Kɛ Pee Oti Kaa O Ma Ha Nɛ A Baptisi Mo

1. (a) Mɛni jɔɔmihi komɛ o ma ná ke o ha nɛ baptisi mo? (b) Mɛni he wa ma susu ngɛ ní kasemi nɛ ɔ mi?

ANƐ o jɔɔ o he nɔ kɛ ha Yehowa nɛ o ha nɛ a baptisi mo lo? Ke jã a lɛɛ, o ngɛ Mawu bie konɛ e ha nɛ o ná he nile kpakpa. (1 Pet. 3:21) Jã a nɛ o maa pee ɔ tsɔɔ kaa o ngɛ nɔ hyɛmi nɔ́ kpakpa pee kɛ ngɛ nihewi kɛ yihewi kɛ ni hehi nɛ a ngɛ o we asafo ɔ mi ɔ hae. Enɛ ɔ he ɔ, yi mi kpɔ nɛ o mwɔ ɔ sa saminya! Se ke a baptisii we mo lolo ɔ hu nɛɛ? Atsinyɛ jemi ko be he kaa o suɔ Yehowa nɛ o suɔ nɛ o pee e suɔmi nya ní. O le kaa loko a kɛ o he yayami ɔmɛ maa ke mo nɛ huɛ bɔmi kpakpa maa hi o kɛ Yehowa nyɛ kpɛti ɔ, ja o ha nɛ a baptisi mo. (Níts. 2:​38-40) Se loloolo ɔ, o ma nyɛ maa gbla o nane si. Mɛni ma nyɛ maa ye bua mo? Ngɛ ní kasemi nɛ ɔ mi ɔ, wa ma susu (1) nɔ́ he je nɛ ni komɛ gblaa a nane si ngɛ baptisimi he, (2) nɔ́ he je nɛ e sa kaa wa ha nɛ nyagbe ligbi ɔ nɛ hi wa juɛmi mi, kɛ (3) jɔɔmihi nɛ o ma ná ke o pee tsakemihi mlamlaamla nɛ o ha nɛ a baptisi mo.

NƆ́ HE JE NƐ NI KOMƐ GBLAA A NANE SI

2. Mɛni he je nɛ ni komɛ gblaa a nane si ngɛ baptisimi he ɔ?

² Ni komɛ gblaa a nane si kaa a ma ha nɛ a baptisi mɛ akɛnɛ a ngɛ gbeye yee ɔ he je. Kaa nɔ hyɛmi nɔ́ ɔ, e ngɛ mi kaa a suɔ nɛ a sɔmɔ Yehowa mohu lɛɛ, se a yeɔ gbeye kaa a be nyɛe maa sa e hɛ mi. Ke o ngɛ he nue jã a, lɛɛ moo kane ngmamihi nɛ maa ye bua mo nɛ o na kaa Yehowa hla we mluku yemi kɛ ji o ngɔ, mohu ɔ, e bua jɔɔ ke o je o tsui mi kɛ sɔmɔ lɛ. (La 103:​13, 14; Kol. 3:23) Ke o ngɛ gbeye yee kaa nihi maa te si kɛ wo mo ɔ, mo bi Yehowa nɛ e ye bua mo nɛ o na kã kaa la polɔ ɔ nɛ e de ke: “Yehowa ngɛ ye kasa nya; i be gbeye yee. Mɛni adesa ma nyɛ maa pee mi?”—La 118:6.

3. Mɛni susumi lɛ e ma nyɛ ma ha nɛ e he nɛ wa kɛ ha nɔ ko kaa e ma ha nɛ a baptisi lɛ? (Hyɛ foni ɔ hulɔ.)

³ Ni komɛ nɛ a suɔ Yehowa gblaa a nane si akɛnɛ a susu kaa a li Baiblo ɔ kɛ Yehowa he ní fuu ɔ he je. Se anɛ, e sa nɛ o le nɔ́ fɛɛ nɔ́ ngɛ Baiblo ɔ mi loko a baptisi mo lo? Dɛbi. Moo hyɛ nɔ hyɛmi nɔ́ ko ngɛ Baiblo ɔ mi. Benɛ zugba mimiɛ ngɛ he nɛ a wo bɔfo Paulo kɛ Silas tsu ngɛ ɔ, a ye bulɔ nɛ hyɛɛ nihi nɛ a wo mɛ tsu ɔ a nɔ ɔ kɛ e we mi bimɛ ɔmɛ odase. Nyumu ɔ kɛ e weku ɔ na kaa nɔ́ nɛ ya nɔ ɔ ji nyakpɛ nɔ́. Jehanɛ se hu ɔ, a kase anɔkuale komɛ nɛ a he hia kɛ kɔ Yehowa kɛ Yesu he. Lɔ ɔ he ɔ, “a baptisi lɛ kɛ e we ɔ tsuo amlɔ nɔuu.” (Níts. 16:​25-33) Ke o le Yehowa a, ngɔɔ o tsui tsuo kɛ suɔ lɛ, kase Baiblo ɔ sisi je tsɔɔmi ɔmɛ, piaa o he ngɛ o yayami ɔmɛ a he, nɛ o fia o pɛɛ si kaa o maa hi si ngɛ e dami mlaa amɛ a nya a, ke o peeɔ ní nɛ ɔmɛ ɔ, lɛɛ o he su kɛ ha baptisimi.—Mar. 12:30.

4. Mɛni ni komɛ kɛ a juɛmi maa nɔ nɛ lɔ ɔ haa nɛ a gblaa a nane si kaa a ma ha nɛ a baptisi mɛ? (Hyɛ foni ɔ hulɔ.)

⁴ Nihi nɛ a suɔ kaa a maa sa Mawu hɛ mi ɔ ngɔɔ a juɛmi kɛ maa nɔ́ nɛ e sa kaa a pee ɔ nɔ. Ngɛ anɔkuale mi ɔ, e sa kaa wa susu nɔ́ nɛ maa je yi mi kpɔ fɛɛ ko nɛ wa maa mwɔɔ mi kɛ ba a he. (Luka 14:​27-30) Se ni komɛ susuɔ níhi nɛ e ma bi nɛ a kɛ sã afɔle konɛ a nyɛ nɛ a sɔmɔ Mawu ɔ he tsɔ. Nɔ́ nɛ ba Candace nɔ ji nɛ ɔ nɛ. Benɛ e ji jokuɛ ɔ, e kase nɔ́ nɛ e sa kaa e pee konɛ e sa Yehowa hɛ mi ɔ he ní, se e kɛ tsu we ní. Pee se ɔ, e ba kase Baiblo ɔ ekohu benɛ e wa a. E de ke: “Jinɛ i le nɔ́ nɛ e sa kaa ma pee, se i bua jɔ bɔ nɛ i baa ye jemi ha a he, lɔ ɔ he ɔ, i gbla ye nane si. I le kaa e be gbɔjɔɔ kaa ma ngmɛɛ ní nɔ ɔmɛ a he.” Ni komɛ hu susuɔ kaa ke a baptisi mɛ se ɔ, a be nyɛɛ maa hi si ngɛ a baptisimi ɔ nya. A haoɔ kaa a ma tɔ tɔmi ko nɛ hɛdɔ ngɛ he nɛ lɔ ɔ ma ha nɛ a je mɛ ngɛ asafo ɔ mi. Ke susumihi kaa jã a ha nɛ o ngɛ o nane si gblae ɔ, mɛni o ma nyɛ maa pee?

5. Ke wa ngɛ wa nane si gblae kaa wa ma ha nɛ a baptisi wɔ ɔ, mɛni e sa kaa wa susu he? (Mateo 13:​44-46)

⁵ Ke wa yaa he nɔ́ ko ɔ, pi nɔ́ ɔ jua pɛ kɛkɛ nɛ wa hyɛɛ, mohu ɔ, wa hyɛɛ se nami nɛ ngɛ nɔ́ ɔ he ɔ hulɔ. Ke wa na kaa nɔ́ ɔ he ngɛ se nami wawɛɛ ɔ, wa he ɔ oya nɔuu. Jã nɔuu kɛ̃ nɛ ke wa ngɛ hlae nɛ a baptisi wɔ ɔ, e sɛ nɛ wa susu tsakemihi nɛ e he maa hia kaa wa maa pee ɔ pɛ he, mohu ɔ, e sa nɛ wa susu huɛ bɔmi kpakpa nɛ maa hi waa kɛ Yehowa wa kpɛti ɔ hu he. Yesu ngɔ nɔ́ he tomi nɔ́ enyɔ kɛ tsɔɔ oti nɛ ɔ mi. (Kane Mateo 13:​44-46.) Ngɛ nɔ́ heto nɔ́ ɔ eko fɛɛ eko mi ɔ, nɔ nɛ a tu e he munyu ɔ kɛ bua jɔmi jua e níhi tsuo nɛ e ngɛ ɔ konɛ e ya he nɔ́ nɛ he jua wa nɛ e na a. Mo hu o na nɔ́ ko nɛ he jua wa wawɛɛ, nɛ ji anɔkuale nɛ kɔɔ Matsɛ Yemi ɔ he ɔ. Ke o ngɛ o nane si gblae kaa o maa pee tsakemihi nɛ sa nɛ ma ha nɛ a baptisi mo ɔ, lɛɛ mo susu Yesu nɔ́ heto nɔ́ ɔ he saminya. O ma nyɛ ma bi o he ke: ‘Anɛ i he ye kaa Matsɛ Yemi ɔ he sane kpakpa a ji nɔ́ ko nɛ he jua wa lo? Anɛ i buɔ huɛ bɔmi nɛ ngɛ i kɛ Yehowa wa kpɛti, hɛ kɛ nɔ fɔmi nɛ e kɛ ha mi, kɛ nyɛmimɛ a kuu nɛ suɔmi ngɛ mi ɔ kaa nɔ́ ko nɛ he jua wa lo?’ Sane bimihi nɛ ɔmɛ a heto nɛ o ma ha a maa ye bua mo nɛ o na nɔ́ nɛ o maa pee konɛ o ma o juɛmi nya si nɛ o ha nɛ a baptisi mo.

6. Mɛni maa ye bua wɔ konɛ waa kɛ nɔ́ nɛ wa ngɛ kasee ɔ nɛ tsu ní?

⁶ Ngɛ Yesu nɔ́ heto mi nɔ́ nɛ kɔɔ ní dulɔ ɔ he ɔ mi ɔ, e tsɔɔ kaa ke ni komɛ nu sane kpakpa a, a be nɔ́ ko pee ngɛ nɔ́ nɛ a nu ɔ he konɛ a nyɛ nɛ a ya a hɛ mi. Se Yesu tsɔɔ hu kaa ni komɛ lɛɛ “a kɛ tsui nɛ hi kɛ tsui kpakpa” maa bu Matsɛ Yemi sɛ gbi ɔ tue, nɛ a kɛ ma tsu ní. (Luka 8:​5-15) Enɛ ɔ he ɔ, ke o nuɔ he kaa o be nyɛe maa ngɔ níhi nɛ o ngɛ kasee ɔ kɛ tsu ní ɔ, o kɔni mi nɛ ko jɔ̃. Yehowa ma nyɛ maa ye bua mo nɛ o “ná tsui ehe,” nɛ ma ha nɛ o bu lɛ tue. Enɛ ɔ he ɔ, moo sɔle nɛ o bi Yehowa nɛ e ye bua mo nɛ o bua nɛ jɔ nɔ́ nɛ o ngɛ kasee ɔ he, nɛ o kɛ tsu ní.—Eze. 18:31; 36:26.

7-8. Mɛni he je nɛ nihewi kɛ yihewi komɛ yɛ a hɛ mi konɛ a ha nɛ a baptisi mɛ ɔ? (Hyɛ foni ɔ hulɔ.)

⁷ Nihewi kɛ yihewi komɛ suɔ Yehowa se a nyɛ we nɛ a pee tsakemihi nɛ e he hia kaa a pee ɔ konɛ a nyɛ a baptisi mɛ, akɛnɛ ni kpahi a ní peepee náa a nɔ he wami ɔ he je. Kaa nɔ hyɛmi nɔ́ ɔ, tsɔɔli komɛ maa bɔ mɔde kaa a ma ha nɛ a sukuubi ɔmɛ nɛ a na je mi bami komɛ nɛ sɛ ɔ kaa nɔ́ nɛ tɔmi ko be he, e ngɛ mi kaa a ji níhi nɛ Mawu sume. Se jamɛ a ga womi ɔmɛ ma nyɛ maa ngɔ nyagba kɛ ba. (La 1:​1, 2; Abɛ 7:​1-5) Ke o kɛ la polɔ ɔ ga womi ɔ tsu ní ɔ, o ma nyɛ maa yu o he kɛ je nyagba nɛ ɔ he. E de ke: “I kɔɔ nɔ́ se pe ye tsɔɔli ɔmɛ tsuo, ejakaa i susuɔ o kaimi ɔmɛ a he.”—La 119:99.

⁸ Amaniɛ bɔmi tsɔɔ kaa fɔli komɛ nɛ a ji Odasefohi ɔ tsiɔ a bimɛ ɔmɛ a nya ngɛ baptisimi he. Fɔli nɛ ɔmɛ ngɔɔ a juɛmi kɛ maa sukuu nɛ a bimɛ ɔmɛ maa ya kɛ ní tsumi nɛ a ma tsu ɔ nɔ wawɛɛ, aloo eko ɔ, a yi bua a bimɛ ɔmɛ nɛ a ngɔ mumi mi otihi kɛ ma a hɛ mi. Anɛ o susu kaa o fɔli ɔmɛ ma nyɛ maa pee babauu pe bɔ nɛ a ngɛ pee ɔ kɛ ye bua mo konɛ o su oti nɛ o kɛ ma o hɛ mi kaa o ma ha nɛ a baptisi mo ɔ he lo? Ke jã a, moo je o tsui mi nɛ o kɛ mɛ nɛ sɛɛ he ní. Mo ná nɔ mi mami kaa o wa jio, o wɛ jio ɔ, lɔ ɔ be nyɛe maa tsi o nya konɛ huɛ bɔmi gbagbanii nɛ ko hi o kɛ Yehowa nyɛ kpɛti.—Abɛ 20:11.

9. Mɛni lɛ haa nɛ ni komɛ ha we nɛ a baptisi mɛ ɔ?

⁹ Ni komɛ a he su kɛ ha baptisimi se eko ɔ, a maa suɔ kaa a baptisi a kɛ ni pɔtɛɛ komɛ ngɛ be kake mi. Kaa nɔ hyɛmi nɔ́ ɔ, eko ɔ, a maa suɔ nɛ a baptisi a kɛ a huɛ loo a wekuno ko ngɛ ligbi kake nɔ. Ngɛ anɔkuale mi ɔ, a ma nyɛ maa baptisi o kɛ nihi nɛ o suɔ mɛ ɔ ngɛ ligbi kake nɔ. Se anɛ e sa nɛ o ha nɛ nɔ́ nɛ ɔ nɛ tsi o baptisimi nya lo? Mo kai kaa o he nɔ nɛ o jɔɔ kɛ ha Yehowa a ji si nɛ mo pɛ o wo lɛ. E sɛ nɛ o da nɔ́ nɛ nɔ kpa ko maa pee ɔ nɔ kɛ tsɔɔ be nɛ e sa nɛ a baptisi mo.—Rom. 14:12.

MO KAI KAA NYAGBE Ɔ SU SI TA

10. Mɛni he je nɛ ni komɛ gblaa a nane si ngɛ a hɛ mi nɛ a maa ya ngɛ mumi mi ɔ he?

¹⁰ Kɛ piɛɛ níhi nɛ a wo nɔ́ ta kɛ sɛ hlami ɔmɛ a he ɔ, ni komɛ maa gbla a nane si ngɛ baptisimi he ejakaa a susu kaa nyagbe ɔ sui lolo. Se anɛ nile ngɛ susumi nɛ ɔ he lo? Yesu bɔ e kaseli ɔmɛ kɔkɔ ke: “Nyɛɛ pee klaalo, ejakaa ngmlɛfia nɛ nyɛ susuu we kaa nɔmlɔ Bi ɔ maa ba a, jamɛ a ngmlɛfia a mi nɛ e maa ba.”—Luka 12:40.

11. Ngɛ La 119:60 nya a, benɛ wa ba le Yehowa a, kɛ wa nu he ha kɛɛ ngɛ e mlaa amɛ a he?

¹¹ Akɛnɛ wa suɔ Yehowa, nɛ wa suɔ kaa waa bu lɛ tue he je ɔ nɛ wa jɔɔ wa he nɔ kɛ ha lɛ ɔ nɛ. Ke wa yaa nɔ nɛ wa kaseɔ Yehowa he ní be fɛɛ be ɔ, wa maa na kaa e suɔ wɔ wawɛɛ, nɛ se nami ngɛ e mlaa amɛ a he kɛ ha wɔ. (Kane La 119:60.) Yakobo tsɔɔ nɔ́ kpa ko hu he je nɛ e sa nɛ waa ye Yehowa mlaa amɛ a nɔ oya nɔuu ɔ. Nɔ́ he je ji kaa wa ti nɔ ko li nɔ́ nɛ maa ba hwɔɔ. Eko ɔ, hwɔɔ be wɔ náe ‘nɛ waa kɛ maa pee nɔ́ nɛ da,’ lɔ ɔ he ɔ, e sa nɛ waa pee nɔ́ nɛ Yehowa ngɛ hlae nɛ waa pee ɔ amlɔ nɛ ɔ.—Yak. 4:​13-17.

12. Mɛni wa ma nyɛ maa kase ngɛ nɔ́ he tomi nɔ́ nɛ kɔɔ wai ngmɔ ɔ he nɛ Yesu kɛ tsu ní ɔ mi?

¹² Mo susu nɔ́ he tomi nɔ́ nɛ kɔɔ wai ngmɔ ɔ he nɛ Yesu kɛ tsu ní ɔ he nɛ o hyɛ? E tsɔɔ kaa ni komɛ maa ngɔ ngmlɛfia kake pɛ kɛ tsu ní, se a kɛ nihi nɛ a tsu ní ligbi ɔ tsuo ɔ ma ná hiɔwo kake. Se benɛ a bi nihi nɛ a kɛ ngmlɛfia kake pɛ tsu ní ɔ kaa mɛni he je nɛ a ji sisi mla a, a he nɔ ke: “Ejakaa nɔ ko bɔɛ wɔ apaa.” Enɛ ɔ tsɔɔ we kaa a ji hejɔtsɛmɛ, mohu ɔ, akɛnɛ nɔ ko bɔɛ mɛ apaa a he je. Benɛ a tsɛ mɛ ɔ, amlɔ nɔuu nɛ a ya piɛɛ ní tsuli ɔmɛ a he. (Mat. 20:​1-16) Mwɔnɛ ɔ, Yesu tsɛ wɔ hu kaa wa ba pee e kaseli konɛ waa fiɛɛ sane kpakpa a. Ke wa nu e tsɛmi ɔ, e sa nɛ wa he nɔ amlɔ nɔuu.

13. Mɛni wa ma nyɛ maa kase ke je Lot yo ɔ sane ɔ mi?

¹³ Nɔ fɛɛ nɔ ko nɛ maa gbla e nane si nɛ e be e hɛ mi yae ngɛ Yehowa sɔmɔmi ɔ maa na kaa nyagbenyagbe ɔ, e he maa wa ha lɛ kaa e maa pee tsakemi loko nyagbe ɔ maa ba. Yesu le nɔ́ nɛ ɔ, enɛ ɔ he ɔ, e bɔ e kaseli ɔmɛ kɔkɔ ke: “Nyɛ kai Lot yo ɔ.” (Luka 17:​31-35) E le kaa e be kɛe nɛ Yehowa ma kpata Sodom kɛ Gomora hɛ mi mohu lɛɛ, se e sume nɛ e je níhi nɛ e ngɛ ɔ he. (1 Mose 19:​23-26) E sane ɔ kaiɔ wɔ kaa be nɛ Yehowa to kɛ ha adesahi nɛ a kɛ pee tsakemihi nɛ he hia konɛ a ba sɔmɔ lɛ ɔ pi. Ke a pee we tsakemi nɛ jamɛ a be ɔ su ɔ, a ma nga sinya a kɛ wo a yi.—Luka 13:​24, 25.

14. Kɛ e sa nɛ Baiblo gbamihi nɛ kɔɔ nyagbe ɔ he ɔ nɛ ha nɛ o pee o ní ha kɛɛ?

¹⁴ Benɛ je ngɛ nae nɛ je ngɛ jɔe ɔ, níhi nɛ ngɛ nɔ yae ngɛ je ɔ mi ɔ haa nɛ wa naa kaa Baiblo gbamihi nɛ kɔɔ nyagbe ɔ he ɔ ngɛ mi bae. Ke ní nɛ ɔmɛ yɛ nɔ ngɛ he nɛ o ngɛ ɔ po ɔ, e sa nɛ níhi nɛ ngɛ nɔ yae ngɛ ma kpahi a nɔ ɔ nɛ hɛli mo si konɛ o na kaa e hia nɛ o pee tsakemi nɛ o ha nɛ a baptisi mo. Mo susu nɔ́ nɛ bɔfo Paulo de Kristofohi nɛ a hi si ngɛ kaseli ɔmɛ a be ɔ mi ɔ he nɛ o hyɛ. Bɔfo Petro bɔ mɛ kɔkɔ kaa e sa nɛ a “hɛ mi nɛ ka si,” loo a pee “klaalo,” ejakaa “níhi tsuo a nyagbe su haa.” (1 Pet. 4:7; sisi ningma.) “Nyagbe” ɔ nɛ a tu he munyu ɔ ji Yudabi ɔmɛ a níhi a blɔ nya tomi ɔ nyagbe. Kristofohi nɛ Petro ngma sɛ womi nɛ ɔ kɛ mane mɛ ɔ kɛ Yerusalem he kɛ, lɔ ɔ he ɔ, Yerusalem hɛ mi kpatami ɔ be a he sae tutuutu. (1 Pet. 1:1) Se benɛ a na kaa jamɛ a gbami ɔ ba mi ɔ, hɛ kɛ nɔ fɔmi nɛ a ngɛ ngɛ Yehowa si womi kpa amɛ a mi ɔ mi ba wa. Jã kɛ̃ nɛ ke o na kaa gbamihi nɛ kɔɔ nyagbe ɔ he ɔ ngɛ mi bae ɔ, e sa nɛ lɔ ɔ nɛ wo mo he wami nɛ o pee níhi nɛ ma ha nɛ o he nɛ su kɛ ha baptisimi.

15. Mɛni wa maa pee konɛ waa pee klaalo kɛ ha Yehowa ligbi ɔ? (2 Petro 3:​10-13)

¹⁵ Ngɛ Petro sɛ womi enyɔne ɔ mi ɔ, e tsɔɔ nɔ́ nɛ e sa kaa waa pee konɛ waa pee klaalo kɛ ha “Yehowa ligbi ɔ,” nɛ ji je nɛ ɔ nyagbe ɔ. Benɛ Petro ngma sɛ womi nɛ ɔ kɛ ha Kristofo ɔmɛ ɔ, a kɛ Yehowa ligbi ɔ he kɛ, se Petro de mɛ ke ‘a juɛmi nɛ hi nɔ wawɛɛ,’ loo ‘a hi jamɛ a ligbi ɔ blɔ hyɛe.’ (Kane 2 Petro 3:​10-13; sisi ningma.) Ke wa pee klaalo nɛ wa hyɛ jamɛ ligbi ɔ blɔ ɔ, lɔ ɔ tsɔɔ kaa jamɛ a ligbi ɔ ngɛ wa juɛmi mi. Ke waa kɛ wa he wo “je mi bami klɔuklɔu ní peepeehi kɛ Mawu jami mi ní peepeehi a mi ɔ,” lɔ ɔ tsɔɔ kaa wa pee klaalo. Ke Yehowa na kaa o kɛ o he woɔ “Mawu jami mi ní peepeehi a mi ɔ,” hyɛ bɔ nɛ e bua maa jɔ ha! E ngɛ heii kaa e bua maa jɔ wawɛɛ ke e na kaa o jɔɔ o he nɔ kɛ ha lɛ, nɛ o ha nɛ a baptisi mo.

E HI KAA O MA HA NƐ A BAPTISI MO AMLƆ NƆUU

16. Mɛni be nɛ e sa kaa o ha nɛ a baptisi mo? (2 Korintobi 6:​1, 2) (Hyɛ foni ɔmɛ hulɔ.)

¹⁶ Amlɔ nɛ ɔ ji be nɛ e sa kaa o ma ha nɛ a baptisi mo. (Kane 2 Korintobi 6:​1, 2.) Etiopia sɔmɔlɔ nɔkɔtɔma a nɛ Filipo kɛ lɛ kpe ɔ na kaa e he hia nɛ e ha nɛ a baptisi lɛ amlɔ nɔuu. Benɛ sɔmɔlɔ nɔkɔtɔma a ba nu sane kpakpa a sisi nɛ e ná he blɔ kaa a baptisi lɛ ɔ, e de we ke: ‘I suɔ nɛ ma kase níhi fuu kɛ kɔ sane kpakpa a he loko ma ha nɛ a baptisi mi. Pa kpa maa hi blɔ ɔ nɔ.’ Mohu ɔ, e bi Filipo ke, “Mɛni tsiɔ ye baptisimi nya.” (Níts. 8:​26, 27, 35-39) Enɛ ɔ ji nɔ hyɛmi nɔ́ kpakpa! Benɛ a baptisi sɔmɔlɔ nɔkɔtɔma a ta a, “e pue nɔ kɛ ho kɛ bua jɔmi.”

17. Mɛni nɔ mi mami wa ma nyɛ ma ná?

¹⁷ Ke o ngɛ o nane si gblae ngɛ baptisimi he ɔ, lɛɛ mo na nɔ mi mami kaa Yehowa suɔ kaa e maa ye bua mo konɛ o ba pee e huɛ. (Rom. 2:4) Ke o ngɛ gbeye yee loo o ngɛ he nue kaa e he wa ha mo kaa o ma ha nɛ a baptisi mo, loo nihi ngɛ o kɔni mi jɔ̃e ɔ, e maa ye bua mo. Ke o ha nɛ a baptisi mo ɔ, o ma ná bua jɔmi wawɛɛ kaa o ngɛ Yehowa suɔmi nya ní pee, nɛ o maa na kaa “níhi nɛ a ngɛ se ɔ” he hia we hu. (Flp. 3:​8, 13) Amlɔ nɛ ɔ, o ma nyɛ maa hyɛ “níhi nɛ a ngɛ hɛ mi ɔ” blɔ. Ní nɛ ɔmɛ ji si nɛ Yehowa wo nihi nɛ a jɔɔ a he nɔ kɛ ha lɛ nɛ a ha nɛ a baptisi mɛ ɔ. Si womi nɛ ɔmɛ maa ba mi kokooko.—Níts. 3:19.