Raŋo Were Ocweyo Piny?

1. Raŋo Were ocweyo piny?

Jehova ocweyo piny me t’omiyo ji. Me a peco mawan. Ri ameno, ji ario ma Were otelo cweyo, Adam gi Eva, k’ocwey jo bedo i polo. Were oyido otieko cweyo jomalaika bedo i polo. (Yobu 38:4, 7) Munyo Were otieko cweyo Adam, dhano m’otelo, oketho go i ndelo ma Eden. (Cakirok 2:15-17) Jehova omito ni Adam kodi nyithindho pere jowobedi i piny ka cil gi cil.​—Soma Zabuli 37:29; 115:16.

I cakirok, ndelo ma Eden kende ama oyido kabedo maŋon. Adam kodi Eva oyido joripo nywolo nyithindho ji jowopoŋi piny gipi. Rumacen, piny gipi d’olokere kabedo maŋon. (Cakirok 1:28) Were kilareyo woko piny. Piny lamedere bed’iye ji.​—Soma Zabuli 104:5.

Neni vidiyo Raŋo Were Ocweyo Piny?

2. Raŋo pama piny k’obedo paka cango Were omito ni wobedi?

Adam gi Eva jocayo Were to jotimo gimarac to Were riemo jo i Eden. Jokeŋ piny maŋon ma Were oyido omiyo jo, aka ongoye dhano moro je manyalo yiko piny me. Baibul waco ni: “Were otieko miyo piny i cingi jokidakana.”—Yobu 9:24.​—Soma Cakirok 3:23, 24.

Onyo wawaci ni atoŋa ma Jehova oyido ni gine ri ji odhiero go? Be. Rupiri go obedo Were Majameni Je, ongoye gima nyalo dhiero go. (Isaya 45:18) Were bino loko piny me kabedo maber ri ji, paka atoŋa pere obedo wok i cakirok.​—Soma Zabuli 37:11, 34.

3. Were oloki nedi piny me kabedo maber?

Ka Yesu ocako dhumo piny, odoko piny lalokere kabedo maber. I lweny m’ilwoŋo ni Amagedon, Yesu bino telo jomalaika pa Were joworeyi woko ji je ma jokwero timo gima Were mito. Rumacen, Yesu latweyo Sitan oro 1,000. Ji pa Were jolaboth rupiri Yesu lakuro jo. Jolalimo kwo makirum i piny manyen.​—Soma Menyirok 20:1-3; 21:3, 4.

4. Candirok orumi keraŋo?

Were okwany woko keraŋo gikipiny mareco i piny? Yesu omiyo wan ranyuth makonyo wan ŋeyo ni gik piny cegin tundo. Gikipiny mareco matimere i piny pama kelo ri ji candirok madit swa. Kuceli, gikipiny no nyutho ni gik piny cegin tundo.​—Soma Matayo 24:3, 7-14, 21, 22.

I hongo ma oro 1,000 ma Yesu ladhum’iye piny, go lakwanyo woko candirok je i piny. (Isaya 9:6, 7; 11:9) Medo kwoŋ meno, Yesu bino tiyo paka jacwayi ri Were i wi migam aka lacwako reco pa ji je ma jotimo gima Were mito. Ameno Were bino oro Yesu kwanyo woko two, ti, kodi tho.​—Soma Isaya 25:8; 33:24.

5. Jomene ma jolabedo i piny manyen?

Joma timo gima Were mito ama jolabedo i piny manyen. (1 Yohana 2:17) Yesu odhiro jofonjirok pere dwaro jomamwol jowofonji jo gikipiny ma Were mito. Pama Jehova dwaro ji ma jolabedo i piny manyen. (Zefania 2:3) I Kingdom Hall, kama Wajulizi pa Jehova jorom’iye lamo Were, ji jofonjere nger ma jonyalo bedo cwo gi mon maber. Nyithindho gi jonywol pajo jolamo Were kanyacel kendo jofonjere nger ma Baibul nyalo konyo jo i kwo.​—Soma Mika 4:1-4.