Raŋo Were Weyo Gikipiny Mareco Kodi Candirok Bedo?

1. Gikipiny mareco ocako nedi?

Gikipiny mareco ocako i piny munyo Sitan oluwo twodo mar’apena. I cakirok Sitan obedo malaika maber, to rumacen olokere malaika marac rupiri go “k’obedo yuthenge mar’adieri.” (Yohana 8:44) Go omito ni ji jowolami go ayin aka sano Were kende ama waripo lamo. Gim’owok’iye, Sitan owondo Eva to kelo rigo cayo Were. Adam bende oriwere gi Eva to joturo cik pa Were. Gima Adam otimo owok’iye candirok kodi tho.​—Soma Cakirok 3:1-6, 19.

Munyo Sitan okelo ri Eva turo cik pa Were, meno amo’bedo cakirok ma piemo gi dhum pa Were. Ji mathoth jomakere gi Sitan aka jokwero Were bedo jadhum pajo. Am’omiyo Baibul waco ni pama Sitan am’obedo “jadhum ma piny me.”​—Soma Yohana 14:30; 1 Yohana 5:19.

2. Cwec pa Were oyido k’otire?

Kis gima Were ocweyo k’obedo gi teko moro je. Ji kodi jomalaika ma Were ocweyo oyido jonyalo winjo go. (Cik 32:4, 5) Were omiyo wan thwolo ma timo gimaber kosa gimarac. Go kirom wan timo gimaber. Thwolo no miyo wan silwany ma nyutho ni wamaro Were.​—Soma Yakobo 1:13-15; 1 Yohana 5:3.

3. Raŋo Were oweyo candirok bedo tundo pama?

Hongo maromo otieko kadho munyo Jehova fodi oweyo ji piemo gi dhum pere. Raŋo go otimo ameno? Wonyali nyutho ni go kende amanyalo dhumo maber. (Jafonji 7:29; 8:9) Oro 6,000 m’otieko kadho munyo ji ama jodhumo, nyutho kamaler ni jodhum ma piny me jokinyali kwanyo woko lweny, turo cik, kodi two.​—Soma Yeremia 10:23; Joroma 9:17.

Pokirok kwoŋ dhum pa ji, dhum pa Were kelo bero ri joma joyeyo dhum no. (Isaya 48:17, 18) Jehova cegin kwanyo woko dhum pa ji je. Jono kende ma joyeyo dhum pa Were ama joladoŋ i piny.—Isaya 11:9.​—Soma Daniel 2:44.

Neni vidiyo Raŋo Were Weyo Candirok Bedo?

4. Silwany mene ma wanigine rupiri Were fodi odiyo cunye?

Sitan waco ni ji jolamo Were rupiri nitie gikipiny ma jolimo wok bonge. Imito nyutho ni meno obedo twodo? Inyalo, rupiri Were fodi odiyo cunye wanyali nyutho ka wamito dhum pere kosa apa ji. Gima watimo amanyutho ni wamito dhum pa Were kosa be.​—Soma Yobu 1:8-12; Agecin 27:11.

5. Wanyalo nyutho nedi ni wamito dhum pa Were?

Wanyutho ni wayero Were dhumo wan ka wayero din mar’adieri, ma luwo Wac pa Were, Baibul. (Yohana 4:23) Wakwero Sitan dhumo wan munyo wakidonji i wac mar’adhum ma piny me kodi i lweny, paka Yesu otimo.​—Soma Yohana 17:14.

Sitan oro meni pere miyo ji timo kidakana kanyacel gi kula moro je marac. Ka wakwero kula macale ameno, merin mawan gi jowat mawan jonyalo nyero wan kosa cero wan fonjirok gima mako kwoŋ Were. (1 Petero 4:3, 4) Ri ameno, waripo yero gir’atima. Wanotiyere gi ji ma jomaro Were? Wanowinji cik ma Were miyo wan ru bero mawan? Ka watimo ameno, wanyutho ni Sitan otwodo munyo owaco ni ongoye dhano manyalo winjo Were ka nitie i dinyo.​—Soma 1 Jokorintho 6:9, 10; 15:33.

Were lakwanyo woko candirok je rupiri go omaro ji. Joma joketho yeyo pajo i wac me jobino limo kwo makirum i piny.​—Soma Yohana 3:16.