Yaa Nɔ Nɛ O Kɛ “Ga Nɛ Tsɔɔ Ní” Ngɛ Fiɛɛmi Mi

1. Mɛni nɛ e sa nɛ waa kase, nɛ mɛni he je? (2 Timoteo 4:2) (Hyɛ foni ɔ hulɔ.)

YESU de e se nyɛɛli ɔmɛ ke: ‘Nyɛɛ pee nihi kaseli . . . , nɛ nyɛɛ tsɔɔ mɛ nɛ a ye níhi tsuo nɛ i fã nyɛ ɔ nɔ.’ (Mat. 28:​19, 20) Enɛ ɔ tsɔɔ kaa Yesu fã Kristofohi tsuo kaa a tsɔɔ nihi ní. Ngɛ anɔkuale mi ɔ, Yehowa lɛ gblaa “nihi tsuo nɛ a ngɛ su kpakpa” a, nɛ e bɔfo ɔmɛ lɛ a tsɔɔ wɔ blɔ kɛ yaa nimli nɛ ɔmɛ a ngɔ. (Níts. 13:48; Yoh. 6:44; Kpo. 14:6) Se kɛ̃ ɔ, e sa nɛ waa kase bɔ nɛ a tsɔɔ nihi Yehowa he ní ha. Mo susu bɔfo Paulo kɛ Banaba a nɔ hyɛmi nɔ́ ɔ he nɛ o hyɛ. Baiblo ɔ de ke, benɛ a ngɛ fiɛɛe ngɛ kpe he nɛ ngɛ Ikoniom ɔ, “bɔ nɛ a plɛ kɛ tu munyu ha a ha nɛ Yudabi kɛ Helabi babauu nitsɛ ba he ye.” (Níts. 14:1) E ngɛ heii kaa, Paulo kɛ Banaba kase bɔ nɛ a kɛ “ga” tsɔɔ nihi ní ha. (Kane 2 Timoteo 4:2.) E sa nɛ Kristofohi tsuo nɛ a kase bɔ nɛ a kɛ ga maa tsɔɔ ní ha.

2. Mɛni he je nɛ Kristofohi komɛ nuɔ he kaa a be nyɛe maa ya a hɛ mi ngɛ a ní tsɔɔmi mi ɔ?

² Ni komɛ maa nu he kaa a li bɔ nɛ a kɛ ga tsɔɔ ní ha, ejakaa a susu kaa a yɛ sukuu aloo a be nyɛmi nɛ a kɛ tsɔɔ ní. Ni komɛ nɛ a wo a ta ngɛ Baiblo ɔ mi ɔ hu nu he kaa a be jamɛ a nyɛmi ɔ. (2 Mose 4:10; Yer. 1:6) Ni komɛ hu susuɔ kaa a li ní tsɔɔmi kpakpa ko, ejakaa a ní tsɔɔmi ɔ wui yiblii kaa ni kpahi a ní tsɔɔmi. Ngɛ anɔkuale mi ɔ, tsa pi nɔ fɛɛ nɔ nɛ waa kɛ lɛ sɛɛɔ ní, aloo waa kɛ maa kpe ngɛ fiɛɛmi mi ɔ nɛ maa kplɛɛ sane kpakpa a nɔ. Jehanɛ hu ɔ, yiblii nɛ jeɔ mi kɛ baa a dɛ si ngɛ wa mɔde bɔmi pɛ nɔ. Kaa bɔ nɛ wa de kɛ sɛ hlami ɔ, Yehowa kɛ bɔfo ɔmɛ yeɔ bua wɔ konɛ waa na tsui kpakpatsɛmɛ. Se loloolo ɔ, wa suɔ nɛ wa sɛ gbi ɔ nɛ ta wa tue buli ɔmɛ a tsui he. Ngɛ ní kasemi nɛ ɔ mi ɔ, wa maa na blɔhi etɛ a nɔ nɛ wa ma nyɛ maa gu konɛ waa kɛ ga nɛ tsɔɔ nihi ní ke wa ngɛ fiɛɛe.

MO SUSU O TUE BULI ƆMƐ A HE

3. Mɛni he je nɛ nihi fuu suɔ kaa a maa bu Yesu tue ɔ?

³ Baiblo ɔ de ke, Yesu “le nɔ́ nɛ ngɛ adesa mi.” (Yoh. 2:25) Munyu nɛ ɔ tsɔɔ kaa Yesu le bɔ nɛ nihi susuɔ níhi a he ha, kɛ nɔ́ he je nɛ a peeɔ ní komɛ. Yesu nyɛ nɛ e su e tue buli ɔmɛ a tsui he ejakaa e le a hiami níhi. Yesu le kaa nihi hia blɔ tsɔɔmi kɛ bua womi, ejakaa jami hɛ mi nyɛɛli ɔmɛ wo mɛ mlaahi fuu, nɛ lɔ ɔ ha nɛ si himi ɔ he wa ha mɛ. (Mat. 9:36; 23:4) Yesu tu ní nɛ ɔmɛ a he munyu ngɛ e Yoku ɔ Nɔ Fiɛɛmi ɔ mi nɛ e kɛ ye bua e tue buli ɔmɛ. Nihi fuu suɔ kaa a maa bu Yesu tue ejakaa e tu a nyagba amɛ a he munyu.

4. Mɛni wa ma nyɛ maa pee kɛ tsɔɔ kaa wa susuɔ nihi a he? (Hyɛ foni ɔmɛ hulɔ.)

⁴ Wa ma nyɛ maa tsɔɔ kaa wa susuɔ nihi nɛ waa kɛ mɛ kpeɔ ngɛ fiɛɛmi mi ɔ a he ke wa bɔɔ mɔde kaa wa maa nu mɛ sisi. Satan je ɔ náa nihi nɛ wa fiɛɛɔ kɛ haa mɛ ɔ a nɔ he wami. Ke enɛ ɔ ngɛ wa juɛmi mi ɔ, wa maa suɔ kaa wa maa ye bua nihi nɛ a ngɛ wa zugba kpɔ ɔ mi ɔ. Kaa nɔ hyɛmi nɔ́ ɔ, anɛ nɔ́ ko ya nɔ ngɛ he nɛ o ngɛ ɔ nɛ nihi ngɛ he munyu tue lo? Anɛ fɔli haoɔ ngɛ a bimɛ a he ke a ho sukuu ya lo? Anɛ e he waa ha nihi nɛ a ngɛ he nɛ o ngɛ ɔ kaa a ma ná ní tsumi lo? Wa ngɛ “behi nɛ a mi wa” mi, enɛ ɔ he ɔ, bɔɔ mɔde nɛ o kɛ o he nɛ wo nihi nɛ a li nɔ́ nɛ Baiblo ɔ de kɛ kɔ hwɔɔ se he ɔ a si fɔfɔɛ ɔ mi.—2 Tim. 3:1; Yes. 65:​13, 14.

5. Mɛni ha nɛ Yesu je ekpa ngɛ Farisi bi ɔmɛ a he? (Mateo 11:​28-30)

⁵ Yesu susuɔ e tue buli ɔmɛ a he, nɛ a na enɛ ɔ heii ngɛ bɔ nɛ e kɛ mɛ hi si ha a mi. Yesu je ekpa ngɛ Farisi bi ɔmɛ a he. Farisi bi ɔmɛ nuɔ he kaa a he hia pe ni kpahi, nɛ a kɛ nihi yeɔ ngɛ blɔ nɛ sɛ nɔ. (Mat. 23:13; Yoh. 7:49) Se Yesu lɛɛ e kɛ ni ɔmɛ hi si ngɛ bumi kɛ mi mi jɔmi mi. Yesu ‘he jɔ, nɛ e baa e he si kɛ jeɔ e tsui mi,’ nɛ lɔ ɔ ha nɛ e ba pee tsɔɔlɔ nɛ e he be. (Kane Mateo 11:​28-30.) E sa nɛ wɔ hu waa kɛ wa tue buli ɔmɛ nɛ hi si ngɛ bumi kɛ mi mi jɔmi mi.

6. Kɛ wa ma plɛ kɛ je mi mi jɔmi kɛ bumi kpo kɛ tsɔɔ nihi nɛ a bui wa sɛ gbi ɔ tue aloo a teɔ si kɛ woɔ wɔ ɔ ha kɛɛ?

⁶ Ni komɛ sume kaa a maa bu wa sɛ gbi ɔ tue, nɛ ni komɛ hu sume wa sane. Enɛ ɔ he ɔ, kɛ e sa nɛ waa pee wa ní ha kɛɛ? Yesu tsɔɔ wɔ kaa waa kɛ nihi nɛ a teɔ si kɛ woɔ wɔ ɔ nɛ hi si saminya. E de ke waa “pee nihi nɛ a ngɛ wɔ nyɛe ɔ kpakpa,” nɛ waa “jɔɔ nihi nɛ a ngɛ wɔ gbiɛe ɔ,” nɛ waa ‘sɔle po kɛ ha ni nɛmɛ nɛ a ngɛ wɔ jɛe ɔ.’ (Luka 6:​27, 28) E he be wae ha wɔ kaa wa maa pee ní nɛ ɔmɛ ke wa kai kaa yi mi tomi ko he je nɛ nihi bui wɔ tue ɔ nɛ. Ngɛ anɔkuale mi ɔ, ni komɛ suɔ kaa a maa tsi wa fiɛɛmi ní tsumi ɔ nya. Se ni komɛ hu ngɛ nɛ a sume nɛ a kɛ wɔ maa tu munyu akɛnɛ a ngɛ haoe ngɛ nyagba ko nɛ ngɛ a weku ɔ mi aloo nyagba kpa ko ɔ he je. Eko ɔ, wa yɛ a ngɔ ngɛ be nɛ sa mi. Enɛ ɔ he ɔ, e sa nɛ “be fɛɛ be ɔ, [wa] ha nɛ [wa] munyuhi nɛ ngɔ, nɛ ngo nɛ hi mi, konɛ [waa] le bɔ nɛ e sa kaa [wa] ha nɔ fɛɛ nɔ heto ha.” (Kol. 4:6) Ke wa mi mi sãa wɔ ngɛ nihi a he nɛ wa bɔɔ mɔde kaa wa maa nu mɛ sisi ɔ, wa mi mi be fue mla, nɛ lɔ ɔ ma ha nɛ wa maa pee nihi nɛ a tsɔɔ ní saminya.

NGƆƆ O HƐ KƐ FƆ MAWU MUNYU Ɔ NƆ

7. Mɛni Yesu pee kɛ tsɔɔ kaa e ngɔɔ e hɛ kɛ fɔɔ Mawu Munyu ɔ nɔ ke e ngɛ nihi ní tsɔɔe? (Yohane 7:​14-16)

⁷ Yesu kɛ e hɛ fɔɛ níhi nɛ e le ɔ nɔ. E kɛ e tsɔɔmi ɔmɛ da Mawu Munyu ɔ nɔ, nɛ e ye bua e tue buli ɔmɛ konɛ a nu sisi nɛ a kai. Baiblo ɔ tsɔɔ kaa Yesu tsɔɔ nihi ní ‘kaa nɔ ko nɛ e ngɛ he blɔ, se pi kaa bɔ nɛ womi ngmali ɔmɛ tsɔɔ ní ɔ.’ Enɛ ɔ ha nɛ ni ɔmɛ “a nya kpɛ a he.” (Mar. 1:22; hyɛ study note nɛ ji “not as the scribes.”) Ke womi ngmali nɛ a ngɛ Yesu be ɔ mi ɔ ngɛ ní tsɔɔe ɔ, a tsɛɔ rabihi nɛ a he biɛ wawɛɛ ɔ a munyuhi a se. Se Yesu lɛɛ, e tsɛɔ munyuhi a se tɛ̃ɛ kɛ jeɔ ngmami ɔ mi. Akɛnɛ Yesu ji Mawu Bi nɛ e je hiɔwe kɛ ba he je ɔ, jinɛ e ma nyɛ maa ngɔ e nile ɔ kɛ tsɔɔ nihi níhi fuu konɛ a na kaa lɛ ji Mawu bi ɔ nɛ, se e pee we jã. Mohu ɔ, e ngɔ e ní tsɔɔmi ɔ kɛ da Mawu Munyu ɔ nɔ, nɛ e tsɔɔ mɛ kaa a pee Mawu suɔmi nya ní. (Kane Yohane 7:​14-16.) Yesu pee nɔ hyɛmi nɔ́ nɛ se be kɛ ha e se nyɛɛli ɔmɛ.

8. Mɛni blɔ nɔ lɛ bɔfo Petro gu kɛ kase Yesu?

⁸ Yesu kaseli ɔmɛ hu ngɔɔ a hɛ kɛ fɔɔ Mawu Munyu ɔ nɔ ke a ngɛ nihi ní tsɔɔe. Kaa nɔ hyɛmi nɔ́ ɔ, mo susu munyu nɛ bɔfo Petro tu ngɛ Pentekoste 33 M.B.K. ɔ he nɛ o hyɛ. Petro yɛ sukuu kɛ yɛ tsitsaa. Se kɛ̃ ɔ, e da Ngmami ɔ nɔ kɛ tsɔɔ kaa gbamihi nɛ kɔɔ Yesu he ɔ ba mi, nɛ enɛ ɔ ta e tue buli ɔmɛ a tsui he wawɛɛ. (Níts. 2:​14-37) Mɛni je mi kɛ ba? “A baptisi nihi nɛ a kɛ bua jɔmi kplɛɛ e munyu ɔ nɔ ɔ, nɛ ngɛ jamɛ a ligbi ɔ nɔ ɔ, nihi maa pee 3,000 ba piɛɛ a he.”—Níts. 2:41.

9. Mɛni he je nɛ e sa nɛ waa kɛ wa ní tsɔɔmi ɔ nɛ da Mawu Munyu ɔ nɔ ɔ?

⁹ Baiblo ɔ pɛ lɛ ma nyɛ maa ye bua nihi nɛ a pee tsakemihi nɛ maa sa Yehowa hɛ mi. (Heb. 4:12) Enɛ he ɔ, ke wa ngɛ nihi ní tsɔɔe ɔ, e sa nɛ waa ngɔ wa ní tsɔɔmi ɔ kɛ da Baiblo ɔ nɔ. Wa suɔ nɛ waa “fiɛɛ munyu ɔ,” se pi wɔ nitsɛmɛ wa susumihi. (2 Tim. 4:2) Abɛ 2:6 de ke: “Yehowa nitsɛ lɛ haa nɔ juɛmi; nile kɛ nɔ́ se kɔmi jeɔ e nya mi.” Enɛ ɔ he ɔ, ke wa je Ngmami ɔ mi kɛ tsɔɔ nihi ní ɔ, e ngɛ kaa nɔ́ nɛ Yehowa lɛ ngɛ munyu tue. (Mal. 2:7) Wa suɔ nɛ nihi nɛ a le kaa Baiblo ɔ nɔ kuɔ kulaa pe adesahi a nile. E ji womi nɛ je Mawu ngɔ, nɛ nile nɛ ngɛ mi ɔ yeɔ buaa wɔ konɛ wa nyɛ nɛ waa sa wa Bɔlɔ ɔ hɛ mi, nɛ wa bua nɛ jɔ ngɛ si himi mi.—2 Tim. 3:​16, 17.

10. Mɛni blɔ nɔ wa maa gu kɛ gbla Baiblo kaselɔ ko juɛmi kɛ ya Mawu Munyu ɔ nɔ?

¹⁰ Ke o ngɛ o he dlae nɛ o kɛ nɔ ko nɛ ya kase Baiblo ɔ, hla blɔhi a nɔ nɛ o ma nyɛ maa gu kɛ gbla nɔ ɔ juɛmi kɛ ya Baiblo ɔ nɔ. E ngɛ mi kaa, waa kɛ fonihi kɛ videohi tsɔɔ ní mohu lɛɛ, se e sa nɛ waa gbla ní kaselɔ ɔ juɛmi kɛ ya nɔ́ nɛ Baiblo ɔ de ɔ nɔ titli. Lɔ ɔ he ɔ, hyɛ ngmamihi titli nɛ a kɛ ní kasemi ɔ da nɔ ɔ, nɛ o ye bua ní kaselɔ ɔ nɛ e susu a he. Ke nyɛ ngɛ fonihi aloo videohi a he susue ɔ, ye bua ní kaselɔ ɔ nɛ e nu Baiblo sisi tomi mlaahi nɛ a kɛ ní kasemi ɔ da nɔ ɔ sisi. Enɛ ɔ tsɔɔ we kaa o tu munyu fuu aloo o kane ngmamihi babauu loko o nyɛ nɛ o su oti nɛ ɔ he. Mohu ɔ, moo ngmɛ ní kaselɔ ɔ blɔ konɛ e pue e yi mi tɛ ngɛ ngmami ɔ eko fɛɛ eko nɛ nyɛ maa kane ɔ he, konɛ e sɛ e tsui mi, ke enɛ ɔ ma bi nɛ nyɛɛ kane ngmami ɔ si abɔ po. Jã nɛ wa maa pee ɔ tsɔɔ kaa pi womi kɛkɛ nɛ nɔ ɔ ngɛ kasee, aloo foni loo video ko kɛkɛ nɛ e ngɛ hyɛe, mohu ɔ, e ngɛ Baiblo ɔ kasee.—1 Kor. 2:13.

11-12. (a) Mɛni wa maa pee kɛ tsɔɔ kaa wa toɔ wa tsui si kɛ haa wa Baiblo mi ní kaseli? (Ní Tsumi 17:​1-4) (Hyɛ foni ɔ hulɔ.) (b) Mɛni nɛ eko ɔ, ni komɛ be lee ngɛ Baiblo ɔ he, nɛ kɛ wa ma plɛ kɛ ye bua mɛ ha kɛɛ?

¹¹ Ke e he wa ha nɔ ko nɛ o kɛ lɛ kaseɔ Baiblo ɔ kaa e maa nu oti ko sisi ɔ, mo kai nɛ o “fiɛɛ munyu ɔ . . . ngɛ tsui si tomi nitsɛnitsɛ mi” kɛ ha lɛ. E slo bɔ nɛ nɔ fɛɛ nɔ yaa e hɛ mi ha ngɛ Baiblo ɔ nɛ e ngɛ kasee ɔ mi. Baiblo mi tsɔɔmi komɛ ngɛ nɛ a sisi numi yi ha wɔ, se ni komɛ lɛɛ, e ma he mɛ be babauu loko a maa nu sisi. E he ba hia nɛ Paulo nɛ e fiɛɛ kɛ ha Yudabi nɛ a ngɛ Tesalonika a nɛ e kɛ mɛ nɛ susu ngmami ɔ he si abɔ loko a kpɛti ni komɛ nɛ ba nu sisi.—Kane Ní Tsumi 17:​1-4.

¹² Blɔ kpa ko nɛ wa ma nyɛ maa gu nɔ kɛ tsɔɔ kaa wa toɔ wa tsui si ji kaa, wa ma bi ní kaselɔ ɔ sanehi mohu pe nɛ wa maa tu munyu fuu. Moo bu lɛ tue saminya, nɛ o bɔ mɔde kaa o maa nu lɛ sisi. Lɔ ɔ se ɔ, nyɛɛ kane ngmami pɔtɛɛ komɛ nɛ nyɛ susu a he, nɛ o ye bua lɛ nɛ e na Mawu juɛmi ngɛ níhi a he. Ni komɛ ngɛ nɛ a nɛ Baiblo ɔ eko hyɛ, nɛ a li níhi nɛ ngɛ mi po. Anɛ e maa hi kaa o maa tsɔɔ mɛ Baiblo ɔ nɛ a print ɔ eko lo? O kɛ lɛ ma nyɛ ma susu “Níhi Nɛ Wa Ma Nyɛ Maa Kase Ngɛ Mawu Munyu ɔ Mi,” nɛ ngɛ Je Ehe Sisi Tsɔɔmi ɔ hɛ mi ɔ, konɛ e le munyuhi nɛ a he hia nɛ a ngɛ Baiblo ɔ mi ɔ. Lɔ ɔ se ɔ, o ma nyɛ ma ha nɛ e na kaa Baiblo ɔ ma nyɛ maa ye bua lɛ ngɛ e si himi mi ke o kɛ lɛ susu ngmami kake loo enyɔ nɛ ngɛ sane bimi 15 ɔ mi ɔ he. Ke o pee jã a, o ngɛ Baiblo kaselɔ ɔ ye buae konɛ e na kaa Baiblo ɔ ngɛ he wami, nɛ o ní tsɔɔmi ɔ hu maa nu tso.

YE BUA MƐ NƐ A BA LE YEHOWA

13. Ke wa ngɛ nihi ní tsɔɔe ɔ, mɛnɔ nɔ titli nɛ e sa nɛ waa gbla nihi a juɛmi kɛ ya? Mo ha enɛ ɔ he nɔ hyɛmi nɔ́.

¹³ Oti nɛ waa kɛ ma wa hɛ mi ji kaa, wa maa ye bua wa tue buli ɔmɛ nɛ a ba le Yehowa nɛ a hɛ kɛ su e he. (Yak. 4:8) Waa kɛ wa ní tsumi ɔ ma nyɛ maa to nɔ ko nɛ e kɛ kane ngɛ nɔ ko nɔ́ ko tsɔɔe ngɛ diblii mi ɔ he. E kɛ kane ɔ be lɛ nitsɛ e nɔ mae. Mohu ɔ, e kɛ maa ma nɔ́ nɛ e ngɛ hlae nɛ nɔ ɔ nɛ e na a nɔ. Wɔ hu wa ma nyɛ maa pee jã ke wa ngɛ nihi ní tsɔɔe. E sa nɛ waa gbla ni ɔmɛ a juɛmi kɛ ya Yehowa nɔ, se pi wa nɔ.

14. Mɛni o maa pee kɛ ye bua Baiblo kaselɔ ko konɛ e suɔ Yehowa?

¹⁴ Ke o kɛ nɔ ko ngɛ Baiblo ɔ kasee ɔ, moo ye lɛ nɛ e ná suɔmi ɔ kaa e maa pee Yehowa suɔmi nya ní. (Abɛ 27:11) Pi nɛ wa ngɛ lɛ ní tsɔɔe nɛ e pee nɔ́ nɛ da, konɛ e hiɔ ní yayamihi nɛ e ba pee Yehowa Odasefono pɛ kɛkɛ, mohu ɔ, wa suɔ nɛ e pee tsakemihi konɛ e nyɛ nɛ e sa Yehowa hɛ mi hulɔ. Kaa nɔ hyɛmi nɔ́ ɔ, ke e he wa ha o Baiblo kaselɔ ko kaa e maa pee tsakemihi nɛ e ye su yayahi a nɔ ɔ, mo bi lɛ sanehi nɛ nyɛɛ se nɛ ɔmɛ: “Mɛni he je nɛ Yehowa sume ní peepee nɛ ɔ? Mɛni he je nɛ Yehowa ngɛ hlae kaa o kpa nɔ́ ko nɛ o bua jɔ he ɔ peemi ɔ? Mɛni he je nɛ nɔ́ nɛ Yehowa ngɛ hlae ngɛ o dɛ ɔ tsɔɔ kaa e suɔ mo?” Ke o yaa nɔ nɛ o yeɔ buaa o Baiblo ní kaselɔ ɔ nɛ e susuɔ Yehowa he ɔ, e ma ba na kaa Yehowa suɔ lɛ wawɛɛ, nɛ e maa suɔ kaa e maa pee Yehowa suɔmi nya ni.

YAA NƆ NƐ O KƐ GA NƐ TSƆƆ NÍ

15. Mɛni maa ye bua mo konɛ o ya nɔ nɛ o kɛ ga nɛ tsɔɔ ní ngɛ fiɛɛmi mi?

¹⁵ O ma nyɛ ma bi Yehowa nɛ e ye bua mo konɛ o ya hɛ mi ngɛ o ní tsɔɔmi mi. (1 Yoh. 5:14) Ke waa kɛ tsɔsemi nɛ Yehowa kɛ ngɛ wɔ hae ngɛ asafo mi kpehi a sisi ɔ tsu ní ɔ, lɛɛ wa ngɛ wa ní bimi ɔ nya ní tsue. O ma nyɛ maa fɔ̃ tsɔɔli nɛ a he be ɔ nine nɛ a ba piɛɛ o he ke o kɛ nɔ ko ngɛ Baiblo ɔ kasee. Lɔ ɔ se ɔ, mo bi mɛ nɔ́ nɛ o ma nyɛ maa pee konɛ o ya o hɛ mi. E ngɛ mi kaa o le níhi fuu kɛ kɔ nɔ́ nɛ nyɛ ngɛ kasee ɔ he mohu lɛɛ, se mo kai kaa o Baiblo kaselɔ ɔ lɛɛ e li he nɔ́ ko tsɔ. Mo susu bɔ nɛ ní kaselɔ ɔ maa nu he ha ngɛ nɔ́ nɛ nyɛ ngɛ kasee ɔ he. Lɔ ɔ se ɔ, mo ha nɛ o ní kaselɔ ɔ nɛ e le kaa sɛ gbi nɛ wa ngɛ fiɛɛe ɔ ji sane kpakpa. Ke o pee jã a, lɔ ɔ maa ye bua lɛ konɛ huɛ bɔmi kpakpa nɛ hi e kɛ Yehowa a kpɛti, nɛ e bua maa jɔ ngɛ si himi mi.—La 1:​1-3.

16. Ke wa ya nɔ nɛ waa kɛ ga tsɔɔ ní ngɛ fiɛɛmi mi ɔ, kɛ wa ma ná he se ha kɛɛ?

¹⁶ Níhi nɛ haa wɔ bua jɔmi wawɛɛ ɔ a kpɛti kake ji he blɔ nɛ wa ná kaa wa maa tsɔɔ nihi Yehowa he ní. Ngɛ je ehe ɔ mi ɔ, e he maa hia kaa waa tsɔɔ nihi babauu ní. Enɛ ɔ he ɔ, ke wa ngɛ nihi ní tsɔɔe amlɔ nɛ ɔ, nyɛ ha nɛ waa ya nɔ nɛ waa ye bua mɛ nɛ a ngɔ a hɛ kɛ fɔ Mawu Munyu ɔ nɔ, nɛ a ba le Yehowa hulɔ. Ke wa pee jã a, e maa ye bua wɔ nɛ waa ya wa hɛ mi ngɛ bɔ nɛ waa kɛ ga tsɔɔ ní ha a mi.