Nɔ́ Nɛ Baptisimi Tsɔɔ

1. Kɛ wa plɛ kɛ le kaa Baptisimi ji Baiblo ɔ mi tsɔɔmi ko nɛ he hia ha kɛɛ?

KE A baptisi no ko ɔ, wa bua jɔɔ wawɛɛ! Jã ji bɔ nɛ kekleekle Kristofohi nɛ a hi si ɔ nu he, benɛ a baptisi nihi ngɛ Pentekoste jeha 33 M.B.K. Jamɛ a be ɔ mi ɔ, bɔfo Petro tu munyu, nɛ e tsɔɔ kaa e he hia wawɛɛ kaa nɔ ko ma ha nɛ a baptisi lɛ. (Níts. 2:​38, 40, 41) Bɔfo Paulo ngma ke, “baptisimihi a he tsɔɔmi” ɔ piɛɛ “Kristo ɔ he sisije tsɔɔmi” ɔmɛ a he. (Heb. 6:​1, 2) Baptisimi ji Baiblo ɔ mi tsɔɔmihi nɛ a he hia wawɛɛ ɔ a kpɛti kake. Enɛ ɔ he ɔ, e sa nɛ waa nu sisi saminya. Mɛni he je?

2. Mɛni he je nɛ e sa nɛ waa nu baptisimi sisi saminya a?

² Kaa bɔ nɛ ke a fia tsu ko sisi tomi sisi saminya nɛ lɔ ɔ haa nɛ tsu ɔ he waa a, jã kɛ̃ nɛ ke wa nu baptisimi sisi saminya a, wa hemi kɛ yemi ɔ hu mi maa wa. Ke a baptisii we wɔ lolo aloo a baptisi wɔ jehahi babauu ji nɛ ɔ jio, e sa nɛ wɔ tsuo waa nu baptisimi sisi saminya. Lɔ ɔ he ɔ, ngɛ ní kasemi nɛ ɔ mi ɔ, wa ma ha sane bimihi nɛ a nyɛɛ se nɛ ɔmɛ a heto: Mɛni nɛ baptisimi tsɔɔ? Mɛni yaa nɔ ngɛ Kristofohi a baptisimi mi? Nɛ mɛni he je nɛ e sa nɛ a baptisi nɔ ko ngɛ Tsɛ ɔ biɛ mi, ngɛ Bi ɔ biɛ mi, kɛ mumi klɔuklɔu ɔ biɛ mi ɔ?

NƆ́ NƐ O BAPTISIMI Ɔ TSƆƆ

3. Mɛni lɛ baptisimi tsɔɔ?

³ Ke nɔ ko ha nɛ a baptisi lɛ ɔ, lɔ ɔ tsɔɔ kaa e kplɛɛ anɔkualehi nɛ e kase ngɛ Yehowa Mawu kɛ Kristo Yesu he ɔ nɔ, e pia e he kɛ je e yayami ɔmɛ a he, nɛ e tsake e je mi bami konɛ e nyɛ nɛ e sɔmɔ Yehowa. Jehanɛ hu ɔ, e kplɛɛ nɔ kaa Mawu maa gu Yesu nɔ kɛ he adesahi a yi wami, e sɔle kaa e maa pee Mawu suɔmi nya ni, nɛ e kɛ e we asafo ɔ maa bɔ. Ke o ná nɛ o jɔɔ o he nɔ nɛ o ha nɛ a baptisi mo ɔ, lɛɛ o je nɔ́ nɛ o maa pee konɛ o ná neneene wami ɔ peemi sisi.

4. Ke a kɛ mo wo nyu ɔ sisi nɛ a je mo kpo ɔ, mɛni e tsɔɔ? (Hyɛ foni ɔ hulɔ.)

⁴ Benɛ a baptisi mo ɔ, a ngɔ mo kɛ wo nyu mi nɛ a je mo kpo,a e ngɛ kaa nɔ́ nɛ o gbo, nɛ a tle mo si. (Kɛ to Kolosebi 2:12 ɔ he.) Ke o ha nɛ a baptisi mo ɔ, lɔ ɔ tsɔɔ kaa o pee tsakemi agbo ngɛ o si himi mi. Ngɛ mɛni blɔ nɔ? Benɛ a kɛ mo wo nyu ɔ sisi ɔ, lɔ ɔ tsɔɔ kaa o ngmɛɛ o sa je mi bami ɔ he. Benɛ a je mo ngɛ nyu ɔ mi ɔ, lɔ ɔ tsɔɔ kaa o je si himi ehe sisi, nɛ́ tsɔɔ kaa o suɔ kaa o maa pee Mawu suɔmi nya ní.

5. Mɛni he wa ma nyɛ maa ngɔ níhi nɛ wa pee nɛ ha nɛ wa he su kɛ ha baptisimi ɔ kɛ to, nɛ mɛni he je? (1 Petro 3:​18-21)

⁵ Kane 1 Petro 3:​18-21. Ngɛ blɔ ko nɔ ɔ, waa kɛ níhi nɛ wa pee loko wa he su kɛ ha baptisimi ɔ ma nyɛ maa to ní tsumi nɛ Noa tsu kɛ kpɛ daka a he. Ke kpaako o bɔni Yehowa he ní kasemi ɔ, ní tsumi nɛ ngɛ o hɛ mi ɔ he ma nyɛ maa wa kɛ ha mo kaa bɔ nɛ ní tsumi nɛ Noa tsu kɛ kpɛ daka a hu he wa kɛ ha lɛ ɔ. Se anɛ e he hia nɛ o gbo dengme ko kaa jã lo? Ee. Mɛni he je? Mo susu Noa he nɛ o hyɛ. Mawu nitsɛ lɛ tsɔɔ Noa bɔ nɛ e sa kaa e kpɛ daka a ha, nɛ e sa nɛ e nyɛɛ blɔ tsɔɔmi ɔ se pɛpɛɛpɛ konɛ e kɛ baa wami yi. Yehowa ye bua Noa kɛ kpɛ daka a, ejakaa e ngɛ hemi kɛ yemi ngɛ e mi, nɛ e bu lɛ tue. Kaa bɔ nɛ Noa pee ɔ, mo hu o ma nyɛ maa “pee níhi tsuo nɛ Mawu fã” mo ɔ.—1 Mose 6:22.

6. Ngɛ mɛni blɔ nɔ nɛ baptisimi ma nyɛ ma he o yi wami?

⁶ Ngɛ 1 Petro 3:21 ɔ, bɔfo Petro ngma ke, baptisimi ngɛ “nyɛ yi wami hee.” Se ngɛ anɔkuale mi ɔ, nyu mi kɛkɛ nɛ a kɛ nɔ ko maa wo ɔ be e yi wami hee; nɛ e be nyɛe ma fɔ e he yayami ɔmɛ kɛ je hulɔ. Yesu muɔ ɔ pɛ lɛ ma nyɛ ma je nɔ ko he yayami kɛ je. (1 Yoh. 1:7) Se loloolo ɔ, baptisimi he hia wawɛɛ ejakaa Yehowa lɛ e kɛ jamɛ a fami ɔ ha. Enɛ ɔ he ɔ, ke a baptisi nɔ ko ɔ, lɔ ɔ tsɔɔ kaa e ngɛ ‘Mawu bie konɛ e ha nɛ e ná he nile kpakpa.’ Yehowa bua maa jɔ kaa e ma ha mo nɔ́ nɛ o bi lɛ ɔ. Ke jã a lɛɛ, baptisimi ngɛ o “yi wami hee,” aloo e ngɛ mo yee buae kɛ ha yi wami hemi.

MƐNI YAA NƆ NGƐ KRISTOFOHI A BAPTISIMI MI

7. Kɛ e sa nɛ a baptisi nɔ ko ha kɛɛ?

⁷ E ngɛ mi kaa Baiblo ɔ tsɔɔ kaa ke a maa baptisi nɔ ko ɔ, e sa nɛ a mu lɛ mohu lɛɛ, se Baiblo ɔ de we níhi fitsofitso kɛ kɔ baptisimi he. Se kɛ̃ ɔ, Ngmami ɔ tsɔɔ wɔ nɔ́ nɛ e sa kaa waa pee. Kaa nɔ hyɛmi nɔ́ ɔ, Baiblo sisi tomi mlaahi yeɔ buaa nɔ nɛ a maa baptisi lɛ ɔ nɛ e leɔ bɔ nɛ e sa kaa e dla e he ha. Jehanɛ se hu ɔ, e yeɔ buaa nihi nɛ a ba ngɛ ní peemi ɔ hyɛe ɔ nɛ a leɔ bɔ nɛ e sa kaa a pee a ní ha. (1 Kor. 14:40; 1 Tim. 2:9) Behi fuu ɔ, asafo mi nikɔtɔmahi lɛ a baptisiɔ níhi, se wa nɛ nikɔtɔma nɛ ɔmɛ kaa a he hia pe ni kpahi. (1 Kor. 1:​14, 15) Nihi babauu lɛ a ngɛ lejɛ ɔ jio, nihi bɔɔ pɛ jio, nɔ́ nɛ he hia ji kaa a maa baptisi mo.—Níts. 8:36.

8. Mɛni sane bimihi lɛ a biɔ nihi nɛ a maa baptisi mɛ ɔ, nɛ mɛni he je? (Ní Tsumi 2:​38-42) (Hyɛ foni ɔ hulɔ.)

⁸ Baiblo ɔ tsɔɔ kaa e sa nɛ waa ngɔ wa ‘nya kɛ jaje wa [hemi kɛ yemi ɔ] ngɛ ma hɛ mi kɛ ya yi wami hemi mi.’ (Rom. 10:​9, 10; hyɛ study note nɛ ji “publicly declare.”) Baptisimi he hia wawɛɛ kɛ ha yi wami hemi ejakaa jamɛ a ligbi ɔ, wa jajeɔ wa hemi kɛ yemi ɔ ngɛ ma hɛ mi. Enɛ ɔ he je ɔ, a biɔ nihi nɛ a maa baptisi mɛ ɔ sane bimi enyɔ. Kekleekle nɔ ɔ ji, “Anɛ o pia o he ngɛ yayamihi nɛ o pee ɔmɛ a he, nɛ o jɔɔ o he nɔ kɛ ha Yehowa, nɛ o kplɛɛ nɔ kaa Yesu Kristo nɔ nɛ Yehowa guɔ kɛ heɔ nɔ yi wami lo?” Sane bimi nɛ ɔ haa nɛ wa naa bɔ nɛ nɔ nɛ a maa baptisi lɛ ɔ dla e he ha, nɛ e ngɛ kaa ga womi nɛ Petro kɛ ha asafo kuu ɔ ngɛ Pentekoste ligbi ɔ nɔ ɔ nɔuu. Sane bimi enyɔne ɔ ji, “Anɛ o nu sisi kaa o baptisimi ɔ kadiɔ mo kaa Yehowa Odasefono, nɛ o ba piɛɛ Yehowa asafo ɔ he lo?” Sane bimi nɛ ɔ kaiɔ wɔ kaa ke waa kɛ Yehowa asafo ɔ peeɔ kake, nɛ waa kɛ blɔ tsɔɔmi nɛ a kɛ haa wɔ ɔ tsuɔ ní ɔ, lɔ ɔ tsɔɔ kaa wa hiɔ si ngɛ wa he nɔ jɔɔmi ɔ nya. Jehanɛ hu ɔ, e kaiɔ wɔ kaa e sa nɛ waa kɛ wa nyɛmimɛ Kristofo ɔmɛ nɛ pee kake kɛ sɔmɔ Yehowa kaa bɔ nɛ Kristofohi nɛ a hi si ngɛ kaseli ɔmɛ a be ɔ mi ɔ hu pee ɔ. (Kane Ní Tsumi 2:​38-42.) Ke nɔ ko nyɛ nɛ e je e tsui mi kɛ ha sane bimi enyɔ nɛ ɔmɛ a heto ke ee ɔ, lɛɛ lɔ ɔ tsɔɔ kaa e he su kɛ ha baptisimi.

9. Mɛni e sa kaa nɔ fɛɛ nɔ nɛ e pee konɛ Mawu bua nɛ jɔ e he?

⁹ Eko ɔ, loko o ma bɔni anɔkuale ɔ kasemi ɔ, o baa o je mi bɔ nɛ sa, nɛ o pee we tɔmi ko nɛ hɛdɔ ngɛ he. Aloo eko ɔ, o fɔli ɔmɛ ji Kristofohi, nɛ a ye bua mo nɛ o ba suɔ Yehowa. Anɛ loloolo ɔ, e he maa hia nɛ o tsake o tsui nɛ o ha nɛ a baptisi mo, konɛ Mawu bua nɛ jɔ o he lo? Ee. Bɔ fɛɛ bɔ nɛ wa si fɔfɔɛ ngɛ ha a, e sa nɛ wɔ tsuo wa kai kaa yayami ngɛ wa he, nɛ lɔ ɔ ha nɛ wa nyɛ we nɛ waa hɛ kɛ su Mawu he. (La 51:5) Se benɛ wa ngɛ Yehowa he ni kasee ɔ, wa ba na kaa e sa nɛ waa kɛ Yehowa suɔmi nya ní nɛ pee nɔ́ titli ngɛ wa si himi mi. Ke wa bɔni jã peemi pɛ ɔ, lɔ ɔ maa ye bua wɔ konɛ waa yu wa he kɛ je níhi nɛ wa pee be ko nɛ be ɔ he, konɛ waa ya nɔ nɛ waa pee níhi nɛ wa hiɔwe Tsɛ ɔ suɔ. Lɔ ɔ se ɔ, a ma nyɛ maa baptisi wɔ.—Níts. 3:19.

10. Ke a baptisi mo momo ngɛ jami ko mi po ɔ, mɛni e sa kaa o pee?

¹⁰ Ke a baptisi mo momo ngɛ jami ko mi po ɔ, e sa nɛ a kpale nɛ a baptisi mo kaa Yehowa Odasefono. Mɛni he je? Ejakaa jamɛ a be mi ɔ, o nui anɔkualehi nɛ kɔɔ Yehowa Mawu kɛ Yesu a he ɔ sisi saminya. Nɛ ke o jɔɔ o he nɔ kɛ ha Mawu ngɛ sɔlemi mi po ɔ, pi e he anɔkuale nile nitsɛnitsɛ ɔ nɔ nɛ o da kɛ pee jã. Benɛ bɔfo Paulo kɛ ni komɛ kpe ngɛ Efeso nɛ a baptisi mɛ momo se a nui Kristofo ɔmɛ a tsɔɔmi ɔmɛ a sisi ɔ, e to blɔ nya konɛ a baptisi mɛ ekohu.b (Níts. 19:​1-5) Jã kɛ̃ nɛ mwɔnɛ ɔ hu ɔ, ja nɔ ko ná Mawu he nile nitsɛnitsɛ loko Mawu maa kplɛɛ e baptisimi ɔ nɔ.

‘NGƐ TSƐ Ɔ BIƐ MI, BI Ɔ BIƐ MI, KƐ MUMI KLƆUKLƆU Ɔ BIƐ MI’

11. Ke a ke a baptisi nɔ ko ‘ngɛ Tsɛ ɔ biɛ mi, ngɛ Bi ɔ biɛ mi, kɛ mumi klɔuklɔu ɔ biɛ mi’ ɔ, mɛni e tsɔɔ? (Mateo 28:​18-20)

¹¹ Yesu fã kaa a baptisi kaseli ehehi ‘ngɛ Tsɛ ɔ biɛ mi, Bi ɔ biɛ mi, kɛ mumi klɔuklɔu ɔ biɛ mi.’ (Kane Mateo 28:​18-20.) Mɛni e ngɛ tsɔɔe? Ngɛ Baiblo ɔ mi ɔ, ke a kɛ munyungu nɛ ji “biɛ” tsu ní ɔ, e daa si kɛ ha bɔ nɛ a le nɔ ko ha. Jehanɛ hu ɔ, e ma nyɛ maa tsɔɔ he blɔ kɛ he wami nɛ nɔ ɔ ngɛ. Lɔ ɔ he ɔ, ke wa ngɛ nɔ́ ko pee ngɛ nɔ ko “biɛ mi,” loo nɔ́ ko “biɛ mi” ɔ, wa kaiɔ he blɔ nɛ jamɛ a nɔ ɔ loo jamɛ a nɔ́ ɔ ngɛ. (Kɛ to Mateo 10:41 ɔ he; hyɛ study note nɛ ji “because he is a prophet.”) Hyɛ kaa o maa na he blɔ kɛ he wami nɛ Tsɛ ɔ kɛ Bi ɔ ngɛ, kɛ ní tsumi nɛ Mawu mumi klɔuklɔu ɔ tsuɔ ɔ lo.

12. Kɛ a baptisiɔ nɔ ko ngɛ Tsɛ ɔ biɛ mi ha kɛɛ? (Kpojemi 4:11) (Hyɛ foni hulɔ.)

¹² Ngɛ Tsɛ ɔ biɛ mi. Wa le kaa Yehowa ji wa Tsɛ nɛ ngɛ hiɔwe nɛ haa wɔ wami. Lɛ ji Mawu ope, nɔ nɛ bɔ níhi tsuo. (Kane Kpojemi 4:11.) Wa le lɛ kaa nɔ nɛ e buɔ sɔlemi tue, waa kɛ e biɛ ɔ tsuɔ ní faa ngɛ bumi mi ke wa ngɛ sɔlee, nɛ wa deɔ ni kpahi nɔ nɛ e ji. (La 65:2) Se loloolo ɔ, ke a baptisi nɔ ko ngɛ Tsɛ ɔ biɛ mi ɔ, e biɔ babauu. Nihi nɛ a bu Petro tue ngɛ Pentekoste ligbi ɔ nɔ ɔ le Yehowa biɛ ɔ momo, se amlɔ nɛ ɔ lɛɛ e sa nɛ a kplɛɛ nɔ kaa Yesu Kristo nɔ pɛ lɛ Yehowa maa gu kɛ ha wɔ neneene wami.—Rom. 5:8.

13. Kɛ a baptisiɔ nɔ ko ngɛ Bi ɔ biɛ mi ha kɛɛ? (Hyɛ foni hulɔ.)

¹³ Ngɛ Bi ɔ biɛ mi. Wa le Yesu kaa lɛ ji Mawu Bi kake too ɔ nɛ. Yesu ji “blɔ ɔ,” nɛ e nɔ pɛ lɛ wa ma nyɛ maa gu konɛ huɛ bɔmi kpakpa nɛ hi waa kɛ Yehowa wa kpɛti. (Yoh. 14:6) Yesu ji wa kpɔlɔ hulɔ, ejakaa lɛ nɛ e ba gbo kɛ ha wɔ konɛ wa ná wami. Ní nɛ ɔmɛ nɛ wa ba le ɔ haa nɛ wa kaseɔ e nɔ hyɛmi nɔ́ ɔ daa ligbi ngɛ wa si himi mi, pi be nɛ a kɛ baptisi wɔ ɔ nɔ pɛ. (1 Yoh. 2:6) Lɔ ɔ he ɔ, waa kɛ kã fiɛɛɔ kaa bɔ nɛ Yesu pee ɔ, nɛ wa ha we nɛ nɔ́ ko nɛ tsi wɔ blɔ. (Luka 4:43) Wa bua jɔ he kaa waa kɛ anɔkuale yemi ma sɔmɔ Mawu ke waa kɛ kahi ngɛ kpee po. (2 Tim. 3:12) Wa buɔ Yesu kaa lɛ ji “asafo ɔ yi,” lɔ ɔ he ɔ, waa kɛ bua jɔmi buɔ nihi nɛ e hla mɛ kaa a nyɛɛ wa hɛ mi, nɛ a hyɛ e se nyɛɛli ɔmɛ a nɔ ɔ.—Efe. 4:​8, 11, 12; 5:23.

14. (a) Kɛ a baptisiɔ nɔ ko ngɛ mumi klɔuklɔu biɛ mi ha kɛɛ? (Hyɛ foni hulɔ.) (b) Mɛni baptisimi kpa lɛ nihi nɛ a pɔ mɛ nu ɔ náa? (Hyɛ daka nɛ ji, “Baptisimi Kpahi Nɛ Nihi Nɛ A Pɔ Mɛ Nu ɔ Náa.”)

¹⁴ Ngɛ mumi klɔuklɔu ɔ biɛ mi. Wa kplɛɛ anɔkuale nɛ kɔɔ mumi klɔuklɔu ɔ he ɔ nɔ. Mumi klɔuklɔu ɔ, tsa pi nɔmlɔ, aloo Triniti ɔ fã ko, mohu ɔ, Mawu he wami nɛ e kɛ tsuɔ ní. Wa ba le kaa mumi klɔuklɔu lɛ kudɔ gbali ɔmɛ kɛ nihi nɛ a ngma Baiblo ɔ, lɔ ɔ he ɔ, wa kaneɔ Baiblo ɔ be fɛɛ be nɛ waa kɛ nɔ́ nɛ wa kane ɔ tsuɔ ní. (2 Pet. 1:​20, 21) Nɛ wa yuɔ wa he ngɛ yayamihi nɛ hɛdɔ ngɛ a he ɔmɛ a he, ejakaa ke wa pee jã a, pi nɛ e maa tsi Mawu mumi ɔ blɔ pɛ kɛkɛ, mohu ɔ, mumi ɔ be ní tsue ngɛ asafo ɔ mi.—Efe. 4:30.

15. Mɛni e sa kaa waa fia wa pɛɛ si kaa wa maa pee?

¹⁵ Ke o ji Kristofono nɛ a baptisi mo momo ɔ, moo fia o pɛɛ si kaa o maa nu “baptisimihi a he tsɔɔmi”c ɔmɛ tsuo a sisi, nɛ o ba o je mi ngɛ si nɛ o wo Yehowa benɛ o jɔɔ o he nɔ nɛ o ha nɛ a baptisi mo ɔ nya. Se ke a baptisii we mo lolo kaa Kristofono ɔ hu nɛɛ? Anɛ nɔ́ ko ngɛ mo blɔ tsie lo? Ngɛ ni kasemi nɛ nyɛɛ se ɔ mi ɔ, wa ma susu bɔ nɛ o ma plɛ kɛ ya o hɛ mi konɛ o he nɛ su kɛ ha baptisimi ɔ he.