FONJI 6

Jom’otho Jonyalo Kwo Kendo?

1. Wac maber ma mako kwoŋ jom’otho a mene?

Lazaro ocerino aka nyimin go Marita gi Maria jojolo go gi kisangala

Munyo Yesu otundo Bethania cegin gi Yerusalem, onwaŋo mere pere m’ilwoŋo ni Lazaro otho aka oyido nyaka ocowo ndelo aŋwen i kalyel. Yesu okidho dho kalyel gi Marita kodi Maria, nyimin Lazaro. I hongo macek, ji jocokere. Iparo ni Marita gi Maria jowinjo nedi munyo Yesu ocerino Lazaro?—Soma Yohana 11:21-24, 38-44.

Marita oyido oŋeyo wac maber ma mako kwoŋ jom’otho. Go oyido oŋeyo ni Jehova bino cerino jom’otho kendo jowobedi i piny ka.—Soma Yobu 14:14, 15.

2. Ginaŋo matundo kwoŋ dhano k’otho?

Were cweyo Adam, rumacen to Adam tho — Were owaco ri Adam ni: “Ocweyin wok i lowo, aka doko ibino lokere lowo.”—CAKIROK 3:19

Were ooro lowo munyo cweyo dhano. (Cakirok 2:7; 3:19) Wakibedo cuny m’oruko del, aka ka watho ongoye gima both. Ka watho nyaŋith wan bende tho, odoko wakinyali paro. Am’omiyo Lazaro k’owaco gimoro kada aciel m’otimere i hongo ma go ocowo munyo otho, rupiri ongoye gima jom’otho joŋeyo.—Soma Zabuli 146:4; Jafonji 9:5, 6, 10.

Were waŋo ji i mac makitho? Be. Rupiri Baibul fonjo ni ongoye gima jom’otho joŋeyo, fonji ma mac makitho obedo fonji matwodo mamiyo ji kipusa Were ru gima go kitimi. Jehova obedo Were majamar, go kinyal cando ji ameno.—Soma Yeremia 7:31.

Neni vidiyo Jom’otho Jonyalo Kwo Kendo?

3. Jom’otho jonyalo luwo kodi wan?

Jom’otho jokinyali luwo kosa winjo. (Zabuli 115:17) To nitie jomalaika mareco ma joluwo gi ji to jorendere ni a jom’otho. (2 Petero 2:4) Jehova kimiti ni watem luwo kodi jom’otho.—Soma Cik 18:10, 11.

4. Jomene ma jolacerino?

Jacwo m’ocerino i piny manyen fonjere gima mako kwoŋ Were. Rumacen jacwo no bende fonjo joman ma jocerino.

Ji mathoth ma jotho jolacerino odoko jowobedi i piny ka. Joman ma cango jotimo gikipiny mareco rupiri oyido fodi jokoŋeyo Were, bende jolacerino.—Soma Tim 24:15.

Joma jolacerino jolafonjere adieri ma mako kwoŋ Were, jowonyali ketho yeyo pajo i Yesu, kodi timo gikipiny ma go mito. (Menyirok 20:11-13) Jono ma jolacerino to jotimo gima Were mito jolabedo i piny ka cil gi cil.—Soma Yohana 5:28, 29.

5. Cerino fonjo wan aŋo kwoŋ Jehova?

Wani gi geno ni jom’otho jolacerino rupiri Were odhiro Wode to tho ri wan. Ri ameno, cerino fonjo wan ni Jehova omaro wan swa kendo go nigi wor. Ka jom’otho jocerino, ŋa m’imito neno?—Soma Yohana 3:16; Joroma 6:23.

K’imito ŋeyo maloyo kenyo, soma siro 6, 7, kodi 10 ma kitawo m’ilwoŋo ni What Can the Bible Teach Us?