Mo Ná Hɛ Kɛ Nɔ Fɔmi Ngɛ Je Mluku ɔ Tsuo Nɔ Yelɔ ɔ Mi

1. Mɛni haomihi nɛ́ a nya wa lɛ Hiob kɛ kpe?

NÍHI fuu nɛ Hiob ngɛ ɔ bɔ lɛ. E bimɛ tsuo gbo, níhi nɛ e ngɛ ɔ tsuo hɛ mi kpata, nɛ e nu hiɔ ko nɛ nya wa wawɛɛ. Se pi lɔ ɔ pɛ. Nihi gbe e he guɛ, nɛ e “huɛmɛ ɔmɛ” hu tu munyuhi kɛ jɔ̃ e kɔni mi. E yo nɛ e suɔ lɛ wawɛɛ ɔ po hao nɛ e de lɛ ke, “gbiɛɛ Mawu nɛ o gbo.” (Hiob 2:9; 15:​4, 5; 19:​1-3) Jinɛ haomihi nɛ Hiob kɛ kpe ɔ ko ha nɛ hɛ kɛ nɔ fɔmi nɛ e ngɛ ngɛ anɔkuale Mawu ɔ mi ɔ mi ko gbɔjɔ. E ma nyɛ ma susu po kaa Yehowa be nyɛe maa bu e sɔmɔli anɔkualetsɛmɛ nɛ a suɔ lɛ ɔ a he.

2-3. Ke waa kɛ haomihi ngɛ kpee ɔ, mɛni susumi wa ma nyɛ ma ná, nɛ kɛ Hiob womi ɔ ma nyɛ maa ye bua wɔ ha kɛɛ?

² Be komɛ ɔ, wɔ hu nyagbahi nɛ a mi wa nɛ waa kɛ kpeeɔ ɔ ma nyɛ maa ka hemi kɛ yemi nɛ wa ngɛ ngɛ Yehowa mi ɔ. Wa ngɛ ‘behi nɛ a mi wa nɛ a nya dami yeɔ ɔ’ mi. (2 Tim. 3:1) Ke waa kɛ nyagbahi fuu ngɛ kpee ngɛ be kake mi ɔ, wa haoɔ wawɛɛ nɛ wa nuɔ he kaa wa be nyɛe maa da nya. Ke e ba jã a, ni komɛ ma nyɛ maa nu he kaa Yehowa sume nɛ e ye bua mɛ.

³ Ke o nu he jã hyɛ ɔ, o kɔni mi nɛ ko jɔ̃. Hiob kase kaa Yehowa kua we nihi nɛ a yeɔ lɛ anɔkuale ɔ gblegbleegble. Wɔ hu wa ma nyɛ maa ngɔ wa hɛ kɛ fɔ Yehowa nɛ ji wa Tsɛ ɔ nɔ kulaa, nɛ́ wa ná nɔ mi mami kaa e maa ye bua wɔ nɛ e maa jɔɔ wɔ. Hiob womi ɔ maa ye bua wɔ nɛ́ waa na kaa wa ma nyɛ maa ngɔ wa hɛ kɛ fɔ Yehowa nɔ be fɛɛ be, ejakaa lɛ ji Je Mluku ɔ Tsuo Nɔ Yelɔ. Wa maa na hu kaa Yehowa ngɛ he wami nɛ e ma nyɛ ma ha nɛ níhi tsuo nɛ e de ɔ maa ba mi. Jehanɛ hu ɔ, e ma ha wɔ níhi tsuo nɛ wa hia nɛ ma ha nɛ huɛ bɔmi kpakpa nɛ hi waa kɛ lɛ wa kpɛti ɔ.

SATAN BA PIƐƐ A HE

4. Benɛ Yehowa kɛ bɔfo ɔmɛ bua a he nya a, mɛni ya nɔ?

⁴ Ligbi ko ɔ, “anɔkuale Mawu ɔ bimɛ ɔmɛ” ba bua a he nya ngɛ Yehowa hɛ mi ngɛ hiɔwe. Baiblo ɔ tsɔɔ kaa ‘Satan hu ba piɛɛ a he.’ (Hiob 1:6) Enɛ ɔ ji kekleekle be nɛ biɛ nɛ ji “Satan” ɔ je kpo ngɛ Baiblo ɔ mi. A kɛ jamɛ a biɛ ɔ tsɛ lɛ ejakaa e teɔ si kɛ woɔ Yehowa. E ngɛ mi kaa jamɛ a be ɔ mi ɔ, Satan piɛɛ we Mawu bimɛ anɔkualetsɛmɛ ɔmɛ a he hu lɛɛ, se Mawu ngmɛ lɛ blɔ nɛ e ba jamɛ a kpe ɔ eko. Satan ji Yehowa, bɔfo anɔkualetsɛmɛ ɔmɛ kɛ nihi tsuo nɛ a yeɔ Mawu anɔkuale ɔ a he nyɛlɔ. Munyu nɛ Yehowa tu ngɛ 1 Mose 3:15 ɔ tsɔɔ kaa Satan piɛɛ we Yehowa weku nɛ ngɛ hiɔwe ɔ he hu. Enɛ ɔ tsɔɔ kaa Satan piɛɛ we “yo ɔ” nɛ ji Yehowa weku nɛ ngɛ hiɔwe nɛ ji mumi mi adebɔ níhi nɛ “nina” a maa je e mi kɛ ba a he.

5. Mɛni wa kaseɔ ngɛ nɔ́ nɛ Satan de ɔ, kɛ bɔ nɛ Yehowa ha lɛ heto ha a mi?

⁵ Yehowa ha nɛ a ngma nɔ́ nɛ ya nɔ ngɛ he nya buami nɛ ɔ mi ɔ kɛ wo Baiblo ɔ mi. Munyu nɛ Satan tu ngɛ lejɛ ɔ tsɔɔ kaa e ji nɔ he guɛ gbelɔ nɛ e yi mi wa saminya. (Hiob 1:9; kɛ to Kpojemi 12:10 he.) He nya buami nɛ ɔ hu ha nɛ wa na kaa Yehowa ngɔɔ e he wami nɛ huzu be he ɔ kɛ tsuɔ ní ngɛ blɔ nɛ da nɔ. Enɛ ɔ woɔ wa bua wawɛɛ nitsɛ. Wa na hu kaa akɛnɛ Yehowa ji Mawu Ope he je ɔ, e haa ni kpahi huzu ngɛ nɔ́ nɛ a ma nyɛ maa pee kɛ nɔ́ nɛ a be nyɛe maa pee ɔ he.

YEHOWA WO HUZU NGƐ NƆ́ FƐƐ NƆ́ HE

6. Mɛni Yehowa pee kɛ tsɔɔ kaa e ngɛ he wami ngɛ kpe nɛ a pee ngɛ hiɔwe ɔ nɔ? (Hiob 1:​7, 8)

⁶ Kane Hiob 1:​7, 8. Akɛnɛ Yehowa ngɛ he wami ngɛ kpe nɛ ya nɔ ngɛ hiɔwe ɔ nɔ he je ɔ, e bi Satan ke: “Anɛ o to ye sɔmɔlɔ Hiob he hɛ lo?” Yehowa le kaa Satan ngɔ e hɛ kɛ pi Hiob nɛ yeɔ lɛ anɔkuale ɔ. Nyɛ ha nɛ waa hyɛ bɔ nɛ Yehowa maa ngɔ e he wami nɛ huzu be he ɔ kɛ tsu ní ha ngɛ Hiob blɔ fa mi.

7. Ngɛ Hiob 1:​10, 11 ɔ nya a, mɛni Satan de ngɛ nihi nɛ a sɔmɔɔ Yehowa a he?

⁷ Kane Hiob 1:​10, 11. Yehowa ji Je ɔ Tsuo Nɔ Yelɔ, nɛ e ngɔɔ e he wami ɔ kɛ tsuɔ ní ngɛ blɔ nɛ da nɔ. (Yer. 32:17; Dan. 4:35) Se kɛ̃ ɔ, Satan tsɔɔ kaa bɔ nɛ Yehowa kɛ e he wami ɔ tsuɔ ní ha a dɛ. Ngɛ blɔ ko nɔ ɔ, Satan ngɛ tsɔɔe kaa Yehowa haa adesahi nɛ Hiob hu piɛɛ he ɔ ní kpakpahi konɛ a da lɔ ɔ nɔ kɛ sɔmɔ lɛ. Satan tsɔɔ hu kaa nihi nɛ a sɔmɔɔ Yehowa a peeɔ jã ngɛ nɔ́ ko nɛ a ma ná kɛ je Yehowa ngɔ ɔ he je. Kɛ Yehowa tsu nya pomi nɛ ɔ he ní ha kɛɛ?

8-9. Mɛni huzu lɛ Yehowa ha Satan, nɛ mɛni he je? (Hiob 1:12) (Hyɛ foni ɔ hulɔ.)

⁸ Kane Hiob 1:12. Yehowa ngmɛ Abosiami blɔ konɛ e ka Hiob nɛ e hyɛ kaa Hiob ma ja Yehowa a aloo e be lɛ jae. Se kɛ̃ ɔ, huzu ngɛ he blɔ nɛ e ha lɛ ɔ he. Mawu de Satan ke: “Se lɛ nɔmlɔ [Hiob] ɔ lɛɛ o ko ta e he!” Yehowa ha nɛ bɔfo ɔmɛ na huzu nɛ e ha Satan ngɛ ka nɛ e kɛ maa ba Hiob nɔ ɔ he. Satan be nyɛe maa be jamɛ a huzu ɔ he, enɛ ɔ he ɔ, e pee nɔ́ nɛ Yehowa ngmɛ lɛ blɔ kaa e pee ɔ pɛ. Nɛ jã pɛpɛɛpɛ nɛ e ji mwɔnɛ ɔ. Yehowa ngɔ he wami nɛ e ngɛ ɔ kɛ po Hiob he piɛ nɛ e kɛ tsɔɔ kaa e ji Mawu nɛ ngɛ suɔmi.

⁹ Kekleekle kahi nɛ Satan kɛ ba Hiob nɔ ɔ tsuo yi manye. Hiob ya nɔ nɛ e ye e hiɔwe Tsɛ ɔ anɔkuale. (Hiob 1:22) Se Satan maa ya nɔ maa ka Hiob.

10. Mɛni he je nɛ Yehowa ngmɛ blɔ nɛ Satan ngɔ ka kpahi kɛ ba Hiob nɔ ɔ? (Hiob 2:​2-6)

¹⁰ Kane Hiob 2:​2-6. Satan bɔ mɔde kaa e ma mia ka nɛ e kɛ ba Hiob nɔ ɔ mi konɛ Hiob nɛ kpa Yehowa sɔmɔmi. Satan susu kaa Hiob maa gbiɛ Mawu konɛ e kɛ po e wami he piɛ. Lɔ ɔ he ɔ, Yehowa ngmɛ Abosiami blɔ konɛ e ha nɛ anɔkualetsɛ Hiob nɛ nu hiɔ. Se Yehowa ha Satan huzu ngɛ enɛ ɔ hu he. E de lɛ ke: “O ko kpata e wami hɛ mi!” Satan be he blɔ kaa e maa be huzu nɛ Mawu ha lɛ ɔ he nɛ e gbe Hiob. Si kake ekohu ɔ, wa na kaa Hiɔwe No ɔ be Satan blɔ ngmɛe nɛ e be huzu nɛ e ha lɛ ɔ he, ejakaa e ngɛ he wami pe nɔ fɛɛ nɔ.

YEHOWA PO HIOB NƆ́ NAMI Ɔ SE

11. Benɛ Yehowa po Hiob nɔ́ nami ɔ se ɔ, mɛni je mi kɛ ba? (Hiob 42:​10-13)

¹¹ Kane Hiob 42:​10-13. Benɛ Hiob ngɔ e ní peepee kɛ tsɔɔ kaa e maa ya nɔ maa ye anɔkuale ɔ, Yehowa po kahi nɛ Satan kɛ ba e nɔ ɔ se. Yehowa ha nɛ e sɔmɔlɔ anɔkualetsɛ nɛ ɔ kpa nɔ́ nami. Satan be nyɛe maa tsi Yehowa nya kaa e ko jɔɔ Hiob nɛ e po e he piɛ.

12. Mo ha nɔ hyɛmi nɔ́ nɛ tsɔɔ nɔ́ nɛ Yehowa pee kɛ ha e sɔmɔli nɛ a ngɔ a hɛ kɛ fɔ e nɔ kaa e ma he a yi wami ɔ.

¹² Yehowa ngɔ e he wami ɔ kɛ ye bua e sɔmɔli babauu ngɛ nyagbe ligbi nɛ ɔmɛ a mi. Kaa nɔ hyɛmi nɔ́ ɔ, ngɛ jeha 1945 ɔ mi ɔ, ta buli nyɛ Yehowa Odasefohi 230 a nɔ konɛ a nyɛɛ blɔ gagaaga kɛ je tsu womi he ko nɛ ngɛ Germany ɔ kɛ ya wo ɔ nya konɛ a ya gbe mɛ. Blɔ nɛ ɔ nɔ ngɛ oslaa wawɛɛ. Se a ti nɔ kake po ya gbo we. Benɛ a gblee si fɔfɔɛ nɛ mi wa nɛ ɔ mi ta a, a de ke: “Yehowa he wa yi wami kaa bɔ nɛ e he Hebribi etɛ ɔmɛ a yi wami ɔ. E je mɛ kɛ je flɔɔnɔɔ kɛ e mi la a mi, nɛ a nui lasuku he fu po ngɛ a he. Jã nɔuu kɛ̃ nɛ benɛ nyɛmimɛ nɛ ɔmɛ kɛ haomi nɛ mi wa kpe ɔ, a nyɛ nɛ a da nya, nɛ a hemi kɛ yemi ɔ mi ba wa po pe be ko nɛ be ɔ. Yehowa ha mɛ e he wami ɔ. A na hu kaa a he a yi wami kaa bɔ nɛ Yehowa he Daniel yi wami kɛ je jata amɛ a muɔ mi ɔ. Kɛ je jamɛ a be ɔ mi kɛ yaa a, a fia a pɛɛ si kaa a ma sɔmɔ Yehowa kɛ ya daa. Jehanɛ hu ɔ, a le kaa a ma ná jɔɔmi nɛ se be ke a ya nɔ nɛ a sɔmɔ Yehowa.”—Kɛ to Daniel 3:27; 6:22 ɔ he.

13. Ke o kɛ kahi ngɛ kpee ɔ, mɛni nɔ mi mami o ma nyɛ ma ná? (Hyɛ foni ɔmɛ hulɔ.)

¹³ Be komɛ ɔ, wɔ hu wa maa na nɔ́ akɛnɛ waa kɛ kahi nɛ nya wa ngɛ kpee ɔ he je. (1 Pet. 5:​8-10) Enɛ ɔ he ɔ, wa kɔni mi ma nyɛ ma jɔ̃. E ma nyɛ maa pee wɔ po kaa kahi nɛ waa kɛ ngɛ kpee ɔ se be poe gblee. Ke wa ya je si fɔfɔɛ ko kaa jã a mi nɛ wa kai Hiob sane ɔ, e maa ye bua wɔ. Wa ma nyɛ ma ná nɔ mi mami kaa Yehowa maa ngɔ e he wami ɔ kɛ po wa nɔ́ nami ɔ se amlɔ nɛ ɔ, aloo ngɛ je ehe ɔ mi. Yehowa be hae nɛ be nɛ e to nɛ e kɛ ma kpata je yaya nɛ ɔ hɛ mi ɔ nɛ be he kɔkɔɔkɔ!

YEHOWA SUƆ NIHI NƐ A YEƆ LƐ ANƆKUALE Ɔ

14-15. Mɛni Yehowa suɔ kaa e maa pee kɛ ha e sɔmɔli anɔkualetsɛmɛ, nɛ mɛni he je? (Hiob 14:15) (Hyɛ foni ɔ hulɔ.)

¹⁴ Kane Hiob 14:15. Wa hiɔwe Tsɛ ɔ suɔ nihi nɛ a yeɔ lɛ anɔkuale ɔ wawɛɛ nitsɛ. Akɛnɛ a he jua wa wawɛɛ ha lɛ he je ɔ, ke a gbo po ɔ, e suɔ kaa e ma tle mɛ si kɛ ba wami mi ekohu. Enɛ ɔ ma ha nɛ e sɔmɔli ɔmɛ maa ye a he kɛ je gbenɔ he kulaa, nɛ a bua maa jɔ wawɛɛ.—Yes. 65:17.

¹⁵ E ngɛ mi kaa ngɛ Hiob nɔ́ nami ɔ se ɔ, loloolo ɔ, e ngɛ Satan je ɔ mi mohu lɛɛ, se Baiblo ɔ ha nɛ wa na kaa, Yehowa ha nɛ Hiob ná nɔmlɔ tso mi he wami kpakpa ekohu, nɛ e jɔɔ lɛ pe be ko nɛ be ɔ po. Se hwɔɔ se ɔ, Yehowa maa jɔɔ lɛ babauu po pe jã. Yehowa tsɔɔ kaa e suɔ nɛ e sɔmɔli anɔkualetsɛmɛ ɔmɛ nɛ a ná bua jɔmi nitsɛnitsɛ ngɛ si himi mi. Ngɛ anɔkuale mi ɔ, nihi nɛ a maa ya nɔ maa ye anɔkuale ɔ maa hi si kɛ ya neneene ngɛ paradeiso ɔ mi. (Kpo. 21:​3, 4) Akɛnɛ Yehowa ji Je Mluku ɔ Tsuo Nɔ Yelɔ he je ɔ, e suɔ kaa e maa pee jã. Enɛ ɔ woɔ wa bua nɛ wa nyɛɔ fĩɔ si ke waa kɛ kahi ngɛ kpee!

16. Mɛni ji nɔ́ kpa ko hu nɛ haa nɛ wa náa hɛ kɛ nɔ fɔmi ngɛ Yehowa nɛ ji Je ɔ Tsuo Nɔ Yelɔ ɔ mi?

¹⁶ Ngɛ jehahi babauu nɛ Hiob ye ɔ tsuo se ɔ, nyagbenyagbe ɔ, e gbo. Se Yehowa nɛ ji je ɔ Tsuo Nɔ Yelɔ nɛ e ji Mawu Ope ɔ, ngɛ he wami ngɛ gbenɔ po nɔ. (5 Mose 32:39) Enɛ ɔ he ɔ, ke be su nɛ e ma tle nihi nɛ e suɔ mɛ ɔ si ɔ, nɔ ko be nyɛe maa tsi e nya.—Rom. 8:​38, 39.

NGƆƆ O HƐ KƐ FƆ YEHOWA NƆ KULAA

17. Mɛni tsɔɔ kaa Satan be nyɛe ma kpata Yehowa we bi a hɛ mi?

¹⁷ Hiob sane ɔ tsɔɔ wɔ nɔ́ he je nɛ e he hia kaa waa ngɔ wa hɛ kɛ fɔ Yehowa nɔ kulaa a. Wa bua jɔɔ kaa Yehowa ha we Satan he blɔ nɛ e kpata Mawu we bi a hɛ mi! Mwɔnɛ ɔ, nihi anɔkualetsɛmɛ maa pee ayɔ nɛɛ lɛ a ngɛ Yehowa sɔmɔe. Enɛ ɔ tsɔɔ kaa Yehowa ji Je ɔ Tsuo Nɔ Yelɔ niinɛ. Wa na si abɔ kaa ta hwumi níhi nɛ a sɔ̃ɔ̃ kɛ siɔ Yehowa sɔmɔli ɔ eko eko yi manye. (Yes. 54:17) Nɔ yeli nɛ a he wa, kɛ jami hɛ mi nyɛɛli nyɛ we nɛ a ye Yehowa we bi nɛ e ngɛ kaa nɔ́ nɛ a be he piɛ pomi ko ɔ a nɔ kunimi. Nɔ́ ko be nyɛe maa tsi wa nya kaa wa ko fiɛɛ Mawu he anɔkuale munyu ɔ. Nɛ jã kɛ, nɛ nɔ́ ko be nyɛe maa tsi wa nya kaa wa ko kpa Satan yiwutsotsɛ ɔ he bo. Gbenɔ po be nyɛe ma ha nɛ wa kpa anɔkuale munyu nɛ ɔ fiɛɛmi ejakaa Yehowa ma tle nihi nɛ a yeɔ anɔkuale kɛ ya siɔ gbenɔ mi ɔ si.—Hos. 13:14.

18. Mɛni he je nɛ waa kɛ kã ma nyɛ maa da kahi nɛ waa kɛ maa kpe hwɔɔ se ɔ a nya a?

¹⁸ Ke wa pue wa yi mi tɛ ngɛ Hiob sane ɔ he ɔ, wa hemi kɛ yemi ɔ mi maa wa, nɛ waa kɛ kã ma nyɛ maa da kahi a nya hwɔɔ se. Ngɛ amanehlu ngua a mi ɔ, e maa pee kaa nɔ́ nɛ Mawu we bi be he piɛ pomi ko nɛ Satan kɛ e we bi ɔmɛ maa ye kunimi. Se kaa bɔ nɛ e ba ngɛ Hiob be ɔ mi ɔ, Yehowa ma kudɔ nɔ́ fɛɛ nɔ́ ko nɛ maa ya nɔ ɔ, nɛ e be hae nɛ Satan nɛ kpata e sɔmɔli a hɛ mi kɛ ya neneene. Be nɛ Yehowa kɛ maa po nɔ́ nami nɛ Satan kɛ ba adesahi a nɔ ɔ se ɔ ngɛ sue mlamlaamla. A maa wo Abosiami kɛ e daimonio ɔmɛ tsu jeha 1,000. (Luka 8:31; Kpo. 20:​1-3) Nyagbe ɔ, a ma kpata Satan kɛ nihi tsuo nɛ a fĩɔ e se ɔ a hɛ mi. (Kpo. 20:10) Kaa bɔ nɛ Yehowa de ɔ, a maa fia Satan yi nɔ. A ma kpata e hɛ mi kulaa.—1 Mose 3:15; Rom. 16:20.

19. Mɛni jɔɔmihi lɛ nihi nɛ a ngɔɔ a hɛ kɛ fɔɔ Yehowa nɔ ɔ ma ná? (Hyɛ foni ɔ hulɔ.)

¹⁹ Nihi nɛ a jaa Mawu ngɛ anɔkuale mi ɔ ngɛ blɔ hyɛe kaa hwɔɔ se ɔ, adesahi maa ye mluku nɛ a ma ná bua jɔmi ngɛ je ehe ɔ mi ekohu. Si himi ɔ maa pee kpakpa pe bɔ nɛ wa susu ɔ po. Yehowa de ke: “Hyɛ! i ngɛ níhi tsuo pee ehe.” (Kpo. 21:5) Mɛni lɔ ɔ tsɔɔ? Kɛ je Eden abɔɔ ɔ mi ɔ, enɛ ɔ maa pee kekleekle be nɛ́ adesahi maa ye a he kɛ je Satan kɛ e daimonio ɔmɛ a he. Jamɛ a be ɔ mi ɔ, Satan kɛ e daimonio ɔmɛ be hae nɛ adesahi nɛ a pee yiwutso ní hu. E maa pee bua jɔmi wawɛɛ nitsɛ! Nyagbahi nɛ ngɛ je momo nɛ ɔ mi nɛ ha we nɛ o hwɔ mahe ɔ se maa po. Nihi nɛ a maa po Harmagedon ɔ maa na nyakpɛ blɔ nɔ nɛ a maa gu kɛ tsa adesahi ngɛ je ɔ mi tsuo. Nɛ wa suɔli nɛ a gbo ɔ hu maa ba wami mi. Jamɛ a be ɔ mi ɔ, si himi ɔ maa pee bua jɔmi kaa bɔ nɛ wa hiɔwe Tsɛ Yehowa to e yi mi ɔ!

20. Mɛni o fia o pɛɛ si kaa o maa pee?

²⁰ Ngɛ nyagbe ligbi nɛ ɔmɛ a mi ɔ, waa kɛ kahi fuu maa kpe, enɛ ɔ he ɔ, ja wa pee kã loko wa ma nyɛ maa ye Yehowa anɔkuale. Niinɛ, wa suɔ nɛ wa fĩ e nɔ yemi ɔ se. Nyɛ ha nɛ waa kɛ wa ní peepee nɛ tsɔɔ kaa wa fĩ wa hiɔwe Tsɛ ɔ se, nɛ́ wa ha nɛ Satan nɛ pee lakpatsɛ. Wa ma nyɛ ma ná nɔ mi mami kaa wa ma ná si himi kpakpa hwɔɔ se ke wa ye Yehowa nɛ ji Je Mluku ɔ Tsuo Nɔ Yelɔ ɔ anɔkuale, ejakaa Yehowa suɔ nɛ e jɔɔ e sɔmɔli anɔkualetsɛmɛ ɔmɛ, nɛ e maa pee jã kokooko!