Cik pa Were Konyo Wan Nedi?

1. Raŋo Were otimo maber miyo wan cik?

Were riek loyo wan. Go omaro wan swa aka mito ni wabedi gi kwo maber. K’obedo atoŋa pa Were nike wawegi wadhumere. (Yeremia 10:23) Paka nyithindho joripo limo rieko wok bongi jonywol pajo, apaka wabende waripo limo rieko wok bongi Were. (Isaya 48:17, 18) Baibul obedo mic maber mawok bongi Were, rupiri n’iye rieko manyalo konyo wan i kwo.​—Soma 2 Timothe 3:16.

Ka waluwo cik pa Jehova, wanyalo bedo gi kwo maber pama, aka wanyalo kir limo kwo makirum i hongo mabino. Rupiri Were am’ocweyo wan, go oŋeyo kis gimaber ri wan. Am’omiyo waripo winjo cik pere.​—Soma Zabuli 19:7, 11; Menyirok 4:11.

2. Rieko ma Were miyo wan konyo wan nedi?

Gikipiny man ma wasoma i Baibul k’obedo cik, kwanyo woko nyutho wan paro pa Were. Kucel, cik nyutho wan gima waripo timo. (Cik 22:8) Ruman waripo oro rieko nyaka to waneno nger ma gikipiny man ma wasoma i Baibul konyo wan. (Agecin 2:10-12) Paka gir’anena, Baibul fonjo ni kwo obedo mic mawok bongi Were. Ka watieko ŋeyo ameno, watimo gimanyalere je geŋo gikipiny manyalo ketho kwo mawan i teko ka wanitie katic, peco, kosa ka wawotho i royo.​—Soma Tim 17:28.

3. Cik ario maloyo man je a mene?

Yesu oluwo kwoŋ cik ario maloyo man je. Cik mar’apena nyutho gim’omiyo Were ocweyo wan. Were ocweyo wan wanyali ŋeyo go, maro go, kodi timo tic pere gi cuny wan acel. Kis gimoro je ma wamito timo, kutho ber paro kwoŋ cik no. (Agecin 3:6) Joma jooro cik no i kwo pajo jolokere merin pa Were, jolimo kisangala, aka jolalimo kwo makirum.​—Soma Matayo 22:36-38.

Cik mar’ario fonjo wan tiyirok maber gi joman. (1 Jokorintho 13:4-7) Cik no konyo wan tero ji paka Were tero jo.​—Soma Matayo 7:12; 22:39, 40.

4. Cik pa Were konyo wan nedi?

Ka jopeco joluwo cik pa Were manitie i Baibul, peco no bed’iye siem kodi kisangala. (Jokolosia 3:12-14) Kendo Baibul riwo peco rupiri fonjo jacwo gi cege ni kis dhano ripo cwire kwoŋ nyawote.​—Soma Cakirok 2:24.

Ka waketho i tim gima wafonjere i Baibul, nyalo kir konyo wan i nger man m’opokere opokere. Paka gir’anena, kis dhano mito jatic magenere kendo matiyo gi meni. (Agecin 10:4, 26; Joebulaniya 13:18) Odoko Baibul fonjo ni wakiripi rembo ka wanyalo limo gikipiny ma mitere i kwo, kendo fonjo ni waripo maro Were loyo ŋaŋo.​—Soma Matayo 6:24, 25, 33; 1 Timothe 6:8-10.

Ka waluwo cik pa Were, nyalo kir kuro kwo mawan. (Agecin 14:30; 22:24, 25) Paka gir’anena, ka waluwo cik ma cero wan mero, botho wan kwoŋ two kodi teko man ma jomero jolimo. (Agecin 23:20) Were yeyo wan madho mwenge, to nyaka manok. (Zabuli 104:15; 1 Jokorintho 6:10) Kendo cik pa Were konyo wan bedo gi paro m’otire. (Zabuli 119:97-100) To Jokristo mar’adieri jokiwinji cik pa Were rupiri konyo jo. Jowinjo cik pa Were rupiri jomito miyo go dwoŋ.​—Soma Matayo 5:14-16.