Ker pa Were a Ginaŋo?

1. Ker pa Were a ginaŋo?

Ker pa Were obedo dhum ma polo. Bino kwanyo woko dhum pa ji je, aka lemiyo gima Were mito w’otimere i polo kodi i piny. Wac ma mako kwoŋ Ker pa Were obedo wac maber swa. Ker pa Were cegin bino wocaki dhumo ji i nger maber. Ker pa Were lariwo ji je ma jolabedo i piny ka.​—Soma Daniel 2:44; Matayo 6:9, 10; 24:14.

Ker moro je ripo bedo gi kere. Yesu Kristo ama Jehova oyero bedo Kere ma Ker pere.​—Soma Menyirok 11:15.

Neni vidiyo Ker pa Were a Ginaŋo?

2. Raŋo Yesu ama ripere bedo Kere?

Wod Were ama ripere bedo Kere rupiri go nigi wor aka timo gim’otire hongo je. (Matayo 11:28-30) Aka Yesu ni gi meni kendo nyalo konyo ji rupiri go bino dhumo g’ipolo. Munyo ocerino, go ogiki i polo to bedo yu cingi Were maracuc to kuro Were miyo go dhum. (Joebulaniya 10:12, 13) Rumacen, Were omiyo go dhum to cako dhumo.​—Soma Daniel 7:13, 14.

3. Jomene ma joladhumo gi Yesu?

Nitie kitipa pa ji ma Baibul lwoŋo ni “jomaleŋ” ma joladhumo gi Yesu i polo. (Daniel 7:27) Jehova ocako cango con yero jono. Go otelo kodi jomoor pa Yesu. Kir konon, Jehova fodi yero cwo gi mon ma joladhumo gi Yesu. Jono jocerino gi del manyacuny, paka Yesu ocerino.​—Soma Yohana 14:1-3; 1 Jokorintho 15:42-44.

Joma jolakadho i polo jolabedo ji adi? Yesu olwoŋo jo ni “nyaka rombo” (Luka 12:32) Jolabedo ji 144,000. Jono kende ama jolakadho i polo to jodhumo piny kanyacel gi Yesu.​—Soma Menyirok 14:1.

4. Ginaŋo m’otimere munyo nyaka Yesu ocako dhumo?

Ker pa Were ocako dhumo i oro ma 1914.a Gima Yesu otelo timo munyo nyaka cako dhumo, a bolo Sitan kodi jwogi pere i piny. Gino omiyo Sitan nge tocako kelo ri ji teko i piny gipi. (Menyirok 12:7-10, 12) Wok i hongo no, teko omedere swa i piny. Lweny, kec, two, kodi yengirok pa piny, am’obedo megi kwoŋ gikipiny manyutho ni Ker pa Were cegin cako dhumo piny.​—Soma Luka 21:7, 10, 11, 31.

5. Ker pa Were timo aŋo pama?

Luwo i tic ma fonjo ji Baibul ma pama timere i piny gipi, Ker pa Were riwo ji mathoth. Pama ji mathoth joyeyo dhum pa Yesu. Ker pa Were lakuro jo k’obino reyo woko piny pa Sitan marac me. Ri ameno, ji je ma jomito limo silwany ma Ker pa Were lakelo i piny, joripo yeyo Yesu.​—Soma Menyirok 7:9, 14, 16, 17.

I hongo ma oro 1,000, Ker pa Were latimo gikipiny je ma Were ocano timo ri ji wok i cakirok. Piny gipi bino lokere kabedo maŋon. Rumacen, Yesu ladwoko dhum bongi Bamere. (1 Jokorintho 15:24-26) Nitie dhano moro je m’inyalo wacoye ri go wac maber me ma mako kwoŋ Ker pa Were?​—Soma Zabuli 37:10, 11, 29.