Peco Mewin Nyalo Nedi Bed’iye Kisangala?

1. Raŋo nywomirok i cik kelo kisangala i peco?

Wac maber wok bongi Jehova Were “majakisangala,” ma mito ni pecin wobed’iye kisangala. (1 Timothe 1:11, NW) Go amo’cako ri ji can ma nywomirok. Nywomirok m’iyeyo i cik kelo kisangala i peco rupiri konyo jonywol kuro kodi pidho nyithindho pajo maber. Jokristo joripo luwo cik pa piny ma jobed’iye ma mako kwoŋ ndiko nywomirok pajo i cik.​—Soma Luka 2:1, 4, 5.

Were tero nedi nywomirok? Go mito ni nywomirok wobedi i dier jacwo gi dhako, aka jokiri joweyere. Jehova kimiti jocot. (Joebulaniya 13:4) Go kimiti jacwo woriemi cege. (Malaki 2:16) Kwanyo woko, Were yeyo dhano eye i nywomirok to nywomere kosa to nywomo ŋatman ka nyawote otimo cot.​—Soma Matayo 19:3-6, 9.

2. Jacwo kodi cege joripo tiyere nedi?

Jehova ocweyo cwo gi mon jowokonyere i nywomirok pajo. (Cakirok 2:18) Jacwo am’obedo jatel ma peco, aka go ripo limo ri jopeco pere gikipiny ma mitere i peco gi fonjo jo gima mako kwoŋ Were. Go ripo maro cege. Jacwo kodi cege joripo mare kodi miyere wor. Rupiri jacwo gi cege jobedo ji ma jonyalo timo makosa, ka jomito limo kisangala i peco pajo, kis dhano ripo fonjere cwako ri nyawote.​—Soma Joefeso 4:31, 32; 5:22-25, 33; 1 Petero 3:7.

3. Wiripere pokirok ka nywomirok mewin ongoy’iye kisangala?

Ka wilimo teko i nywomirok mewin, kis dhano ripo timo gima nyalere je nyutho nyawote mar. (1 Jokorintho 13:4, 5) Wac pa Were kinyuthi ni pokirok am’obedo nger ma cowo teko ma winigine i nywomirok mewin.​—Soma 1 Jokorintho 7:10-13.

4. Nyithindho, aŋo ma Were mito ri win?

Jehova mito wilimi kisangala i kwo. Jehova miyo soye ryeko maber manyalo konyo jo. Go mito ni wiwinji jonywol mewin winyali limo kisangala. (Jokolosia 3:20) Kendo Jehova mito ni wilimi kisangala mawok i timo gikipiny ma go kodi Wode jomito.​—Soma Jafonji 11:9–12:1; Matayo 19:13-15; 21:15, 16.

5. Jonywol, winyalo konyo nedi nyithindho mewin limo kisangala?

Wiripo tiyo gi meni winyali limo ri nyithindho mewin cemo, kanindo, kodi ruk. (1 Timothe 5:8) To ka wimito nyithindho mewin jowolimi kisangala i kwo, wiripo kir fonjo jo gikipiny ma mako kwoŋ Were. (Joefeso 6:4) Jolamaro Were ka wiketho ri jo ranena maber. Ka wifonjo nyithindho mewin munyo wioro Wac pa Were, joladongo gi kula maber.​—Soma Cik 6:4-7; Agecin 22:6.

Nyithindho jowinjo maber ka wifoyo gikipiny mabeyo ma jotimo. Aka ber tiro jo jowonyali dongo gi kula maber. Ka witimo ameno, nyithindho mewin jokobedi gi kula mareco manyalo cowo kwoŋ jo siem. (Agecin 22:15) To kiber oro nge munyo wifonjo nyithindho mewin.​—Soma Jokolosia 3:21.

Wajulizi pa Jehova jondiko kitawin makweth manyalo konyo jonywol kodi nyithindho. Rieko je manitie i kitawin no wok i Baibul.​—Soma Zabuli 19:7, 11.