Inyalo Nwaŋo Nedi Din Maradyeri?

Ka imito bedo mere pa Were, iripo lamo go i nger motire. Yesu owacho ni joma lamo Were i royo motire jobino lamo go “iy’adieri.” (Yohana 4:23, 24) Nitye royo achiel kende motire ma lam’iye Were. (Joefeso 4:4-6) Din maradyeri tero jo i kwo makirum, aka din matwodo tero jo i reyirok.​—Matayo 7:13, 14.

Inyalo ŋeyo din maradyeri ka ineno tim pa joma nitye i din no. Kwoŋbedo ni Jehova ber, joma lamo go iyadyeri bende joripo bedo ji mabeyo. Paka tyendi muchungwa maber nyak muchungwa mabeyo, apaka din maradyeri bende bed’iye ji mabeyo.​—Matayo 7:15-20.

Merin pa Jehova joworo Baibul. Joŋeyo nike Baibul obedo wach pa Were. Jooro gima Baibul wacho i kwo pajo, i chowo teko pajo, kodi konyo jo fuonjirok gima mako kwoŋ Were. (2 Timothe 3:16) Jotemo ketho gikipiny ma jofuonjo i tim.

Merin pa Jehova jomarere. Rupiri Yesu onyutho ji mar, ofuonjo jo gima mako kwoŋ Were, kodi botho jo two. Joma nitye i din maradyeri bende jomaro ji. Paka Yesu, jokichay jochandi kosa joma jokobedo jonono pajo. Yesu owacho ni ji di joŋeyo jofuonjirok pere chungo kwoŋ mar ma joni gine i dyer jo.​—Yohana 13:35.

Merin pa Were joworo nyingi Were, Jehova. Adyeri dhano nyalo bedo mere perin ka okwero oro nyingin? Be! Ka wani gi mere mawan, waoro nyinge aka wawacho ri joman gikipiny mabeyo ma mako kwoŋ mere mawan no. Ri ameno, joma mito bedo merin pa Were joripo oro nyinge kendo to jowacho ri joman gima mako kwoŋ go. Jehova mito ni watimi ameno.​—Matayo 6:9; Joroma 10:13, 14.

Paka Yesu chango otimo, merin pa Were jofuonjo ji kwoŋ Ker pa Were. Ker pa Were obedo adhum ma polo ma bino loko piny me kabedo maŋon swa. Merin pa Were jowacho ri ji wach maber me ma mako kwoŋ Ker pa Were.​—Matayo 24:14.

Wajulizi pa Jehova jotemo paka jonyalo bedo merin pa Were. Joworo Baibul aka jomarere. Jooro kendo joworo nyingi Were aka jofuonjo ji gima mako kwoŋ Ker pa Were. Wajulizi pa Jehova ama jonitye i din maradyeri.