O Hɛ Nɛ Ko Je Níhi Nɛ A He Hia Wawɛɛ ɔ Nɔ

1-2. Mɛni blɔ nɔ nɛ nɔ́ ko nɛ he hia a ma nyɛ maa gbla nɔ ko juɛmi kɛ je nɔ́ ko nɛ he hia wawɛɛ ɔ nɔ?

ANƐ o ngɛ nɔ́ ko nɛ e he hia wawɛɛ pee nɛ nɔ́ kpa ko gbla o juɛmi kɛ je nɔ hyɛ lo? Kaa nɔ hyɛmi nɔ́ ɔ, ngɔɔ lɛ kaa o hɛɛ lɔle, nɛ nɔ ko ngɛ mo tsɛe ngɛ fon nɔ. Eko ɔ, o ma susu kaa nɔ nɛ ngɛ mo tsɛe ɔ hia o yemi kɛ buami, nɛ jamɛ a be ɔ mi nɔuu ɔ, o le kaa e sa nɛ o ngɔ o juɛmi kɛ ma lɔle ɔ nɛ o ngɛ hɛɛ ɔ nɔ. Si fɔfɔɛ komɛ nɛ waa kɛ kpeɔ ɔ ngɛ kaa enɛ ɔ nɔuu ɔ. Be komɛ ɔ, e ma bi nɛ waa mwɔ yi mi kpɔhi ngɛ nɔ́ nɛ he hia pe kulaa nɛ e sa kaa waa hla a he.

² Níhi fuu ngɛ nɛ a he hia nɛ e sa kaa waa pee. Se wa le kaa Mawu jami mi ní peepeehi nɛ waa kɛ wa he maa wo mi ɔ he hia wawɛɛ.a (Mat. 6:33) Kaa bɔ nɛ ke dlɛɛva ko hɛɛ lɔle nɛ e bɔɔ mɔde kaa e be hae nɛ nɔ́ ko nɛ gbla e juɛmi ɔ, jã nɔuu kɛ̃ nɛ Yehowa we bi hu ngɔɔ a juɛmi kɛ maa Yehowa suɔmi nya ní peemi nɔ titli.—Abɛ 4:25; Mat. 6:22.

3. Kɛ ní kasemi nɛ ɔ maa ye bua wɔ ha kɛɛ?

³ Wa ti nɔ ko be nɛ e maa suɔ kaa nɔ́ ko nɛ je e juɛmi kɛ je Mawu jami nɔ. Se kɛ̃ ɔ, níhi babauu jeɔ wa juɛmi kɛ jeɔ Mawu jami mi níhi a nɔ. (Luka 21:​34-36) Bɔ nɛ pee nɛ wa juɛmi nɛ hi Mawu jami nɔ ɔ, wa ma susu ní etɛ komɛ a he. (1) Mɛni ji ní komɛ nɛ jeɔ wa juɛmi kɛ jeɔ Mawu jami nɔ, (2) mɛni Yesu pee konɛ níhi nɛ ko je e juɛmi kɛ je Mawu jami nɔ, kɛ (3) nɔ́ nɛ wa maa pee konɛ níhi ko je wa juɛmi kɛ je Mawu jami nɔ.

MƐNI JI NÍ KOMƐ NƐ JEƆ WA JUƐMI KƐ JEƆ MAWU JAMI NƆ?

4-6. Mɛni ji ní komɛ nɛ ma nyɛ ma je wa juɛmi kɛ je Mawu jami nɔ?

⁴ Wɔ tsuo wa ngɛ nyagba ko kɛ̃ nɛ ma nyɛ maa gbla wa juɛmi. Kaa nɔ hyɛmi nɔ́ ɔ, eko ɔ, wa be nɔmlɔ tso mi he wami kpakpa, aloo ní komɛ ngɛ nɛ a he hia ngɛ wa weku ɔ mi nɛ e sa nɛ wa tsu a he ní. E ngɛ heii kaa, ní nɛ ɔmɛ a he hia, nɛ e sa nɛ wa tsu a he ní. Se anɛ ní nɛ ɔmɛ ma nyɛ maa gbla wa juɛmi kɛ je níhi nɛ a he hia kaa waa pee ngɛ Mawu jami mi ɔ nɔ lo? Ee, e ma nyɛ maa ba jã ke wa puɛɔ be fuu, kɛ wa he wami kɛ susuɔ ní nɛ ɔmɛ a he nɛ wa ná we be kɛ ha ní kpahi.

⁵ Jehanɛ hu ɔ, akɛnɛ wa ngɛ nyagbe ligbi ɔmɛ a mi he je ɔ, wa ti ni komɛ ngɛ hehi nɛ basabasa peemi ngɛ nɔ yae ngɛ, waa kɛ sika he nyagba ngɛ kpee, aloo hiɔ nɛ sãa nɔ ba he nɛ wa ngɛ ɔ. (2 Tim. 3:1) Ke waa kɛ si fɔfɔɛ nɛ ɔmɛ eko ngɛ kpee ɔ, eko ɔ, wa maa hao, nɛ wa maa hi nyagba amɛ a he susue kpamisaa.

⁶ Eko ɔ, wa le ni komɛ nɛ nyagba nɛ ɔmɛ eko ha nɛ a si himi tsake kulaa. Ke nɔ ko hao ngɛ si fɔfɔɛ ko kaa jã nɛ e ya je mi ɔ he ɔ, sisi numi ngɛ he. Yehowa bɔɛ adesahi nɛ a ya nɔ nɛ a hao be kɛkɛɛ. E be nyakpɛ kaa ni komɛ nuɔ he kaa níhi yɛ nɔ ngɛ a si himi mi kaa bɔ nɛ e sa kaa e ya nɔ ɔ. Enɛ ɔ he ɔ, ni komɛ ngɔɔ be fuu kɛ jeɔ a hɛja konɛ a hɛ nɛ je a nyagba amɛ a nɔ. Mɛni wa ma nyɛ maa pee ke wa ya je si fɔfɔɛ ko kaa kikɛ nɛ ɔ mi? Yesu nɔ hyɛmi nɔ́ ɔ nɛ wa ma susu he ɔ maa ye bua wɔ konɛ waa yu wa he kɛ je níhi nɛ ma nyɛ maa gbla wa juɛmi kɛ je níhi nɛ a he hia wawɛɛ ɔ nɔ.

MƐNI YESU PEE KONƐ NÍHI NƐ KO JE E JUƐMI KƐ JE MAWU JAMI NƆ?

7. Mɛni ji ní komɛ nɛ ko nyɛ je Yesu juɛmi kɛ je Mawu jami nɔ?

⁷ Níhi fuu ko nyɛ je Yesu juɛmi kɛ je Mawu jami nɔ. Ní nɛ ɔmɛ ekomɛ ji, si himi ɔ mi nyagbahi kɛ ma kudɔmi sanehi. Ngɛ e be ɔ mi ɔ, nihi fuu ye o hia, nɛ a nu hiɔ. (Mat. 14:14; Mar. 14:7) Romabi ɔmɛ kɛ Yudabi kpahi hu ha nɛ si himi ɔ mi wa ha ni ɔmɛ. Benɛ ni ɔmɛ na kaa Yesu ngɛ he wami nɛ e ngɛ nyakpɛ níhi pee ɔ, a suɔ kaa a maa wo lɛ matsɛ. (Yoh. 6:​14, 15) Jehanɛ se hu ɔ, Satan de Yesu kaa e ma ha nɛ e ba pee je ɔ nɔ yelɔ amlɔ nɔuu, nɛ enɛ ɔ ba pee ka kɛ ha Yesu. (Mat. 4:​8, 9) Yesu ko nyɛ ko ha nɛ níhi ko pee gbɔjɔɔ ha lɛ benɛ Petro de lɛ ke: “Nyɔmtsɛ, naa o he mɔbɔ” ɔ.—Mat. 16:​21, 22.

8. Mɛni ye bua Yesu nɛ e kɛ Yehowa suɔmi nya ní pee nɔ́ titli ngɛ e si himi mi?

⁸ Mɛni lɛ ye bua Yesu nɛ e kɛ Yehowa suɔmi nya ní pee nɔ́ titli ngɛ e si himi mi? Níhi etɛ lɛ ye bua lɛ. Kekleekle ɔ, e susuɔ níhi a he kaa bɔ nɛ Yehowa peeɔ ɔ. (Yoh. 8:28; 14:9) Enyɔne, e kɛ fiɛɛmi ní tsumi ɔ pee nɔ́ titli ngɛ e si himi mi. (Mat. 9:35) Etɛne ɔ, e le níhi nɛ a he hia wawɛɛ ngɛ e si himi mi. (Yoh. 4:34) E kɛ kã kua he blɔ nɛ Satan kɛ ha lɛ ɔ. E le kaa Petro ngɛ hlae nɛ e ye bua lɛ mohu lɛɛ, se Petro susumi ɔ kɛ Yehowa susumi kɔ we. (Mat. 4:10; 16:23) Yesu ha we nɛ nɔ́ nɛ nihi susuɔ, nɔ́ nɛ a deɔ, aloo nɔ́ nɛ a peeɔ ɔ, nɛ je e juɛmi kɛ je Yehowa suɔmi nya ní peemi nɔ. Ngɛ anɔkuale mi ɔ, níhi nɛ jeɔ wa juɛmi kɛ jeɔ Mawu suɔmi nya ní peemi nɔ ɔ ngɛ ekpa ngɛ nyagbahi nɛ Yesu kɛ kpe ɔ he. Se ke wa peeɔ níhi etɛ nɛ Yesu pee ɔ, e maa ye bua wɔ konɛ waa kɛ Yehowa suɔmi nya ní peemi nɛ pee nɔ́ titli ngɛ wa si himi mi.

MƐNI WA MAA PEE KONƐ NÍHI NƐ KO JE WA JUƐMI KƐ JE MAWU JAMI NƆ?

9. Mɛni lɛ Efesobi 5:17 ɔ tsɔɔ kaa e he hia nɛ waa pee?

⁹ Mo susu níhi a he kaa bɔ nɛ Yehowa peeɔ ɔ. Jã peemi maa ye bua wɔ nɛ wa “yɔse nɔ́ nɛ ji Yehowa suɔmi nya ní ɔ.” (Kane Efesobi 5:17.) Wa ma nyɛ maa le Yehowa suɔmi nya ní kɛ gu Baiblo ɔ nɛ wa maa kase nɛ wa ma pue wa yi mi tɛ ngɛ he ɔ nɔ. Ke Baiblo ɔ tu we wa si fɔfɔɛ ɔ he munyu po ɔ, wa ma nyɛ maa le nɔ́ nɛ Yehowa suɔ nɛ waa pee. Ngɛ mɛni blɔ nɔ? Lɔ ɔ ma ha nɛ waa le Yehowa susumi ngɛ níhi a he, nɛ wa maa suɔ kaa waa kɛ ma tsu ní ngɛ wa si himi mi.

10. Mɛni blɔ nɔ wa maa gu kɛ kase bɔ nɛ Yehowa susuɔ níhi a he ha a?

¹⁰ Ke wa kase Baiblo ɔ nɛ wa susu bɔ nɛ Yehowa kɛ adesahi hiɔ si ha a he ɔ, wa ma nyɛ maa na bɔ nɛ e susuɔ níhi a he ha. (Yer. 45:5) Ke wa ngɛ Baiblo ɔ kanee ɔ, wa ma nyɛ ma bi wa he ke: ‘Mɛni enɛ ɔ tsɔɔ mi ngɛ Yehowa he? Mɛni ma pee konɛ ma na níhi kaa bɔ nɛ Yehowa naa níhi ɔ?’ Ngɛ anɔkuale mi ɔ, Yehowa susumi nɔ kuɔ kulaa pe wa susumi. (Yes. 55:9) Enɛ ɔ he ɔ, wa hyɛɛ blɔ kaa e tsɔɔ wɔ blɔ nɔ nɛ wa maa gu kɛ pee e suɔmi nya ní. (La 143:10) Wa sɔleɔ hu kɛ biɔ lɛ konɛ e ye bua wɔ nɛ wa susu níhi a he kaa bɔ nɛ e susuɔ níhi a he ɔ.—1 Yoh. 5:14.

11. Mɛni Yehowa suɔ nɛ waa pee?

¹¹ Yehowa suɔ nɛ wa hɛ nɛ hi wa he nɔ loko nyagbe ɔ nɛ ba. Enɛ ɔ he ɔ, e sume nɛ nɔ́ ko nɛ je wa juɛmi kɛ je e suɔmi nya ní peemi nɔ. (Mat. 24:44) E sume nɛ waa hi tsui yee tsɔ ngɛ si himi ɔ mi nyagba amɛ a he. (Mat. 6:​31, 32) Enɛ ɔ he ɔ, ke wa be he wami, wa ní tsumi puɛ, wa be hwɔ he kpakpa ko, aloo waa kɛ nyagba kpahi ngɛ kpee ɔ, e tsɔɔ wɔ nɔ́ nɛ wa maa pee kɛ da nya. Ke wa bi lɛ juɛmi kɛ he wami nɛ waa kɛ maa da wa nyagba amɛ a nya a, e ma ha wɔ.—La 55:22; Abɛ 3:​5-7.

12. Mɛni blɔ nɔ wa maa gu kɛ da je nɛ ɔ mi haomi ɔmɛ a nya? (Mateo 5:3)

¹² O kɛ o he nɛ wo Mawu jami mi níhi a mi vii. Wɔ tsuo wa haoɔ ngɛ ní yayamihi nɛ yaa nɔ ngɛ je ɔ mi ɔ he, se wa be nyɛe maa pee he nɔ́ ko. Enɛ ɔ he ɔ, bɔ nɛ pee nɛ ní nɛ ɔmɛ nɛ ko je wa juɛmi kɛ je Mawu he ɔ, waa kɛ wa juɛmi maa Mawu jami mi níhi a peemi nɔ. Ke wa ha nɛ Mawu blɔ tsɔɔmi he hia wɔ ɔ, wa bua maa jɔ wawɛɛ. Ejakaa jã ji bɔ nɛ Yehowa suɔ kaa waa pee. (Kane Mateo 5:3.) Wa peeɔ jã kɛ guɔ Baiblo ɔ nɛ wa kaseɔ, kɛ wa he nɛ waa kɛ woɔ Mawu jami mi níhi a peemi mi vii ɔ nɔ. Ke wa pee jã a, wa maa sa Yehowa hɛ mi, ejakaa waa kɛ wa be ngɛ ní tsue ngɛ nile mi.—Abɛ 23:15.

13. Mɛni blɔ nɔ wa maa gu konɛ waa kɛ wa “be nɛ tsu ní saminya”?

¹³ Kaa Kristofohi ɔ, wa suɔ nɛ waa kɛ wa “be nɛ tsu ní saminya.” (Efe. 5:​15, 16; hyɛ study note nɛ ji “making the best use of your time.”) Ngmami nɛ ɔ tsɔɔ we bɔ nɛ e sa nɛ waa kɛ wa be nɛ tsu ní ngɛ wa daa ligbi si himi mi pɛ kɛkɛ. Mohu ɔ, e ngɛ wɔ he wami woe konɛ waa kɛ wa be ɔ nɛ tsu ní saminya ngɛ Yehowa sɔmɔmi mi loko nyagbe ɔ nɛ ba. Kɛ waa kɛ wa be ma tsu ní saminya ha kɛɛ? Ke wa ngɔɔ be fuu kɛ hyɛɛ amaniɛ bɔmihi nɛ kɔɔ ní yayamihi a he ɔ, lɔ ɔ ma nyɛ ma ha nɛ wa kɔni mi ma jɔ̃, nɛ kã nɛ waa kɛ sɔmɔɔ Yehowa a maa ba si. E maa hi wawɛɛ kaa wa ma gbɔ be abɔ nɛ waa kɛ hyɛɛ, loo waa kɛ kaneɔ amaniɛ bɔmihi ɔ nɔ! Ke wa pee jã a, wa ma ná be babauu kɛ ha Mawu jami mi ní peemihi. Wa le kaa e he hia nɛ wa susu blɔ nɔ nɛ wa maa gu kɛ pee babauu ngɛ fiɛɛmi ní tsumi ɔ mi ɔ he. Eko ji, nihi nɛ a bua jɔ munyu ɔ he nɛ wa maa kpale ya slaa mɛ. Wa le kaa e he hia nɛ waa ngɔ he blɔ fɛɛ he blɔ nɛ wa ma ná a kɛ ye bua nihi konɛ ‘a ba ná anɔkuale ɔ he nile nitsɛnitsɛ, nɛ a he a yi wami.’—1 Tim. 2:4.

14. Ke waa kɛ wa he woɔ Mawu jami mi níhi a mi be fɛɛ be ɔ, kɛ wa náa he se hu kɛɛ? (Hyɛ foni ɔ hulɔ.)

¹⁴ Ke waa kɛ wa he woɔ Yehowa sɔmɔmi mi be fɛɛ be ɔ, e haa nɛ wa leɔ nɔ́ he je nɛ ní yayamihi ngɛ nɔ yae ngɛ je ɔ mi. Basabasa peemi nɛ yaa nɔ, sika he nyagbahi nɛ waa kɛ kpeɔ, kɛ hiɔ nɛ pɔ he ɔ hɛwi wɔ tsɔ. Ejakaa wa le kaa Baiblo ɔ gba kɛ fɔ si kaa ní nɛ ɔmɛ maa ya nɔ. Enɛ ɔ he ɔ, wa ha we nɛ gbeye nɛ nu wɔ. Wa le kaa hwɔɔ se ɔ, Yehowa ma ha nɛ e si womi nɛ kɔɔ paradeiso ɔ he ɔ maa ba mi. Lɔ ɔ he ɔ, wa peeɔ kpoo nɛ waa kɛ wa hɛ fɔɔ Yehowa nɔ konɛ e ye bua wɔ nɛ wa fĩ si.—La 16:8; 112:​1, 6-8.

15. Ke wa ‘hɛ mi kã si’ ɔ, mɛni lɔ ɔ maa ye bua wɔ nɛ waa pee? (1 Petro 4:7)

¹⁵ O hɛ nɛ ko je níhi nɛ a he hia wawɛɛ ɔ nɔ. Mwɔnɛ ɔ, nihi babauu ngɔɔ a juɛmi kɛ maa níhi nɛ ma ha mɛ bua jɔmi ɔ nɔ, pe nɛ a kɛ a juɛmi maa ma nyagbe ɔ nɛ ngɛ sue ɔ nɔ. Tɔmi ko be he kaa wa ma je wa hɛja, se ke wa peeɔ wa ní kaa bɔ nɛ nihi nɛ a ngɛ je ɔ mi ɔ peeɔ a ní ɔ, e be hae nɛ wa “hɛ mi nɛ kã si.” (Kane 1 Petro 4:7.) Mɛni lɛ enɛ ɔ tsɔɔ wɔ? Enɛ ɔ tsɔɔ kaa ke wa ngɛ wa hɛja jee ɔ, e sa nɛ waa kɛ wa be nɛ tsu ní saminya, nɛ waa mwɔ yi mi kpɔhi nɛ nile ngɛ mi. Yi mi kpɔhi kaa jã a kɛ Yehowa susumi ma kɔ, nɛ e maa tsɔɔ kaa wa le níhi nɛ a he hia wawɛɛ ɔ.—2 Tim. 1:7.

16. Benɛ e piɛ bɔɔ nɛ Yesu ma gbo ɔ, mɛni nɔ nɛ e kɛ e juɛmi ma?

¹⁶ Yesu hɛ ji níhi nɛ a he hia wawɛɛ ɔ nɔ kɔkɔɔkɔ. Benɛ níhi a mi wa ha lɛ nɛ e piɛ bɔɔ nɛ e ma gbo po ɔ, e le kaa anɔkuale nɛ e maa ye Mawu kɛ pi si ɔ ji nɔ́ nɛ he hia pe kulaa. Enɛ ɔ he ɔ, e sɔle wawɛɛ. Se e kaseli ɔmɛ lɛɛ a nyɛ we nɛ a pee jã, mohu ɔ, a hwɔ mahe. “Aywilɛho ha nɛ pɔ tɔ a he.”—Luka 22:​39-46; Yoh. 19:30.

17. Mɛni he je nɛ nihi fuu yaa social media nɔ, nɛ mɛni ma nyɛ maa je mi kɛ ba? (Hyɛ foni ɔ hulɔ.)

¹⁷ Kaa bɔ nɛ e ji ngɛ Yesu kaseli ɔmɛ a blɔ fa mi ɔ, haomi ma nyɛ ma ha nɛ pɔ nɛ tɔ wa he. Níhi nɛ ngɛ nɔ yae ngɛ wa be nɛ ɔ mi ɔ ma nyɛ ma ha nɛ waa hao. Nihi fuu yaa social media nɔ kɛ susumi ɔ kaa a ma ná yemi kɛ buami ko kɛ da a haomi ɔmɛ a nya ngɛ lejɛ ɔ. A guɔ nɔ kɛ maneɔ a huɛmɛ kɛ a wekuli amaniɛ bɔmihi, fonihi, kɛ ní kpahi. Jehanɛ hu ɔ, a guɔ nɔ kɛ jeɔ a hɛja wawɛɛ nɛ huzu be he. Be fɛɛ be ɔ, a kaneɔ nɛ a hyɛɛ ní hehi nɛ nihi kɛ fɔɔ social media a nɔ ɔ, nɛ enɛ ɔ ngɔɔ a be tsuo, nɛ e haa nɛ pɔ hu tɔɔ a he wawɛɛ. Bɔ nɛ pee nɛ waa le kaa waa kɛ social media a ngɛ ní tsue saminya a, wa ma nyɛ ma bi wa he ke, ‘Anɛ níhi nɛ i hyɛɛ loo i buɔ tue ngɛ social media a nɔ ɔ woɔ mi he wami aloo e jeɔ ye juɛmi kɛ jeɔ níhi nɛ he hia wawɛɛ ɔ a nɔ?’

18. Mɛni he je nɛ e sa nɛ waa kɛ nile nɛ tsu ní ke wa ngɛ níhi nɛ waa kɛ ma je wa hɛja hlae ɔ?

¹⁸ Ke wa fiaa video games aloo wa hyɛɛ sinihi ngɛ tiivi loo intanɛti ɔ nɔ ɔ, e sa nɛ waa hyɛ saminya. Waa kɛ ní nɛ ɔmɛ ma nyɛ ma je wa hɛja nɛ wa bua nɛ jɔ mohu lɛɛ, se e sa nɛ waa hyɛ be abɔ nɛ waa kɛ jeɔ wa hɛja, kɛ níhi nɛ waa kɛ jeɔ wa hɛja a hulɔ. Behi fuu ɔ, ke o hyɛ video ko ta a, kɛkɛ ekpahi hu nyɛɛ se nɛ e maa pee mo kaa o hyɛ. Video nɛ ɔmɛ ekomɛ kɔɔ yiwutso ní peepee kɛ je mi bami yaya he. Nyɛminyumu ko nɛ e ngɛ Asia a kɛ si fɔfɔɛ nɛ ɔ eko kpe. Sisije ɔ, e hyɛɛ video kpitikpiti komɛ ngɛ intanɛti ɔ nɔ. Lɔ ɔ se ɔ, e hyɛɛ video kpahi nɛ nyɛɛɔ se ɔ. Bɔɔbɔɔbɔɔ ɔ, e bɔni je mi bami yayami he videohi hyɛmi. Nyagbenyagbe ɔ, e bɔni bɔmi nami he fonihi kɛ videohi hyɛmi. Bua jɔmi sane ji kaa asafo mi nikɔtɔma amɛ kɛ e huɛmɛ ye bua lɛ nɛ e nyɛ nɛ e yu e he kɛ je ní ɔmɛ a he. E je níhi nɛ e kɛ hyɛɔ video nɛ ɔmɛ kɛ je e fon ɔ nɔ, nɛ e gbɔ be abɔ nɛ e kɛ fon ɔ tsuɔ ní ɔ hu nɔ. Níhi a si kpami nɛ ɔ ha nɛ wa na kaa e he hia nɛ waa kɛ nile nɛ tsu ní saminya ke wa ngɛ wa hɛja jee.

19. Ke waa kɛ wa he wo hɛja jemi mi vii ɔ, mɛni maa je mi kɛ ba?

¹⁹ E sa nɛ waa kɛ nile hu nɛ tsu ní ke wa suɔ nɛ wa jɔɔ wa he, aloo waa pee nɔ́ ko nɛ ma ha nɛ wa bua nɛ jɔ. Ke wa tsu ní nɛ pɔ tɔ wa he ɔ, wa suɔ nɛ waa jɔɔ wa he bɔɔ. Enɛ ɔ haa nɛ wa náa nɔmlɔ tso mi he wami kpakpa be fɛɛ be. Se ke waa kɛ wa juɛmi ma níhi nɛ waa kɛ jeɔ wa hɛja a nɔ tsɔ ɔ, lɔ ɔ ma je wa juɛmi kɛ je níhi nɛ a he hia wawɛɛ ɔ a nɔ, nɛ enɛ ɔ maa pee oslaa kɛ ha wɔ. (Flp. 1:10) E sa nɛ wa ti nɔ fɛɛ nɔ nɛ mwɔ e yi mi kpɔ ngɛ nɔ́ nɛ e kɛ e be peeɔ kɛ be abɔ nɛ e kɛ peeɔ jamɛ a nɔ́ ɔ he. Loko o maa mwɔ yi mi kpɔ ko ngɛ ní nɛ ɔmɛ a he ɔ, mo bi o he ke: ‘Anɛ be abɔ nɛ i kɛ jɔɔ ye he aloo i kɛ jeɔ ye hɛja a tsɔɔ kaa e kɛ nile tsuɔ ní lo? Anɛ lɔ ɔ tsɔɔ kaa i le níhi nɛ a he hia wawɛɛ, nɛ i ngɛ ye he dlae kɛ ha “níhi tsuo a nyagbe” ɔ lo?’

20. Mɛni he je nɛ e sɛ nɛ wa hɛ nɛ je níhi nɛ a he hia wawɛɛ ɔ nɔ ɔ?

²⁰ Ke wa ha we nɔ́ ko nɛ je wa juɛmi kɛ je níhi nɛ wa peeɔ ngɛ wa Mawu jami mi ɔ, wa ma ná he se wawɛɛ. (Yes. 48:17) Yehowa ma nyɛ maa ye bua wɔ nɛ waa da wa nyagba amɛ a nya, nɛ níhi nɛ ngɛ nɔ́ yae ngɛ je ɔ mi ɔ be wɔ haoe tsɔ. Jehanɛ hu ɔ, wa be hae nɛ hɛja jemi nɛ ngɔ wa be ɔ tsuo. Lɔ ɔ he ɔ, nyɛ ha nɛ waa ya nɔ nɛ wa susu níhi a he kaa Yehowa, nɛ wa hɛ nɛ dɔ ngɛ mumi mi níhi a he, nɛ waa ngɔ wa juɛmi kɛ ma níhi nɛ a he hia wawɛɛ ɔ nɔ. Ke wa pee jã a, wa hɛ be níhi nɛ a he hia wawɛɛ ɔ nɔ jee, mohu ɔ, wa maa “pɛtɛ wami nitsɛnitsɛ ɔ he wawɛɛ.”—1 Tim. 6:19.