Pwony me 10

Kit me Nongo Kwede Dini me Ada

Ka i mito bedo larem Lubanga, in omyero i lub dini ma Lubanga cwako. Yecu owacci ‘luworo ma ada’ biworo Lubanga i yoo ma rwatte ki “ada.” (Jon 4:23, 24) Yoo matir me woro Lubanga tye acel keken. (Jo Epeco 4:4-6) Dini me ada tero dano i kwo ma pe tum, ki dini goba tero dano i too.​—Matayo 7:13, 14.

Itwero ngeyo dini me ada ki neno dano ma tye iye. Kit ma Jehovah ber kwede ni, jo ma wore iyoo me ada myero gubed jo mabeco. Kit ma tyen yat mucungwa maber nyako mucungwa maber, dini me ada nyako dano mabeco.​—Matayo 7:15-20.

Lurem Jehovah gitye ki woro matut i kom Baibul. Gingeyo ni Baibul oa ki bot Lubanga. Gin ye ngo ma Baibul waco me tiro kwogi, me cobo pekogi ki me konyogi pwonyo lok i kom Lubanga. (2 Temceo 3:16) Gin temme me timo ngo ma gipwonyo.

Lurem Jehovah nyuto mar bot luwotgi. Yecu onyuto mar pi dano ki pwonyogi lok ikom Lubanga, ki cango lutwo. Jo ma gilubo dini me ada bene nyuto mar bot jo mukene. Calo Yecu, gin pe gicayo lucan nyo jo me dul kaka mapat. Yecu owaco ni dano bingeyo jo ma lube pi mar ma ginyuto bot luwotgi.​—Jon 13:35.

Lurem Lubanga giworo nying Lubanga, Jehovah. Ka ngati mo okwero tic ki nyingi, ngat eno ni romo bedo laremi ma cok? Pe! Ka wa tye ki laremwa, watiyo ki nyinge dok wa loko jami mabeco i kome bot jo mukene. Dong jo ma gimiti gibed lurem Lubanga omyero gutii ki nyinge dok gulok pire bot jo mukene Jehovah mito ni wan watim meno.​—Matayo 6:9; Jo Roma 10:13, 14.

Lurem Lubanga gipwonyo dano lok i kom Ker pa Lubanga calo Yecu. Ker pa Lubanga obedo gamente me polo ma biloko lobo doko paradic. Lurem Lubanga ginywako lok angeya maber i kom Ker pa Lubanga ki jo mukene.​—Matayo 24:14.

Lucaden pa Jehovah aye lurem Lubanga. Gin tye ki woro i kom Baibul ki mar i kin-gi kengi. Gitiyo ki nying Lubanga dok giworo kun gipwonyo jo mukene lok i kom Ker pa Lubanga. Lucaden pa Jehovah aye jo ma gilubu dini me ada iwi lobo kom kare ni.