kende amabed’iye ji ma jotimo gikipiny mabeyo.—Soma Matayo 7:13-23.
3. Inyalo ŋeyo nedi din mar’adieri?
Onyo wey wanen gikipiny abic manyalo konyin ŋeyo din mar’adieri:
Joma jonitie i din mar’adieri joworo Wac pa Were, Baibul. Jotemo swa luwo fonji manitie i Baibul. Ri ameno, din mar’adieri opokere kwoŋ din maluwo paro pa ji. (Matayo 15:7-9) Joma jonitie i din mar’adieri joketho i tim gikipiny ma jofonjo.—Soma Yohana 17:17; 2 Timothe 3:16, 17.
Joma jonitie i din mar’adieri joworo nyingi Were, Jehova. Yesu onyutho ni woro nyingi Were munyo waco ri ji nyingi Were. Yesu okonyo ji ŋeyo Were kendo ofonjo jo kwayo ni nyingi Were wolwor. (Matayo 6:9) I adec m’ibed’iye, din mene ma fonjo ji nyingi Were?—Soma Yohana 17:26, NW; Joroma 10:13, 14.
Jokristo mar’adieri jofonjo kwoŋ Ker pa Were. Were odhiro Yesu i piny ka fonjo ji Wac maber ma mako kwoŋ Ker pa Were. Ker pa Were kende ama lakwanyo woko teko pa ji je. Yesu oluwo kwoŋ Ker pa Were cuka otho. (Luka 4:43; 8:1; 23:42, 43) Owaco ni jofonjirok pere di jofonjo kwoŋ Ker pa Were. Dhano k’obino bongin to waco rin gima mako kwoŋ Ker pa Were, iparo ni ŋato wok i din mene?—Soma Matayo 24:14.
Jokristo mar’adieri jokobedo ji pa piny. Inyalo ŋeyo jo rupiri jokidonji i wac mar’adhum ma piny kendo jokidonji i lweny. (Yohana 17:16; 18:36) Aka joweyo kula mareco manitie i piny kodi paro pa ji mareco.—Soma Yakobo 4:4.
Jokristo mar’adieri jomarere swa. Wac pa Were fonjo jo ni joripo woro ji ma nonin je. Kada nende joma jonitie i din ma twodo jomaro donjo i lweny ma piny m’opokere opokere, joma jonitie i din mar’adieri jokitimi ameno. (Mika 4:1-3) Kwanyo woko jooro meni kodi lim pajo konyo joman.—Soma Yohana 13:34, 35; 1 Yohana 4:20.
4. Onyo pama inyalo ŋeyo din mar’adieri?
Din mene ma fonji mere je wok i Baibul, ma woro nyingi Were, kendo ma fonjo ni Ker pa Were kende ama lakwanyo woko teko pa ji je? Din mene ma n’iye ji ma jomarere aka ma jokidonji i lweny? Iparo ni a jomene?—Soma 1 Yohana 3:10-12.